أنا تخوازون....أنا كاتخون .....أنا تخونتون ......

الحالة
مغلق ولا يسمح بالمزيد من الردود.

لاجودان شاف

:: عضو بارز ::
أحباب اللمة
إنضم
6 جويلية 2011
المشاركات
2,434
نقاط التفاعل
648
النقاط
91
السلام عليكم ورحمة الله وبركاته
أهلا بكل رواد منتدى وش راك تهدر
موضوع اليوم شوي يبان جريء بيسك مش موالفين نحكيو في هاد الامور مي نورمال

حبيت نحكيلكم برك على واحد الحاجة تصرا هنا بزاف في جزاير الكرامة
مي ديما ننساها
المرة هادي تفكرتها كي كنت نمشي البرا وفت على زوج بنات كبار شوي في لاج
وهازين معاهم بزاف شكاير كبار معبيين باين حوايج الشورة
زربيات وقزادر وفراشات وبروديات و les napes هادوه لي ماعندهم حتى معنى
المهم كي تكروازيت معاهم سمعت وحدة قالت لختها:
انا قالي ديري برا وعامين ما تولديش:-o:-o

لثم زدت كونفيرميت بلي راح تزوج بعد رمضان وراهي تكمل في حوايجها
وبقاتلها غير لاغوب البيضة ماحكمتهاش بيسك مازال مالقاتش ستيل تاعها
بيسك هي قالك gout تاعها واعر بزاف ومش قادرة تلبس اي حاجة في أحلى يوم في حياتها ....الـ............

المهم انا هنا خطرت في بالي حاجة
قلت صح لي كوبل كامل تاع الجزاير - نقصد لي مخطوبين ومفتحين -
لي تحكي معاه ولا معاها وسيرتو معاها في قضية لولاد والنسل والذرية والضنايا تجاوبك بفرد جواب:
أنا عامين لولين مش راح نجيب :-o:-o
أنا مش رح نولد كاتخون ...:-r:-r
أنا تفاهمت مع زيزو مانولدش سانكون:-o:-o:-o
انا صاي ديسيديت مع كاغيم مش روح نولد تخونتون :-o:-o

مع انو النبي علية الصلاة والسلام أوصى الأمة تاعو وقال:
تزوجو الولود الودود
وقال تكاثرو فاني مباه بكم الأمم

ولوكان تقعد شوي مع روحك وتحاول تلقى تفسير لهاد التخميمات لي عايشين بيهم الجزايريين تلقى تقسيرين فقط:

الأول تفسير منطفي مي مش هو التفسير الصحيح
الثاني خيالي وهمي في الجزاير مي هو الصحيح

انا على الاول كنت تبالي بلي مشكلهم المسؤولية والحالة المادية والظروف الاجتماعية تاع البلاد وبوتفليقة وبن فليس والسعيد بوتفليقة وسلال
وليكوش غاليين بزاف والحليب يمشي ليه ليه
سيرتو كان رزقك ربي بطفلة علابالك البنات يسرطو بزاف:-o:-o:-o

مي في الاخير تبين بلي مش هذا هو السبب
تبين بلي السبب انهم باغيين يعيشو حياتهم
تبين بلي باغيين يعيشو غومنسية لي بخومياغ زاني تاعهم
وحدة قاتلهم انا منعيشش شهر عسل واحد
انا لازمني خمس سنين عسل :-o:-o:-o
( روحي برك ربي يسلط عليك داء السكر وتفوتي خمس سنين انسولين )
وحدة قاتلهم انا حبيت نستمتع بكل لحظة نعيشها مع ديدو:-o:-o:-o:-o:-o:-o
وديدو مسكين عندي الكريدي عند مول لكيوسك 5 ملاين
يتكيف بزاف وماعندوش باه يخلص
وهي حاب تستمتع بحياتها مع ديدو

وحدة حاب ماتولدش 3 سنين ...اهه علاه امادام
حابة نعيش وناكل ونحوس مع راجلي

اها وقداه تسلكو امادام
هو يسلك مليون ونص تاع لانام
وهي ديطاشي تاع das تسلك مليون ساعات برك مش ديما وبدعاوي الصالحين
وكاريين ب مليون والفاتورة تاع الما والغاز والتريسيتي ب 500
وهي مازلت تساالها الحفافة تاع العرس
وهو مازالو الدين في النعجة تاع العروس

نداء الى أولا د وبنات الجزاير:
صعب جدا تعيشو رومنسية ب 3 ملاين للشهر تخدمو في زوج وتسلكو بلانام
ولكان مدايرين سكن ولا طاكسي بالتقسيط المميت ومع مصاريف الدنيا
تبقالكم مليون تعيشو بيها

كيفاه حبيتو تستمتعو بحايتكم بمليون في الجيب
مستحيل تعيش رومنسية وانت الكولون تاعك يسطر ومداير فيك حالة
تالمو تضرب غير العدس واللوبيا والماكلة تاع البارح وكي تكون زعما شوي مرفه تروح تجيب فيها شوي مرقاز مخدوع وتبالك بلي درت حكاية مي نتا راك زدت على روحك بيسك المرقاز صابح

صعبة جدا تبغي تعيشي لي كاتخون لولين تاعك ملاح ونتي تسكني في 3 ايطاج
والما مكانش والجيران مش متفاهمين باه يديرو Pompe

صعبة جدا تحرمي روحك من ابن ولا بنت من أجل انك تعيشي عوامك لولين ملاح وplafond يقطر عليك من فوق بيسك الباطيما مافيهاش la chappe من فوق
صعبة جدا تحرمي روحك من لولاد عوامك لولين باه تعيشي مليح مع راجلك
ونتوما قفتلو 10 صفحات في الكارني تاع ماديدو مول لاليمونتاسيو
تاعمو راجلك كردا الشيكولا بزاف باه تحتفلو كل يوم
هوما يحتافلو وماديدو قتلاتو القنطة مسكين:mad::mad::mad:

رسالة الى أبناء وبنات الجزاير المقبلين على الزواج:

ربي يباركلمو ويتمم بيناتكم وجيبو ولاد على قد ما قدرتو وخطام من هادي كاتخون وتخوازون وربي راهو يجيب الرزق ويفتح عليكم
الرومنيسة راهي ماعندها حتى علاقة بلولاد
ارومنسية كي يكون جيبك معمر
 
رد: أنا تخوازون....أنا كاتخون .....أنا تخونتون ......


السلام عليكم ورحمة الله وبركاته
حويا فى منطقتنا ماكانش هاذ الحكاية
ديجا البنت هنا كون توصل 4 شهر وما تضهرش عليها اعراض الحمل ما تخلى حتى طبيب
ودواء تاع عرب ^^
اما لى تحكى عليهم هاذو والله يحيرو صح
بارك الله فيك خويا
ربي يرزقنا الزوجة الصالحة والذرية الصالحة



 
رد: أنا تخوازون....أنا كاتخون .....أنا تخونتون ......

أهلا بيك اشيخ
هاذي تظريا برك وفي الvيد وقبل الزواج والأوهام يقلك عامين مانجيبش ونعيش حياتي قبل مانتربط بطفل ولا طفيلة وتول يالتحريكة والتحويسة بحقها
ولكن بعد الزواج ، تتبدل النظريات ..

 
ضوء الخيال، تم حظره "حظر دائم". السبب: مخالفة القوانين
رد: أنا تخوازون....أنا كاتخون .....أنا تخونتون ......

السلام عليكم

لي قلتو صحيح وكاين عينات تاع نسا ورجال مازالهم يخمموا هكذا هذا افتراضيا وضروك نرجعو واقعيا رايح تلقى العكس تماماً المرا من الايام الاولى يدخلها وسواس الذرية وتالية فيهم تجيب 5 وطلّع ( شعبنا تاع جيوش واكيب مفروغ منها ) ونزيدك كاشيات منع الحمل لي راهم في السوق مضروبين شحال من وحدة دارت منهم وراهي طير من طبيب لعشّاب لقزّان على الضناية صعيب الحال وربي يستر .وراجل كيف كيف يدهن المرا بالرومانسية قبل الزواج وهو منين يحكمها تحت سقف واحد تتبدل العقلية 360 درجة ( الا لقيتو دزيري رومانسي تيروني بسبعالاف رصاصة :d:d ) والا لقيتو مرا بعد الزواج مازالها رومانسية ( نعطيكم نص ثروتي خخخخخ ) تلقاها مسكينة مع ورقة وستيلو هاذ ميزانية دار هاذ حق الخضار هاذي حق خداوج لي مانعرف ويكتاه تعرفت عليها ولا سلفت من عندها صواردا :p:p
 
رد: أنا تخوازون....أنا كاتخون .....أنا تخونتون ......

موضوع مليح عجبني ياسر عكس لينا واقع التفكير في المجتمع مع أنو يضحك دم ههههههه
يا خويا وش نقلك وش تفاهمو العريس والعروس الله يسهل المهم هو اسمو عقد غليظ ولازم االالتزام ببنودو


أفضلها ترك الأمور للمكتوب والصدفة أحسن هناك أمور أفضل أولى أن يتفق عليها قبل الزواج
 
رد: أنا تخوازون....أنا كاتخون .....أنا تخونتون ......

السلام عليكم ورحمة الله وبركاته

كي قريت العنوان قلت راك تتكلم بالامازيغية
والله ماعرفتش نقراها صح

المهم نرجعو للموضوع
الشباب
انا عجبني
وشكرااااااا ليك

صح بزاف بنات نعرفهم عندهم هاد الفكرة
وكي تسالها علاش
يكون جوابها كيما قلت
حابة تعيش

ربي يهديهم
ويوريلهم الصح

نرجع ممبعد باش نحكي شويا في الموضوع
 
رد: أنا تخوازون....أنا كاتخون .....أنا تخونتون ......


السلام عليكم

اغلب ليقلوها على جال بزاف حوايج في مخاخهم
بصح يولو يدورو في تفكيرهم ..... الكبدة تحـــــن:-r
ليبقاو مصرين هما صحاب الحيل ...
نسيي قبل لا ما عجبنيش الحال نولي لدارنا :-o:-o ...... :down::down:

..... أحسن النية و الرؤية يحسن ما حولكن :)
 
رد: أنا تخوازون....أنا كاتخون .....أنا تخونتون ......

كلشي بالمكتوب


كينة الي تقولك انا نرفد ليه ليه مي ميكتبش ربي


ربي يرزقنا بالذرية الصالحة



 
رد: أنا تخوازون....أنا كاتخون .....أنا تخونتون ......

يعطيك الصحة على الموضوع
طريقة الطرح عجبتني
حطيت الافكار بطريقة طريفة

المهم نرجع للموضوع
نعرف بنات قبل الزواج ماكانوش دايرين هاذ الفكرة في راسهم
يعني من الاول حابين يكوّنوا عايلة ويجيبوا ذراري
وربي سهللهم

وكاين لي تقول مانجيبش ذراري في عامي لول، بصح والله مع تتزوج تولي تجري من جيهة لاخرى على الضناية

عندي صحبتي تزوجت وقاتلي مازال، نفوت عام حتى نعيش حياتي ومبعد ذراري ساهل الحال

وعلى حكاية الرومنسية في الدزاير، تلقاها في الخطبة مي بعد الزواج
"الله يذكرك على خير يا الرومنسية"

تلقى كل واحد يخمم في الميزانية تاع الدار و المصروف والكريدي وهلم جرا...
مرة عجوز قاتلي بني زايد في 75 ومازال ماخطبش وكي نقولو على الزواج يقولي
الحليب ولي كوش (حاشاكم) يليقلهم ميزانية وحدهم
خلي على المصروف والكرا ومرتي لازملي نعيشها مليح
واش من خلصة تكفي؟

فمابالك في تخمامهم في الرومنسية وشهر العسل ههههه

قاع يقولو مانجيبوش ذراري ومبعد يبدلو السيستام
بصح هاذي تاع 3 و4 سنين ماعندناش صراحة
لي تقولك تقول عام
كل واحد ربي يسهلو ويعرف واش يخرجو
بصح ربي يقول:
باسم الله الرحمن الرحيم
"المال والبنون زينة الحياة الدنيا"
صدق الله العظيم


بارك الله فيك ودمت متألق خويا
 
رد: أنا تخوازون....أنا كاتخون .....أنا تخونتون ......

السلام عليكم و رحمة الله و بركاته
اه يا خويا راك عمرت القرع مليح مليح شفت البنات واش كانو شاريين من القش وسمعت حتى حكاية لاغوب البيضا وما خليتهاش في قلبك حتى المستقبل و بليك ماشي رايحة تجيب اولاد تم تم ههههههههه يا الواعر
نرجعو للموضوع جابلي ربي حكاية تأجيل الاولاد على جال اي سبب من الاسباب اللي ذكرتها او ما ذكرتهاش راهي تبانلي جياحة علاش؟ اولا ماكانش منها واحدة تقول غير نتزوج نقدر نرفد الجوف لأنو الحكاية بيد ربي سبحانو واذا من الاول دارت حسابها باش تأجل الحكاية ربما رايحة تتفاجأ بأنها لما تقرر تنجب الاطفال انها عاجزة لسبب من الاسباب و فيما تكتشف المرض من الاول تكون اجلاتو و رايحة تبدا من الزيرو
تانيا اي كوpل يقرر باش يتزوج يدير حسابو بامكانية حدوث الحمل يعني ماشي يحسب غير للعرس و ما يخممش في مور العرس والبنت كل ما تكبر في السن كل ما تكون عندها صعوبة في الحمل و التربية وكل شي خصوصا اذا كانت عاملة
وحكاية الرومنسية و نعيش حياتي انا ما ننصح بيها حتى واحدة وجابلي ربي ما كانش لحظة اكتر رومنسية من انو الكوpل يحطو وليدهم بيناتهم لأنو ثمرة حبهم و الزواج بلا اولاد كي الشجرة بلا ثمار ما عندها حتى فايدة
مي قوللي مازالو صح كاينين اللي يخمو كيما هاكدا؟؟ انا جابلي ربي من وصايا الأم لابنتها (فرغيلو جيبو و اربطيه بالدراري باش ما يخممش في واحدة اخرى ) انتهت الوصية ههههههههههههههههههه
 
رد: أنا تخوازون....أنا كاتخون .....أنا تخونتون ......

هههههههه أنا عجبني بزاف الطرح مع انو المحتوى المُعالَج يعيي صح، كيما قلت الرومنسية مش بالجيب فارغ والكولون يسطّر من الماكلة البايتة ههه، الرومنسية كي تكون مهني في جيبك وتخرج وتحوس صح، مش تخرج تضرب دورة في الكاغتيي حدك لبحر وترجع أواااه هك غير جيبي لولاد عمري بيهم وقتك وربيهم خير من الفيد لي يرجع قاتلك وديدو وزيزو وPapo ومعرف واش يرجع ما قاعدلكش ويخمم في الغدوة كيفاه يدير باه يشريلك الخبز يخي انتي ما تطيبيش الكسرة ما عندكش Pétrin ديدو ما يخلصش مليح هههه . والله يعني مدة ما قريتش موضوع هك يعطيك الصحة خويا كنت قلقانة ونحيتلي على بالي ومع أني ضحكت مي الموضوع هذا حتى وطرحتو بطريقة خفيفة يبقى في إطار شر البلية ما يضحك . سلام عليكم .
 
رد: أنا تخوازون....أنا كاتخون .....أنا تخونتون ......

السلام عليكم ورحمة اله وبركاته
هايني رجعت للموضوع

والله يا اخي لاجودان
اللي قلتو كلو رانا نسمعوه

رايحة نتكلم عن رايي الخاص فالموضوع

هاد التفكير في حد ذاته
سطحي
وماهوش تفكير ناضج

لخاطر اللي تفكر تتزوج وتعيش عامين وبعد ترجع تفكر بالدراري
انا نظن
راهي خايفة من مسؤوليتهم
وهاد الموضوع تاجله لخاطر حابة تعيش حياتها
هاد سبب تافه

والذرية تاني مكتوب
والواحد اللي يخمم هاك
تفكيره محدود

الاطفال حاجة شابة بزاااااااف
بصح تاني للي يعرف قيمتهم

وشكرااااااااااا
على الموضوع

 
رد: أنا تخوازون....أنا كاتخون .....أنا تخونتون ......

ههههههههههههههه سلام عليكم خويا

يعطيك الصحة موضوع فور بصح قتلتني ضحك ديدو وكاغيم ههههههههههههههههه
والله منعرف يمكن لظروف ولا امورك تخليهم ياجلو الاطفال شوي مي كيما قالك بعد ما تتزوج تولي تبكي باش تولي ام
شكرا لك
 
رد: أنا تخوازون....أنا كاتخون .....أنا تخونتون ......



أنا أحسبلي لللانفيني :-r :)

سوجي باهي نبيل خويا .. و نا عقبت على هاذ الحاجة ..

قالو وش تحكيلي على الزواج ... قالو اللي مش متزوج ما يعرف عليه والو و اللي متزوج ما يقدر يحكيلك والو .. تالمون كل زوج و كيفاش عايشين حياتهم و ضروفهم و عايلاتهم ...

التخمام راح يتبدل بعد الزواج ... عند الراجل و عند المرا و عندهم في زوج أوطون كو كوpل ماريي ....


لاحظت وحد الحاجة في القضية هاذي انبيل خويا و هي ضغط العايلة على الراجل و المرا ... هاذا العامل تقريبا اللي ياثر بزاف على قضية تاخير الانجاب هاذي ... بعد مدة المرا لي كانت تخمم ما تجيبش الذراري حتى تحوس و تشوف ليشونزيليزي تاع أمها العورة لي تسكن في الدورة :p تولي تعيش ضغظ امها لي تقلها أربطي راجلك بطفل ( محسوب سنسلة تاع حديد :-o ) و ضغظ عايلتهم و لافامي تاع العمومية و اللسان الطويل لي يبداو يقولو بلي راهي عاقر وما حبش يطلقها :down: ...

و حتى الراجل تخمامو يتبدل .. و ينسى اصلا هذيك الرومنسية لي حب يدير الروطار على جالها و يدخل في الحياة الواقعية ... و هنا الرجال انواع ..كاين لي يحب يجيب الذراري ..كاين لي ما يهموش جاب ولا ماجابش .. و كاين لي خايف يجيب ذراري باسكو ضروفو مش مليحة و الصوردي مكانش ... و هاذاك أبو المصائب ...


حاجة خرى ثاني لي مدايرة ديفو كبير ... هي الريثم اللي عايشين بيه هاذو les couples اللي صوا-ديزون رومنسيين ... تلقاهم مشتاقين تمرة و حابين يتقلشو كيما براد pيت و انجيلينا .. و يحب يحسس مرتو بلي يحبها .. و تبختري يا حلوة يا زينة بالشيكولا كريدي تاع عمك السعيد( المونطاسيون ) و الشانال سانك بالفاسيليتي تاع كوسميتيك النواري ;) و آنسي دوسويت ...

نورمالمون كل هاذا و يلبس قد صباطو .. و اللي ما كفاهش قبرو يجي فوقو و يرقد ... بصح حنا غاشي مخلوع ( غاشي ماشي شعب :regards01:) نحبو نعيشو le rêve Americain بعقلية عيسى الجرموني .. الزوخ و الفوخ و العشى gرنينة ...

كاين حاجة خرى باش ما ننساوهاش و هي مصاريف تاع الزيادة و تاع التعيارات ... كاين اللي تهز بالحمل من شهرها لول و كاين لي تقعد شهور ... و كي يبدى الحمل لازم الراجل يخبي شكارة دراهم ..ليزاناليز غاليين و الديبلاصمون بين الطبة و بلاك لكيلوميترات طويلة و دراهم الفرود لللي ماعندهمش الvواتير .. و يزيد يسناهم الكلونديستان و يمصلهم دم جيوبهم ... و مرورا بفترة الوحم و المرا تسخف على الكيوي و الشوا و معرف واش .. و اخيرا الولادة لي ديفوا تكون سيزاريان و تكون بربع ملاين و لا ستة ...

خلاف الدارهم لي راح يسلكهم الراجل.. فيه مجهود و تعب فكري و طلعات و هبطات و حيرات و دواوات ... لي يخلو الزوجين السعيدين اللي تزوجو بثبات و نبات ..يفكرو بزاف قبل ما يجيبو صبيان و بنات .... و الرازق ربي سبحانو ...


أسباب بزاف تخلي الراجل يحب يدير الروطار في الذراري ... زعما يحب يبني فوق الدالا .. و لا يحب يستقر في سكنة وحدو اذا كان ساكن مع عايلتو ... و كاينين فئة تحب تعيش الرومنسية و الخرجات a deux للبيتزيريات و للشطوط :regards01:



العآقل :)

 
آخر تعديل:
رد: أنا تخوازون....أنا كاتخون .....أنا تخونتون ......



أنا أحسبلي لللانفيني :-r :)

سوجي باهي نبيل خويا .. و نا عقبت على هاذ الحاجة ..

قالو وش تحكيلي على الزواج ... قالو اللي مش متزوج ما يعرف عليه والو و اللي متزوج ما يقدر يحكيلك والو .. تالمون كل زوج و كيفاش عايشين حياتهم و ضروفهم و عايلاتهم ...

التخمام راح يتبدل بعد الزواج ... عند الراجل و عند المرا و عندهم في زوج أوطون كو كوpل ماريي ....

لاحظت وحد الحاجة في القضية هاذي انبيل خويا و هي ضغط العايلة على الراجل و المرا ... هاذا العامل تقريبا اللي ياثر بزاف على قضية تاخير الانجاب هاذي ... بعد مدة المرا لي كانت تخمم ما تجيبش الذراري حتى تحوس و تشوف ليشونزيليزي تاع أمها العورة لي تسكن في الدورة :p تولي تعيش ضغظ امها لي تقلها أربطي راجلك بطفل ( محسوب سنسلة تاع حديد :-o ) و ضغظ عايلتهم و لافامي تاع العمومية و اللسان الطويل لي يبداو يقولو بلي راهي عاقر وما حبش يطلقها :down: ...

و حتى الراجل تخمامو يتبدل .. و ينسى اصلا هذيك الرومنسية لي حب يدير الروطار على جالها و يدخل في الحياة الواقعية ... و هنا الرجال انواع ..كاين لي يحب يجيب الذراري ..كاين لي ما يهموش جاب ولا ماجابش .. و كاين لي خايف يجيب ذراري باسكو ضروفو مش مليحة و الصوردي مكانش ... و هاذاك أبو المصائب ...


حاجة خرى ثاني لي مدايرة ديفو كبير ... هي الريثم اللي عايشين بيه هاذو les couples اللي صوا-ديزون رومنسيين ... تلقاهم مشتاقين تمرة و حابين يتقلشو كيما براد pيت و انجيلينا .. و يحب يحسس مرتو بلي يحبها .. و تبختري يا حلوة يا زينة بالشيكولا كريدي تاع عمك السعيد( المونطاسيون ) و الشانال سانك بالفاسيليتي تاع كوسميتيك النواري ;) و آنسي دوسويت ...

نورمالمون كل هاذا و يلبس قد صباطو .. و اللي ما كفاهش قبرو يجي فوقو و يرقد ... بصح حنا غاشي مخلوع ( ماشي شعب :regards01:) نحبو نعيشو le rêve Americain بعقلية عيسى الجرموني .. الزوخ و الفوخ و العشى gرنينة ...

كاين حاجة خرى باش ما ننساوهاش و هي مصاريف تاع الزيادة و تاع التعيارات ... كاين اللي تهز بالحمل من شهرها لول و كاين لي تقعد شهور ... و كي يبدى الحمل لازم الراجل يخبي شكلرة دراهم ..ليزاناليز غاليين و الديبلاصمون بين الطبة و بلاك لكيلوميترات طويلة و دراهم الفرود لللي ماعندهمش الvواتير .. و يزيد يسناهم الكلونديستان و يمصلهم دم جيوبهم ... و مرورا بفترة الوحم و المرا تسخف على الكيوي و الشوا و معرف واش .. و اخيرا الولادة لللي ديفوا تكون سيزاريان و تكون بربع ملاين و لا ستة ...
مع انكـ حكيتـ ع كلش مي نسيتـ حاجة مـٌهمة خويا
الحفـآظـآتـ والحليب ديال البيبي لي الباطة ادير 50الف وطلع وماتكفيهش ليومين الا كـآن بسلامتو يشرب وماماه ماعندهـآش اتسمى الشكـآرة وماتكفيهش ويدخلو مرة اخرى للوازم الطفل وتجهيزاتو بلا ماننساو تقولو يلزم ادير عليه السابع ويلزم نطهرو ونذبح ونعرض كيما جارتي فلانة ويلزم 5 نواع حلوة ونكري الصالة ووو
لهنا يولي السيد يغني ( نقطع حوااااااااااايجي ههههههههه )
ايا بزاف

خلاف الدارهم لي راح يسلكهم الراجل فيه مجهود و تعب فكري و طلعات و هبطات و حيرات و دواوات ... لي يخلو الزوجين السعيدين اللي تزوج بثبات و نبات يفكرو بزاف قبل ما يجيبو صبيان و بنات .... و الرازق ربي سبحانو ...


أسباب بزاف تخلي الراجل يحب يدير الروطار في الذراري ... زعما يحب يبني فوق الدالا .. و لا يحب يستقر في سكنة وحدو اذا كان ساكن مع عايلتو ... و كاينين فئة تحب تعيش الرومنسية و الخرجات a deux للبيتزيرات و للشطوط :regards01:



العآقل :)

رد اخينـآ مجمل م كل النواحي
باركـ الله فيكـ

سلامي
 
رد: أنا تخوازون....أنا كاتخون .....أنا تخونتون ......


مع انكـ حكيتـ ع كلش مي نسيتـ حاجة مـٌهمة خويا
الحفـآظـآتـ والحليب ديال البيبي لي الباطة ادير 50الف وطلع وماتكفيهش ليومين الا كـآن بسلامتو يشرب وماماه ماعندهـآش اتسمى الشكـآرة وماتكفيهش ويدخلو مرة اخرى للوازم الطفل وتجهيزاتو بلا ماننساو تقولو يلزم ادير عليه السابع ويلزم نطهرو ونذبح ونعرض كيما جارتي فلانة ويلزم 5 نواع حلوة ونكري الصالة ووو
لهنا يولي السيد يغني ( نقطع حوااااااااااايجي ههههههههه )
ايا بزاف




جل من لا ينسى ... بصح انا هنا ما نسيتش :regards01: ..

Pريمو راه حكى عليهم نبيل في السوجي و ما حبيتش نعاودهم .. و Sوكوندو انا حبيت نحبس عند لاكوشمون .. ما حبيتش نروح لليديطاي تاع حياة العايلة ... و ماشي غير الحليب لي غالي ..كاين لي يزيد عندو طفل ناقص من حاجة ولا عظامو معوجين ولازملو ريديكاصيون كل يوم .. وكاين الذراري لي لازمهم عناية كاملة .. وكاين بزاف حالات تاع ديبيبي ما يزيدوش نورمال ..باش ما نقولوش مراض ... و يلزم واحد يخصصلهم مال ووقت ...

الحكاية مهيش حكاية دراهم و بس .. الحكاية هي تاع مسؤولية و تخوف ... تاع انسان راح يجيب ذراري صغار و يقوم بيهم .... و اغلبهم ما رباو لا زاوش لا قط .... je me demande bien كيفاش راح يتهلاو في هذوك الملايكة لي يزيدو .... que ce soit الراجل ولا المرا .....






رد اخينـآ مجمل م كل النواحي
باركـ الله فيكـ

سلامي


ربي يجمل عقلك ختي نينا :)

و فيك بارك الله

 
رد: أنا تخوازون....أنا كاتخون .....أنا تخونتون ......

السلام عليكم
ماعلاباليش غير انا ولا تبانلي
بصح جيني كي شغل عندك عقده تجاه الفتيات
يا اخي هذي النوعيه تع البنات ماعلاباليش وين راك تلقاها مي انا نقارونتيلك بلي مكاش بنت تكره الاطفال اي بنت قبل الزواج كي تشوف الاطفال تحب تهبل بالغيره
بالعكس بالنسبه ليا ولا على الاقل وين نسكن الرجال قبل الزواج يشرطو على نساهم باه مايولدوش العام ولا عامين لوالا زوجي قبل زواج شرط عليا مانولدش عام لوول مي انا قريب بطلت عليه قتلو غير عند البيبيات لي مادورش انا نمووووووووووووووت فيهم مام ختي راهي مخطوبه قالها راجلها عامين لواله مانجيبوش بيبي ماحبتش جارتي حماتي تاني شرطلها راجلها
مي وين تسكن انت العكس هههههه هيا نديرو افار رجال تاعنا يدو من عندكم ونتوما دو من عندنا هكا تنحل الازمه هههه
شكرا على الموضوع نظن بلي صح راه صاري سواء من الرجل او المراه المهم هذا المفهوم راه بدا يدخل للمجتمع تاعنا بعد ماكانت المراه لي ماتظنيش في عامها لول تبدا خايفه ذرك راهي شنا
ربي يهدينا
 
رد: أنا تخوازون....أنا كاتخون .....أنا تخونتون ......

وعليكم السلام

نعرف وحدة قالت أنا مازلت صغيرة واتزوجت صغيرة
منجيبش لولاد ونعيش كيما نور ومهند ;)
5 سنين ومارزقهم ربي ودرك راهي تجري ورى الولاد
ونعرف وحدة تكدب على راجلها على قضية الولاد ونهار فاق بيها ماش حابة تجيب
ماش ربي لي مارزقهم عطاها بكف وبعثها تروح عند دار باباها وشاف غيرها

يعني الانسان يعرف وظيفتو في الحياة
مادام راح تتزوج راح تتحمل مسؤولية دار وولاد وووو
الظاهرة هادي كثرت في المجتمع تاعنا غير من الاحلام تاع البنات لي لقاو رجال حلولهم العين.
موضوع رائع بارك الله فيك​
 
الحالة
مغلق ولا يسمح بالمزيد من الردود.
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top