السلام عليكم و رحمة الله و بركاته
صايي بوانتيت لهنا منعرف علاااه؟!! المفييييد ....
خطرة كنت نقصر مع وحدة قاتلي عام بعد ما نغلق فانتون نحط في المور ديالي
البارح كان في عمري عشرين..؟!!
قتلها ما يكون العام لبعدو و نت حاطة ... يا حسراه ك كنت صغيرة يا حسراه :d
.... جيل مخلوع من روحو
لسنسيال ايامات من بعد تقدملها واحد مولا خمسة و تلاتين سنة ..مزروب و حاب يكمل نصف دينو
الحق ناس ملاح ترونكيل مدين خلوق خدام حاكم pـوست شباب بدارو كل المواصفات فيه
الطفلة مقبلتش .. سي توتافي نورمال لولة تقرا و م راحش تفرط فيها و هو تاني م راحش يسنى حتان تتخرج ...
و فوق هاديك فارق السن أزعجها ..
قتلها.. بلاك شاف المواصفات توالم عقليتو و قصد بالنية
لا يرعك المشيب يابنة عبد الله فالشيب جلة ووقار
زيد ما تعرفي منين يجي الخير.. ناس زمان قالو
كبير يدللني و لا صغير يعللني
و كلشي بالمكتوب
مقدمتي م كانت سوى ولوج للفكرة الاساسية لهدرتنا ل هي
الكبار قيمتهم و وزنهم الثقيل في المجتمع
كلما تقدم العمر بالانسان يزداد في التجارب و بلاك م يزيدش خبرة و بلاك يطور في الخبرة بصح بلا حكمة
ك نحبو نتعلمو و نحسنو من أنفسنا أو ناخدو راي في شيئ يخصنا نقصدو ناس من مختلف الاعمار يشهد لهم برجاحة العقل
مي قلوبنا ديما تحن لكبار السن لقيمتهم الاجتماعية و حتى نستفيد من خبرتهم الطويلة الثرية
كون الكبار أغلبهم يتصفو برجاحة العقل و حسن الاسلوب و الذكاء
و ل بمجرد ما يقلك يا بنتي و لا يا بني سبحان الله تكون بداية للطمأنينة و الثقة
الكبار يتصفو بحلاوة الكلام و عذوبة الحوار يوصلو المعلومة بطريقة سلسة مرنة و ب المنطق القووووي
و حسن اسلوبهم الخالي من الزعاف ليشوه صورة القدوة و التهور و الطيش ل يطمسو الهيئة يجعلهم ناس مؤثرين و فوقها محترمين و محبوبون من طرف الصغار ...
عاشر من الناس كبار العقول
وجانب الجهال أهل الفضول
واشرب نقيع السم من عاقل
واسكب على الأرض دواء الجهول
و من هنا و من منتدى وش راك تهدر حبيت نهديهم هذه الشهادة المتواضعة :$ ل متوفيهمش حقهم الا القليل
...و نهديهم أجمل سلام و كل الاحترام و التقدير لمقامهم الرفيع.
و السلام عليكم و رحمة الله و بركاته.