- إنضم
- 13 جوان 2011
- المشاركات
- 14,518
- نقاط التفاعل
- 19,207
- النقاط
- 971
- محل الإقامة
- : ♥ قلب عسكوري ♥
- الجنس
- أنثى
السلام عليكم ورحمة الله وبركاته
و أنا نقرا في حكايات الأعضاء في المنتدى رجع بيا الزمان خطوات للوراء و تفكرت حكاية من بين الحكايات ألي مازالت عالقة في راسي و كل مايجي عام إلا و نتفكرها ، تنزل الدمعة و معها ضحكة حلوة :$
في حياتي عشت حكايات كاين المرة و كاين الحلوة و كاين لي ممزوجة بين الحلو و المر ، من بين الحكايات كاين حكاية الباك لي تعبت باه نجحت فيه ، كنت من الأوائل لكن القدر مكانش حليفي ، كل عام نقول هذا العام نربح و نفرح عايلتي خاصة ميمتي ، لكن للأسف راسبة ، الأساتذة مخلوعين و أنا أكثر منهم ، 3 مرات و 3 سنيين عشت المرارة عام و را عام و دمعة ورا دمعة و الحلم يقولي ممنوع الاستسلام ، كاين ناس وقفت معايا كأستاذة الفلسفة ألي مننساش كرمها و حبها و حنانها ، كل عام إلا و تخلي حكمة مكتوبة في دفتري ، و مننساش عايلتي و دعوات الوالدة ربي يحفظها و صديقة مكانش مقربة ليا بصح وقت الي حتجت ناس لقيتها هي الأولى و لكن كاينة إنسانة وقت الشدة كانت تلقاني جنبها و لكن كي احتجت ليها راحت لأنها رجعت جامعية :d صحبتي بعد مادات الباك تخلت عليا و رجعت متعرفنيش كي يسقسوها عليا تقولهم علامن راكم تهدروا :s وصلتني هدرة و أقوال لكن قلبي كان متمسك بحلمي و إيماني كان قوي ، صليت و صمت و دعيت ربي نحقق حلمي و حلم لي يحبوني .
خرجت من الثانوية مع أن المدير كان يقولي مدمني هنا منطردوكش ابقي مسجلة و متجيش تقري و نهار الباك روحي فوتيه عادي مكان حتى مشكل لكن أنا خممت نفوته حرة و في نفس الوقت نقرا حاجة تفيدني و أنا نقرا في جريدة الخبر لقيت اعلان تكوين صحافيين في مؤسسة الهلال للصحافة بباتنة ، عيطت لخويا قالي مكان حتى مشكل ، راح سقسى و جابلي معلومات و قدمت ملفي و تمّ القبول و فرحتي كانت لا توصف و لكن فرحة الباك كنت دايما نتمنى نعيشها ، بقيت نقرا و في نفس الوقت تقدمت للمعهد بمارافال وهران و درت اختصاص كاتبة مكتبية و فوت ستاج عند أكبر محامي في وهران :-r ، كنت كل مانرجع للدار نلقى حافلة الطلبة تحط في الطلاب و هذيك لي كنت مسميتها شريكتي كي تشوفني دور راسها لأن نيفوها طالع و ناسية الراسبة آمنة واش راهي دير من وراها :p
المهم فوت الباك و مخبرت حتى واحد فقط أختي و خويا و بنت أختي المقربة ليا و كنت كي نروح نفوت نقول ليهم عندي امتحانات في المعهد فاتوا ليام عادي و كأن أول مرة نفوت ، تخيلو الفشل واش صنع مني في نفس العام كنت نقرا في مؤسسة الهلال و معهد مارافال و نفوت الباك و كأن راني ندرس اختصاص واحد وقتي منظم و كل شي في مكانه ، دينا عطلة في المعهد و في المؤسسة ( قريت فيها بالمراسلة ) و جا وقت اعلان نتائج الباك نضت صباح صليت و دعيت ربي يكون نهار مليح حتى و إذا مديتهش ، رحت مع أختي على أساس رايحة تنحي ضرسها
و توجهنا لمتوسطة لي راح يحطوا الاعلان فيها تلقيت بوحدة كانت تقرا معايا وحد الوقت قالتلي جيبي نشوفلك في موبيليس قلتلها لالا قالتلي جيبي حتى فاجأتني ناجحة منكذبش مصدقتش قلتلها موبيليس و ندير عليهم و بقيت صامدة حتى شفنهم يعلقوا في النتائج رحت نجري و نحوس و الحمد الله لقيت اسمي طرت بالفرحة و بقيت نجري و نعيط يا ربي يا ربي وينك ماما عنقيني ربحت ربحت ، أختي مسكينة مدهوشة فيا و تعيط لدارنا و الفرحة منقدرش نوصفها وصلت لدارنا لقيت ماما عند الباب تقارع فيا و فاتحة يديها الحمد الله يا ربي نغبنت و تعبت عليكم و مخدلتونيش الحمد الله و أنا مش قادرة نحط رجليا في الأرض من الفرحة .و أخيرا حققت الحلم و نجحت و سكتوا لي كانوا ورايا يهدروا و أخيرا و أخيرا الراسبة 3 مرات رجعت ناجحة
تقدمت و سجلت في الجامعة شعبة فلسفة و عامين و تخرجت من المعهد و ديت الشهادة تقني سامي و زدت تخرجت من المؤسسة نتاع الصحافة بشهادة كاتبة صحفية و بعدها بعامين تخرجت من الجامعة بشهادة ليسانس في الفلسفة و تكريم من رئيس القسم و بعدها سجلت و راني نكمل في قرايتي و خدمة و مازلت و في سبتمبر إذا كنا أحياء نتقدم باه نفوت الدكتوراه و لي هدروا و قالوا و تخلوا عليا راهم في نفس النقطة لي خلاوني هما فيها
حكايتي طويلة بزاف عطيتكم نصها برك غير باه نوصللكم العبرة و المغزى :
هذي هي حكايتي مع الباك و الله على ما أقول شهيد ، إن شاء الله تكون عبرة لكل فاشل او فاشلة و نقولكم الصبر ثم الصبر مع الإيمان بأن الله قادر على كل شيء
سلام :regards01:
