راني باغية نفوته direct

[الجندية]

السلام ع ـليكم

هادي هي حياتي

نهار نقول تهنيت بان بروبلام

هههه هادي غنية

معليش المهم انتوما راكم قاااع كي خاوتي
ونعزكم ومنكم تعلمت بزاف حوايج ماعرفتهاش من قبل

كاين واحد كبييرر عليا عنده 24 سنة
ووحد الفوايو حشاكم ياخوتي
يبات خابطها ويصبح يدافر في الزناقي
من العام اللي فات وهو يتبع فيا ويقولي نموت عليك
حتى ولى يحوس على الايميلات نتاوعي عند اللي يعرفوني وكاين اللي غواهم بالدراهم
مدولو السكايب والايميل
ولى مهبلني علاباله دابزت حبابي وحباباتي
علاباله صراولي لي بروبلام في الدار
علاباله بابا ولى مايأمنيش
صرالي بزاف حةايج ماشي ملاح
ولى يعيطلي ويديرونجيني
ويقولي ادا ماهدرتيش معايا راني نجي ليماك نحكيلها ونرسل يما تجي تخطبك
وانااااا انااا اناااا في عمري 14 سنة
كرررههت علاجاله ترنكت عليا شحال من حاجة
راه يتبعني 24/24 ساعه
وعاسني وين نروح ومعامن نحكي وكلللل شي
وانا وليت نخااااف منووو نقول لكم الصح
والله غير يخوفني جامي شفت واحد كيفه
وليت نشوف قاع لي جان ذئاب بشرية
مي لااااا هو اللي خصرلي صورتهم وشوهها
وديما قاعد مقابل البالكون ديالنا
والله غير هبلني ماقديتش والله ماقديت
اسمحولي طولت عليكم
بصح قولولي واش ندير ضروك شانقول له
شانقول للي حاسيبيني نخرج معاه
واش نديـــــــــ:cursing:ــــــير يرحم بوووك خبرني
.......................
راني نستنى فيكم
​

 

[fifi016]

قولي لخوك ولا باباك
يفريهالك​

 

[Dr.CrAzY]

وباباك وينو في لحكاية هادي كاملة ؟؟؟؟
أو أهدريلو وش مايامنش أدا ؟؟؟؟
​

 

[الجندية]

قولي لخوك ولا باباك
يفريهالك​

بابا خفت يقولي علاش ماحكيتيش من زمان وخويا نخاف عليه خاطرش يبغي هكدا الدبازي ونخاف يجيبها في روحه

وباباك وينو في لحكاية هادي كاملة ؟؟؟؟
أو أهدريلو وش مايامنش أدا ؟؟؟؟
​

بابا خفت نخبرو وديجا هو كان شاك فيا بلي راني نخرج معا هادا
​

 

[الجندية]

ملك خوان ولاد عم ولاد خال
اذا انا مانعرفك ماتعرفيني كرهت هاذا السيد وكون نشوفو نحرقو
ماتسكتيش على روحك ومزالك صغيرا وشكي يمات مياه لخاوتك خليهم يعفسو على راسو ويربوه

يعطيك الصحه خويا
انا عندي خو واحد في عمره 19 سنه ونخاف عليه بزااااف من هاد المشاكل وسيرتو هادا واحد يمشي غير بالخدمي والسيف على هادا حرت واش ندير
​

 

[Dr.CrAzY]

بابا خفت نخبرو وديجا هو كان شاك فيا بلي راني نخرج معا هادا
​

ياأختي لحوايج هادي مافيهاش الخوف
تخليها تجي فيك ؟؟؟؟
أهدري مع باباك وقوليلو وش صاير وهو
ان شاء الله يتصرف معاه بالطريقة المناسبة

​

 

[الجندية]

ياأختي لحوايج هادي مافيهاش الخوف
تخليها تجي فيك ؟؟؟؟
أهدري مع باباك وقوليلو وش صاير وهو
ان شاء الله يتصرف معاه بالطريقة المناسبة

​

انشالله انشالله اليوم نهدررر
ادعوووولي برررررك
​

 

[MAN1850]

يعطيك الصحه خويا
انا عندي خو واحد في عمره 19 سنه ونخاف عليه بزااااف من هاد المشاكل وسيرتو هادا واحد يمشي غير بالخدمي والسيف على هادا حرت واش ندير
​

أسمع قولي لخووووووووووووووك الي عمرو 19 على خاطر صايي لازم يتحمل المسؤولية
و راهو رااجل و يعرف ما يصلح بيك
و لله ولله ولله لو كان خوك يعرف و يجيه الخبر مش راح يفرح و يقول أختي خافت عليا

على خاطر مش الأولاد الي يخافو عليهم شوفي أنتي قولي لخووك و هوا راح يفريهالك
و أنتي ثاني باين عليك تخالطي شوية لولاد على خاطر ليجان ما يروحش لأي وحدة

ولله لو كان نتلاقى بيه هذا الحيوان ما نرحموش
ما يخلعوكش جماعة الشراب و الخوذمي على خاطر كامل ماشي رجال يديرو غير في السمير ...

 

[nada242008]

كان حشمتي من باباك احكي لامك وهي تعرف تفهم باباك ولا خوك وكون طولي كثر راهي تلصق فيك الحكاية كثر

 

[الجندية]

أسمع قولي لخووووووووووووووك الي عمرو 19 على خاطر صايي لازم يتحمل المسؤولية
و راهو رااجل و يعرف ما يصلح بيك
و لله ولله ولله لو كان خوك يعرف و يجيه الخبر مش راح يفرح و يقول أختي خافت عليا

على خاطر مش الأولاد الي يخافو عليهم شوفي أنتي قولي لخووك و هوا راح يفريهالك
و أنتي ثاني باين عليك تخالطي شوية لولاد على خاطر ليجان ما يروحش لأي وحدة

ولله لو كان نتلاقى بيه هذا الحيوان ما نرحموش
ما يخلعوكش جماعة الشراب و الخوذمي على خاطر كامل ماشي رجال يديرو غير في السمير ...

ايه معليش نحكيله
مي ياخويا انا خاطيني مخالطة لي جان سيرتو قراين هاد الحيوان حشاكم
عندي les amis مي معنديش الحبيب
ولوكان جيت نخالط لوكان ماراهوش جايني مشكل
​

كان حشمتي من باباك احكي لامك وهي تعرف تفهم باباك ولا خوك وكون طولي كثر راهي تلصق فيك الحكاية كثر

ايييه عندك الصح راني خايفة تلصق فيا الحكايه
صحيتي ختي
​

 

[الجندية]

مسكين هذا السيد نا قص حنان ههههههههههههههههههه

لوكان جا متربي وولد عايلة كون ربي جابله وحدة اللي تربيله ولاده ماشي يقعد يتبع في بنات الناس
​

 

[فؤاد الورقلي]

السلام عليكم

مادام عندك بابك خوك احكي لهم يفرولك كل شي وهذا الصوالح مفيهاش خوف او شيء

ربي يفرج عليك

 

[الجندية]

السلام عليكم

مادام عندك بابك خوك احكي لهم يفرولك كل شي وهذا الصوالح مفيهاش خوف او شيء

ربي يفرج عليك

ربي يحفظك خويا وشكرا ع ـلى اهتمامك
​

 

[MARIA_4algeria]

نقولك حاجة اصبري شوية يكره منك وتتهناي
لانو هو عمرو24 وانت 14 يعني مايقدرش يقعد يسنى فيك طول حياتو​

 

[nina bonoise]

فكرتيني في حكاية صراتلي كي كان عمري 15 سنة هههه
كنت صغيرة شوية و هذا الطفل يعس فيا h 24
و كل ما يجي يهدر معايا نموت قداموا تالمون لي هو تاع زطلة و دخان و شراب و موس خفت منوا
ايا مرة قالي تجي معايا نضربوا دورة قتلوا اخطي عزريني حكمني من يدي و جبدلي الموس
تعرفوا مت ميتة تاع الصح
من تم وليت نكذب على ماما قلت لها اني مريضة منروحش نقرا
عذا نهار نهارين ماما قالتي وش هذا مشك مريضة روحي تقراي
انا خفت لا يحكمني قلت لها يوصلني بابا
ايا وصلني بابا بصح قلت لو على 12 سا تجي تديني منروحش وحدي قالي منا لل 11 سا اني نعيطلك و نقولك
بابا عيط قالي اني منجيش اني نخدم روحي برك
هيا انا مروحة مع البنات و نتلفت و نلقاه ورايا مت بالخلعة بصح روحت نترعد قاتلي ماما شكون الطفل هذا لي جبد عليك الموس ؟ انا حرت قلت مين جاتها الهدرة . و الهدرة قالهالها البروف تاعي منعرف وين تلاقاتوا قالها او جبد عليها الموس قريب رحت كسرتوا . ايا ماما قالت للبابا و بابا كي تصرالي حاجة او يولي مهبول ميعرفش وش يدير ايا عيط لصحبوا البوليسي قالوا ارواح لليسي تاع الطفلة و ماما بعتتلي ولد خالتي تاع البوكس ههههه
انا كي خرجت على ال 4 سا الطفل هذا جاني و ولد خالتي قاعد مالهيه شورتلوا باه يفهم بلي راهوا هذا هو لي جايني الطفل
انا بدلت الطريق و خليت الباقي لولد خالتي . ولد خالتي ديراكت راح عطاه دبزة على خشموا ساح الدم ههههه الشه فيه قالوا تزيد تهدر معاها راك عبالك . الدقيقة هذيك خرجلي باباب بالطموبيل قالي ايا اطلعي . قالي وينوا الطفل قلت لو هاهوك بابا طول زاد في la vitesse و ضربوا على رجليه بالطموبيل . الطموبيل ضربتلوا ركايبوا قدقد . نطق الطفل هذا قالوا وش بيه ربك انت " استغفر الله " و بخرجلوا بابا قالوا نزيد نشوفك دورتي باها و الله ندخلك للحبس . اليوم غدوة رحت لاباس و يالموصيبة جاني الطفل قالي وش جايبتلي بابا خوك عمك .... قلت له نجيب و نزيد نجيب مي الرحمة بابا كان يعس فيا مالهيه و انا كنتش عمبالي بيه و يجيوا لابوليس صحيب بابا داوه للمركز و مبعد خرجوه من تم مزادش دار بيا

 

[السلطانة]

احكي للوالدة تيعك
وهي بدورها تقول لباباك
وماتتصرفيش وحدك في الموضوع
قادرة تغلطي وممكن تقبليلو بواش حاب لانك خايفة منو
احسن حل قولي لوالديك وربي معاك يااختي

 

[joujou1986]

وسعي خاطرك شدة وتزول انشاء الله

 

[أمينة16]

اختي نصيحة ليك قولي لداركم ماشي حاجة اللي تتخبى

ماشي حتى كاش ما يصرا قولي درك خير ليك احكي لماماك سور راح تفهمك

ربي يسهلك اختي

 

[منايا الجنة]

يا اختي لازم تقولي لباباك باش تنحيلو الشك اللي راهو دايرو فيك وماتخافيش ديري ثقة في نفسك وروحي احكيلو كلش لوكان تقعدي تحصلي اكثر

 

[chou_big]

ربي يعينك اختي