كيف اجعل زوجتي تحبني

http://4algeria.com/forum/threads/423934/



السلام عليكم...ذكرت الاخت على فارق السن بين و بين زوجتي هو 6 سنوات فقط
شكرا لمشاركتكم مع اني اعلم ان اجوبتكم ستكون لجانبها الا اني لا استطيع فراقها من فضلكم اتمنى حلول غير فراقها...اما عن اخت الي قتلي خليها براحتها و متراقبهاش والله يا اختي جامي حوست عليها او تبعتها اوراقبتها حتى في تلفون كي نلقاها تهدر منقولهاش مع من و جامي راقبت تحركاتها او تنقلاتها انا تربيت معاها و نعرف كل تفكيرها حتى لو تكون دير في حاجة هك اوهك نفيقلها من عينيها اما على اني نقعد معاها و نحكي حكينا مرتين برك هذا لاسباب تخصها معندهاش وقت و انا مخليها براحتها اذا هكا كامل و راني مقصر وش لازم ندير يارجال جاوبوني يظهرلي اني مدللها فوق لازم و هي لاخبر و دورتها معاها وحد وقت قوة مي منجمتش ولات تخاف مني و تبكي مني وانا غير نهيب برك و الله مفهمت عليها..انا راني منسمحش فيها لذا نتمنى تقولولي يا اخوات وش يرضيكم على وجه ربي فعلا صدق من قال ارضاءكن غاية لاتدرك

رد: كيف اجعل زوجتي تحبني

تم الاعتماد

رد: كيف اجعل زوجتي تحبني

خويا حبيت نسقسيك سقسيتها علاش راهي ادير هاكا
حاولتو كاش نهار تقعدوا كناس بالغين وتتحدثو بموضوعية
نصيحة ليك خويا معظم النساء ميحبوش اللااجل اللي يكون مجنون بيهم يحسو ضعيف
ربي يعاونك

رد: كيف اجعل زوجتي تحبني

الله اعلم أخي لكن حتى في الفلاحة إن سقيت الزرع فوق طاقته سيزهر بسرعة ثم يفسد ويذبل
كن وسطيا لا تحب بشكل مفرط جدا تبحث وتراقب فأنت تخنقها بذلك ولن تحس بقيمتك اطلاقا بل تحس انها تزوجت دون فائدة

في الزراعة نجوعو نهار ونسقو نهار
مثل ذلك استخدم لتكن وسطيا
لا اقول لك لا تهتم بها على الاطلاق
لكن اذهب الى مكان بعيد للسياحة لمدة معينة ولا تتصل إلى اذا اتصلت وحين عودتك أو اذهب لعملك ولا تسأل كثيرا لا تخنقها بحبك الشديد جدا
حينئذ ستحس أنها تزوجت رجل ! فتبحث عن ذلك الحب فيك فتعطيها ذلك الحب أحيانا وبكمية محدودة لكي لا تشبع منه وترفضك ولا تحتملك
كن وسطيا في حبك لها

رد: كيف اجعل زوجتي تحبني

سلام

مافهمتش حاجة من موضوعك اذا راك تحكي عن زوجتك أو خطبتك بمعى هل تم الزواج؟

اذا كانت خطيبتك ممكن بعد الزواج تتبدل لأنك ذكرت أنك متأكد من حبها ليك و هي رافعة نيفها، ممكن يكون خجل و حياءو ممكن تكون متمنعة فقط بمعنى تريدك بينها و بين نفسها

و تقولك اذا ماعجبكش الامر اتفضل طلقني لانها متاكدة ماتقدرش تعملها من اهتمامك الزايد بها
و حتى تفصل في الامر اقلب المعادلة و انت قولها مافهمتكش و اذا حبيتي انا قادر ننساك و مستعد انفصل، و شوف ردة فعلها اذا قاتلك معليش و طلقني الطفلة لا تريدك رسميا ، صلي استخارة في الموضوع و اذا فيها خير ترجعلك و اذا مافيهاش هني رروحك و راح ترضى في الاخير بالامر لي حكمو ربي.

رد: كيف اجعل زوجتي تحبني

مجرد رأي فقط
ما كاش انسان كامل انا نقول ليك أخي
ادا انت ما تصليش لازم تصلي
و ادا كنت تصلي تفكر تروح للمسجد
و تقرأ القران في بيتك و تكثر من النوافل و الدكر
و ادا عندك عادات سيئة اطلب منها انها تعاونك باش تتغير
ادا شافت انك تحاول تكون انسان صالح او افضل

رايح تحس بالامان و بادن الله رايح تحبك
وربي يوفقك و يفرج همك

رد: كيف اجعل زوجتي تحبني

راهي تدلل عليك و عرفت نقطة ضعفك
لوكان تنقص شوي اهتمام بها تشوف الفرق
خاصة اذا كيما قلت هي تخبك و ما تحبش تبين
تولي وحدها تحوس تفهم وش صرا
و كيما قال العضو سابقا
كل شي عندو حساب لا افراط و لا تفريط
و الراجل راجل و مهما كان حبو ما ينساش بلي هو الراجل
نقص شوي اهتمام و تدليل

رد: كيف اجعل زوجتي تحبني

مرحبا اخي
ياو يا خويا والله راهي تتفشش وتدلل عليك هذا مكان تلعبها برك
لان مش عارفة قيمتك لان انت ديما معاها و جنبها و دريلها كلش
احنا نساء و نعرفو بعض
و انسان بطبعو ما يعرفش الحاجة الي عنده حتى يخسرها
نقولك حاجة طبقها و خبرنا ههه
حاول انك تنقص من اهتمامك بيها ديرها كانك وليت مش يهمك الامر سيبو مليت ههه
متسقسيش عليها مين تشوفها ولا حاجة ديرها معلاباليش بيك ههه
و ناكدلك هي راح ترجع تحوس عليك وتقولك واش بيك تبدلت ههه
هاد هو العربي خشين الراس
و ربي يفرحكم

رد: كيف اجعل زوجتي تحبني

اخي انت تحبها لكن مندفع بشكل كبير وما تشكوه غريب اترك هذا لوقته هي صح صغيرة لكن راكزة عقلها كبير انت الي راك تبالغ الحب قبل الزواج ليس اساسا قويا للاستمرار بل العشرة والمعاملة الطيبة تخلي كل طرف يناظل و يقدم كل ما يملك للاخر وفر اندفاعك تحتاجه بعد الزواج اكثر
اخي بكل صدق المراة تحب الرجل الثقيل في كل شيء الي تلقاه حابها بزيادة تتقلش عليه شوف دير واش نقولك سمانة واذا ماجبتش نتيجة زيد 10 ايام او 15 يوم متكلمهاش واغلق الخط في الاوقات الي عودتها تكلمها فيهم واذا اتصلت قولها مشغول ورد بالثقالة
هذي ومبعد الزواج راح تبطل طبايعها

رد: كيف اجعل زوجتي تحبني

الحل الانسب انك تتناقش معاها
وتهدرو في الاسباب لي خلاتها تتصرف هكا
لأنو النقاش افضل شي اكيد راح يخليك تعرف الاسباب وتلقى الحل ان شاءلله
ربي يوفقكم اخي

رد: كيف اجعل زوجتي تحبني

مشي كامل النسا كيف كيف

كاين بزاف فحلات لي يحبو رجالهم ويديرو كل شيء باش يرضو رجالهم كيما راك نتا ثاني تحاول ترضيها

مكانش كيما الصراحة

خرجها كاش نهار لمكان شباب.. شاطئ البحر أو غابة أو مكان أخضر أو حتى مطعم هادئ

وأحكيلها كامل واش في قلبك

وقوللها بلي بتصرفاتها هذي يجي نهار وتكره ويبرد قلبك

قوللها بلي لازم هي ادير جهدها لانقاذ الزواج لأنو الزواج عقد بين طرفين مشي من طرف واحد وإذا مكانش الحب متبادل راح يموت

وزوجتك غبية وسامحني على ذده العبارة... لأنو في هذا الوقت قلما تجد المرأة رجلا يحبها بصدق ويفني نفسه على جالها

ولات العقلية اتزوج وطلق .. إلا ما عجبكش الحال كاين خياتك في السوق

حنا ما نتمناولكش تلحق لهاذاك الشيء

إن شاء الله ترجع لعقلها وتعرف قيمتك

ومكانش حاجة تسوا الحب في الحلال

رد: كيف اجعل زوجتي تحبني

رد: كيف اجعل زوجتي تحبني

سلام عليكم
هاذي البنت بغات تخترع طريقة حب جديد على حساب الشوفة !!

خويا لعزيز شوف كاين طرق بزاف باش تعرف اذا هاذ المخلوقة راهي صح تحوس تزوج بيك ولا نــGولو "تبغيك" ..انت تاني فتح مخك شويا ....وانت تاني شوف لروحك شويــا ...متنساش شكون انت...و الى اي فصيلة تنتمي !! ....واذا مدرتش قيمة لروحك مكاش اللي يديرلك قيمة هاذي ديرها في بالك مليح ...وافهم انك رايح تزوج ..يعني حياة مشتركة بيناتكم ..فيها مشاكل و فيها ايامات حلوين..
خويا لعزيز حاول تسرب اشاعة على انك رايح تبطل هذا الزواج..و ماعدش تحوس تزوج بيها ... و احرص على ان يوصلها الخبر مليح ....
وشوف ردت الفعل ...اذا جاك اتصال من عندها و عيطت و لا رفدت روحها وتكلمت كلام معقول و رجعلها شاهد العقل و حسيتها ندمت ... كانت برك تعزز في روحاها باسكو عارفاتك تبغيها بدل الفيستا من هذاك النهار و زير الحالة
واذا سمح الله مكان حتى ردت فعل من عند المخلوقة كي شغل مكان والو .....بلا ما نحكو و نزيدو نتعمقو "الكتاب مبين من عنوانه" اوكي خيي ......"اللي مافيه نفع للواد ادفع"
ان شاء الله منسمعو عليك كان الخبر اللي يفرح..

رد: كيف اجعل زوجتي تحبني

حشمتونا "" الله لايتربحكم"" رجال اخر زمن المرة ولاتّ تحكم في الرجال تجرّ في وذنيه ويعبدها كثر من خالقوا واش من حالة ربي قال طاعة الله ثم طاعة الوالدين ثم اقر ّ بطاعة الزوجة للزوجة وجوب طاعة الزوجة للزوج في كل الامور ...
بصح انقوللك حاجة لازم تحطها في راسك إذاكانت لاترغب فيك ""ماهيش تحوس عليك"" افهمها ودير القلب
وخملها قشها وحطها في دار بابها وشوف اخرى ألي تتفاهم معاها النساء راهم بزاف
ارفع راسك يا أبا وماذلش روحك للمرة مارهيش مصنوعة من الذهب ""خاوتها في السوق""
وخطينا من الذلل
انا نكره الرجل المذلول اللي يقيمّ النسا ويدير لهم حسابّ "" طلع النيفو.. شوية "" وشبيك مخلوع هاك
الله يسترنا من الذلّ والتذلل

رد: كيف اجعل زوجتي تحبني

السلام عليكم
كلامي مش راح يكون متغير على كلام الاخوات هنا
انت حاول وش راح تخسر
اقعد معاها قعدة نتاع ناس كبار قلها يابنت أنا نحبك وحاب نتزوج بيك ونهنيك ونبنو عايلة فيها الحب والاحترام
قلها نعطيك فرصة شهر مثلا وخمي مليح
اذا حابة نكملو مع بعض هاذيك حاجة تفرحني واذا شفتي روحك مش طايقتني ومش متقبلتني كزوج افسخي الخطوبة من عندك ونشوف بنت الحلال لي تستاهلني ونستاهلها ونتي تاني ربي يسهلك مع رجل آخر

نتا رافض موضوع الفراق نهائيا وهذا مش تفكير ماكش رايح تشري صالون أو تشري قطعة أرض
هاذي بنآدمة راح تعيش معاك اذا ماحبتكش مش راح تعيش معاها مليح راح تكره حياتك لانو الامر بعد الزواج أصعب بكثير
كاين ناس حبو بعضاهم وعرفو بعضاهم وبعد الزواج تفاجؤوا بالعقلية متبدلة شوي
فمابالك نتا !
الطفلة يظهر والله أعلم انها مش تحوس عليك !
راح تعيش معاها وتعيش معاك في حجيم وصدقني راح تندم لانك تزوجتها
ويمكن حتى تولي تفكر في مرا أخرى وتولي تخون فيها باش تهرب من المشاكلها وسماطتها

صح الامر يمكن مش سهل للمرة الاولى ولكن اذا حطيت كرامتك قبالة وأثبتتلها انك راجل بالتصرفات وبالنيف
ممكن جدا راح تبدل نظرتها فيك وتولي تشوف فيك الراجل لي هيا حباتو
اغلب النسا مايحبوش ورا لي يجري وراهم
يحبو هوما يختارو الراجل وخصوصا لو كان ثقيل معاها راح تحبو اكثر واكثر
كل النسا هنا قالولك هذ الشي

نتا جرب وش راك خاسر اجبد عليها وماتسقسيش عليها وقت
بعدها صارحها وقلها رانا كبار مثقفين والامر هذا لازم نحلوه الان مش بعد الزواج
اذا حابتني ماذابيا واذا شفتي روحك مش قادرة تتحمليني او تكوني في داري ونعطيك اسمي يابنت الناس كل واحد في طريق
اتعلم تعفس على قلبك واذا بقيت دايما تحلل فيها وتجري وراها ولا في حياتها رايحة تحترمك او تحبك
هذه هي الحقيقة الله غالب لازم تتقبلها يمكن لما تشوفك راح تستغني عليها وتشوفك رجعت ثقيل معاها او تسمعك راح تخطب بنت اخرى يمكن تفيق مع روحها وترجعلك جرب كل الحلول واعمل لي يخرج عليك

رد: كيف اجعل زوجتي تحبني

السلام عليكم، ... يا أخ إن كنت تؤمن بالحب الأسطوري فلن تنفعك النصائح، و إن كنت واقعي فهاك رأيي :

في هذا الأمر لو يتم نصحك بشكل وافي و تحليل مستفيض فإنه لن يكفي كتاب، و لهذا سوف ألمّح لك بالمختصر المفيد ، و ستفهم إذا ركّزت جيدا بنظر واسع و بعيد ... سأتكلم على أساس أن فتاتك هي في إطار الشخص العادي (أي ليست مريضة أو مختلة نفسيا - و ما أكثرهن -).

أولا أبدأ و أذكرك أن المرأة في العموم مخلوق ضعيف .. و الضعيف لا يعطي شيئا إن لم يتحصل على شيء عزيز عليه ، و أحوج شيء تحتاجه المرأة هو الإحساس بالأمان .. و الأمان لا يمكن أن يوفره إلا من كان قويا أمينا ... كيفية و ماهية الأمانة شيء معروف ... وأما القوة بالمعنى الحرفي هي : الصلابة الجسدية و الصلابة النفسية.

... و الآن كيف على الرجل أن يكون قويا ؟؟

- الصلابة الجسدية لا يعني بالضرورة أن تكون مثل مقاتلي الكاتش أو كمال الأجسام ، و إنما أقصد أن يكون الجسد ذكوري (أي كما يقال وقفة راجل) ، أن لا يكون مائع و طري و مترهل (كما يقال مطلوق و مرخوف) .. و هذا الأمر يتسبب فيه أحد ثلاثة أمور أو كلها : عدم ممارسة الرياضة أو الأعمال اليدوية لمدة طويلة جدا، الأمراض العضوية المؤلمة و المتعبة، الحالة النفسية المزمنة المتردية و القاهرة التي تنعكس على شكل و مورفولوجية الجسد مثل الخوف و الذل و القهر و الحزن ... إلخ، فتظهر الشخص بشكل ضعيف الشخصية و مقهور.
و حتى تعدل و تصحح وضعيتك الجسدية عليك أن تعالج أو تقضي على مسببات الأسباب المذكورة و مصادرها.
مع التنبيه إلى أن الصلابة الجسدية هي عامل مهم في تكوين الصلابة النفسية.

- الصلابة النفسية (قوة الشخصية) تتمثل في قوة العزيمة و الجلد و التحمل ، و التحكم في التفاعلات و الإنفعالات النفسية و العاطفية، أي التعامل مع المواقف برزانة و ثقة في النفس (مع وجود هيبة تفرض إحترام الآخرين لك) ... و في المعاملة الإجتماعية يجب تأكيد الهوية الذكورية حركيا و سلوكيا و ذهنيا و صوتيا ... إحذر التصرفات الصبيانية و الطفولية التي قد تصدر عن لا وعي و دون إنتباه (بسبب التكوين الأصلي منذ الطفولة) ... فتلك الفتاة لا يمكن أن تكون أمك أبدا و لن تستسيغ أبدا أن تلعب معها دور الصبي الذي يبحث عن حنان الأم .. الرجل يبقى رجل، ليس إلى جانبه أي عذر، فهو لا يشتكي و لا يحتاج إلى من يطمئنه أو يواسيه .. و لا ينتظر شيئا، فهو في حرب و مشاق إلى الممات لتوفير الأمن الإجتماعي إلى جانب واجبه في توفير الأمن النفسي و العاطفي لزوجته و أسرته (هذا هو الواقع) ... دعك من المثاليات فإنها تسبب لك الإعاقة في تكوين حياتك و حل مشكلاتك اليومية.

لا تصدق الترهات و قصص الحب، فالواقع شيء آخر تماما ، بدون هذين العنصرين (الصلابة الجسدية و الصلابة النفسية) لا يمكن للمرأة أن تحبك .. ليس لأنها لا تريد و إنما لأنها لا تسطيع ، و هذا الأمر بشكل طبيعي.
بدون هذين العنصرين ستكون محظوظا إن لم تكرهك ... أما أن تحبك فلا تحلم.

ثم بعد كل هذا يأتي الأمر الفاصل و هو ميول القلب ، و هذا الأمر ليس بيد العباد. .. و الطيور على أشكالها تقع.

في النهاية ... على الرجل قبل الزواج أن يترك أولا للمرأة حرية أن تريده أو لا تريده، ثم يحزم الأمر هو بنفسه في أن يقبل بها أو لا يقبل ، أما بعد الزواج فعليه أن يحافظ على حبها له (المودّة) بالمعاملة الإنسانية و القيام بواجباته كرجل و زوج.

أما إذا كانت فتاتك هذه مريضة و مختلة نفسيا (مثل الكثيرات الكثيرات) ، فدعك منها ... لأنك مهما كنت و مهما فعلت فأنت تلاحق سرابا.

رد: كيف اجعل زوجتي تحبني

بمجرد أني قرأت أنك '' تربيت معاها '' فهمت كل الحكاية
'' أنت بالنسبة لها فرد من العائلة ''
قبل كل شي فهمني .. كيف قررت من تلقاء نفسك أنها '' زوجتك '' ?!
لأني فهمت من بقية كلامك أنكما لستما متزوجين !! ..
و زيد على ذلك : قعدتوا مرتين فقط مع بعض لأنه '' ما عندهاش وقت '' -_-
بكل بساطة هي ليست مهتمة بك و لا تحبك و لا تريدك زوجا لها
أتريد حقا أن تتزوجها بالقوة رغما عنها ?! ، تفكريك هاذا خاطئ
فـ الحب يا خيي ماهو بالقوة .. فـ إن لم يكن نابع من القلب فـ هو ليس بـ حب
أتركها تتنفس و تعيش حياتها .. و أنت عيش حياتك مع آمرأة أخرى
لا تجعل حياتك تقف عند شخص واحد ..

رد: كيف اجعل زوجتي تحبني

rycerz
كلام وافي وكافي للأخ بالكمال والتمام :] لا ازيد عليه ولو نقطة
كما حدث في قصة موسى عليه السلام

رد: كيف اجعل زوجتي تحبني

قال هشام رضا:

rycerz
كلام وافي وكافي للأخ بالكمال والتمام :] لا ازيد عليه ولو نقطة
كما حدث في قصة موسى عليه السلام

إضغط للتوسيع...

شكرا لك الأخ هشام رضا على تعليقك الجميل،

معك حق و بالفعل لقد أصبت، فإن لنا في قصة سيدنا موسى عليه السلام عبر و دروس عظيمة.

رد: كيف اجعل زوجتي تحبني

مشكلتك لازم تحلها مع زوجتك باش تحط النقاط على الحروف
حاول تتكلم معها وتفهم وعلاه هك تعاملك وناقشها في كل كبيرة وصغيرة وسقسيها في كل واش يخطر على بالك من اسئلة قبل ماتزوج بها لان لو بقيتو كيما هك وماتفاهمتوش راح يكون زواجك تعيس وتندم على اي لحظة فكرت فيها
ياخويا اذا ماتحبكش ماتزوجهاش بالغصب عليها راح تكون العواقب وخيمة ويقع اللوم كلو عليك وتتعب معها
لازم يكون الحب والاحترام بين الطرفين باش تقدرو تزوجو وانا مانيش نشوف في هذه الصفات في زوجتك

انت قلت تربيتو مع بعض قادر تعزك كيما خوها وما تحبكش انت ممكن تحب شخص آخر

اعذرني اخي في هذه الكلمة في الحقيقة زوجتك ماهيش نورمال كيفاش تلقى واحد يحبها بهذا الجنون ويقدرها ويحترمها وهي دير هك ؟؟؟؟؟؟؟؟؟؟؟؟؟؟؟ ماتبادلكش حتى بنفس الشعور اكيد ماتحبكش لو كانت تحبك ماتقولكش طلقني ساهلة عندها هذه الكلمة فيسع قالتها وماراعاتش حتى شعورك هذا مازال حتى مادرتوش العرس لو تصادفكم مشاكل كيفاه راح يكون تصرفها ؟؟؟؟ماتعرفش حتى كيفاه تتصرف باين الجواب من عنوانو

المرأة لازم تقدر زوجها وتحترمو في فترة الخطوبة وبعد الزواج وتعيش معاه بكل احترام يفرح تفرح معاه وكي يحزن تحزن معاه وتكون زوجة مثالية لكن زوجتك معاملتها وتصرفاتها عكس ذلك
صلى صلاة استخارة واكيد ربي يعطيك اشارة اما تكمل معها او لا ؟؟؟؟؟
اذا مكتبهالك ربي راح تكون ليك واذا ربي ماهوش مكتبهالك لعلم يعلمه الا هو سبحانه وتعالى
اخي اذا مابغاتش تهدر معاك حاول تكلم مع خوها او والدها وتفاهمو بالتي هي احسن اذا تفاهمتو االلهم بارك واذا ماتفاهمتوش كل واحد يختار طريقو وكل واحد يلقى النصيب في جهة اخرى
وتاكد اخي اذا مابغاتش تتبدل من تصرفتها انساها ماهيش هي اخر واحدة في الدنيا ادعي ربي يجيبلك مكتوب من جهة اخرى

واش نقولك ربي يجيب الخير انشاء الله