الـــــــدرس الـــخامس لدورة اللمة الجزائرية لتعليم فنون الطبخ2

قال عفاف الجزائرية:

السلام عليكم ورحمة الله وتعالى وبركاته

عيش (بركوكس) بالقديد (لحم مجفف ومملح)
كوكتال رولي مالح
بقلاوة الـفراشة

عيش بالقديد

• بصل
• طماطم حبات
• مغرفة طماطم مصبرة
• لحم مجفف (القديد)
• الهرماس (مشمش مجفف)
• فويلة وحمص (الفويلة هو الفول الصغيرة اليابس)
• ثوم
• ملح فلفل احمر فلفل اكحل كسبر مطحون
• جعبة فلفل حار
• شوي زيت

من جهة اولى نحطو الهرماس في الماء ونحطوه على النار خفيفة باه يلين

وممن جهة تانية نحطو تاني القديد في الماء ونحطوه شوي يتشمخ

بعده نقطعو البصل نحطو معاه القديد

ونحطو الطماطم المرحية (انا استعملت الي صانعتها ومصبرتها في البيت ممكن تلاحظوها في قارورتها نحطها هكذاك ومه الحرارة الخفيفة تذوب وتسيح كامل منا لقرعة ونولي ننزع القارورة برك)
نقصو الجعبة نتاع الفلفل على 2 ونحطو باقي المكونات من التوابل الى الحبوب

نخلو يغلي شوي مع بعضو
بعده نمرقو ونغلقو عليه يطيب تقريبا نص ساعة قدر ما يطيب اللحم

بعد ما يطيب اللحم ننزعوه من المرق نحطوه بجنب

نضيفو الهرماس اللي كنا غليناه شوي وصفيناه

ونخلو المرق يغلي شوي ونذوقو هل من اضافات اخرى او لا
بعده نحطو العيش (انا استعملتا لعيش نتاع القمح يجي في البنة خلاف)

ونخلوه يغلي على نار خفيفة ونخلطو من مرة الى اخرى

كي نشوفوه خثار نقدموه في صحن مع رشة كسبر ولحم القديد

وهذا شكله النهائي

كوكتال رولي مالح

• العجينة المورقة
• صلصة طماطم
• طون
• صلصة الجبن
• زيتون اسود مقطع صغير
• 1 قطعة جبن شاف
• صفار بيضة
• ماييس

نحلو العجينة المورقة نتاعنا بسمك 1 سم تقريبا

ندهنو الجوانب نتاعها بصفار البيضة

نحطو في جبن صلصة الطماطم فوقها الزيتون والجبن مقطع صغير

ومن جهة تانية صلصة الجبن والطون والماييس
نلهوثوها على بعضها ونغلقوها بإحكام

نقطعوها بسكين حاد او بالخيط
نحطوها في بلاتو فيه ورق الطبخ وندخلوها للفرن

وهنا تكون حاضرة بعد تقريبا ربع ساعة
وهذا شكلها النهائي

بقلاوة الفراشة

• للعجينة نستعملو عجينة فيلو او عجينة البقلاوة لكن من الاحسن عجينة فيلو
  
• مقاديرها 3 كيلات فرينة + كيلة مايزينة + مغرفة لحظة + 1/2 كيلة سمن + 2مغارف ماء الزهر + فاني نعجنوها بالماء وتكون شوي يابسة ماش طرية بزاف

• بعد ما خلطت العجين نقصت شوي وزدتلو ملون حسب الرغبة للطبقة الاخيرة وعجنت كل عجين لوحده

• والعجينة البيضاء انا زدتلها الملون الابيض باه تجي بيضاء ناصعة
  
• الحشو 3 كيلات لوز مع كيلة ماش معمرة سكر قرصة قرفة نعجنوها بماء الزهر واضافة مغرفة عصير برتقال او ليمون

بعد ما نعجنو العجينة نخلوها ترتاح
نحلوها في الماشينة ثلاث مرات في رقم 5
تم المرة الاخيرة في رقم 7 وندهنو البلاتو ونحطو 6 طبقات مدهونين بين كل طبقة وطبقة بالزبدة بلا ما ننساو نثقبو ثقوب خفيفة

نحطوا لحشو نتاعنا

ونزيدو 4 طبقات من فوق
الطبقةا لخامسة نكونو حليناها في رقم 6 يعني شوي خشين علىا لطبقات الاولى
ونخطوها بحذر

نفصلو حباتا لبقلاوة نتاعنا

ومباعد نرفدو كل جنبين نطووهم فوق بعضهم ونرشقو فوقهم حبة لوز

والصورة توضح كل شي

نصبو عليها باقي الزبدة وندخلوها للفرن تتحمر
بعد ما تطيب وهي سخونة نشربوها بالعسل البارد
ونخلوها ليلة كاملة تتشرب
وهذا شكلها النهائي

(اما صورة الحبات ما جبت غدوا الصباح نقطهعا ونصورها لقيتهم هزوها ومدوها)
المهم هذا شكلها النهائي بعد ما طابت

​

إضغط للتوسيع...