نبدا موضوعي بقصة اللي ربما تعرفوها
تع هذا الشاب اللي راح وقرا في أمريكا على علم الأرصاد الجوية ورجع لبلادو
وحد اليوم كان قاعد مع جدو .. قالو الجد : لعشية رح تصب المطر :s
قالو الشاب يااااااااو مكانش منها يا جدّو !! الحالة صاحية وحنا في صيف ورياح جنوبية شرقية وخرطي اخر ...
مي في هاديك لعشية صبت لمطر صح :-o:-o راح هداك الشاب لجدو وسقساه :
انا قريت وهملت فالغربة وتعبت سنين وسنين ونتا كيفاه عرفت المطر ؟
قالو جدو شفت الكلب يتمرغ فالتراب
هيييه قرايتي راحت في تمريغة كلب
رغـــم التطــــور العملي والتكنولـــــــوجي والثقـــافي
ومحو الأمية ، والدين الاسلامي الكافي والوافي
مازال
اللي يروح يشري سيارة يقولك مانجيبهاش كحلة باش مانتقلبش بيها
مازال
الناس كي ترفّ عينو ليسرى يقولك رح نبكي ، وكي يعض لسانو رح ياكل لحمة ، وكي تطيحلو شفرة من شفرات عينو يقولك جايني ضيف ، وكي تاكلو يدو يقولك رح نحكم دراهم ، وكي ياكلوه شواربو رح يسلّم ،
مانعرف ادا كلاوه مناطق اخرى واش رح يصرالو ...
مازالنا
نسمعو اقلب السباط ، ونخافو من البومة والقط لكحل ، وكي نشوفو حمار نرجعو نرقدو ...
بلا مانحكي على الخزعبلات في الاعراس والأفراح والمناسبات ....
يا ناس
التطّير صار من يوميّاتنا .. بكل الأصناف والاحجام ، وقتاش نفيقو بلّي حنا مسلمين
وعندنا حاجة داخل الجمجمة اسمها عقل
نميزو بين الواقع والخرافة ، بين الجهل والعلم ؟؟
هذا فقط حبيت نفتح المجال للحديث على الظواهر المتشعبة اللي تتعلق بالتطير والتشاؤم دون أن اخوض في حكمها من الناحية الدينية راهي واضحة ..!!
ونتوما
اذكرولنا بعض الظواهر الغريبة للتطير وتشمئزون منها
كيف نعمل على استئصالها من مجتمعنا ؟
تحيــــــــة
