وراه الابداع تاعكم ؟؟؟ رهجتونا و رهجتو اللمة

[Moha le sage]

الجيل تبدل .... وتبدلت معاه المنتديات ... جيل sms و المهند

واش الفايدة كي تباتو نايضين تكتبو الميساج من ورا خوه.... في البورتابلات... وتجو للمنتديات تقولكم عقاقن تبعثو غير في التصاور


واش الفايدة كي تجيب موضوع من منتدى اخر وانت قادر تحكيه ؟؟؟

و واش الفايدة في عوض ما تحللو الموضوع .... تكتبو مشكور !!!!!


واش الفايدة كي معندكمش راي ... تبعو في الناس .. كي تلقاو موضوع فيه بزاف المشاركات تكتبو
وتدخلو ... وكي ما تلقاوش بزاف الناس تخلوه ... حتى ولو كان موضوع ادى جائزة نوبل ونتوما غافلين

واش الفايدة كي الذراري يلقاو اسم طفلة في موضوع يدخلو..... ويزيدو يلقاو كلماتو هابطة .... وهوما يكتبولها موضوع رائع !!!!!!

واش الفايدة كي لبنات يلقاو موضوع رهج يدخلو فيه و يجاوبو ويشكرو على خاطر دارلهم شوية ورد ... ولا دار في الصورة تاعو رونالدو ولا المهند ؟؟؟

واش الفايدة كي نجي نكتبلكم موضوع نلقى 4 من الناس عندها في الراس وتناقش و الاخرين يطلو ويروحو....

ميهمنيش الردود و لكن العباد الي من وراء الجهاز .... و منديش موضوع من الهيه ... ومن بعد نكتبلكم اين الردود ؟؟

ما يهمنيش النقاط .. ميهمنيش نكون ولا منكونش.... يهمني واحد يستغاد مني وما يغلطش .. يهمني نعرف رجالة ولا نساء

يا جماعة طلعو النيفو .. حاولو تكتبو وحاولو تديرو ردود .... لاه صرالكم هكذا ؟؟؟

انا كي نهدر نهدر en face ونحط صبعي على موضع الالم ....

في منتديات اخرين ناس تتبادل في الخبرات في التكنلوجيا في خبايا العلم الحديث ... ناس بعدت علينا

ونتوما باه تدخلو و تكتبو حاجة تجيكم ثقيلة .... و زيد حتى مشكور هاذيك ودرتولها copier - coller

مالا كون يخلولكم غير اللمة .. ومتقدروش تدخلو المنتديات لخرين .... راح يصيبكم العقم ؟؟؟

اللي عندو واش يهدر يكتب ... وان شاء الله يكون كلامو مش كلام سيادو ..

 

[بيكهام]

مصبتش واش انقووول
ان شاء صورتي تعبرلك

 

[Moha le sage]

يعطيك الصحة خويا حسام ... دير في بالك بلي راني نقصت الهدرة ونحيت اسطر

قلبي مليان

 

[RaNiA]

مالقيت مانقول
والله عندك حق
اكره حاجة عندي كي نلقا الموضوع منقول سورتو كي يعود مافيه حتى فايدة و مافيه حتى عبرة
وراني استفذت من تجاربي في المنتديات الاخرى و في اول مرة سجلت في اللمة
كي يكون الموضوع من مخك و كاتبو بيدك لتما تلقا الردود بزاف
و اما بالنسبة لمهند راهو مات و راهم القليلات لي تحبو ​

 

[d@niel]

hi Tarkan
والله غير عندك الحق ماكانش موضوع دخلتلوا غير فيه شويت ردود
hope we done best here :angel_not: wa more can I say
ttyl
peace ^______^

​

 

[mimi.dz]

بسم الله الرحمن الرحيم

خوياTarkan راك تحكي في كلام معناه كبير بزاف
يفيد الجميع
يعطيك الصحة
لكان الكل عملو بكلامك رايح يكون هذا المنتدى من احسن المنتديات
والشعب الجزائري رايح يطور و يكون عندو شخصية مستقلة عن باقي الشعوب
ربي يبارك فيك
مهما هدرت و قلت مانيش رايحة نوفيك حقك من الشكر
والله غير احسن موضوع قريتو
مفيد جدا

ربي يخليك لوالديك و يخليهملك
و ينجحك تفيد المجتمع الجزائري بافكارك اللي ما نقدر نقول غير
عبقرية

تحياتي لك
​

 

[Moha le sage]

ليامات الجايين راح نبدا نحكي ... راح نحط القناع .... راح نسمي القط قط ... و الغزال غزال


j v appeler un chat un chat

تقست بزاف... بصح نبرد قلبي قبل من روح

 

[Brunette]

Wellah ya khouya 3andek lhakk !! d foi telka mawadi3 mankoula bla fayda whatta rodod tlkaha copier coller kima kolt !! nchallah yttawar lmountada lelahsan !! wya3tik assaha 3la sujet lhadef !! rabbi ywafkek wyweffekna m3ak

 

[sleepingbeauty]

انا نحير كيما واحد يدير موضوع للنقاش و يكون متحمس و يستنا في الآراء و يجيو يكتبولو شكرا على الموضوع اخي رغم ان الموضوع باين بلي للنقاش لابداء الراي ماشي للشكر في هادي صح يحبس راسي
اما المواضيع التي تتكرر دائما حدث ولا حرج حتى حفظتهم حفاظة و عندك الحق كي قلت يديرو نسخ و لصق لانك احيانا تشوف موضوع باللهجة الخليجية او المصرية اذا عجبكم و نقلتوه على الاقل ترجموه وش رايحة تدي منكم على العموم ربي يهدينا

 

[killua0555]

....و الله خويا يعطيك الصحة ......موضوع هايل حتا انا و بزااف فى اللمة ...كرهنا من المواضييع لمعاوديين و شحال من مرة يجيو مواضيع كيما هادا ...متنقلوش ..متنقلوش ..بصح لا حياة لمن تنادى .....و الحاجة الى تقتل تلقاه داير موضوع و يناقض روحو فى الموضوع الى موراه ..يتما هنا الناس تجرى مور عدد المشاركات ..مام با ميقراش الموضوع الى راه دايرو ..و لا يخلى فيه حاجة هو الى دارها جديدة فى الموضوع .....انا مقولتش منقلوش كامل كاين مواضيع للمنفعة و علمية تتنقل بصح كل حاجة عندها حدها ....ربى يهدى و يسلكها على خير

 

[RaNiA]

ليامات الجايين راح نبدا نحكي ... راح نحط القناع .... راح نسمي القط قط ... و الغزال غزال


j v appeler un chat un chat

تقست بزاف... بصح نبرد قلبي قبل من روح

وين راك رايح ؟
برد قلبك كيما تحب لاكان مانعين الهدرة علاه دارو قسم واش راك تهدر ولا فرغ واش كاين في قلبك لي عندك قولو مي في حدود الاحترام و عدم قول الكلام البذيء برك هذا ماكان
والي قاسك اتفاهم معاه بطريقتك لي تحبها بالشرات ولا كيما تحب
واللبيب من الاشارة يفهم ​

 

[Moha le sage]

Wellah ya khouya 3andek lhakk !! d foi telka mawadi3 mankoula bla fayda whatta rodod tlkaha copier coller kima kolt !! nchallah yttawar lmountada lelahsan !! wya3tik assaha 3la sujet lhadef !! rabbi ywafkek wyweffekna m3ak

comme il est écrit ds l'image du profil : je suis adorable .. quand je veux ...

moi aussi j'etait adorable .... mnt je suis passé de l'ot coté


merci a vous Brunette

 

[Moha le sage]

وين راك رايح ؟
برد قلبك كيما تحب لاكان مانعين الهدرة علاه دارو قسم واش راك تهدر ولا فرغ واش كاين في قلبك لي عندك قولو مي في حدود الاحترام و عدم قول الكلام البذيء برك هذا ماكان
والي قاسك اتفاهم معاه بطريقتك لي تحبها بالسرات ولا كيما تحب
واللبيب من الاشارة يفهم ​

[/quote]

منيش انا لي يقول العيب .. لا في المنتديات ولا برا ... و المتربي من عند ربي....

 

[programmeur]

السلام عليكم
بارك الله فيك اخي
هادو هوما العرب استهلاك بدون انتاج
انا واحد من الناس نحب المنتديات الاجنبية لخاطرش نصيب فيهم معلومات كثيرة وقيمة خاصة في الاختصاص التاعي لكن من ناحية الثقافة شويا صعيبة يلزم الواحد يعرف واش يخير
ماشي كيما المنتديات العربية ...... مواضيع منقولة و مستوى متدني بزاف بزاف
وانا مارانيش نتكلم على المنتديات العامة راني نتكلم على المنتديات العلمية والتكنولوجية
لي الواحد يدخل فيهم باش يعمر راسه
أما ادا دخلنا للمنتديات العامة تصيب كارثة كبيرة
مواضيع منقولة وكلام بدون فائدة و الردود اما منعدمة أو الله غالب هداك ماحلبت البقرة بدون مستوى
وعندي بزاف حوادث صراولي على هده الاشياء خاصة في المنتديات العربية
وحد النهار كنت في وحد المنتدى اجنبي تاع الاعلام الالي مختص في البرمجة واش نقولك ماشاء الله
المستوى لي عندهم الله يبارك تعلمت منه بزاف حوايج ملاح
من بعد قلت في نفسي نروح لوحد المنتدى عربي وفي نفس الاختصاص ...دخلت فيه وقعدت نقرى
صبت عنوان كاتبين فيه جلسة المبرمجين قلت باين كاش جماعة تاع les programmeurs
راهي هنا دخلت للموضوع وبديت نقرى في الردود ........اااااش غادي تتخيل واش قريت ؟؟؟؟
( السلام عليكم ... وعليكم السلام....كيف حالكم ........ الحمد لله) موضوع كله هكذا
هدا الموضوع ليس بجلسة مبرمجين بل أصبح جلسة تعارف
على كل حال هنا تهمنا اللمة تاعنا وهدا المنتدى هو المنتدى العربي الوحيد لي راني ندخله يوميا لخاطرش
يبانلي خير من كل المنتديات العربية الاخرى
مع تمنياتنا للمة مزيدا من التقدم والرقي ولا يكون ذلك الا بعمل الاعضاء واجتهادهم
شكرا

 

[RaNiA]

منيش انا لي يقول العيب .. لا في المنتديات ولا برا ... و المتربي من عند ربي....

الحمد لله
احنا جينا هنا للمة باه نعرفو عقليات ولاد وبنات لبلاد ولي عندو مشكلة او حاب يفرغ واش كاين في قلبو
فقلبنا مفتوح واحنا نسمعولو
وكيما قلت لك
واللبيب من الاشارة يفهم

والله قبيل كنت نفكر نكتب موضوع على جماعة الكوبي كولي
ومبعد سبقتني
مي موضوع مليح ويجيب فايدة ان شاء الله ​

 

[programmeur]

ياخويا فرغ واش كاين في داك القلب
جيب البيدون وحل السبالة ههههههههه

 

[marame]

يا اخي صح و الله كلامك صح و زيد المنتدى ولى غي مواضيع لم يتم الرد عليها
كل واحد راه يجيب غي في المواضيع و يهمه غي الناس تقوله شكرا برك وميعرفوش يحلل
موضوعك في محله شكرا

 

[Brunette]

comme il est écrit ds l'image du profil : je suis adorable .. quand je veux ...

moi aussi j'etait adorable .... mnt je suis passé de l'ot coté


merci a vous Brunette

dslé mé la curiosité hekmetni !! eske tekder tmedli une idée 3la wash sralek !! sa se voit belli rak m3ammar w belli kayen li djarhok !! en tt cas ana nkollek belli li djarhek un vrai imbécil paske malkash rouhou m3ak w ya khouya moul nya yerbeh welkhedda3 yenfidah wenta bayn bli kanet neytek mliha wash nkollek rabbi ydjib elkhir wmat3ammarch rassek !! bon courage

 

[x123]

موضوع رائع و كلامك صح
و الله غير حاجا مليحا مين كتبته ممكن تفطن بعض الاعضاء النايمين
من جماعة مرسي و شكرا ديرينها في ملف في الكمبيوتر و يحلو المنتدى و يبداو غير copier coller


مشكووووور

و بارك الله فيك و يعطيك الصحا

 

[Moha le sage]

dslé mé la curiosité hekmetni !! eske tekder tmedli une idée 3la wash sralek !! sa se voit belli rak m3ammar w belli kayen li djarhok !! en tt cas ana nkollek belli li djarhek un vrai imbécil paske malkash rouhou m3ak w ya khouya moul nya yerbeh welkhedda3 yenfidah wenta bayn bli kanet neytek mliha wash nkollek rabbi ydjib elkhir wmat3ammarch rassek !! bon courage

Qui vivra verra ... en ttes les couleurs

je mise tjrs cache ... et je perds le gros lot ... en amitier ..en amour ...

rien va plus khti

..... j v ecrire un roman autobiographique ... en fr et en ar intitulé :

les étrangers de ma vie ..​