اليوم كان في بالي كي نخرج من الخدمة نروح نشري شويا حوايج.....رحت درت شويا كل مرة ندخل لحانوت اذا لقيت حاجة عجبتني نجيبها اذا مكانش نجي خارجة....فرحة كبيرة كي تدخل لاباي و تروح تشري حاجة حاجة لناس لي تحبهم...المهم جيت ندخل لطاكسيفون باه نفليكسي صونالي الموبيل و على حساب الرنة عرفتها حبيبة قلبي أختي كشما راح تقولي جيبيلي معك....مدخلتش حكيت معاها برا...أنا نحكي معاها لقيت واحد العجوز تعيطلي يا بنتي يا بنتي....شفت ليها و الله لقيت حالتها حالة....عكاز تاع الحديد...قلت لختي حاوزي روحك راني مشغولة.....رحت ليها قاتلي عاوننيني نطلع الدروج عاونتها...و على حساب حالتها و الله غاضتني حوايجها ماشي نضاف و معندهاش السنين و رجلها مريضة.....كي طلعتها قتلها نخليك كشما تحتاجي قاتلي والله يا بنتي رايحة نقولك حاجة و وجهي مبهدل....قتلها خير برك قاتلي كنت عند الطبيب ذركا و قالي راكي مريضة بالسكر و معنديش الدراه ساخفة في شويا تفاح اذا عنك تعطيني قلتلها معليش....جبدت بورت موني تاعي عطيتها....قتلها ما ادعيلي دعوة خير....بدات تدعي و انا رجعت لطاكسيفون جاتني وحدة قاتلي اختي حابة نسقسيك...حرت قتلها تفضلي قاتلي هذيك العجوز قاتلي اعطيني دراهم قتلها ايه قاتلي عطيتيها قلتلها ايه...تبسمت و راحت عيطتلها قتلها علاه سقسيتيني تعرفيها....قاتلي هذيك عجوزتي...راها كذبت عليك هي صح مريضة مي عندها الدراهم و لاباس بيها مي قاتلي ناضتلها هاذ الفكرة في راسها رجعت تطلب الدراهم من الناس...قتلها انا قصدتني مقدرتش ردها و صح غاضتني حالتها بزاف....كملت ندور ....شويا دخلت لواحد الحانوت مع الدخلة تاع الباب تلاقيت مع هذيك العجوز...شاريا حوايج و خارجة بيهم و كي شافتني عرفتني قاتلي بنتي هاذوا و الله ماهم تاعي تاع الناس ورايحة تزيد تحكيلي كشما حكاية...الصح تبسمت في وجها و بدلت الطريق....ربي يهدينا يا رب
