الرشتة البليدية بلمسة عصرية لعيون حبيبتي أم منير،حصري من مطبخي،

السلام عليكم ورحمة الله وبركاته
اليوم جيتكم بوصفة تقليدية بلمسة عصرية معروفة عند العائلات البليدية وتعتبر طبقهم التقليدي في معظم المناسبات
سبق ووعدت أمي أم منير بسر اللمسة العصرية فأقلية من يعرفها ولن أكون أنانية بإخفائها
نبدأ بسم الله بالمقادير
رشتة
بصلة كبيرة
1 طماطم كبيرة
حمص
قرعة (قليشة الكابوية)
لفت
ثوم
زيت
زبدة
ملح
فلفل أسود
شوية كمون
فلفل عكري
قرفة
فلفل حار
ملعقة طماطم مصبرة
دجاجة مقطعة منقوعة في الخل والملح
توابل الدجاج.تباع في أي متجر.

في قدر تحطي طرفين من الدجاج كالعنق والصدر تبشريلهم بصل تدوزنيهم ب فلفل اسود ملح قرفة وتقليهم فالزيت وكي تمرقيهم ويغلوا حطي الخضر اللفت والقرعة اختياري اذا حبيتي ضيفي خضر أخرى
فنفس الوقت تحلي الرشتة فالقصعة وامبعد تحطيها فالكيكاس تفور فوق قدر المرق الأول
في طنجرة
حطي اطراف الدجاج المهمة الأفخاذ الجناحان و قطع من الصدر
تحطي كمية من الزيت و ملعقة كبيرة زبدة تبرشيلها كمية كبيرة من البصل وقيس ملعقة كبيرة ثوم تدوزنيها تحطيلها فلفل أسود فلفل عكري
الأحمر أقصد. فلفل حار ملح قليلا من الكمون و توابل الدجاج الي فالصورة تبرشي حبة طماطم وتزيدي ملعقة طماطم مصبرة
وجومبو دجاج

عذرا منكم ماحطيتش كل الصور أنا تعبانة شوي والي مافهمش ولا حاب يستفسر أنا في الخدمة وأمي طبعا ﻷنها هي الي تعطيني كل الأسرار
نرجعو لطبقنا تقليهم مليح أطراف الدجاج مع التحريك مايتحرقوش امبعد مرقيهم قيس 2 كيسان برك كمية قليلة برك نأكد كمية قليلة وتخليهم يطيبو على نار قليلة وماتزيديش الماء حتى يطيبلك الجاج الماء تضيفيه عند الحاجة برك خليهم يتجمرو فوق النار
فهاذ الوقت تكون رشتتنا فارت نقلبوها فالجفنة ونمرقوها بالمرقة البيضاء نشربوها وحذاري تعجنوها وعاودي رجعيها تفور للمرة الثانية امبعد نحيها وادهنيها بازبدة وكاين الي يفورها حتى للمرة الثالثة انا اكتفيت بتفويرتين

فالطبق ديالك سقي الرشتة مرقيها بالمرق الأبيض بدون خضار وامبعد سقيها من الفوق برك بالمرق الي جمرتيه مع قطعة دجاج وزينيه بالخضر صدقوني بنة لا تقاوم أعذروني على الصور الرديئة كنت مزروبة باه نعشيو ضيافنا نتمنى فهمتو وعجبتكم وتجربوها ان شاء الله

وراني وفيتلك بوعدي أم منير حبيبة الكل
نتمنى تجربيها وترديلي الخبر
وعذرا على الرداءة في الصور وعدم وضع كل الخطوات
والسلام عليكم:love01:
​

ما شاء الله لا قوة إلا بالله
بصراحة جوعتيني وبشدة الله يسامحك ههه
تطبيق رائع ربي يحفظك أختي الغالية
إن شاء الله أطبقها أنا الأخرى
تسلم إيديك يا حلوة
أسعد الله قلبك​

و عليكم السّلام ورحمة الله وبركاته
ما شاء الله والله يبارك
سلمت يداكِ يا غالية
راكي شهيتينا ^^ بالرغم مانحبش الرشتة بزااف بصح والله كي شفتها سخفت ههه

ربي يوفقك حبيبتي وان شاء الله مزيد من الإبداع

تقبلي مرروي​

بارك الله فيك حبيبتي و غاليتي
وعدتي وو فيتي بالوعد
واش نقول لك ربي يحفظك و يعطيك الصحة انت والوالدة الكريمة
الوصفة و الطريقة مفهومة لا داعي للاعتدار
سلامي و تحياتي لناس البليدة
كما قالت العزيزة سكون والله جوعتينا
بوركت
​

حبيبتي يا الرشته يم يمي
نموت عليها روعة مش نكره منها هههه
جميل جدا شاااامممو صحيتي
​