حكايات بنات الطبعة الثالثة-العدد الأوّل-

السلطانة

:: أمينة اللمة الجزائرية ::
طاقم الإدارة
إنضم
19 سبتمبر 2009
المشاركات
51,395
نقاط التفاعل
84,068
النقاط
821
محل الإقامة
الشرق-الوسط
الجنس
أنثى
do.php




إنـْ شآء الله كامل تكونو بخير




غالياتنا لعزيزاتـ حبّينا نمسيو ونصبحو عليكم بكلمة حلوة


wardah.gif
بالورد نرحبو بيكمـْ و بشويّة سكر نرشو عليكمـ باش قعدتنا تبقى حلوة غير معاكمـْ


كيما اعلنا على اعادة احياء هذه الفكرة

حكايات بنات يعود من جديد

اللي تجمع النقاش حول موضوع ما
بين 4 اخوات من المنتدى

وضيفات هذا العدد هنّ:

Ľă Mîšš HîBă
Hiba habouba
ملكة زمــآني

بنت الـ25


اول حكاية راح تكون على موقف صرالي انا شخصيا صادفني وبلوكاني راح
نبداو نحكيلكم موقف وكل وحدة فيكم تعطينا رايها وتعلق براحتها


حكايات بزاف يصراولنا واليوم اخترلتلكم عفسة صراتلي ليا أنا شخصيا لما كنت ندرس في الجامعة.
وأنا راكبة في الbuس مع صاحبتي لانتيم على السبعة تاع الصباح وكان شتاء والبرد يجمّد ،مالا ركبت ورانا وحدة وبقات تحكي هي وصحبتها
وحنا نسمعو فيها :bravo01:
شغل السكات وواحد يحكيلك في وذنيك ذراع ;)
قالت لصحبتها:تعرفي أنا كرهت هاذ لحكاية تاع وهاب يانقولو يجي يخطب يانتورنيلو كاش فيلم أكسيون نخليلو مخو حابس
صحبتها :تلافو يجيب خلافو ،تقدري تركبي لاpيس لوخرا وتكملي تحكي مع أمين
ياك قتيلي بلي راه يحبك
قالت لصحبتها:أواه أنا عيني على صلاح عندو الدراهم ومرفه بزاف وزيد قالي كون نخطبك نديرلك دار وحدك ولي تبغيه نديرهولك
وراه نية مسكين واش نقولو يقبلني ساهل باه نكلحو :graduation:
صحبتها :مي انتي قتيلي بلي تحب وهاب ومام معندو والو تكملي معاه :s

قالت لصحبتها:ياي وهاب معندو والو افهميني منين نقولو دير حل يقولي ملقيتش خدمة ولازم تصبري معايا ونحبك مي الحب مايوكلش عيش كيما يقولو :down:
صحبتها :اسمحيلي مي راكي خلطتيها بزاف انا معدتش نفهمك
قالت لصحبتها:لازم نصايد واحد قبل مانتخرجو يابنتي منيش حابة نخرج من هنا فارغة يخي يقولك القافزة تجيب l'homme ومعاه الديبلوم :thumb_up02:
صحبتها :مي أنا قاعدة نسنى في مكتوبي
قالت لصحبتها:قتلك اقفازي يابنتي راهي تطفر فيك افكري 4 ولا 5 ولي يصلح هاداك هو
صحبتها :منقدرش ورانا وصلنا انزلي انزلي....


كيفاش بانتلكم هاذ الحكاية ؟
ممكن تعملولنا عليها تعليق ؟
حكاية من الواقع ممكن تعطونا آراء خاصة ؟
نقاش مفتوح..ورأي خاص ؟

do.php


ـ
2146196589641452343.gif


وهنا في الجزء هذا تلقاو آراء بنات العدد والمناقشات تاعهم

Ľă Mîšš HîBă



كيفاش بانتلكم هاذ الحكاية ؟
والله الصراحه حكايه لوجيك ومعقوله لاني نقرا فلجامعه وعلابالي بتخمام لبنات بخاسك كيما هك واكتر حاشا بنات لفاميليا
ممكن تعملولنا عليها تعليق ؟
كيما قلت لعقليه لي راهي دور دوكا هادي هيا تحت شعار قلب الحجره تلقا عشره بصح يدوها من عندي ياي والله غير تخلاص عليهم مــــــــــــال
حكاية من الواقع ممكن تعطونا آراء خاصة ؟
واالله بنات كيما هادو نحسهم مزال موصلوش لمرحله النضج مالقري تلقايها 23 ولا24 سنه يعني كبيره ومتعرفش صلاحها تحساب زواج غير دراهم وتبياش وتقلاش
معلابهمش بلي مسووليه وووو وبهد العقليه مش راح يبنو دار ع الصح ورح يكون مصيرهم الطلاق لانو لي يتبني ع الكدب عمرو مايدوم
نقاش مفتوح..ورأي خاص ؟
انا والله ومن دون زياده ماتهمنيش الماده بكنر ماتهمني العاطفه والمشاعر ندي واحد نحبو ويحبني ونعيشو ع الحلو ولمر خير من ندي واحد شاريني بدراهم
وكلشي زايد لانو الدراهم والمتريال زايد وفاني ويجي يوم وين يروح كلش
وشكون لي عندها حق من زوج الصحابات هاذم ؟
انا مع لي تحوس ع الحب وماشي لي تحوس ع شكون عندو كثر,,,,,,,,,,,


شكرا ام ياسمين يعطيك الصحه
كان ليا الشرف اني نكون معاكم في اول عدد
نتمني لكل بنات اللمه انو يرزقهم بزوج الصالح



df5.gif



Hiba habouba


Hiba haboubaمساء النور اختي أم ياسمين...واش راكي لباس ؟؟؟ :) :)
شكرا لك لي ختاريتيني وحدة من المشاركات في الموضوع ..هذا شرف كبير بالنسبة ليا :-r
الحكاية من الواقع ...كما قلتي و فيها كفاش يخمو البنات فغيمو تنخلعي بزاف ..تصيد من كل جهة و تشوف لي يصدق
.......مهمهاش شكون لي تكمل معاه حياتها كتر مهمها شكون عنده دراهم بزاف ...
تفكرت حكاية هكدا
مرة شخص (أ) خطب بنت (س) كملت الخطبة وافقت يمات عرفت بلي الشخص (أ) عنده خوه (ب) غني بزاف راحت عنده قالتله انا كنت حاباتك نتا و من هدا الكلام قاللها ساهلة فسخي الخطوبة من (ا) و انا نجي نخطب و صرا الفسخ ناس تنخلعت من السبب و جا الشخص (ب) لي باع خوه و خلاه صغير في عين الناس و خطبها و تزوجو هي خلات الشخص المربي العاقل الاخلاق على جال المال فات زمان هداك (ا) خطب و ربي رزقه باطفال و دار و زوجة صالحة و هديك باقية لحد الان في فيلا دايما عايشة تشك في راجلها و مجابوش اولاد و لقات روحها باعت الهنا باطل (قصة حقيقية و الرجال خاوة )
هكدا الناس يخمو في الدراهم و نساو امه حاجة لبناء اسرة
............و حكاية تانية هكدا كنت انا شاهدة عليها تقريبا نفس حكايتك لنت معايا قالت كمل مع فلان و راني مع فلان و فلان يحبني و من هذا الكلام بعدها قالتله شخص توضف في سوناتراك قالولها شديه برجليك و يديك :eek: ......
انا بالنسبة ليا المال سبب تعيشي مليح بصح ماشي سبب للسعادة و ماشي بيه تبني اسرة اهم شروط الزواج الاخلاق الدين
و حاجة زاوجة من حكاية تشوفي البنت تحكي مع 10 و 20 و تقولك ناويين الحلال ...تطيح من قيمتها على اساس يتزوجها كاش واحد
و كاين لي توالف حتى تتزوج يخص تدير اصدقاء (من شب على شيء شاب عليه ) .....ديك دقيقة تقول حابة نتزوج و بعدها تلقا روحها تمشات في طريق نهايتها مكانش .......و مرات تلقيها تتكلم مع ناس متزوجين و تقولك ناويني الحلال ....و حتى و شيوخ ميهمش المهم ترجع مدام بعد مكانت مادموزال
....بزاف نعرفهم بهدي العقلية مي بعد الزواج تقولك ندمت ...اولا تبقا تشك في راجلها و هو يشك فيها اون بلوس ادا فاقو دارها كارتة و زيد ربي ميرضاش علينا....
انا ضد هذي تدي لوم و ديبلوم ..باسكو الزواج رزق من عند ربي ماشي نروحو نعرفو 1000 عبد باش نتزوجو و كل واحد نقوله رواح خطب
تلقيها عندها 14 تقوله رواح خطب و هو يكون 16 هههههههههه ربي يستر


df5.gif



ملكة زمــآني



وعليكي السلام والرحمة
الحمد لله
وانت تانيك ان شاء الله راكي مليحة

اكيد ام ياسمبن

كيفاش بانتلكم هاذ الحكاية ؟
هذه لحكاية بانتلي بلي وحدة خلاطة
{تحب روحها}وين تلقى الفايدة تروحلها
ممكن تعملولنا عليها تعليق ؟
والله هذه الطفلة زعما متعلمة وراهي في الجاميعة ودير هكدا مع الرجالة
على حسابها لازم تبروفيتي وين تلقى صلاحها تروحلو و خلاص


حكاية من الواقع ممكن تعطونا آراء خاصة ؟
كاين كيما هدي لحكايةواكتر
صح تكون ناوية تكمل مع واحد وغي تسمع بفلانة دات واحد لاباس بيه
حتى هيا تحب تعاندها وخلاص
صح والله كاين الي مكترمن هديا تلقايها مخطوبة وعاقدة
وتهدر مع واحد في التليفون
والله لعجب ولى كاين
سيغتو تلقايها مخطوبة وعندها شعال من واحد
الراس نتاعك يحبس
حابة نعرف برك كيفاش لوحدة تقولك علاش ربي ماكتبليش هديك الحاجة
وهي راهي غي مع حوايج يغضبو ربي
المشكل انك راكي غي تكدبي وخلاص

نقاش مفتوح..ورأي خاص ؟

هد الطفلة تالمو قارية وفاهمة ومكفاهاش واحد تحب تخلط
مام صاحبتها قلتاها راكي تحبي {وهاب}وهو كي عاد ماعندوش دراهم
ومايقدرش يعيشها لمعيشة الي تحبها هي صافي تحب كل شيء سيغتو الدار
ايا تحب تلعب بمشاعر شخص واحد اخر
{صلاح}ماهيش تحبو لشخصو هو تحبو علاخاطرش عندو دراهم ويوفرلها Gـــــآع واش حابة
مي هديا وين تلقى مصلاحتها هديك هي
وزيد دارتلي eroor نتاع الصح تحكي معاهم في زوج
زعما واشنوهذا مكفاهاش واحد تخليه وتزيد واحد اخر
ايه ولى كيما يقولوها {خلطها تصفى}


رايي الخاص

هد البنت تحب التخلاط وين تلقى المصلحة نتاعها تروحلها
ولوكانت ماتحبش الشخص لنفسه تحب غي على انو لاباس بيه عندو دراهم ويفششها ويديرلها دارها
والحوايج الي تحبهم

وين تلقى الفايدة نتاعها روحلها زعما كي عاد {تحب وهاب}الله غالب
هو فقير صافي قدو قد حالو مايقدرش يديرلها كل شيء لازم تستغنى على حاجة
مي هي لالا تحب غي روحها برك صافي بدلاتو بواحد {ولات تحب صلاح} ولا تكذب عليه وعلى روحها
باسكو هو المفيد نتاعها الدراهم و الدار و......الخ

مي هدوما لحوايج ماكش كامل مهمين الاهمية والفايدة انك تكون عندك كلمة وماتلعبيش بولاد الناس على خاطرش هديا
دنيا والدنيا دوارة علاش ماتحكميش غي واحد وخلاص
ومع الوقت كل شيء تقدري ديريه
وشكون لي عندها حق من زوج الصحابات هاذم ؟

صاحبتها الي عندها الحق
:up:
قالتلها انا نستنى في مكتوبي
على بالها بلي كل شيء بالمكتوب
وعلاش تقلق روحها

df5.gif
بنت الـ25

كيفاش بانتلكم هاذ الحكاية ؟
والله بكل صراحة انا بانتلي لحكاية عادية وما تشوكيتش
لاخاطر وين نروح نلقى هاد العقلية ، فالجامعة ، برا ، فالخدمة باغتو يخمو هكدا
ولبنات تع دوكا ما عادوش كي تع بكري ، تع دركا يخممو فالزواج نهار يتعلمو يمشيو
ولقراية رجعت بالنسبة ليهم حاجة كمالية مش ضرورية، وهات يلسقو برك ميهمش فيمن المهم راجل
ممكن تعملولنا عليها تعليق ؟
هاد الطفلة (1) مولات لحكاية تنطبق عليها وحد العبارة سمعتها في فيلم
قالك : "بعض النساء كي القرودة ما يطلقوش غصن حتى يتعلقو بواحد اخر" خخخخخخخ
وهدا اللي شفتو من خلال هاد الحكاية ، لالة حاكمة في امين وعينها في وهاب وناصبة على صلاح
مي اللي حيرتني علاه ما خممتش كون يفيق بيها امين بلي تحب وهاب وناصبة على صلاح وش يصرالها؟ أكيد نهايتها تكون مأساوية
حكاية من الواقع ممكن تعطونا آراء خاصة ؟
الحكاية هادي فكرتني في حكاية تع وحدة كانت تقرا معايا فالجامعة
الطفلة هادي هي البينوم تاعي درنا مذكرة التخرج مع بعض
هي على حساب ما تحكيلي ملي كانت تقرا فالليسي كانت مع واحد تعرفت عليه اسمو زاكي
هو مولا شكارة ، صوارد وفيلا وطوموبيل وحطات ، بيان سيغ هاد الشي لي جبدها ليه
المهم الـ 3 سنين تع الجامعة كانت تتلاقاه برا يجي فالطوموبيل يستناها خارج الاسوار وتروح معاه
مي فالسنة الرابعة صارحها واحد يقرا معانا اسمو حسام باعجابو بيها وانو من اول سنة وهو معجب بيها وزاد اعجابو كي ما شافها مع حتى واحد فالجامعة
وما حبش يهدر معاها استنى حتى قرب العام يخلاص باش ما يفسدلهاش سمعتها ، وناوي يخطبها اول ما تتسقم اوضاعو المادية وووووو
هي انبهرت بشخصيتو واخلاقو وحبتو صح وتعلقت بيه ورجعت ترقد بحسام وتنوض بحسام ، بصح من جيهة اخرى بقات مع زاكي لاخاطر خايفة حسام ما يزربش يكون روحو يطير زاكي من يدها وما تربحها ني منا ني منهيه
بقات حاكمة في هدا وفي لاخر
، قلبها مايل لحسام وعقلها يقول زاكي
حتى وحد النهار جاها زاكي للجامعة كي شافها متريبونديش عليه التلفون ، هي خافت يشوفها حسام ايا ركبت معاه وراحت
انا كنت في وحد الكلاسة نخدم فالميمواغ تعنا، المهم نلقى رقم غريب عيطلي ، هزيت شكون قاتلي راني انا ، عيطت باش نقولك
ابقاي فالبلاصة لي راكي فيها حتى نجي لاخاطر راني عيطت لحسام كي قالي وينك قتلو راني مع مينة برا نتغداو اطونصيو تخرجي ويشوفك وحدك
قتلها ومنين عيطتيلو وتعمن هاد النيمرو ، قاتلي تع زاكي عطاني باش نعيطلك معنديش ليزينيتي وقلت لحسام بلي نيمرو تعك ما يعيطش فيه
المهم انا قتلها ازربي ارواحي وناوية نديرلها درس لاني منحبش لبنات لي يلعبو على الحبلين كيما هك
لكن تجري الرياح بما لا تشتهي السفن
طولت عليا ما جاتش ، وانا راح عليا الحال لازمني نروح ، ايا خرجت من هديك الكلاس ونطيح فاص آ فاص مع السي حسام
ما هدرش معايا ، مي راح ديراكت هز تلفونو وعيط للنيمرو هداك وتفضحت الحية
نلقى لالة جاية تجري من بعيد ما جات توصل لحقها حام عطاها وحد الكف لدرك انا نتفكرو فما بالك هي
وراح بلا ما يقولها اي كلمة
وسكّتي يا مينا هههههههههه والمشكل الكبير انها ما علابالهاش وش حكى هو وزكي
المهم بعد ايامات جات تقرا قاتلي حكمني زكي عطاني طريحة شوية هك قتلني وفالدار قتلهم اقريساني واحد كي ما حبيتش نمدلو التلفون ضربني
المهم دات فيها كف من عند هداك قدام الناس تع الجامعة وطريحة من عند لوخر وما ربحتها ني منا ني منهيه ، وجابتها مدة وهي قافلة على روحها ومعزولة على الدنيا وهادي مد ما سمعتش عليها حتى خبر
نقاش مفتوح..ورأي خاص ؟
انا في رايي الطفلة تحكم في ربي ، وتخاف على سمعتها وسمعة عايلتها قبل ما تقدم على حتى خطوة
لأنو الشرف تع الطفلة مش ملكها وحدها ، إذا فقدتو رايحة عايلة كاملة تتحمل العواقب
وشكون لي عندها حق من زوج الصحابات هاذم ؟
أكيد الطفلة الثانية هي لي عندها الحق ، والله مهما الطفلة تعرف واحد وتحبو ولا تخرج معاه فالأخير رايحة تدي اللي ربي مكتبهولها
علابيها يلزمها تخاف على مستقبلها مع الراجل اللي رايحة تتزوج بيه خصوصا غذا بدا ينبش فالماضي تعها
نتذكر طفلة كانت تقرا معايا فالليسي كانت كيما هك من واحد لوحد لدرجة شغل بيها واحد يقرا معانا قالها انتي كابال كي تكبري ديري تعدد الأزواج
وراحت ايام وجات ايام وحد نهار نلقاها عيطتلي تترعد قاتلي خطبني واحد من تيزي وزو ومنعرف شكون حكالو عليا كي كنت فالليسي
راهو عاصرني قالي يا اما تعترفيلي وحدك ولا نروح نسقسي عليك فالبلاصة وين كنتي تسكني ونجيب الرسمي ، تحسب راني علابالي شكون حكالو
وانا ملي دينا الباك انقطعت اخبارها عليا
علااااااش ما تخموش كي تزبلوها وممبعد توليو تترعدو وتقولو يا ندامتي؟؟؟



df5.gif





نشكر بنات اللمة على الابداء بآراءهن
ونقوللهم يعطيكم الصحة :thumb_up02:



وفي اللخر نختمو الموضوع بنصيحة للبنات:

متكونيش خلاطة من جا تروحي ليه
استري روحك وصوني عرضك
اسم باباك متلطخيهش
اقراي قرايتك وربي يجيبلك المكتوب مكنلاه تديري كيما الطفلة لي في الموضوع

وأخيرا تحياتنا للجميع.


ملاحظة :

بقية العضوات يمكنكن مناقشة الموضوع أيضا من خلال الردود


:regards01:






 
آخر تعديل:
رد: حكايات بنات الطبعة الثالثة-العدد الأوّل-

حالياً الأعضاء النشيطين الذين يشاهدون هذا الموضوع: 6 (1 عضو و 5 ضيف) ‏أم ياسمينdz
 
رد: حكايات بنات الطبعة الثالثة-العدد الأوّل-

السلام عليكم

شكرااا للعضوات


و الله هذي الظاهرة عاد نشوفوها بزاااااااف لاسباب مجهولة

انا وحدة تقرا معايا قاتلي علااش مدريش هكا وكها مي انا قلتلها انا خاطيني هذو الصوالح والديا رسلوني نقرااااا

ابا قاتليانت وحدة جايحة ما علابالكش بلي كي تخلطيها تسلك

الصراحة ما كنتش نتوقع منها هذي الهدرة من ذاك النهار مازتش درت معاها وخبرت ماما

في الاخير ربي يهديهم هذوك البنات

تقبلوا مروري
 
رد: حكايات بنات الطبعة الثالثة-العدد الأوّل-

السلام عليكم ورحمة الله تعالى و بركاته
كيفاش بانتلكم هاذ الحكاية ؟
نتاع وحدة جاهلة لا علاقة بالتعليم و الثقافة
ممكن تعملولنا عليها تعليق ؟
والله مش حاجة جديدة علينا و راكي تعرفي نص بنات اليوم كيفاش يفكرو ناقصات فالعقل هما حطين الزواج هو كل شي و الوحدة كي تخلط معنتها راهي ضمنت مي العكس
حكاية من الواقع ممكن تعطونا آراء خاصة ؟
بزاف يخمو نفس تخماماها هي راهي عزباء تهدر هاك كون نحكيلك وحدة مخطوبة و تخمم هاك دايرة بورطابل واحد لخطيبها و الأخر تحكي مع الولاد باه تضمن كان خلاها خطيبها راهي مصيدة من البورطابل الثاني هههه و المشكل تلقيها زعما تقرا و مثقفة
نقاش مفتوح..ورأي خاص ؟
الله يهدينا و يهدي الجميع ربما العنوسة لي رانا عايشينها خلاها تفكر هاك ربما خايفة تقعد في دارهم و لكن تفكيرها غالط الوحدة مادامت تؤمن بالله و المكتوب و بالقدر وغيرها لازم تفكيرها ميكونش هاك لأن هذا تفكير نتاع وحدة جاهلة لا علاقة
والبنت الثانية اكيد عندها حق لازم نستنو المكتوب
 
رد: حكايات بنات الطبعة الثالثة-العدد الأوّل-

الله يبارك 74 مشاهدة وردين لاأكثر !!!

نتعبو ونقدمولكم مواضيع وفي الأخير

تشوفو الموضوع وتهربو !!!!!!!
 
رد: حكايات بنات الطبعة الثالثة-العدد الأوّل-

السلام عليكم
لي عودة باذن الله
في امان الله
 
رد: حكايات بنات الطبعة الثالثة-العدد الأوّل-

شكراااااا على الطرح
رغم مشاركتي كانت قصيييرة البورطابل رتيح يهبلني
والله كنت نخمم في الموضوع لقيت بلي اي وحدة دير هكدا (رخيسة) معندهاش قيمة ابدا ابدا
تحوس وين تلقا مصروفها و خلاص ....حتى يكون متزوج تخربله داره عادي و شفتها و يديرو مخططات كبار باش يوصلو

ولات باش تتزوج تدير العجب تلصق من و من و من و تشوف لي يصدق و نحير في الراجل لي عنده نورمال (ديوث) و علاباله مي يقولك نحبها اي حب هدا
ربي يلطف
لي عودة باذن الله
 
رد: حكايات بنات الطبعة الثالثة-العدد الأوّل-

بنت ال 25 ----->
شفتني هذي البنت مصدق حسام مصدق زاكي صدقو ا غير زوج كفوف تعقل عليهم حياتها .....واش داها تخلط بزاف
كون شدت واحد ماشي خير على الاقل صفعة وحدة
ربي يهدينا
 
رد: حكايات بنات الطبعة الثالثة-العدد الأوّل-

ووووينكم يالبنات مش باين حسكم
ام يلسمين نقترح عليك نبدلو مكان وضع هاد الفعاليه ونحطووه في فسم نشط اكثر
 
رد: حكايات بنات الطبعة الثالثة-العدد الأوّل-

الف شكر اعجبتني اراء الضيفات في الموضوع كل واحدة كانت لها اراء واثرت الموضوع اكثر





كيفاش بانتلكم هاذ الحكاية ؟
حكاية رائجة في بلدنا كثيرا
ممكن تعملولنا عليها تعليق ؟
ظاهرة كارثية
حكاية من الواقع ممكن تعطونا آراء خاصة ؟

انا ايضا اوافقك في الفتيات في رايهن ان هذه الفتاة لعوبة
وتصطاد في المياه العكرة حتى تجد صيدها الثمين ولاتبحث عن الزواج الذي يبنى الحياة الزوجية بجد

ومثلها كثيرات في المجتمع

نقاش مفتوح..ورأي خاص ؟
اسلوب تتبعه كل من لاتخاف الله
للاسف وهناك كثيرات اوصلهن هذا الاسلوب وتزوجن وكأنه لاشيء قد حصل !
دنيا غريبة وعالم أغرب
سترنا الله وهدى جميع بناتنا
تحياتي

 
رد: حكايات بنات الطبعة الثالثة-العدد الأوّل-

مواضيع في القمة
فرونشمو كاينين في هاذي الدنيا
بارك الله فيك
 
رد: حكايات بنات الطبعة الثالثة-العدد الأوّل-

men 9abl kont netchoka men had les histoires, mais doka ki 3raft w cheft bnet bzeeef hakda yghidhoni

hia meskina theb roha w tekhdheb 3la roha thani; mtal3a 9imetha comme si ged ma ta3ref rdjel w tel3eb bihom ged ma rahi bahia w 9affza
dayrin le but f denia zwedj w hadret ness, maalabalhech que "kama toudin toudaan" ydji nhar win sah tezewedj b le riche w l beau gosse mais tdi wahda teser9ola wala wladha thani ydoro bihom wled lehram !!

 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top