مشكلتي من مشكل تافه إلى قطيعة تدوم شهور

الحالة
مغلق ولا يسمح بالمزيد من الردود.

مشكلتي

كلمة المرور: 4algeria2024
إنضم
19 أكتوبر 2013
المشاركات
777
نقاط التفاعل
4,348
النقاط
51
السلام عليكم ورحمة اللّه تعالى وبرگاته
اخوتي اخواتي في الله ادام الله المحبة والطمأنينة في قلوبنا
انا فتاة عشرينية قصتي لديها ربما ثلاث سنوات حيث تعرفت على شاب الذي هو خطيبي و زوجي امام سنة الله و رسوله ولكن بالفم فقط
لا أنكر أنه كان يعشقني وحتى الان وانا اعلم ولكن التصرفات تغيرت 360 درجة ساعات نقول نزع قناعو وساعات نقول محال هو
حبينا بعض و مرت عقبات بزاف في حياتنا وكان دايما يتهمني باشياء والله العقل ما يتقبلهمش وكنت نتعذب و نعرف بحكمة كفاه نقنعو وكان اي مشكل يعملو ميقدرش يفوت يوم بدون ان يسأل عني صحيح شديت عليه ديفوات بزاااااف نورمالمو ميتفاتوش وكلامو مكانش كيما فعلو ودايما كنت نقنع روحي بلي انا المخطئة في حقو لانو ذو قلب ابيض مي نارفو بزاااااف
عودتو في شيء انو يخطأ ويهز شنافتو كما نقولوها وانا الطرف لي يرجع يحل الخلاف بعد تكبر منو و ميرفدش عليا حتان نولي نعيط من نومرو آخر ...صار خطيبي و يوم خطبتي كان أسوأ يوم فحياتي الناس تبات تفرح و تتفكر في اللحظات وانا بايتة ننشف في دموعي والامر انو خطيبي لم يأتي بمستحضرات الخطبة كلموه دارنا وقالولو لازم هك وهك وهو جيست خرج من دارنا عيطلي حسبتو راح يباركلي مي سمعت كلام لا استطيع قوله و نعتني بالمنافقة واني موقفتش معاه وكذلك بعد ايام انا من يبادر الصلح كالعادة وهو يتكبر و يطغى ..هو يظهر في المشاكل من العدم والله لست ملاك والله انها الحقيقة مثلا مريبونديتيش عليه يهز شنافتو و يكوبي وانا نبقى نتمهبل كلشي باه منحسش بلي ظالمني وهو لي حساس برك اني نقلكم اتفه اتفه الاسباب تفتحت عيناي و كبر عقلي و وليت نخمم لقدام كفاه راح نعيش مع انسان هكذا في المستقبل حتى الحب لي بيناتنا مخلالوش طعم
شيء آخر اخبرني انني ساعيش كالسجينة و بديت نخمم للقدام طلب مني ندير جلباب مع العلم اني قسما بالله مستورة والحمد لله مصلية نخاف ربي صحيح غلطت ومكانش لي ميغلطش في الدنيا هاذي مي حاليا زاد تعلقي بربي سبحانو و صليت الاستخارة و دعيت ربي وكل ما اراه انني احقد عليه و اني مش راح نتهنى معاه مانعرف وساوس شيطان ام هي علامات من السماء
فيما يخص طلب الجلباب قتلو نديرو مي مدامني راني في دارنا ومانيش نخرج خلاص بشوي و نزيد نفاتح دارنا بالموضوع وهو ليه سنوات من طلب من امو ديرو و كي قلي انا دارتو هي وقالي امي دارت جلباب وانت وقتاه ديريه وبدا يفتعل في المشاكل كالعادة وانا انصت كالعادة نسكت مانيش مليحة نهدر مانيش مليحة والشيء لي يستفز انو يحكي وش حب ويقول صحا ويكوبي و في الصباح عيطلي ناس تقول صباح الخير وهو من لخر يبدا بالمشاكل وانت وانت ...وانا نحكي معاه دق الباب جات خالتي حطيت تلفون ورحت نفتح الباب دخلت خالتي وجيست دخلت رفدت تلفون تاعي وانا زربت كوبيت...وليت عيطت موراها فايت 20 مرة لمدة يومين والله ما فخرني لحد الساعة مرت عليها شهر بالتمام والكمال وقسما بالله من يراني يحسبني حمار حشاكم يسوق فيه وسكوتي ماهو الا عدم زيادة الطين بلة وانا اقسمت اني منعيطلوش نهائيا ...
نحكي لكم قصة صرات في هاذ الشهر عيطلي رقم وانا اقتلوني ومانرفدش على رقم منعرفوش بعد مدة عيطلي خطيبي بعد ما رفدت عليه قسما بالله كلمت اهلا وش راكي ماقالها قالي كشما عيطلك نورمو قتلو انعم قالي انت لي عيطتيلو فايت 4 مرات و نميرو نتاع ما ودرتولها جديد وهو خدام برا على اساس قال لامو اذا عيطلك رقم جديد قوليلي و زعما انا عيطتلها وقالي منين جاك النيمرو وانا نستغفر ونشهد ونقلو معيطتش امخلوق قالي يسما ما تكذب قتلو حاشا لا انت ولا امك تكذبو مي يا خويا انا مش نكذب روح كومفارمي مع امك و ثم الهدرة قالي راكي سير قتلو 100 سير وكوبا ولا كأنو عامل شيء ولا عيط ولا حتى سقسى وانا نوجعو هو وكل من يريد بي شر الا بكلمة حسبي الله ونعم الوكيل
حكاياتي فقط عبرة عمرو الانسان مايستغنى على روحو ويقلل من قيمتو سيرتو مع انسان ميقدرش ومايستاهلش انا لوكان يقلي نحيلي لحمك واعطيهولي منبخلوش وهو لحد اليوم يقلي موقفتيش معايا
الحل بيد ربي سبحانو دعواتكم ليا بالزوج الصالح التقي العفيف الشريف وحتى اذا مكانش كاين زوج دعواتكم ربي يبعد عليا وعلينا اجمعين البلاء لاني كرهت ابتلاء الناس
لحد الساعة مكانش وعد وعدني بيه وكان قدو آبار الخطبة مالڨري اسوأ يوم في حياتي انا ستغنيت على روحي على خاطرو ماشي معناتو مشتاقة راجل او ميتة على زواج بالعكس كرهت الزواج و كرهت حاجة يسموها راجل و حتى حابة نقعد في دارنا وهو مقاطعني وانا منيش حابة نزيد نحكي معاه خلاص مانعني من كلش وانا مكانش شيء درتو بلا مشورتو حطيتو راجل وهو حط روحو فرعون عليا
نزيدكم مانعني من الفيس بوك ليا 3 سنوات وهو كل مرة يدير واحد ونكتشفو ويقلي هاذي تاليا ودوكا دار واحد قالي عليه وعطاني مود باس و اليوم لي تدابز معايا بدلو المود باص عادت تبانلي ندير واحد و نكومونتيلو على لي ستاتي لي حاطهم والله كلهم موجهين ليا وخاصة ستاتي قالي فيه تتحدثي على النفاق وانت فالاعناق فيه تتخبطون لي مقدرش ظروفي المادية ولاعبها واقف معايا نقلو باي باي و قالي في مساج تانيك استناي راح تسمعي خبر تالمو يفرح يدوخك .
ولم يتبقى الا القليل ...يعني الواحد ناقصو وش راه يشوف سيرتو من عبد راح تعيش معاه لواش برك علاه كي يلقاو مرا معاهم قلب وقالب يشربوها لمرا
لا حول ولا قوة الا بالله وحسبي الله ونعم الوكيل
والحمد لله رب العالمين
 
السلام عليكم ورحمة الله وبركاته
يا أختي العزيزة أول شيء ننصحك بيه هو الدعاء و الإستخارة لما تستخيري الله اطمئني فما كتبه الله لك بعد ذلك هو الأفضل أكيد
وأنصحك بالإكثااار من الإستغفار حبيبتي
وإذا كان شايفة بلي أمك من النوع الي يفيدك أحكيلها واستشيريها
إذا كانت من النوع الي يكتم الأسرار و تقدر تفيدك وتنصحك استشيريها أما من النوع الي ديما تجي ضد و تحكي كل شيء ماكالاه تحكيلها
أما الشروط قوليلو أنا مش هي الي نتصرف فالشروط هوما أهلي الي يتصرفو أنت تحكم عليا وقت نكون مرتك في دارك ومنعاونكش
هذا إذا كانو أهلك صعبوها عليه قوليلو أنا معنديش دخل فالأمر أهلي يلي شرطوا وهوما يتصرفو أما إذا كان عندك دخل إعتذري له
حاولي تكوني قوية أختي وتصبري ديما ,, وأستغفري وأدعي ربي وما تشكي لحد إلا لله يعني متخرجيش مشكلتك للناس وإلا تزيدي فالمشكل أكثر وأكثر لأنو الناس لسانها مش ليها
ربي يعينك أختي و يوفقك و يهنيك يا رب
 
السلام عليكم اختي
ربي يفرج عليك ان شاء الله ربي
كيما قاتلك الاخت Twinkle صلي صلاة الاستخارة و اكثري من الاستغفار
اختي مزال ما عقدش عليك و لا فتح و شفتي روحك متقدريش تكملي معاه بعدي عليه و الانفصال افضل حل هذا النوع من الرجال يا اختي انا منقدرش نعيش معاه هذا قبل ميدخلك لدارو دار فيك رايو ؟؟؟
شوفي مع والديك صارحيهم بالشيء لي كاين متخبيش عليهم هوما الوحيدين لي يعرفو صلاحك و يقدروا يفيدوك
و لي مفيه خير في نفسو مفيه خير في الناس
انسان مغرور مدارلك حتى قيمة انتي ثاني طنشيه و متكسريش راسك بزاااااف
كلشي بالمكتوب و لي فيها خير ربي يجيبها
استشيري والديك و صلي صلاة الاستخارة
ربي يفرج عليك حبيبتي
 
راني نشوف في حكاية نتاع مرااهق طفل صغير مازال ما يعرفش صلاحو
يااختي عيب هذا الشي اذا كان صح واقع وهذا ماشي خطيب وماشي زواج
انا نحير في راجل يحط راسو مع راس الطفلة الحب ماهيش انو تصطنع الشجارات
مع خطيبتك ولا تحب دير استوار عشق ممنوع
لازم يمشيو بعلية عشقها عشقاو خطبها رفضاتو او خطبها وصراتلو مشاكل
ربي يهدي ما خلق وانت ختي الوقت مافاتش صلي استخارة وشاوري اهلك وخليه
عند حدو سلام
 
شوفي اختاه نصيحتي ليك ابتعدي على هاد الشاب لانه كرامتك فوق الجميع سيكون صعبا عليكي في بادئ الامر لكن اصعب الشيء بدايته تم تتعودين وما مات احد من الحب
 
كاين هاد النوعية من الرجال وكتر من هاك على حساب واش تحكي هاد الراجل موسوس يا سراتله حاجة في حياته خدعوه ولى يشك في خياله ويفتعل المشاكل من لا شيء، يا سامع بقصص هاك وتاثر بيهم، يا راها تبانله يكسرك قبل ماتروحي عنده وتولي تخافيه وديريله الف حساب
شوفي هدا على حساب حكايتك يبغيك يموت عليك على بيها راه مفوكر لي راه طايح لوف راكي خاربتله في مخه بزاف هاديك هي راه يتفشش فيك خايف تستغلي هداك الحب وتحقريه بغا يتغجى بيك قبل ماتتعشاي بيه
هدا راه قاع الوقت موسوس عليك راكي في باله دايما لوكان مجاش يبغيك يحكي خطرة فالزمان معاك ومايهمه حتى شي
كاين حب من هاد نوع يبغي يعدب ش حبيبه باش تقعدي مبرونشيا غير معاه تقعدي تخمي علاه يدير هاك وعلاه وعلاه وعلاه وتاكدي راه يطير بالفرحة كي تعيطي بزاف ويجي النهار لي يقولهالك هاد الراجل باغي يكون الكل عندك
المهم الله يجيبلك لي فيها الخير صلي صلاة استخارة واسيي تبدلي العقلية معاه كي بزعف خليه ماتعيطي ماتحوسي زيري على قلبك غادي يطول باش يحكي معاك مي يحكي ونزيدك كي يحكي غادي يدابزك ويقولك كلام يجرحك وممكن يقولك سايي باش انت تخافي وتجري مراه لا خليه يكوبي وزيدي صبري غادي يدير صوالح باش يخرب فيك وتجري مراه زيدي صبري وتشوفي النتيجة ان شاء الله يولي احسن كي تحسيه غادي يخسرك هو غادي يحري موراك وبالتوفيق
 
والله انا ما خلعاتني التصرفات ديالو كيما خلعتيني نتي
واحد كيما هذا ارمي عليه الما ماشي حتي تشاوري الناس
مازال ما داك لعندو وشوفي واش دار فيك تسما نهار تولي مرتو يدير فيك عجب
وهذا ماهوش حب اسمحيلي لي صح يحبك واالله مايدير فيك هكا
ويبانلي هذا واحد مريض نفسي باين من التصرفات ديالو ولوكان تكملي تشوفي الويل معاه
اجبدي روحك مااكان لا استخارة لا دعاء صدقيني هذا مافيهش خير وغير مؤهل للزواج
وملي قلتي كان يمعني عليك فالفيسبوك فهمت بلي عقلو صغير وفارغ شغل
نصيحة ليك يا اختي اجبدي روحك من ضرك قبل ما تظفر وديري في بالك بلي ما تظفر غير فيك اني
وماجيبيها غير في صحتك وربي يرزقك بوليد لحلال لي يعرف قيمتك وينسيك فهاذ التافه هذا
 
السلام عليكم ورحمة الله

من اللخر هذا تافه وديجا راكي صمدتي لليوم معاه جيت أنا راني فيلتريتو من زمان حتى باه يعيطلي يلقاه يكوبي في وجهو ونزيد نقولو بيك بالخطبة تاعك روحو لجهنم.

بعض أشباه الرجال كي يحبو يسترجلو يعملوها مع الطفلة كي يلقاوها قد يدهم والغلطة تاعك أنك سكتيلو بزاف حتى عادت تبانلو من حقو يعاملك هك.

أي علاقة أساسها الاحترام ولي ما يحترمكش ما تكسريش راسك معاه هذا درك يعاملك كي النكرة غدوة تعودي مرتو تكمل عليك بالضرب قلتي صليت استخارة وباقية غير تكرهيه طيشي جدو ويربح بعمرو التافه باين فيه سطحي وكلون وحدو يستفحل على مرا غدوة وقت الشدة تحتاجيه يوقف في وجه راجل يتخبا وراك.

ربي يفرج عليك ويطيحك في الرجل المناسب على خاطر هذا راه كي رجل الكانابي لي منين تجي تعبي لفراش تخبطي صبعك فيه تولي تتوجعي هذا ماكان هذا حجرة في صباطك مغصصلك معيشتك في الدنيا طيش عليك التافه هذا واتكلي على ربي يعوضوك براجل عليه لكلام مش كوميك مازال يشر في الفايسبوك ويدير الطوايش لي درناهم زمان عرفنا حاجة اسمها فايسبوك. دراري يقتل مسكين.
 
عليك بالاستخارة والدعاء حتى يرزقك الله بالزوج الصالح اما خطيبك فلا ارى فيه مؤهلات الزواج والخطأ منك كيف تقبلين بذل كهدا وكذبك فى امر مع امه يعنى بعد الزواج ماذا سيختلق لك مع امه
خطيبك اما يحاول فسخ الخطوبة بتصرفاته او يريد امرأة ترضى بكل شىء خيانة اهانة ضرب كل انواع الذل
انت كيف تصبرى على كل مافعله معك انت حتى لست زوجته فقط خطيبته انجى بنفسك ولا سترين النجوم فى النهار معه
حقا تفاجأت لما قلته هل فعلا يوجد رجال هكذا وحتى ان وجدو ايفعلون كل هدا قبل الزواج يعنى انت محظوظة لانه لم يخدعك ويتظاهر بانه طيب وبعد الزواج يقلب الفيستا
الحياة ليست زواج
 
السلام عليكم
تقولك حاجة ملخر في ستين داهية لهذا البنادم ادا راكي خايفة ما تتزوجيش انا نقولك بوري و ما تديش واحد هكذا يشرفك يكون هذا بابات ولادك؟
و رأي الاخوة و الأخوات راهم مجتمعين على انو هذا انسان ماشي تع زواج و راني نقولك عن تجربة تبكي في عرسك و تعيشي حياتك تبكي على روحك وعلى ولادك إذا كملتي معاه
مانيش نحرض فيك مي راني نقولك عن تجربة.
لكن استخيري ربي والله عزوجل سيفتح لكي قلبك إلى الذي هو خير.
 
السلام عليكم اختي
هذا ماشي راجل هذا.مهبول رسمي واسمحيلي يركبلك الف مرض لو كملتي معاه اول شي.ما يحترمكش وما.عندكش قيمة عندو واناني النوع هذا ما تعيشيش معاه والاحسن تخمي ضرك قبل ما تتفر نقولك حاجة اديه يحترمك والله لا حبك واش دارو اللي حبيناهم انا من.نهار خلاني وراح وبلا سبب ما.نكذبش كان محترمني وبزاف ولا مرة جرحني بكلمة مي.كان يلم فيهم وخرجهالي بخرجة كبيره مي راه ربي يتولاهم انا نقولك هذا الاحسن انك تخليه لو يتزوجك واش يدير فيك.خمي مليح وراح ربي يعوضك.بسيدو انت عارفة روحك ما غلطتيش وولفتيه انت ترونجيه وتحليه حسب روحو حاجة امالا كرامتك افضل خليه وربي يعوضك
 
اسمحيلي اختي مي خطيبك تافه وعقليتو تاع دراري صغار واون بليس حقار انا رايي قولي لوالديك ولاخوك لانو راه حاقرك وملقاش من وراك رجال يخافهم الربي انتي علاه في بالك الطفلة كي تتخطب يوقفو معاها الرجال باش الراجل ميحقرهاش وانتي مازال لاهنا لالهيه يرجل عليك اوقفي على روحك وصليهالو للكبار يتسقم ولايروح يلعب بعيد
 
السلام عليكم و رحمة الله تعالى و بركاته
اولا و قبل كل شيء لازم تديري صلاة استخارة و اللي فيه خير ربي يجيبو
ثانيا فيما يخص الحجاب او الجلباب هو فرض موش قناعة ادا درتيه بينك و بين مولاك و ادا لا كيف كيف بعد لكن ادا درتيه بسبب انو قاللك هدا المخلوق و نيتك ترضي هدا المخلوق ننصحك ماتديريهش لانو لازم تخلصي النية لله عز وجل
اما فيما يخص خطيبك هدا امر تعلمتو انصاف الرجال مايقموش الطفلة اللي تحترمهم و تعزهم يقيمو الطفلة اللي تحطلهم من قيمتهم
حتى ولو تبقاي صابرة مليون سنة حاجة ماراح تتغير و يجي يوم ولما تبدي تحكيلو في الامور اللي دارها و ماتقدريش تزيدي تحملي و جربي ديريها والله العظيم يرجعك انتي الغالطة في كل شيء حتى يخليك تشكي في روحك
و تان كيما في حالتي ادا ماحاولش يشوه و يفسد صورتك امام اهله واهلك راكي الحمد لله و زيد يتهمك انو انتي اللي تشوهي في صورتو قدام اهلك
و اصبريي لايقلك سبيتي امو ولا لقيتيها في الطريق ودرتي روحك ماشفتيهاش
يا اختي نصيحة لوجه ربي بعدي عليه ، ادا كنتي نفسيا ماراكيش مرتاحة معاه و ادا كان الحال هكدا قبل الزواج او العقد راح يجهلك ويخليكي تكفري نورمال بعد العقد
و لكن بعد صلاة الاستخارة شوفي وان شاء الله ربي يقدملك اللي فيه خير لك يارب
تحياتي احترامي و تقديري​
 
هذا راجل لا بارك الله فيه اقطعي احسن ما تدفعي عمرك كامل في العذاب انا سيدة و هذا الشاب منرحبش به ابدا لاي اخت افيقي من غفوتك قبل فوات الاوان كاين الاف احسن منه مليون مرة غدوا يشرب لك المرار فاحذري و احذري لا طيبة ولا اخلاق و لا هيبة و لا حياء و لا كرم و المثل يقول الباعك بالثوم بيعوا بقشورهنتمنى تفيقي والديري خطوة صحيحة
 
لم أرى بيتا يظل قائما عندما يكون اساسه و قواعده مائلا او غير مثبت بشكل صحيح , حتى لو كان قائما الا انه لن يضل كذلك لوقت طويل
لي ماهو ليك غير يعييك و الدنيا مليئة بالرجال و عسى ان تحبوا شيئا و هو شر لكم و عسى ان تكرهوا شيئا و هو خير لكم
و ان شاء الله يكون تدخلي واضحا اختي العزيزة و فرج الله عنك , " ان بعد العسر يسرا "
 
توجهي لربي بالقلب الصافي وصلي صلاة استخارة وربي شايف الخير ربي يرزقك بالزوج الصالح
 
الحالة
مغلق ولا يسمح بالمزيد من الردود.
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top