اسمحو لي ندخل النقاش ونطول شوية اصبرو علي فقط
أنا نشوف الموضوع ماشي ساهل نحكمو عايه بالخيانة
اولا لازم نعرفو طبيعة الراجل بللي يميل كثير للأنثى ويحب يغازلها وهاذي فطرة في كل المخلوقات
ثانيا لو نحب نطبق الشرع على الراجل نطبقوه كذلك على المرأة هل تقبل راجلها يتزوج عليها مرة أخرى وحتى 3 مرات أخرين طبعا لا رغم أن هذا حلال ومن حقو
مادام الراجل عندنا في العادة يتزوج واحدة توجور يبقى يبونسي في واحدة أخرى صاري لو كيما واحد ديما ياكل ماكلة واحدة حتى ولو كانت الميور يبقى يتمنى ياكل حاجة أخرى يعني يبدل
حاجة أخرى وهي الزواج التقليدي اللي معظم الناس متزوجين تقليدي والبنت اللي في قلبو قليل وين يتزوج بها ويبقى هذا الراجل توجور ما يقيمش مرتو ويشوفها كأنها غلطة وتبقى عينو ما تشبعش
زيد المستوى الاجتماعي والثافي بين الزوجين حيث ربما زوجتو ماشي مثقفة أو أمية تماما ويبدا يحوس على واحدة مثقفة بالسكايب وغيرو
ماننساش نقطة مهمة كاين البعض يكونكتي مع البنات باش يعرف مليح عقلية المرأة وحتى ولو كان متزوج وكاين المشاكل لما يتعرف على بنات اخرين يفهم كيفاش يتعامل مع زوجتو صوا يعرف بللي كل النسا كيف كيف ويرجع لزوجتو صوا يكتشف بللي زوجتو مليحة وماكنش عارف حتى قارن بينها وبين اخرين
أما مسألة يتصل بالسر هاذي باينة على خاطر المرا دايما غيارة حتى ولو يحكي مع صديقة ولا قريبة ما تقبلش عليها يتصل بالسكوتي
راني خايف نقول بلي معظم الناس يتصلو بالبنات ولكن هنا فقط يدعاو الترانكليتي
وعندي ملاحظة هي كيفاش نسمو هذي المناقشة هنا بينكم (البنات ) وبيننا (الذكور) وشكرا ليك يا tarkan
