السلام عليكم
هدا سؤال مهم معظم الامهات الجدد يبحثن له عن جواب
انا وليدي كي كان في عمرو
4 اشهر كنت نعطيلو التسويست و ياوورت جاغفي هداك الصغير
وكنت تاني نعطيلو الفرينة نشريلو كل مرة نوع كاين فرينة تاع ربع اشهر اسمها فيغور بصح قالو بلي منتج اسرائيلي مشريتولوش مالا وكلتو بيوميل و فرينة نسلي و كنت كل مرة ندلو نوع مرة تاع الارز و مرة تاع الخضر و مرة تاع العسل
و من بعد 5 اشهر دخلتلو الروز المطحون تاع المهلبية شريتولو و نغليهلو بشوية ملح و زيت وتاني ندلو المرمز الرقييييييييقة نطبخها مليح مليح و في 6 اشهر وليت نطيبلو الخضرة كنت ندير كسرونة ماء و ندلها شوية زيت و رشة ملح و شوية من لحم الدجاج الابيض(السردة) و الخضر و كي يطيبو مليح نرحيهم بالميكسور و في 7 اشهر وليت نطيبلو شربة فارميسال بالحليب و كي تطيب ندير عليها حبة بيض تاع عرب و واصلتلو هكدا حتة لحق للعام وليت نوكلو الكسكس بصح الكسكس نطحن الخضرة تاع المرقة و نزيدلو زوج مغارف كسكس
وتاني بعد العام وليت نوكلو كامل الاطعمة بلبا ما ننسى التمر تاني مفيد حتى لو كان في ربع اشهر تقدري تلحسيهلو
بصح يا اختي عليكي بالنظام
انا ضروك راه في عام و نص ندلو الصباح بيبرون حليب و على 10 نعطيلو قاطو سبيسيال تاع ولاد و على 12 نفطرو و لعشية نعطيلو قاطو بالحليب ولا بيبرون حليب وحدها و في العشا نوكلو حاجة خفيفة و فاكهة او سلاد فروي فيها غير حبة بنان و ياوورت و عصير طبيعي و كي يحب يرقد ندلو بيبرون حليب باش يرقد مليح
نتمنى نكون فدتك مليح
