وصفات حلوياتي بعد رجوعي من العمرة

ninafret

:: عضو مُشارك ::
إنضم
19 ماي 2011
المشاركات
417
نقاط التفاعل
262
النقاط
18
السلام عليكم اسفة جدا على التاخير ماكانتش عندي الانترنات اربع ايام المهم هاي ليكم الوصفات
556766_216907381760247_100003229607068_27439204_1708537354_n.jpg


الغريبية
500غ زبدة لابال تطلعيها مثل الكريمة تزيديلها كاس مليان سكر قلاصي وتزيدي تخدميها وتزيدي 1كلغ مايزينة تخلطي الكل وتلمي بالفرينة حتى تتحصلي على عجين متماسك مايكونش يابس ولا طري بزاف تشكليها بالمحقن وتطيبيها على 180 تجي تدوب في الفم

560216_216846258433026_100003229607068_27438865_1763217391_n.jpg


قاطو بارد...مايطيبش...
1كلغ ونصف كاوكاو منقي ومقلي ومرحي متوسط تزيديلو علبة حلوة الترك نتاع500غ وتزيدي 3 علب قاطو كاسكروط اللي شكلو مربع يكون مرحي غبرة وتزيدي 3 ملاعق كاكاووتلمي ب 400غ شكولا سوداء دايبة مع 250غ زبدة ونصف علبة نتاع رطل عسل وادا ماتلمش الخليط كملي لمي بماء الزهر ثم شكلي حرابش طويلة دخليها الثلاجة ربع ساعة في هدا الوقت دوبي 1كلغ شكولاطة بيضاء فوق حمام مائي مع 2 اكياس صغيرة ملون ابيض وبدون اي اضافات اخري ثم ادهني الحرابش بالشكولا البيضاء باستعمال البانسو وكي تجمد قطي الحرابش مقروضات واعملي خطوط من الشكولا البيضاء بابرة السورانغ ولصقي وردة من عجينة اللوز

427802_216846325099686_100003229607068_27438866_1700750988_n.jpg


غريبية الوردة غريبية جديدة
دوبي 500غ زبدة لابال خليها تبرد وزيديلها كاس اتاي زيت وربع العلبة نفسها سكر قلاصي اخدميهم مليح بالباتور وغطيهم ودخليهم الثلاجة ليلة كاملة وفي الغد عاودي طلعي الخليط مليح بالباتور وزيدي معاها 1كلغ فرينة حتى تتحصلي على عجينة حليها فوق سطح مرشوش بسمك2 سم او اكثر حسب الرغبة وقطعي بواسطة المول من جهة الوردة ودخلي الحبات للفرن من تحت فقط من غير مايتبدل لونها وكي تبرد ديري في الثقب اللي في الوسط شكولا سوداء دايبة ...وانا مرات نعمل في الوسط حبة بندق

522770_216846511766334_100003229607068_27438868_708688142_n.jpg



لقاطو المربع بالجوز هو عبارة عن 500غ جوز مرحي خشين مع 500 غ كاوكاو مقلي ومرحي متوسط وورق البوراك حمرت 2 علب يعني 24 حبة وفتتهم بيدي ولميت الخليط بمعجون وماء زهر و3 ملاعق سكر شكلت الكل في بلاطو مربع بسمك 2سم وزينت الوجه بشكولا سوداء دايبة ورشيت لوز ايفيلي او شرائح محمر شوية ورشقت في الوسط الجوز

36549_216846795099639_100003229607068_27438870_901284744_n.jpg


قريوش المارغوريت...مودال جديد
1كلغ Tفرينة تزيدلو 250 زبدة دايبة وقرصة ملح خلطي الكل مليح وزيدي 3صفار بيض +قرصة صغيرة خميرة الحلويات+قرصة صغيرة خميرة الخبز+ملعقة كبيرة خل خلطي الكل ولمي بماء الورد حتى تتحصلي على عجينة قسميها على 4 وغطيها وخليها ترتاح نصف ساعة ثم حلي العجينة بسمك نصف سم واطبعي بطابع المارغوريت الكبير رقم 1 لصقي كل وردتين من الوسط بشكل متخالف بشوية بياض بيض وارشقي في الوسط حبة صنوبر
اقلي الحبات في زيت غزير على نار هادئة قطريها وكي تجي تقدميها عسليها

389255_216846918432960_100003229607068_27438871_1647747556_n.jpg



قاطو كريات الثلج بنواد كوكو....
1كلغ نواد كوكو تزيديلو برش 2 حبات ليمون كبار+250 غ سكر عادي خلطي الكل وزيدي بيضة ثم صفار ثم بيضة ثم صفار وهكدا حتى يتلم الخليط شكلي كريات دخليها للفرن حتى تاخد اللون الدهبي من تحت وكي تبرد غلفيها بالقلاساج اللي هو عبارة عن بياض البيض اللي بقالك طلعيه مع سكر قلاسي و 2 ملاعق عصير ليمون و2 ملاعق زيت و4 ملاعق ماء زهر زيدي وشوية ملون وردي السكر بالتدريج عينك ميزانك حتى تتحصلي على خليط خاثر غلفي الحبات بيه وزينيهم بوردات من عجينة اللوز اللي هي علبة من عجينة اللوز تزيديلها كاس مايزينة مفورة وملون وردي خلطي الكل وحلي العجينة واطبعي بطابع المارغوريت المتوسط رقم 2
.........اي استفسار او سؤال انا في الخدمة.................رجائي الوحيد ان تدعولي ربي يرزقني درية صالحة معافات
 
وعليــكم السلآآآم
الله يباركـ ، دي قاطوو هآآيليــن
يعطيكـ الصحــة
ولعقوووبة لحجة ان شاء الله
+ أحلى تقييم

 
الله يبارك قاطوات وعليهم لكلام
يهبلو
مبروك عليك العمرة

 
الله يبارك فيكم لعقوبة لكن
 
عمرة مقبولة ان شاء الله...
قاطو بالطبع ...روعة ماشاء الله تسلم الأيادي..
 
عمرة مبروكة وقاطو هايل
 
شكرا لكل الردود انشاء الله تجربوهم وتستمتعو بمداقهة ولعقوبة للكل
 
الله يعطيك الصحة خيتو مشكورة على الوصفآت
تعبنآآك وربي يبـآرك عليك يالحبيبة حلويآت هآيلة
ربي يحفظك خيتو وبآرك الله فيكي
 
وزينيهم بوردات من عجينة اللوز اللي هي علبة من عجينة اللوز تزيديلها كاس مايزينة مفورة وملون وردي خلطي الكل وحلي العجينة واطبعي بطابع المارغوريت المتوسط رقم 2

لي استفسار ما معنى مايزينة مفورة
بوركت جهودكي يعطيك الصحة
 
عمرة مقبولة انشاء الله وحلويات رائعة
 
بارك الله فيك اختي على الوصفات كلها رائعة
سلمت يداك
 
عمرة مبروكة وقاطو هايل
 
mer3
w la3kouba lelhaj​
 
عمرة مقبولة ان شاء الله...
 
شكرا لكن اخواتي على المرور ولعقوبة لكن
 
قاطو هايل اختي
عمرة مبرورة
 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top