النساء والفوتبال راني موسوس

[أبو عاتكة]

خير عليكم
بيناتنا برك
كاين شبه نظرية تقريبا راهي تدور في راسي ولاتلي حلوى شعر البنات وراح تتبلور وتتحول الى بركوكس ولا نظرية مبرهنة مستقبلا بدات من كاس افريقيا اللي فات تقريبا الى الان سارية المفعول
منين ولاو النساء يتبعوا معانا الفوتبال ويتفرجوها كالمسلسلات حتى وماشي عارفين شكون الخصم ولا واش معنى ولا الفرق بين مقابلة ودية وتصفيات ومنافسات وديفوا تكون السعودية تلعب يحسبوها دزاير ديجا نقلكم البارصا يحسبوها الفريق الوطني المهم اللي تلعب في البين سبور ڨاع دزاير وركبولنا الخطفة من عياطهم ورجفتهم وحرقولنا العشاوات ولات الخسارة ملاصقة الفرق الجزائرية وين ما تلعب متشوفش الربح. زادو دخلوهم ليصطاد نقلكم ،،، مافيهاش منا على ربعين سنة

كانو العجايز والكبار شوية معاونينا بدعاوي الخير والبركة والنية اللي فيهم ولكن النساء متقاعدش ياخو

متعتبروهاش عنصرية اعتبروها الحرب العالمية للعنصرية

شكون معايا في جمعية الموسوسين من النساء اللي ولاو يتبعوا الفوتبال بحالك ماشي هوما السبة؟

 

[{مُدَلَّلَتُهُ}]

السلام عليكم

انا الفوت هاذي مدة كملت معاها كنت صغيرة فالليسي و زاهية بروحي نشجع في ليكيب تع سعدان يا حسراه أما ضروك راني مع أم وليد و الجماعة الزينة .. المشكل النسا ضروك راهم في سطاج الوحش كي شفتهم في حفل الاختتام فالسطاد فرحانين و رافدين العلامات و يغنو بابابابا الحية راهي تحدر فالهاوية .. السطاد جامي لاكان تع نسا ولا تع عايلات سيدتي روحي للحديقة شمي الهوا روحي للبحر للجبل شجعي في دارك سيرتو لا تعرفي شتاهو التسلل معناها راكي طيري
بصح السطاد لا

 

[سعد606]

وعليكم السلام ورحمة الله وبركاته
أخي الفاضل الموضوع متعلق بالأم والبنت والأخت. حيث تتوالى الدعوات لإخراجهن من بيوتهن ونزع الحشمة والوقار عنهن حيث تدعو بعض المقالات دخولها المدرجات هدنا الله وإياهم لما يحبه ويرضاه- بعضهم يكتب بحسن نية وبعضهم بسوء فهم وبعضهم والله العالم بالسرائر

 

[Rochdi.dz]

صح اغلبية النسا مايفهموش فوت بول غير فئة قليلة مي خليهم راهم مزهيينا شوي ساعة ساعة يجيبولنا ضحكة

 

[إلياس]

في رأي لا أحبذ المرأة دخول للملاعب إلى ينافي ديننا الحنيف و الاخلاق لانه ذلك من تذهب تقليد الاعمى للغرب المستهلك

 

[الامين محمد]

و الله ق المدام قاتلي اديني لوهرن نتفرج الماتش
و نشوف خالتي هههههه
بلا ما تنسى طول الماتش و انا نطرجم هاذا خطأ
و هذا اللاعب فلان و هذا الحكم و هذا و هاذي
و المصيبة ارواح انت فهمهم التسلل هههههههه

 

[Adem4dz]

وِلي وِلي يا ويلَلِي ههههه

 

[خديجة ph]

ياخويا قالك هاذي دكتورة تاع العلاقات الزوجية تقول للنساء شاركن ازواجكن في هواياتهم و في الاشياء اللي يحبوها حقا حقا يولوا يشهدوا بينا و يرجعوا كي الخاتم في يدينا
انا الحق ما نحبش البالون ما نحملش نقعد كثر من تسعين دقيقة مسمرة في كرسي نتبع في عشرين تراس طالعين هابطين باه مع الاخير يسجلوا هدف واحد و ربما خلصت المبارات ب 0 : 0
الباسكيت صح سبور النتيجة من 30 و طلع الهوند حتى الارضية صغيرة ليه ليه يوصلوا للشبكة التينيس روعة وقت تبعتوا متعة السباحة صح حتى ركوب الخيل فرجة
اما البالون عذاب قنطة ديقة الخاطر انا ما نتفرجو ما نمرض به لا ليكيب ناسيونال لا سريع المحمدية و خميس الخشنة و اتحاد الحجوط

 

[sana barhoumi]

وعليكم السلام ورحمة الله وبركاته
أخي الفاضل الموضوع متعلق بالأم والبنت والأخت. حيث تتوالى الدعوات لإخراجهن من بيوتهن ونزع الحشمة والوقار عنهن حيث تدعو بعض المقالات دخولها المدرجات هدنا الله وإياهم لما يحبه ويرضاه- بعضهم يكتب بحسن نية وبعضهم بسوء فهم وبعضهم والله العالم بالسرائر

ولو ذهبت مع عائلتها هل ينطبق نفس الكلام؟

 

[sana barhoumi]

في رأي لا أحبذ المرأة دخول للملاعب إلى ينافي ديننا الحنيف و الاخلاق لانه ذلك من تذهب تقليد الاعمى للغرب المستهلك

معناها إلغاء منديل كرة القدم النسائية في جويلية 2023

 

[sana barhoumi]

صح اغلبية النسا مايفهموش فوت بول غير فئة قليلة مي خليهم راهم مزهيينا شوي ساعة ساعة يجيبولنا ضحكة

تخدم في sigma conseil؟

 

[sana barhoumi]

ياخويا قالك هاذي دكتورة تاع العلاقات الزوجية تقول للنساء شاركن ازواجكن في هواياتهم و في الاشياء اللي يحبوها حقا حقا يولوا يشهدوا بينا و يرجعوا كي الخاتم في يدينا
انا الحق ما نحبش البالون ما نحملش نقعد كثر من تسعين دقيقة مسمرة في كرسي نتبع في عشرين تراس طالعين هابطين باه مع الاخير يسجلوا هدف واحد و ربما خلصت المبارات ب 0 : 0
الباسكيت صح سبور النتيجة من 30 و طلع الهوند حتى الارضية صغيرة ليه ليه يوصلوا للشبكة التينيس روعة وقت تبعتوا متعة السباحة صح حتى ركوب الخيل فرجة
اما البالون عذاب قنطة ديقة الخاطر انا ما نتفرجو ما نمرض به لا ليكيب ناسيونال لا سريع المحمدية و خميس الخشنة و اتحاد الحجوط

حتى لو انتهت 0:0 فما فريق مترشح وفريق لا حسب المباريات إلي لعبها مع الفرق الأخرى ولو كانت تعادل لكل الفريقين عدد الاهداف المقبولة.اللهم تصفيات نهائية يعملوا الحصص الإضافية.

 

[إلياس]

معناها إلغاء منديل كرة القدم النسائية في جويلية 2023

في راي يلغى احسن لانه ينافي ديننا و الاخلاق

 

[Rochdi.dz]

تخدم في sigma conseil؟

لا لست انا قد يكون هناك رشدي اخر محظوظ اكثر مني يعمل فيها

 

[Hakan]

ياخويا قالك هاذي دكتورة تاع العلاقات الزوجية تقول للنساء شاركن ازواجكن في هواياتهم و في الاشياء اللي يحبوها حقا حقا يولوا يشهدوا بينا و يرجعوا كي الخاتم في يدينا
انا الحق ما نحبش البالون ما نحملش نقعد كثر من تسعين دقيقة مسمرة في كرسي نتبع في عشرين تراس طالعين هابطين باه مع الاخير يسجلوا هدف واحد و ربما خلصت المبارات ب 0 : 0
الباسكيت صح سبور النتيجة من 30 و طلع الهوند حتى الارضية صغيرة ليه ليه يوصلوا للشبكة التينيس روعة وقت تبعتوا متعة السباحة صح حتى ركوب الخيل فرجة
اما البالون عذاب قنطة ديقة الخاطر انا ما نتفرجو ما نمرض به لا ليكيب ناسيونال لا سريع المحمدية و خميس الخشنة و اتحاد الحجوط

ياتل راهم 22 تراس معاهم الحكم 23 ههههه وخلي من الحكم الرابع وووو ، اقعدي مع التنس ياسر فيك ههههههه هكاك راكي مليحة

 

[وۣۗهۣۗہۣۗم]

معندكمش روح رياضية راها غايبة عندكم ...
هههههه احوجى تسعين دقيقة تانى دخلتوو رواحكم فيها ​

 

[خديجة ph]

ياتل راهم 22 تراس معاهم الحكم 23 ههههه وخلي من الحكم الرابع وووو ، اقعدي مع التنس ياسر فيك ههههههه هكاك راكي مليحة

ما نحسبوش زوج حراس المرمى ما يجروش هاذوك يزيدولي القنطة كي واقفين في باطل و الحكام مايلعبوش يعسو اللاعبين برك
و اصلا رايحة نتفرج التنس vive laurent garos

 

[ذكريات]

هادا الي يقولولو هم يبكي وهم يضحك، انا مانحب كرة مانحب صياحها ويضيق خاطري نهار الي تكون تلعب راها تلعب بالأعصاب نتاع المتفرجين، وهاداك المعلق الرياضي حلقو خارج تحسب راه معانا فالدار، والأب الي يكون قدوة راحت القدوة تروح في حالها، وزادونا حتى النساء درك، هادي الي كفات هوما بيهم غي المساوات والحقوق والتحرر باش يخرجو برا يديرو حالا، خاطيهم الكرة مي يهموهم خبارها سورتو كي يكون اللاعب عندو قصص عائلية كما الدراما يحكولك قصة حياتو، الله يجيب الخير، المهم أنا ماتبعتش الكرة ملي كنت صغيرة ونتفرج كابتن ماجد هادوك لي ماتش الي شفتهم في حياتي وكانو يقلقو بزاف.

 

[سعد606]

ولو ذهبت مع عائلتها هل ينطبق نفس الكلام؟

في بلاد الناس المتحضرين، تشكل مشاهدة كرة القدم في الملاعب نشاطا ترويحيا وكسرا للرتابة. ويذهب الناس هناك إلى الملعب مع الأصدقاء أو العائلة، بما فيها أطفاله. وبالإضافة إلى اللوجستيات التي تسهل الانتقال بالسيارة الخاصة أو المواصلات، يكون الملعب ومكوناته ومحيطه أشبه بمتنزه.

 

[ملاك الرحمن]

معليش كي تقعد في دارها تشجع و تتحمس من دارها قدام التلفزيون نورمال عندها حق مليح الواحد يدير شوي اومبيونص فالدار هههههه
اما باه تروح للمدرجات و الملاعب و تبكي و تضحك لا اوافقها الرأي و يبقا رايي الشخصي انا كونتر المراة في الملاعب منقولكش المراة بلاصتها الكوزينة و الدار و و و كيما يقولو اغلبية الرجال بصح الملاعب ملي نعرف صلاحي نشوف فيها بلاصة مخصصة للرجال كيما المقهى هههههه ممكن انا عقليتي شوي ديمودي والله اعلم