- إنضم
- 13 أفريل 2013
- المشاركات
- 14,618
- نقاط التفاعل
- 54,535
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السّلام عليكم يــاناس اللمة الغاليين
إن شاء الله راكم كامل بخير وكامل جاز عليكم العيد بالصحة والهنا
لي صراولو مشاكل ربي يصبرو ان شاء الله
ولي عدا عليه العيد مليح ربي يهنيه ويدومها فرحة
وربي يهنيكم كامل ويدوم عليهم الصحة والهنا
أما بعد ، يا خاوتي كيما تعرفو اليوم الأول والثاني تاع العيد
نعديوه كامل زيارات يا إما نروحو نعيدو للناس يا إما يجيو لينا
وحنا كيفنا كيف باقي الأسر الجزائرية ما نضيعوش اليوم الأول تاع العيد ونزورو
الأقارب واحد بواحد ، و علابالي راكم تقولو واش دخل العنوان في زيارة الأقارب :s
تبعوني نقولكم :up:
من بين البيوت الجزائرية لي رحنا زرناها بيت ناس تجمع بيناتنا وبيناتهم صداقة وقرابة
المهم بعد ما دخلنا عندهم بقينا نتبادلو الأحاديث
ونسقسيو على الأحوال، وخاصة حنا الجزائريين ولينا نتلاقاو غير في المناسبات ،
ولما نتلاقاو نسقسيو على كل شي في بعضاه :d
نسقسيو على ( رمضان, العيد, الصحة, العائلة و القراية ..)
ولما وصلنا لموضوع لقراية بقاو يسقسيو فيا واش مدايرة في القراية
ومبعد قالولي "يا بنتي ماتفرطيش في قرايتك هي كل شي"
حتى الآن راني موافقة معاهم وقلتلهم "شكون لي رايح يفرط في قراتو ؟"
واحد ما يهرب من العلم :smile02:
ومن بعد قالولي " علابالك بلي لي يقراو مليح ويكونو متفوقين يرسلوهم
يقراو في الخارج :graduation: مالا اقراي مليح "، وليت قلتلهم هيه وسكت،
مبعد بقاو يشوفو معايا وعلابالي رايحين يذكرو حاجة أخرى ، مالا قالولي
" ومثلا كن يرسلوك للخارج تروحي ؟ " ، قلتلهم لا وسكت بدون فلسفة وباختصار شديد
مالا تخلعو و قالولي " تتمسخري ؟؟ تلقاي كيفاه تروحي للخارج تقراي وما تروحيش ؟؟
بالعكس المرأة كل ما تزيد قرايتها كل ما تزيد قوتها :sport02: وتولي
مكانتها في المجتمع أكبر وقيمتك تطلع بين الناس " ،
هنا اسمحولي ما قدرتش نحكم في روحي وعرفت
بلي راهو الوقت المناسب باه نبدا نتفلسف هههه :d
وليت قلتلهم " أولا باه امرأة تروح لبلد أجنبي بدون محرم ما نقبلهاش وخاصة
إذا كانت متحجبة وتحافظ على حجابها ، بالاك نقدر نقبلها في حالة كانت المرأة
متزوجة وراجلها معاها مسافر وتكمل قرايتها بحضورو هنا بالاك نقدر ندخلها لراسي
أما تروح وحدها هكاك راني ضد ، أما ثانيا أنا ما نقدرش نروح ونبعد على والديا
لأنو عايلتي أكبر شي وأكثر شي قريب ليا وكل حياتي مرتبطة بيهم ،
وما يرفقني عليهم زوج حوايج برك ( الموت ودار راجلي :d ) "
كي خلصت هدرتي واحد ما حب يهدر يدهرلي وصلتلهم المعلومة جيدا :thumb_up02:
مبعد حطولنا القاطو والمشروبات :d وروحنا للدار
درك نتوما يا ناس اللمة علابالي الآراء تاعكم تختلف كاين بالاك لي راهو موافق
وكاين بالاك لي راهو ضد، انا هنا تكلمت على رأيي برك ونحترم كل انسان ورايو
لأنو كل انسان كيفاه عاش وكل انسان وتفكيرو
درك بالنسبة ليكم يا لبنات تقبلي تروحي وحدك للخارج تكملي قرايتك ولالا ؟؟
ونتوما يا شباب اللمة تقبل زوجتك, أختك , بنتك يروحو يقراو في الخارج وحدهم؟؟
ما تحرمونيش من آراءكم القيمة وان شاء الله ما كنتش تقيلة عليكم
واتهلاو في روحكم ، تحياتي للجميع
ســــلآم
آخر تعديل:
