مطلقة مع و قف التنفيذ

الحالة
مغلق ولا يسمح بالمزيد من الردود.

Smile Queen

:: عضو مُتميز ::
إنضم
2 سبتمبر 2012
المشاركات
587
نقاط التفاعل
925
النقاط
51
محل الإقامة
باتنة
السلام عليكم
انا شابة من الشرق الجزائري تزوجت زواج تقليدي ، صديقة ليا التقيتها بعد سنوات هي ما نجحتش في الباك وتزوجت وانا قريت وكملت قرايتي وكنت خدامة في عقود ما قبل التشغيل كي التقيت بيها صدفة
كانت هي ويماها واقفين نستناو كامل في bus وحكينا شوية ومبعد تبادلنا النوامر وبعدها بأيام عيطتلي قاتلي نسيت نسقسيك راكي مخطوبة ؟ قلتلها لالا قاتلي حبينا نخطبوك لخويا ضحكت وجاتني راهي تتمسخر وش من خطبة لي هكا
قلتلها لالا تاخذي رايي شوفولو وحدة اخرى (بيسك بابا واعر شوية وموحال يقبل بخطبة هكذا)
هي اصرت وقاتلي نجيو ومبعد نتي قرري
قلتلها نخمم ونشاور ونردلك
صليت استخارة وبعد اسبوع عيطتلي قاتلي رانا حابين نجيو راه جا خويا (خوها يخدم في ولاية اخرى)
جاو وتم القبول وفات كل شي لاباس عجبني الرجل ناس ملاح وعاقل ويبان متدين وانا بطبعي خجولة
وما فاتش بزاف وقت حب يعقد وماكانش يعيطلي بزاف وهذا الي زاد عجبني فيه اكثر
عقدنا بعد شهر من الشوفة وبديت ننصدم من وقتها
بانو بلي بخلاء وعلقو دارنا بزاف عليهم قلتلهم نورمال وجيت في صفو
قلت ليما المهم متخلق ومتدين ما يهمش الدراهم كاش ماحاجة ناقصة نكملها معندي
وجا العرس وفات روعة وراجلي حبيتو حبني بعد الزواج والحمد لله وعمري ماتخيلتو في يوم يتخلى عني
بعد 3 اشهر زواج بداو المشاكل
انا شرطت الخدمة وداري وحدي وهو وافق لأنو خدام في ولاية اخرى والدار هذيك كاريها وماليه عايشين في الشرق
المهم كي فاتو 3 اشهر جاو اهلو وقالي بلي يماه مريضة وماتقدرش تريح وحدها لهيه وجاو يعيشو معانا قلتلو ماعليش والديك والديا وعجبني الحال وماكانش علابالي وش راه يستنا فيا
كي قتلو ندير تحويل لخدمتي قالي مستحيييييييييييييل لوكان جينا وحدنا تخدمي مي مع والديا وخويا لالا ريحي في الدار
وقلت ماعليش راجلي ولازم نطيعو وهو عندي بالدنيا كلها
يماه بدات تدير واحد العفايس وتمعنيلي بلي لوكان ماتزوجنيش ولدها مايتزوجني حتى واحد وبلي هو بوقوص عليا وبلي وبلي وانا ماكنت نرد لأنها كبيرة وفي مقام يما وكانت دايما بعد ماتحكي هكا تحير فيا كيفاه ساكتة ومانردش وكي يجي تبدا تبكي وتقولو مرتك راهي تصمت فيا
ويخي علابالكم الشاب الجزائري كي امو تشكيلو من مرتو ديراكتمون يذل مرتو ومايهموش الا كانت ظالمة ولا مظلومة وانا كنت عاذراتو وقلت ماعليش يجي نهار ويفرج ربي وكيما نحب يتندار ليما لازم مانقلقهاش ونحطها في عينيا
ومبعد بدات تعرض في الغاشي من ولايتنا خاوتها ومرت خوها ونسابهم ووو
والدار لي كنا عايشين فيها ضيقة شوية كي يكون الغاشي يرقدو النسا في شومبرتي وراجلي يرقد مع الرجال في الصالون وفي النهار يروحو يحوسو ويخليولي اولادهم وتزيد عجوزتي الله يسامحها تشرط عليا المحاجب والشخشوخة بحكم اني شاوية ونعرف نطبخ الحوايج هذو وكنت صابرة وحاملة على وجه ربي وعلى جال راجلي ودايما يما تقولي لي ماتحمل الغش ماتبني العش
حتان مرضت وقالولي لازمك عملية
قالي لازم العملية تديريها لهيه باش كي تخرجي من السبيطار تروحي لداركم يما مريضة وماتقدرش ترفدك
قلتلو نورمال المهم نرتاح برك
ورحت لولايتي مع باباه وامو وهو ماجاش بحكم خدمتو ماقدرش يخليها
كي لحقنا فاتو يومين ولا قداه قاتلي العجوز نديك لداركم هذاك هو تشوفي داركم ومبعد ولي نروحو للطبيب
داتني هي وبعدها بيوم عيط راجلي قالي نقولك زوج كلمات برك راها بيناتنا الجماعة
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
حرت مافهمتش واش صرا اصلا
عاودت عيطلو مايردش
وعيطت لباباه قالي يابنتي ماعلاباليش بصح راهي مش عجوزتك السبة
؟؟؟؟؟؟؟؟؟؟؟؟؟؟؟؟؟؟
زاد دوخني اكثر
بعدا باسبوع هكاك عيط لخويا وتلاقاه هو باباه وحكاو عالطلاق وقالو اسباب ماعندها حتى معنى قالو حبت ترجع لخدمتها ماتجيبش اولاد ومريضة
بعدها بعثو ورقة من المحكمة
هذا الشي في ماي
والجلسة تاع الطلاق تأجلت على جال عطلة المحكمة وضرك قاتلي المحامية حتان 1 أكتوبر
كنت نعيط باش نفهم علاه هذا الشي مايردش مي من رمضان مازدت عيطتلو ولا هو عيط
هذا اكبر ابتلاء صرالي في حياتي والحمد لله راني صابرة بصح مرات العبد يضعف ويبكي على حوايج مايستاهلوش
كنت حابة نكمل حياتي معاه بصح هو تخلى عليا في الوقت لي تمنيتو يوقف معايا
ادعولي ربي يفرج عليا وتفرا الحكاية هذي وفي اقرب وقت تعبت بزاف وانا نستنى
ربي اني مسني الضر وانت ارحم الراحمين
حسبي الله ونعم الوكيل فيهم هو وأهلو
هذي مجرد فضفضة لا تعتبروها شكوى لأن الشكوى لغير الله مذلة
محتاجة نصائح منكم ودعوات وكلمة طيبة ممكن تكون ليكم فيها حسنة وليا انا جبر خاطر ورح تتردلك ذات يوم
 
رد: مطلقة مع و قف التنفيذ

السلام عليكم
الصلاة و السلام عليك حبيبي يا رسول الله
حبيبتي الغالية كل ما يبتلى به المؤمن مما يؤذيه يعتبر مصيبة

الله يكون معاك و يريح بالك



المشكل اللي ديما يصرا في أي حاجة انو الطرف الأاخر و منحكيش غير على الزواج يخلي تساؤل عندنا

لماذا؟؟
خليها على ربي هو يدرلهاا حل _ما تدري بلاك راه كاتبلك الخير في بلاصة اخرى ما تدري

حنا نشوفو فالطلاق للبنات في مجتمعنا حاجة معيبة مي لالا بلاك مرات يكون صح فيه الخير و تنقص عليك ضغوطات كنتي عايشة فيهاا
مدامك انتي مش غالطة في حقهم _وكلي ربي_الدنياا فانية و ناسنا الله يهديهم رجع الزواج ديما مرادفو الطلاق مش أنو الواحد يبني دار و يتهني و يريح أول حاجة يدرهااي طرف يقلك _الطلاق_
الله يهديناا

حسبنا الله و نعم الوكيل







 
رد: مطلقة مع و قف التنفيذ

السّلام عليكم
ختي لعزيزة راني نرعش والله مالقيت مانقول, الدمعة تحجرتلي
لا حول ولا قوة إلا بالله, نتي من المفروض نقدمولك قسم هنا فرغ واش كاين في قلبك ليك طول كاشما تفرغي الحرقة لي في قلبك
انا ماستغربتش من المشاكل لي صراولك ولا غاضوني المشاكل, غاضتني النهاية ماكانتش مليحة , خاطر نص أمهاتنا تعرضو للمثل في زواجهم
بصح الحمد لله كملت مليح , بصح نتي يعني ربي معاك هادا واش نقول
بصح نقولك حاجة نتي مرأة ونص ونفتخر انو كاينة بنت في بلادي كيفك , ماشاء الله نعم التربية وصبر وأخلاق وكل شي
إذا هاد الراجل راح صدقيني رايح يبكي دم على مرأة صالحة ضيعها في حياتو, واذا عاود تزوج رايحة تجي لي تخرجلو عينيه صدقيني
بنات اليوم ماش تاع تصبر وتقعد والله من نهارها تنعتلو الزنباع وين يتباع
والشي لي زاد حرقلي قلبي في حكايتك وخلاني قريب نهبل هي الطلاق بدون سبب, خاصة انك قلتي العمل ووافقتي عليه, واذا المرض والولاد هادي عيب؟؟
ناس جاهلة وماتعرفش ربي صح, إذا مرتك مريضة تطيشها؟؟ وينو الوفاء؟ وإذا مرتك ماجابتش ولاد ترميها؟؟
لا حول ولا قوة إلاّ بالله العلي العظيم, ختي لعزيزة انا نقولك هاد الإنسان مايستاهلش تبكي عليه, لي دارو خير معاك يلقاه عند ربي سبحانو
ولي دارو شر تاني يلقاه عند ربي سبحانو , ونأكدلك هو لي خسر ماش نتي, خاطر ضيع مرأة لي تهتم بدارو وبعايلتو وهو راح رماها
وتاني نسيت كي تقولك راجلك خير عليك ونتي ماشي شابة ومعرف واش, ياك هوما لي خطبوك ماش نتي لي قلتيلهم اخطبوني, ولا نهار شافوك كانت الشمس ضاربة في عينيهم ولا كيفاه؟, أكره حاجة وأكره لقطة نكرها في حياتي هي المعايرة بالمرض والمعايرة بخلق الله
والله العظيم أكره لقطة عندي, خاطر حاجة تاع ربي سبحانو ولي مدلو المرض ولا لي مدلو الجمال لحكمة, وماكانش لي خلقو ربي قبيح
القبح هو قبح اللسان والأخلاق
كاين وحاد من العائلة حكالنا على صاحبو تزوج ببدر البدور العين زرقا والشعر صفر وغير لي يشوفها يحسدو عليها
تعرفي بعد اعوام من الزواج قالو كن ماجاوش ولاد بيناتنا والله ماتقعد دقيقة في الدار, خاطر كرهتلي حياتي , واش يبين هنا ؟ بلي الهنا هو كلشي, ونتي راكي كنتِ لراجلك مثال للزوجة المطيعة
يعني يا ختي مالقيت مانزيد نقول كن تشوفي واش في قلبي بالاك 10 صفحات ومايكفيوش
انا نقولك احمدي ربي وصلي زوج ركعات لله شكر, خاطر ربي حبك من جهة لأنو ابتلاك ومن جهة لأنو بعد عليك هاد الشخص لي ربما مايستاهلش ابتسامة منك
واش نقولك ختي ربي يهنيك وربي يفرحك , ويجي نهار وين المشاكل كامل تروح ويبقاو غير الذكريات الجميلة
احكمي في ربي ومايكون غير الخير بإذن الله
تقبلي مروري حبيبتي
 
رد: مطلقة مع و قف التنفيذ

السلام عليكم

و الله قلبي راه معاك و ربي كبير كبير كبير كبير ... و الفرج راه قريب انتي برك ادعيلوا .................

" و استعينوا بالصبر و الصلاة و انها لكبيرة الا على الخاشعين"

حسبي الله ونعم الوكيل .... ماقدرتش نقول اي كلام لاني دايما لما نسمع حكايات هكذا نحير ... هاذوك عباد ... بشر صح ........ لا حول و لاقوة الا بالله

ربي يعينك و يفرج عليك ..........
 
رد: مطلقة مع و قف التنفيذ

السلام عليكم ورحمة الله وبركاته

صراحة أنا نتقلق كما نشوف نوع من الرجال الي راكي تحكي عليه، وما نقولوش عليه رجل وانما ذكر !!
وخاصة الي يسمع أمو كثيرا في كل صغيرة وكبيرة في الأمور المتعلقة بحياته الزوجية، صح لازم تسمع لأمك
ولكن تدخلاتها عندها حدود، لو شفت زوجتك عندها حق قول لأمك بأنه عندها حق وقف لجانب زوجتك، ماشي
لما تكون أمك غالطة وتوقف لجانبها ضد زوجتك !! والسبب تقول أمي أمي أمي، والمرأة الي جبتها من دارها
مصونة ومكرمة وشكون الي يدافع عليها !! علاه ولينا نشوفو في الأزواج يلعبوا ببنات الناس، يقولك راهي
حابة تخدم وماكانش الأولاد ومريضة، الخدمة أنت قلتي بلي تفاهمتو، وزايد الأولاد ممكن يكون المرض من
عندو مش من عندك أصلا، والمرض نتاعك الي قلتي عليه بلي كنت مريضة، والله هاذي تحير !! واذا انت يا فلان
كنت مريض تطلقك زوجتك ثاني !!

من مفروض والدة الزوج لما تعايب مرتو، مثلا الجمال يقولها ابنها انا نشوف زوجتي باهية ونص وماكانش في العالم
مثلها، أصلا علاه تزوجتها كون ما شفتهاش جميلة !! .. هاذا النوع من الأمهات يجيهم نهار ويسلكوها، ونوع من الذكور
الي يلعب ببنت الناس يسلكها في الدنيا، لأنو رانا في الوقت الي تشوف فيه كيفاه ربي راهو يسلك في الناس في الدنيا قبل
الآخرة.

المهم أخت الكريمة، من الأحسن مادام زوجك لعب عليك (مع كامل احتراماتي على هذا اللفظ) إلا أن الله عز وجل غني كريم
كما أنه على كل شيء قدير، ما تخافيش من صفة الي راح تلصق بيك اي الطلاق، وما تقوليش بلي خلاص ولا واحد راح
يتقدم ليك، قادر يتقدم ليك واحد يعاملك كالملكة معززة ومكرمة وما يخصك والو، قادر يتقدم ليك واحد يرضى عليك وما
يهموش بأنك مطلقة وو

الموضوع بالنسبة ليك انتهى وخاصة أنك ما نجبتيش مع هذا الانسان أولاد، من الأحسن ان تفكري في حياتك وان تهتمي
بنفسك، وما تنسايش بلي الله عز وجل يوقف مع عبده المظلوم، وما تدريش واش يخيبلك الله عز وجل من المفاجآت الي
هي أكيد راح تسعدك وتخليك تبكي لأنك حينها راح تشكري الله عز وجل أنه أنهى حياتك مع هذا الانسان، لأن حياتك بعده
راح تتحسن أكثر أكثر.

الله يصلح أحوالك أخت الكريمة، وكوني ايجابية ولا تفكري في هذا الموضوع، واجعليه (نسيا منسيا)، ولا تسيئي الظن بخالقك
فهو لن يتخلى عنك ما دمت مؤمنة به .. وكوني متفائلة بالغد الأجمل باذن الله ^^

وشكرا جزيلا لكم على اتاحتنا هذه الفرصة للمشاركة .. في امان الله وحفظك :regards01:
 
رد: مطلقة مع و قف التنفيذ

دعوة المظلوم ليس بينها و بين الله حجاب

قولي الحمد لله لي عرفتي حقيقتو قبل ما تجيبي معاه أولاد

و زيد على حساب ما فهمت من كلامك ربي بعدك على هد الدار هدوا مش فاميليا اصلا

الى كان الراجل يحتقر زوجته و بابه و يماه يشوفوا و ساكتيني هدا يدل على انهم قوم لا يفلحون

كيفاش المراة تحب بنتها تعيش في سعادة بصح زوجة ولدها تعيش في المشاكل ؟؟؟

الحاجة لي نقولهالك لي خلق ما يفرط و هدا راجلك مش راجل اصلا لأن اسباب الطلاق لي تكلمت عليها

اسباب تافهة و كان قادر ربي يبليه بيها هو و يرجع ما ينجب اولا و كل يوم مريض فراش .

و للأسف هو ناسي بلي ربي هو لي يبلي عبدو.

اختي ربي هانك منهم و مزالك صغيرة و ربي يلاقيك بولد لحلال.
 
رد: مطلقة مع و قف التنفيذ

السلام عليكم اخيتي
أحييك على صبرك والله قليل لي كيما انتي انا لوكان في بلاصتك كون راهي دموعي ويدان
مي انتي الحمد لله ربي عطاك وحد الصبر وسعة الصدر نادران
ربي يجازيك عليهم ان شاء الله
فهمت من خلال كلماتك انك أكيد مظلومة وشيء طبيعي تكوني مصدومة مي صدقيني الشاعر لي قال هاد البيتين ما كذبش
لا تظلمن إذا ما كنت مقتدرا *** فالظلم مرتعه يُفْضِي إلى الندمِ
تنام عينك والمَظْلومُ مُنَتَبِهه *** يدعو عليك وعين الله لم تنم
وكلي ربي وهو يجيبلك حقك ويجي نهار وين يعرفو قيمتك
تجيهم وحدة تعصرلهم الحامض يولي يتحسروا على ايامك
بزاف بنات صراتلهم كيما انتي ، والسبب راجل أو ذكر عديم الشخصية يتبع كلام اهلو وعينيه مغمضين
كون جاء كلام فالصلاح معليش مي كلام الخراب والفساد؟ كااارثة
انا نحير فالعجوز اللي ديما حاطة عنادها بعناد كنتها؟ كي عدتي حابة تخربي حياة ابنك علاش زوجتيه مالا؟
دوكا اختي اللي فات مات وما تزيديش تبكي عليه ما يستاهلش تطيحي عليه الدمعات
مي يليق باباك وخاوتك يعصرولو القارص في عينيه باش يفهم بلي بنات الناس مش لعبة

وكلام اختي لؤلؤة واخي نجيب كفى ووفى
ربي يكتبلك لي فيه الخير ونسمعو عليك أطيب الأخبار

 
رد: مطلقة مع و قف التنفيذ

السلام عليكم ربي يكون معاك و يعوضك خير منو ان شاء الله و الصبر مفتاح الفرج
 
رد: مطلقة مع و قف التنفيذ

السلام عليكم
قصتك تأثر بزاف أختي
نت صبرتي ودرتي لعليك وكثر وتحملتي حوايج ماكانش لازم تتحمليهم لانو في الشرع نت تزوجتيه هو وملزمة بيه هو مشي غيرو المهم شا نقولك الحمد لله لي مشيتي بنيتك وما ظلمتيش وما ضرتيش مه ونقولك راكي تهنيتي من واحد ولد أمه خسارة كلمة رجل فيه
وربي يعوضك بأفضل منه
واياك تبكي عليه لانو سمح فيك بكل بساطة هذا مايستاهلش منك حتى تحزني
وتفائلي خيرا تجدينه الدنيا ما تحبسش عند زواج ولا طلاق بالعكس تبدا من عثرة وتنطلق
 
رد: مطلقة مع و قف التنفيذ

والله يا أختيي أخذتي من قلبي النصف ، افففففففف وشحال صعيبة الدنيا ، راني حاسة بيك ، ديري في بالك يجي نهار ويندم لأنك مظلومة وكلي عليه ربي وخلاص
 
رد: مطلقة مع و قف التنفيذ

ربي يشافيك ختي ويفرج عليك
خلي إيمانك بربي كبير
واذا ربي بعدهم عليك فهادي حكمتو سبحانو بالاك كانو غادي يضروك اكتر واكتر بالاك بعيدة عليهم تستناك حياة افضل
انت راكي بمستواك و خدمتك و بلا اطفال لي تخافي عليهم معليش خليه و عيشي حياتك و ربي يفرج علييك
 
رد: مطلقة مع و قف التنفيذ

شكرا لكم اخوتي واخواتي ربي يفرحكم
خلاص اطلقت عندي ضرك 3 اشهر تقريبا مازال ماخلاصتش العدة
فاتت عليا مرحلة كآبة غير ربي لي يعلم بيها
مي ضرك ا لحمد لله راني لاباس ونحمد ربي على كل شي
وهوما وكلت عليهم ربي حسبي الله ونعم الوكيل
ربي يعطيكم ماتتمناو يارب
 
رد: مطلقة مع و قف التنفيذ

حكايتك ضرتني بزاف
ناس متخافش ربي ....... معرفتش ادا خطباتك لولدها علاش دارت هكدا علاش ....كما تدين تدان يجي نهار لي يرجعلها كلش كلش داك نهار تعرف واش خسرت ..و راجل هذا اسفة مي منضنش يزيدوه مع قائمة الرجال ..كلشي قلتي نعم حتى انهم يسكنو معاك في دار ضيقة و طعتيها و كنتي تاع صح مرا فحلة و ضروك .....وكلي ربي حنونة ..كما تدين تدان ...كلشي يرجعلهم متخميش
 
رد: مطلقة مع و قف التنفيذ

شكرا حبيبتي ربي يخليك
الحمد لله هذا مكتوب ربي واكيد الخير فيما اختاره الله
 
رد: مطلقة مع و قف التنفيذ

لاحول ولا قوة الا بالله
 
رد: مطلقة مع و قف التنفيذ

يا اختي قصتكي فعلا مؤثرة جدا لوكان وحدخرا لوكان كشما دارت في روحها و لا هي لي طلبت الطلاق
و الله لنعم الزوجة كنتي ربي يحفظك
الحمد لله ربي هناك منو و من اهلو و ربي يعوظك بزوج صالح يفهمك و يوقف معاك وقت الشدة تاعك

تحياتي
 
رد: مطلقة مع و قف التنفيذ

ربي يكون معاك و يعوضك خير منو ان شاء الله و الصبر مفتاح الفرج
 
الحالة
مغلق ولا يسمح بالمزيد من الردود.
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top