ساعة روطار ولا رقدة فالسبيطار ...!

sahiko hamza

:: عضو بارز ::
أحباب اللمة
إنضم
14 جويلية 2008
المشاركات
3,676
نقاط التفاعل
2,253
النقاط
191
العمر
38
محل الإقامة
وادي سوف
الجنس
ذكر
سلام عليكم ورحمة الله



رمضان كريم وكل عام وانتم بخير


خاوتي والله محتاجكم كامل في هاد الموضوع
لانو احنا الاعضاء رانا تقريبا من اعمار مختلفة ونستغل الفرصة باه نبهكم على حاجة خطيرة بزااااااف

لي زاكسيدون فالطريق ربي يسترنا كامل

بزاااااف والله بزاااااف
من دخل رمضان وانا نشوف فالصور فالفايس بوك تاع ناس تموت وناس قريب تموت بلا لي حابين يموتوا

على 10 دقايق نروح انا نمشي 200 فالكونتور ؟؟

علاه حياتنا احنا لعبة


كون نبدى نحط الصور اي ماتخلاصش
علاه برك مانتعلموش من خاوتنا لي ربي نجاهم
علاه كي نطلع مع خويا ولا صاحبي ولا طاكسيوور مانقلوش بالعقل نقص شويا
ياخاوتي تمنع مرة زوج تلاتة مرة اخرى تغلط مانقولش بات فيك نقول الله يرحمك ....

عدنا في وقت نخافوا على البارمي تاعنا ومانخافوش على حياتنا



سبحان الله كي ينحولنا البارمي ويضربونا بشهر ونص واحنا بلاشي بارمي نتقلقوا ومايعجبناش الحال وكي نديرو الحادث نقولوا الحمد لله هكا ولا اكثر ونورمال ؟؟


لا قدر ربي ومات واحد قريب ليك كيفاه تكون ردت فعلك

والله بزاف عايلات عادوا بلاشي اهلهم وين راهم ماتوا في اكسيدون ؟
الدوبلاج فالفيراج والسرعة الجنونية ومن بعد ..........



والله نكتب فالكلمات هادو ومتاثر بزاف ولو الحمد لله ماعدنا حتى حادث لكن لي نشوف فيهم كل يوم فالفايس بوك والله حسيتهم اهلي بلا مانعرفهم


الماتريال الله لا رجع
الموصيبة فينا احنا لا رحنا مانرجعوش بالعكس نخلوا حزن كبير فالدار تاعنا


من فضلكم كامل خاوتي تطلعو مع اي واحد وتشوفوه بدا يجري قال لا لا
نموت فالدار ومانموتش فالطريق ولو الموت كاتبة من عند ربي
لكن احنا نديروا سبة للموت ونقولوا الى راهي كاتبة تجي الى راهي مش كاتبة ماتجيش اهنا رانا غالطين


بارك الله فيكم انصحوا لي تطلعو معاهم
قال بابا ولا خويا ولا سي فلان نقص
ساعة روطار ولا رقدة فالسبيطار




السياقة فن وتربية ماشي شطارة ولعب بآرواح الناس


نتمنى من الناس لي دخلت وقرت موضوعي تفهم رسالتي


الله يرحم لي مات فالطريق
اللهم آشفي جرحى الطرقات
اللهم اهدينا وخلينا عاقلين فالطريق

اللهم آمين .



اخوكم sahiko hamza
 
رد: ساعة روطار ولا رقدة فالسبيطار ...!

وعليكم السلام

صح ياخويا منلي دخل رمضان كثرت الحوادث ربي يسترنا

انا الصراحة عدت نخاف نفتح الفايس بووك ونقرى الاخبار
 
رد: ساعة روطار ولا رقدة فالسبيطار ...!

السلام عليكم
كل عام وانت بخير
والله يا اخي حطيت يدك على الجرح
الاخبار لي رانا نسمعوها ونشوفوها يوميا تشيب الراس
ناس طايرة و ماشي واعية خلاص
انا لي يحيرني و يهبلني كفاش يا عجبا نهار كامل صايم وصابر على 10 دقايق ما تصبرش وتلعب بعمرك واعمار الناس
راجلي قبل المغرب يخرج ولادو و يروح يدور بيهم بين ما لحق المغرب والله صدقني ما نهنا و نريح حتى يدخلو للدار بسلام لو يساعفني ما يخرجهمش كامل هو رزين ما نخافش من السياقة ديالو بصح هادوك الطايرين راهم يخوفو
حتى الارقام والاحصائيات المرعبة ما اثرتش فيهم وما توعضوش بها خلاص
كي يقرب المغرب يكلبو والله راسي يوجعني من لي كلاكسون نتاعهم و التقلاق والدبازات
يا ناس هدا شهر الرحمة والنفوس من المفروض تكون هادية و مطمئنة بصح مع من تهدر ناس حابسة ما تخمم غير في البطون و انساو او تناسو المعتنى الحقيقي للصيام
واش نقولو الله يحفظنا و يحفظ كامل احبابنا ويحفظكم انتم تاني من هاد المصايب
سمحولي طولت عليكم بصح الموضوع نتاعك يا اخي فتحلي الطريق باش نخرج لي في قلبي
الله يهديهم صحيت على الموضوع وتقبل الله منا ومنكم صالح الاعمال

 
رد: ساعة روطار ولا رقدة فالسبيطار ...!

والله ياخوياا حمزة موضوعك قمة
بصح واش توصي واش تخلي
النااس قلوبها باردة واسباب الحوادث كاامل نو النااس تحب تلحق قبل الوقت
سواء للدار ولا للخدمة
بعض الغاشي الله يهديهم موسيقى في السياارة وسرعة جنونية
وكي تهدر معاه يقلك السيارة هدا على واش صنعوهاا ربي يهديهم كااامل
والله رانا نشوفو في العجب النااس هاربا من الموت وناس اخرى تخلص درااهم باش تموت
شكرااا.....
 
رد: ساعة روطار ولا رقدة فالسبيطار ...!

السلام عليكم
حـوادث المرور نعياو مانعدو في الأسباب نتاعها
ماتكملش
بصـح يبقى السبب الأول نقص التربية المرورية
وزعما منين يزيد في السرعة غادي يسابق الوقت !
ويلحق في وقت الفطور !
خطرة في عنابة فات على رادار الدرك سيارة بسرعة 280 كم
مقلقين باه يلحقو على ماتش تاع بالون
!
روتري بارمي , زادو في قيمة البروسيات , كثرو الرادرات ...وماكان والو
ماكان حتى حل معاهم
اللهم إذا ولينا اللي ينحكم يجري
يعطوه إعدام
بلاك تنقص حوادث المرور
الله يهدينا

 
رد: ساعة روطار ولا رقدة فالسبيطار ...!



ايه صح
يعطيك الصحة على الموضوع والتنبيه
 
رد: ساعة روطار ولا رقدة فالسبيطار ...!

الله يرحم اللي ماتو
من احياها فكأنما احيى الناس جميعا
أبدعوا بإختراعات لم يخترعها الغرب
من خلال ثورة صناعية مسلمة تنهضون بها

اختراع سيارة مثلا تمتلك خاصيات ارتفاع مقطورة السائق والركاب بإستخدام كاميرات عالية الجودة مزودة بحساسات مبرمجة على تقدير سرعة السيارة القادمة فاذا كانت في خطر ارتفاعت مقطورة السائق والركاب
 
رد: ساعة روطار ولا رقدة فالسبيطار ...!

السلام عليكم اخي
بارك الله فيك .. موضوعك في القمة

والله شي مؤسف انو ربي عطالنا الحياة وحنا نلعبو بيها
كاين شي ناس تروح تشري البارمي وتدفع رشاوي باش تجيبو وهوما لا علاقة
وكشما يدير حادث بسيط وتخرجلو سلامات وتصرا حاجة ل كروستو يغيضو الحال
سوغتو لاكانت جديدة .. كيما يقولك في رجلي ولا في سباطي لحمر

معنديش سمانة كنت مسافرة مع لوتورت والله فتنا ب 3 حوادث مرور
يا للعجب اوتوروت
زوج طوموبيلات داخلين في بعض
والتاني طوموبيل داخلة في الجدار اللي يفصل الطريق

شي مؤسف صح وين ولات الحياة رخست عند العباد قدام الحديد

الله يهدينا و يرحم اللي ماتو ويصبر الاهالي
تحياتي
 
رد: ساعة روطار ولا رقدة فالسبيطار ...!

سلام عليكم اخي كريم
موضوع يستحق نقاش واهتمام
ناس تقولك ازرب ازرب بش تلحق ومنها كثرت حوادث مرور
 
رد: ساعة روطار ولا رقدة فالسبيطار ...!

يعطيك الصحة خويا على الموضوع
و على النصائح
صح عادت الناس تخاف على البارمي
و ما تخافش على حياتها
و ارقام خيالية كل يوم نسمعوها على الحوادث
ربي يهديهم و يرحم لي ماتوا
 
رد: ساعة روطار ولا رقدة فالسبيطار ...!

السلام عليكم
بارك الله فيك على الموضوع جعلها الله في ميزان حسناتك
يا أخي يروحو هوما ويدو معاهم ضحايا خاصة في رمضان ربي يهديهم
انا بعيني شفت اكثر من 05 حوادث هاذ الشهر للأسف كامل دايخين ومزروبين
ربي يسترنا
 
رد: ساعة روطار ولا رقدة فالسبيطار ...!

-انا تبالي اللي يمشي 180 في الكونتير باش يلحق يـاكل هذا مايستهلش البارمي على الاطلاق ...مايستهلش حتى "داب" حاشاكم...
 
رد: ساعة روطار ولا رقدة فالسبيطار ...!

احنا كامل حسابتنا فو فى فو
واحد رمضان نهار كامل راقد كيقرب المغرب يخرج كاش مايقضى واومبعد يبدا يجرى باه يلحق مع المغرب
احنا ماعندنا نى تربية مرورية نى تربية اخرى الا من رحم ربي وحاشا اللى مايتهلش
البيرمى ورجع بالدراهم والمعرفة والسرعة رجعت من اساسيات السياقة واش تستنى

نورمالمون الضحايا اللى كل يوم نسمعوا بهم والحوادث تكون لنا عبرة بصح الله غالب مع من تهدر والفنا هذا الاخبار رحعت الموت حاجة عادية فى حياتنا كانها لا تشكل فرق
والله تقول غير الجزائريين اللى كسبوا السيارات فوق الكوكب الارضى
كما قلت اخى ساعة روطار ولا رقدة فى سبيطار
ميساجك ان شاء الله يلحق
شكرا على الموضع القيم بارك الله فيك



 
رد: ساعة روطار ولا رقدة فالسبيطار ...!

السلام عليكم
والله حجا مؤسفة كي تشوف ناس تموت على جال زادت صامت 5 دقايق ولا 10 مور الأذان
والى زادو صبرو شويا علاه راح تنوض لقليعة
بصح واش تهدر واش تخلي
خلاونا نجرو غير على كروشنا
يعطيك الصح خويا حمزة
موضوع في القمة
 
رد: ساعة روطار ولا رقدة فالسبيطار ...!

الحمد لله انكم كامل فهمتوني
المهم خاوتي ماتستاهانوش بالشوفار تاعكم ولو وش يكون حل عينيك على حياتك
مافيهاش عيب خلاص قال نقص اسيدي نقص كي نهبط انا روح موت وحدك .


ها اليوم برك حطو فيديو من عنابة اب وطفل في حالة مانوصفهالكمش
الموت راها مرة وحدة تجي
اما انا .... راني كل يوم نموت كي نشوف موتى فالحادث ...
 
رد: ساعة روطار ولا رقدة فالسبيطار ...!

الله يهديهم درك صار بيبي و يمدوله الباارمي!
و اروااح الناس جاتهم لعبة
شكرا حمزة
 
رد: ساعة روطار ولا رقدة فالسبيطار ...!

السلام عليكم اخي ويعطيك الصحة على الموضوع المهم
والله صح لاحظنا بزاااف حوادث المرور ديما في رمضان تزييد مافهمتش علاه زاربين هكا كامل باه يفطرو حتى يجيبوها في حياتهم
علاه علييه هكا واش دارهالو
كيما هاذيك المرة كي كنت نحكي مع ماما قتلها كاين لي تلقايه يحب ياكل في دارو يزرب باه يلحق قاتلي كلمة صح عندها الحق فيها كي قلتلها هكاك فاتلي امالا راهو فطر فالجبانة
يعيطك الصحة خويا وربي يهدينا ان شاء الله
 
رد: ساعة روطار ولا رقدة فالسبيطار ...!


و الله يا حزة خويا حنا توالنا في سطيف كل يوم تقريبا واحد ولا زوج ميتين ...

معندهاش بزاف ماتت عايلة كاملة من توالنا ( 6 ارواح )

و كاين حتى لي يقولو رقدة في السبيطار ولا خمس دقايق روطار ...


حنا توالنا عيب كي يدوبليك واحد .. و كي تصوق بالشوي يسمى نتى ما تعرفش و راقد في قشك !!


كي يكونو يحكو يقولو كانت عندي طوموبيل .. ولا رحت للطريق الفلانية ( والله ما دار عليا الـ bras ولد المرا ) يعني واحد ما دوبلاني ...


و في رمضان الساعة لخرة لي قبل الفطور ما نحكيلكش .. اللي يحط كراعو لازم يقفل الكونتور .... وش جابت الطوموبيل .. 160 ..200 ...

دارولهم لي دودان ..دارو الرادارات .. الموطارات .... حاجة ما تنفع ...



يعطيك الصحة حمزة ع السوجي





 
رد: ساعة روطار ولا رقدة فالسبيطار ...!

اليوم راجل قريبتنا

دار اكسيدون على الستة تاع الصباح كان راح يخلص

طلع لعنابة معاه جون تاع 20 سنة

في زوج توفاو ربي يرحمهم

وخلى من وراه بيبي صغيرة 9 شهورا

اكسيدون باشعة في طريق عنابة...الله يرحم من ماتو اجمعين...
 
رد: ساعة روطار ولا رقدة فالسبيطار ...!

صح تدخل للفايسبوك تتعجب من الاخبار
انا رجعت نخاف نصادف صور ما يعجبوش
الله يهدي ما خلق و خلاص
 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top