نقاشات حول كل ما يتعلق بالسيبار كافي ( محل انترنت )

Moha le sage

:: عضو بارز ::
أحباب اللمة
إنضم
15 مارس 2009
المشاركات
8,136
نقاط التفاعل
3,556
النقاط
356


السلام عليكم

الموضوع هذا فتحتو باش نجتمعو فيه ..اي واحد مهتم و لا عندو محل انترنت ..باش نفيدو بعضانا و نتناقشو فيه على كلش ( واش هوما الميكروات ... شحال يديرو ..وشمن برامج تانسطاليهم .. )

الموضوع هذا كان نقطة انطلاقة من موضوع الاخ سوناكوم اللي طرح فيه شحال كلفة السيبار ... وانا حبييت نوسع الفكرة بين الاعضاء .. ونتناقشو في جميع احتياجات السيبار ..من الخيوط تاع التريسيتي ..حتان اكبر حاجة فيها

راني نستنا فيكم باش نتقابلو هنا و نحكو على اي حاجة تفيدنا

كي نكون انا نعرف حاجة .. ونا تعرف حاجة .. و صاحبنا يعرف حاجة ..

كي نتلاقاو راح يولي كل واحد فينا يعرف 3 حوايج ..

الموضوع درتو باش نحط عيني عليه و نثروه بالنقاشات و مهوش موضوع ميت ..ونحاولو نجاوبو اي واحد عندو استفسار بقد ما نعرفو








 
آخر تعديل:
mami06



السلام عليكم،
اذا تحدثت على التجهيزات فتفضل:
10 اجهزة كميوتر= 2.5*10=25 مليون سنتيم...
10 طاولات= 2500*10= مليونين و نصف...
سويتش أو وسيلة ربط الشبكة المحلية= 4000دج تقريبا بحسب النوع...
10 ويب كام= 500*10= 5000 دج...
10 كاسك= 250*10= 2500 دج...
10 كراسي= 1500*10= مليون و نصف...
10 طابوري (كراسي صغيرة)= 200*10= 2000دج...
مكتب السيرفر الآن:
لازم يكون الجهاز طيارة حبيبي= 3 ملايين سنتيم...
كرسي الله الله تاع المعاليم= 5000دج...
ايه و لازملك دي باف و اومبليفيكاتور للميوزيك يجوك في القليل 2500دج و شوف...
و متنساش الكراسي تاع الناس الي تستنى الدالة ديرهم 5 ايلا حبيت= 500*5= 2500دج...
ايه و الطابعة و مادابيك تكون وحدة معاها سكانير ووحدة اخرى تكون لازير يجوك في زوج 12000 دج تقريبا...
و متنساش الخدمة تاع لانستالاسيون دو ريزو الي في لقليل اطيحلك مليون نتا و الي راح يركبهولك...
و الموديم يجيك مع الآبونمون باطل= دير 6 شهور يمدولك موديم باطل و القيمة على حساب ما تخير نتا...
يعني بلا ما نحكيلك على الكراء تاع المحل و الاشتراك في الانترنت راح اطيحلك حوالي 38 مليون و ربي يوفقك و يجيب الي فيه الخير...
و اي استفسار اخر راني هنا حبيبي...




 
mr_dahia_1986

السويتش أسرع من الهوب و أسمو العلمي هوب ذكي يعني لما ترسل المعلومة تروح ديركت ل أدراس اي بي تع مولاها ماشي تجوز عليهم كامل
ونقولك حاجة أخي الميكرو تع 2.5 مليون مايدير والو لازم الواحد يشوف للقدام ماشي غير عند نيفو
جيب اللي ب 3 ملاين للسيبار
و نتاعك نتا (سارفور) ديرو حاجة دوريجين يعني هاربة HP ولا DELL يدير وحد 5 ملاين بصح ملي تركبو الميكروات كامل يحبسو و هو يبقى يدور شغل صاروخ ياخو و الله ما تندم عليه و حبيبنا اللي دبر عليك نسا حاجة اللي هي les onduleur لازم يكونو و الحاجة المليحة منهم تدير 6000دج
و القروب تع التريسيتي الا كنت في بلاصة تنقطع فيها بزاف و هكدا تستقام كلش في نواحي 50 مليون بصح والله ماتندم لاخاطر هاذي تدبارة من واحد فالدومان هادي هي قرايتي درت عليها ستاج في شركة لحقت انها عطاتني معدل 19 ودبر راسك خو انت حر جرب وردلي بالخبر

 

عجبتني الديسكيسيون ... باسكو مانتيريسي بيها ..وذرك ندخل معاكم بلا بارود ههههه

في بلاصة ما تقولو ميكرو تاع 4 ولا تاع 5 ملاين تاع السارفور .. احكو فيه تقنيا

لازم الكارت مار ( carte mere ) تاعو تكون gigabyte ولا asus .. ونجاوب السيد الي قال لازم يكون ميكرو dell ..اخطيك ..باسكو البطاقة الام تاع الدال تلقاها intel .. وهاذي فراجيل بزاف ..مالقري intel هي علامة معروفة عند الجميع


من الافضل يكون فيه السارفور كارت مار فيها الشيبسات اينتال la chipset تاعها تكون intel

و عندكم من لي كارت مار العيانين لي راهم يركبو فيهم elite groupe ... راهم يتحرقو

البروسيسور شوفو يكون ديال كور 2.5 ولا كثر .. بلاك 2.8


و نزيد نعقب للرام ram ..لازم يكون البيس تاعهم طالع .. و تكون 2 جيقا ولا كثر

حاجة اخرى اللي هي la carte graphique .. دير في بالك ان الناس الي جاو يكونيكتيو عندك .. فيهم لي يلعب الالعاب تاع الريزو le jeux réseau ..زعما counter strike .. و انواع بزاف كيما الـ rpg .. fps مالا شمر على ذراعك و ركب لكل ميكرو كارت قرافيك مليحة ..زعما 512 ميغا ..تكون ati و لا nvidia .. وسومتها تقدر تكون من 250 الف ..حتان 600 الف .. وكاينين اكثر

يعني نتا ركب في السارفور تاعك حاجة مليحة كون تحب تلعب معاهم .. وركب ليهم حاجة نورمال تقدر تصلحلهم الالعاب كيما pes ... gta ..css .. الخ


ننصحك حاجة ..في كل بواتيي تاع اينيتي تاع ميكرو تلقى بلايص تاع الفونتيلاتور من ورا الميكرو ...روح طل على الميكرو تاعك ذرك تلقى زوج بلايص فارغين ومدورين ... هاذو يركبو فيهم فونتيلو صغار ..اذا كنت نتا تعرف تخنتش ..روح نحي تاع كاش اليمونطاسيون قديمة و ركب فيهم .. كي تدير زوج راهم يبردولك البروسيسور و لاكارت مار و ما يخلوهاش تتحرق .. سيرتو اذا كانت مغمومة تحت الطابلة ... باسكو ديال كور يشوفي بزاف .. ومع العفايس لي راكبين معاه ..اكيد يسخن بزاف ..مالا حاول ديما تبرد السارفور تاعك ..ماشي تخسر عليه 3 ملاين و ما تبردوش

عدو الميكرو : السخانة و التريسيتي ..مالا احمي روحك منهم في زوج

نزيد نفزت لعفسة الاونديلور ..لي ذكرها السيد .. الاونديلور كاين الماركة apc الي هي مشهورة و فيها 4 سورتي .. يعني 4 بلايص وين تقدر تركب لي كابل تاع التريسيتي .. الاونديلور يركب في السارفور باش ما يتروديماراش و ما تتحرقش الكارت مار ولا لاليمونطاسيون ... و يدير بلاغك 400 الف .. وربما قل او اكثر
..وما تركبوش في الميكروات لخرين ..راهي خسارة باطل ..مافيها والو كي يكون كليون راحت عليه التريسيتي و جات ..ماشي كيما السارفور الي يمد الكونيكسيون و هو لي يحسب الاسعار ..مالازمش تروح عليه التريسيتي ..

قضية الميكروات هاذو .. قادر يشريهم بقل من 2 ملاين و نص ..و قادر يركب في بلاصت البوسيسور بانتيوم ..يركب سيليرون ..وراه مش غالي كيما لخرين


بخصوص الريزو ..علاش رايحين لبعيد ...يركب كارت ريزو سامبل في كل ميكرو .. ويركب الهوب ..قادر يشريه بسومة رخيسة .. واش اداكم للهيفي و الروتر ...

الطوابل دير ب 150 للطابلة ... عشر طوابل يكونو ب 2 ملاين ولا قل ..صاديبون القفازة تاعو

حبيت نقلكم على حاجة مهمة ..الي هي البريز .. نعرف واحد صاحبي تحرقولو 3 ميكروات منهم .. باسكو شرا لي بريز رالونج عيانين ..كينين وحد النوع اسمو trust و جايين كحل .. هاذو بريز فيلتر ..يمدو التريسيتي و يصفوها .. وصدقوني يحمو الميكرو كي يطلع الامبيراج و الفولطاج ..يديرو وحد 70 الف

راكم ناسيين حق الكرا تاع القاراج .. الي قادر يكون بسومة طالعة ولا هابطة


اخيرا حاب نقول حنا عندنا الميكروات رخاس في سطيف ..ماشي كيما باقي الولايات .. واللي يحب معلومة نصقسيلو .. ومعرف

اه تفكرت حاجة ..بزاف لي يشرو ابريمونت ميلتي فونكسيون ..هاذو فيهم مشاكل مالا حل عينيك مليح ..بزاف فيهم ( سيرتو في ليريفيرونص لخرين ) مايطيحش عليهم اللونكر ..يعني تروح تشري ليكارتوش و تقرا في لومبالاج بلي يطيح معلامبريمونت تاعك .مع التالي ما يطيحش .. مالا صقسي مليح .. و كاني الروشارج ثاني ..بصح اعرف وش تشري .. وكيفاش تعمرلي كارتوش باش ما تحبسلكش لامبريمونت ..

احسن حل اشري ابريمونت مافيهاش الكولار ..ديرها للناس لي تكتب ورق نورمال ..زعما ليدوموند و لحوايج ذوك ..اشيري وحدة كانون canon تخرج غير الكحل .. و تكون اقتصادية ...و اشري وحدة ميلتيفونكصيون للبحوث و للتصاور


نتمنى نكون فدتك برايي

 
شوف يا سي موح صاحبي عندو سيبار كافي و ديما أنا اللي نحكمها راني شفت بلي الغاشي نتاعنا مالازمش ديرلو حاجة فور و غالية لان النهاية نتاعها التكسار
والنظافة مهما تنظف ما يبانش عليك بلي نظفت و مكانش حاجة تقلقني كيما الشمة تلقاها فوق الطابلة

لي عودة الى الموضوع
 
يليقلك اكثر من 60 مليون باش دير فيها حاجة مليحة تاع الصح
هدا مانقول لخاطرش في صوالح كيما هادو الدراهم هوما اللي يهدرو على ماتريال
 
حبيت نسقسي بزاف تصرا انقطاعات في فصل الشتاء .........يعني لاكونكسيون تروح والسيبار يولي حابس ..واش كاين كاش تعويض من اتصاالات الجزائر ولا الخسائر يتحملها مول السيبار
 
السلام عليكم عندي استفسار ارجو الرد عليه من فضلكم ما هي مكونات الملف من اجل الحصول على ترخيص فتح مقهى انترنت.
 
اخدم حاجة نظيفة تخليك دايما نظيف أخطيك من البريكولاج وتكسار الراس أشري سارفر تاع 20 مليون أما الخوادم ركز جيدا وأقتني الانجع والأنفع حتى وإن كان بـ. 10 ملايين للخادم الواحد بكل بساطة ترجع دراهمك في أقل مدة ممكنة أما إذا أخترت الأجهزة الضعيفة أو المتوسطة لن تسترجع رأس مالك حتى النهاية ولن تخرج من المشاكل أبدا
سلف واخدم حاجة مليحة الي يدخل عندك خطرة غدوة يرجعلك يخلي دارو ويخدم عندك .... هذه تجربة لسنوات خلت خذ برأيي ولن تندم أبدا
 
اخدم حاجة نظيفة تخليك دايما نظيف أخطيك من البريكولاج وتكسار الراس أشري سارفر تاع 20 مليون أما الخوادم ركز جيدا وأقتني الانجع والأنفع حتى وإن كان بـ. 10 ملايين للخادم الواحد بكل بساطة ترجع دراهمك في أقل مدة ممكنة أما إذا أخترت الأجهزة الضعيفة أو المتوسطة لن تسترجع رأس مالك حتى النهاية ولن تخرج من المشاكل أبدا
سلف واخدم حاجة مليحة الي يدخل عندك خطرة غدوة يرجعلك يخلي دارو ويخدم عندك .... هذه تجربة لسنوات خلت خذ برأيي ولن تندم أبدا



السلام عليكم


سارفر تاع 20 مليون :u_pc: :scared:

يا خويا لعزيز رانا في دزاير برك منيش في دبي .. عشرين مليون يا ولد خالتي نتزوج بيها

السارفر يكون p4 مليح و يكون فيه اونتي فيريس باهي و صاي .. و راني مداير p4 3 giga و 512 ram ونخدم بيه مستراح

و الخوادم راني داير p4 2.4 و كاين لي راه حتى مداير مش حتى p4 تلقاهم مدايرين celeron

بصح حبيت نفهم وش من مشاكل لي راك تحكي عليها ؟؟ اللي راك رايح علاجالها تدير سارفور غالي ؟

يعطيك الصحة خويا


 
الله اكبر راك قايم بيها موح...
اسمع شفت واش ولاو يدوموندو باش تفتح سيبار؟ قالك رخصة البناء تاع المحل...وليكاميرا وين يشوفو في رواحهم؟
 
لتجنب مشاكل الانقطاعات في الانترنت لازم يكون عندك زوج اشتراكات مختلفين مثلا
اشتراك انترنت فوري و الاخر انيس
لأن من النادر جداا ان تنقطع الانترنت عليهما الاثنين في وقت واحد و بالتالي بكون فيه نوع من الثبات عندك في تقديم الخدمات

عندي سؤال مفيد جدااا و يحتاج الى شوي تمخميخ هههه : كيف يمكن دمج اشتراكين انترنت و التحكم بهما من خلال سيرفر واحد ؟ يالله يا جماعة السيبار شوفولنا كاش حل و لا معلومة و انا راني نبحث و كاش ما نلقى راني نقلكم ^^
 
في بالي واحد يكون رووتر يكونكتي وحدووو ولاخر معليش ديرو موديم نورمال....
ولا واش رايك؟؟
 
بالنسبة لمف السيبار اصبح معقد لأكن لن تجد محل للكراء ولديه رخصة البناء كما هي حاي انا ،
 
بالنسبة لمف السيبار اصبح معقد لأكن لن تجد محل للكراء ولديه رخصة البناء كما هي حاي انا ،

راك تشوف؟؟؟
هذا و مزال الخير لقدام سيرتو تاع لازم كاميرا مراقبة باش تراقب الزبائن الي تجيك للسيبار....اولدي الي خدم الخدمة هادي خدمها بكري....درك همها اكتر منها...ربي يكون في العون...​
 
موضوع رائع و مميز و به فائدة كبيرة
و لكن هل يمكن اخبارنا باحسن اشتراك انترنت
 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top