- إنضم
- 13 أفريل 2013
- المشاركات
- 14,618
- نقاط التفاعل
- 54,535
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
مرحبا بناس اللمة جميعا كبيركم وصغيركم
إن شاء الله راكم لاباس؟؟
اليوم رايحة نكمل بإذن الله سلسلة الاخت ساندريلا زماني لي عنوانها
حكايات من العالم الآخر
والفكرة انو كل مرة يقدر عضو منكم
يقدم موضوع ويكون هذا الموضوع خاص بحكاية من حكايات العالم المجهول
واليوم رايحة نطرح ثاني عدد من هاد السلسلة المخيفة
لي أقل من 15 سنة مايدخلش راني مانظمنش :smile02: واي حاجة تصرالكم ولا كاشما تحسو عبد وقف من وراكم مالا الهربة تسلك
المهم اليوم وفي موضوعنا الثاني جيت نحكيلكم على قصة من القصص المرعبة لي مرت عليا في حياتي
مالا اتنفسو مليح وركزو معايا كلمة بكلمة
كيما سبق وحكيت في أحد المواضيع السابقة داخل اللمة عن قصص رعب سمعتها في صغري وكاينة لي عشت تفاصيلها
وهاد القصص كاملة صرات في بيت جدتي المرعب
بيت جداتي هو كان بكري عبارة عن مقبرة، يعني كانت مقبرة كبيرة بزاااف ومن بعد قسموها على النص، نص خلاوه مقبرة ونص بناو عليه طرق
وبناو عليه باطيمات ومنهم العمارة أو الباطيما لي ساكنة فيها جداتي
يعني بالاك كن درك يحفرو تحت الباطيما رايحين يلقاو بالاك هياكل عظمية تاع عباد
وهاد الباطيما في 50 سنة لي فاتت يحبلك ولا تحلم باه تعدي من تم على خير خاطر الاشباح ماش رايحين يخليوك تعدي على راحتك
لأنو كاين قصص عديدة ارتبطت بهاد العمارة المخيفة
مثلا يحكيولي خوالاتي وماما سابقا كن فليل تنوض ويروحلك النعاس رايح تندم على النهار لي زدت فيه
رايح تسمع رجلين رايحين وجايين من الغرف الأخرى رايح تشوف الباب المقبض تاعو يتحل ويتغلق
رايح حتى تحس بيد تمسحلك على مخدتك
وكن واحد يقعد وحدو في الدار يسمع الهدرة في باقي الغرف تاع ناس يتناقشو بأعلى صوتهم
ولا مثلا كن يخرجو من الدار ويطلعو راسهم جهة الطاقة يشوفو شعب يطل عليهم من الطاقة بصح ماش من سكان البيت
وبلا قصص أخرى اكثر رعبا
ولدرجة الباطيما هادي محسوسة كاين حتى عباد لي رماو رواحهم منها
كاين بنت رمات روحها من الطابق العاشر ليلا واخرى من الطابق الخامس لكن مع الصباح
وبقات ارواحهم فيزوج تدور داخل الباطيما ويمسعوهم كل ليلة طالعين وهابطين
المهم علابالي انو نصكم مثل هاد القصص والفتو بيها حتى ولات مألوفة في أفلام الرعب
وكاين حتى لي مايصدقاش
على هادي حبيت اليوم نحكيلكم قصة مختلفة وغريبة عن هاد الباطيما ولي تأكدت منها شخصيا
مالا قديما كيما يحكيولي خوالاتي وماما كانو بكري قبل 30 سنة او اكثر لما وحدة فيهم تحط راسها على المخدة وفي وقت الgايلة تسمع صوت
إمرأة برا تبكي وتعيط بأعلى صوتها وتقول " ولدي مات "
لكن غير تنوض لي سمعت الصوت وتروح تطل من الطاقة تلقى الشارع فارغ وماكاين حتى عبد ولما تسقسي باقي خواتاتها يقولولها ماسمعنا والو
ومن بعد وراها بنصف ساعة أو ساعة حتى يسمعو بموت شخص سواءا من سكان العمارة ولا من الجيران
ولا من العائلة، في الاول خوالاتي مادارولهاش بال لكن من بعد ولاو غير وحدة فيهم تسمع صوت المرأة بعد ساعة او نصف ساعة يسمعو بخبر موت شخص
انا لما كبرت شوي وحكاولي هاد الحكاية ماأمنتش بنسبة 100 بالمئة مع اني نصدق ماما وخوالاتي
بصح العقل الواعي ما يتقبلهاش لأنو هادا علم غيب على هادي ماكنتش متأكدة تماما
مالا في يوم من ايام العطلة تاع الشتاء بالاك وكان العام الاول تاعي في الثانوية نشفى عليها كنت انا وماما وختي عند جداتي وكنا في وقت الgا يلة قاعدين انا
وختي وخالتي (لي نعتبرها كي ختي وكتر عليا ب 6 سنوات فقط) نحكيو ونضحكو وندردشو حتى لحقت ال3 وفجأة
دخلت وحدة من خوالاتي ووجها مخطوف قعدت قدامنا وقاتلنا علابالكم قبيلات وانا غير حطيت راسي باه نرقد ونسمع المرأة تاع عام عام
لي كانت تبكي وتقول " ولدي مات " ، وكانت مستغربة خاطر ماسمعوش صوتها لمدة طويلة تتجاوز 20 سنة
هي غير قاتلنا وحنا وجهنا طلع صفر
حسيت روحي في تحدي ونستنى، اذا مات كاش عبد معناها صح واذا ما مات حتى شخص معناها كذبة
ساع ولات ختي تبكي
مالا كي شافتها خالتي خافت قالتلها راني كنت نتخيل برك ماكانش منها واصلا مستحيل تظهر بعد مدة طويلة
المهم بقينا قاعدين وساكتين وقلوبنا مايعلم بيها غير ربي كل واحد فينا يستنا في روحو غير يموت
وفجأة صونا تيليفون ماما وبابا لي عيطلها وقالها راني جاي جهة داركم، كي سألتو عن السبب قالها درك وين وصلني خبر موت أب صاحبي
( وبحكم صديق بابا هادا نعرفوه ويمشيلنا وباباه يسكن قريب من جداتي يعني تفصلهم مسافة 20 دقيقة مشي على الاكثر )
تما كي سمعنا بقينا حابسين، ساع قاتلنا خالتي راني قلتلكم بلي صوت المرأة دايما يصدق
انا تما أمنت وتأكدت بنسبة 10000 بالمئة
عندي العديد من القصص المخيفة لكن باه نخرجو على روتين القصص لي تشوف بيها وجوه مخيفة
وتسمع أصوات مخيفة قررت نحكيلكم هاد القصة
هيا واش رايكم فيها؟ وقداه من واحد ما خافش؟ بينو رواحكم يا الشجعان
هيا ابقاو على خير وبلاكم من الكولوار فليل ماتدريش واش قادر يخرج ههههه
تحياتي
نتمنى يعجبكم هاد الموضوع وهاد السلسلة وتتفاعلو معاها
فقط لي يحب يقدم الموضوع لازم بعد 3 ايام
ويراسل الاخت ساندريلا باه ميتخلطوش علينا المواضيع
ونشوفو شكون اكثر واحد يرعبنا
فقط لي يحب يقدم الموضوع لازم بعد 3 ايام
ويراسل الاخت ساندريلا باه ميتخلطوش علينا المواضيع
ونشوفو شكون اكثر واحد يرعبنا
