ياخاوتي وش راهو صاري!!!!!!!!

[سلفي والحمد لله]

السلام عليكم
وشراكم خاوتي ان شاء الله راكم بخير
ياخاوتي وش راهو صاري!!!!!!!!
هذا وين ضربت طلة لمنتدى فرغ وش كاين في قلبك دخت وش كاين
وحدة راح تسويسيدي وحدة كرهت حياتها....
وحدة خلاها حبيبها بعد قداه نعام وراهو ذرك مع وحدخرى...
وحدة سماطتلها لمعيشة...
وحدة تشتي لبروف لي يقريها وراهي تهدر معاه في التيليفون.....(بين قوسين مليحتلو كف لبروف هذا)

وحدة في عمرها 15 سنة وصاحبها قد باباها في عمرو 30 سنة
ومحبش يريبوندي عليها في التيليفون راهي حزينة بزاف وخافت لامايكونش يحبها باباها هاذا وراهو غير يتمسخر بيها
يا بنتي روحي حلي فروض تاعك تاع دراسة الوسط وش داك لحكايات هاذو!!!!!!!!!
اواه انا منكذبش عليكم راني دايخ
وربي يستر وربي يجيب اللخير وربي يستر خواتاتنا وبنات المسلمين

​

 

[DARINE05]

اه يا عمي السلفي بلعقل عليهم شوف انا نفهمك هو علاه سموه فرغ واش كاين في قلبك يعني لي قلبو معمر يفرغو هنا خير ما يحكم في قلبو ويبقا يسوفري والحب عمرو مكان للكبار برك او قالك القلب ومايريد
المهم تكون الاخلاق طالعة هذا مكان والواحد ميديرش حاجة تغضب ربي سبحانو وكل واحد وعقليتو كاين لي تجيه مواضيع كيما هذي نورمال وكاين لي تجيح حاجة بزار ومتنساش يا خويا بلي راك في منتدى في انواع العقليات با الصغير با الكبير وخصوصا اكبر فئة تع المرهقين اصلا احنا الشعب العربي هذو الامور تاع الحب منتناقشوش فيه تبالنا حاجة عيب مي ياو جينا عندنا ثقافة الحوار مايصراو مشاكل نعطيك اكزومبل طفلة كي دير صحبها ياو جات لقات في الدار لغة الحوار كانت تحكي لام تاعها على الاقل توعيها تنعتلها صلاحها مي نونو لقات امها ياو تقلها حاجة كيما هذا تبطلها من القراية ايبان تقول لصحبتها يعني زوج صغار ينصحو بعضهم واش يجيك من ردة الفعل تاعهم
هذي راهي مجرد وجهة نظاري مرسي

 

[هــــيلدا]

:surrender::surrender: متحيرش يعود يرح صيامك،،

الله غالب، كل واحد والشيء للي راه صاريلو!!!

معندنا مانديرو،،

 

[HWK4ALGERIA]

وحدة في عمرها 15 سنة وصاحبها قد باباها في عمرو 30 سنة

انا ف عمري 30 يسمى راني قد باباها:scared:،، والله راك فشلتني على بالك:tears:،،، يسمى نورمالمون راهم ولاددي ذركا ف ال 15 سنة،،، ههه
المهم،،، اخي العزيز،،، هذا هو الواقع المرير اللي رانا عايشينو،،، شكشوكة وخالوطة كبيرة،،، ومشاكل لا تعد،،، وهذي عينات برك من الاهوال اللي راهي واقعة واللي مايقدروش ماليها يفرغوها من قلوبهم.
تحية لك وشكرا على الموضوع.

 

[KiNg ♥f ThE l♥vE]

و هذا جديدة عليك خو !
مالا اذا نحكيلك و الله مخك يحبس
ياو ربي يهدي يا الخو

 

[معاك يا الخضراء]

و عليكم و السلام و رحمة الله و بركاته

15 سنة او كي كنت قدها عندي عامين خبرة :lol:​

اخي ماهكذا تحل الامور راهم صغار و ما يعرفوش و محتاجين مساعدة اكثر من نقد

 

[ماكانش]

اه يا عمي السلفي بلعقل عليهم شوف انا نفهمك هو علاه سموه فرغ واش كاين في قلبك يعني لي قلبو معمر يفرغو هنا خير ما يحكم في قلبو ويبقا يسوفري والحب عمرو مكان للكبار برك او قالك القلب ومايريد
المهم تكون الاخلاق طالعة هذا مكان والواحد ميديرش حاجة تغضب ربي سبحانو وكل واحد وعقليتو كاين لي تجيه مواضيع كيما هذي نورمال وكاين لي تجيح حاجة بزار ومتنساش يا خويا بلي راك في منتدى في انواع العقليات با الصغير با الكبير وخصوصا اكبر فئة تع المرهقين اصلا احنا الشعب العربي هذو الامور تاع الحب منتناقشوش فيه تبالنا حاجة عيب مي ياو جينا عندنا ثقافة الحوار مايصراو مشاكل نعطيك اكزومبل طفلة كي دير صحبها ياو جات لقات في الدار لغة الحوار كانت تحكي لام تاعها على الاقل توعيها تنعتلها صلاحها مي نونو لقات امها ياو تقلها حاجة كيما هذا تبطلها من القراية ايبان تقول لصحبتها يعني زوج صغار ينصحو بعضهم واش يجيك من ردة الفعل تاعهم
هذي راهي مجرد وجهة نظاري مرسي

بابابا ربي بارك على هاد الرأي وهاد لعقل عليك دارين
هههههههه​

 

[ماكانش]

يا خويا لعزيز الحالة راهي مخلطة والي علابالك بيه قليل...
عيش تسمع وعيش تشوف هدا ماكان​

 

[salma2010]

نقولو ربي يهديهم وخلاص

 

[riadh bba]

واش راح دير ياخويا نساو الموت والحساب لي بعدو

 

[Thayri]

راني معاك خويا والله العظيم حاجة تدمع عليها العين

نورمالمو بنت صغيرة خاطيها gاع هاد الهذرة و هاد الحوايج بصح واش حبيتنا نديرو هادي هي الدنيا و راك في 2010 كيما يقولو
هاكدا... التلفاز و النت دخلو علينا فلسفات منافية للاخلاق و الدين رانا ولينا نعيشو كيما يحب الغرب نعيشو
تلقا فالطريق طفلة عمرها 10 سنين تقول لك حبيت واحد و خلاني و مانقدرش نصبر عليه هنا تسقسي روحك وقتاش عرفاتو و وقتاش حباتو و وقتاش خلاها بالاك عرفاتو كي كان عمرها عامين

على كل حال ربي يهدينا كامل
​

 

[بنت الـ25]

يقول الرسول (عليه الصلاة والسلام): علموا أبناءكم الصلاة لسبع، واضربوهم لسبع، وصاحبوهم لسبع"
ويقول المثل "إذا كبر ابنك خاويه"
مي احنا هنا في بلادنا ... العادات والتقاليد تخلي الأب كلما يكبر ابنو يبعد عليه
يقولك باش مايدخاصش عليا
وهدا غلط x غلط
نورمالمو كي يبدا الطفل ولا الطفلة يفهموا ويعرفوا صلاحهم مليح تبدا التوعية مالوالدين باش لما ولادهم يندمجو في المجتمع يعرفو يعيشوا ويفرقوا بين الحلال والحرام والصح والخطأ
والكارثة العظمى أنو الوالدين مش برك مفرطين في ولادهم من هاد الناحية ...حتى وسائل الاعلام الحديثة عندها دور
وأي حاجة يشوفوها فالتلفيزيون ولا الانترنت يحبوا يقلدوها ويحطوها "نووووووورمال"
بصح وش الحل؟؟؟
الحل أكبر مني ومنك...برامج توعية في وسائل الاعلام... وفي الأسرة....يعني علم كبير
ومنقدروش نحلو المشكل ببساطة في موضوع يقراه عالأكثر 300 ولا 400 من مجموع عشرات الآلاف
****
بصح عجبني خويا خوفك على مستقبل هدا الجيل
بارك الله فيك
​

 

[ريفال]

1-موضوعك يتكلم عل الصح والاغلب رانى عايشين فيه
2- الدنيا مخلات واحد في حالو الكل عندهم مشاكل والكل عندهم هموم ويعنى مغلطوش كي سموه هنا فرغ واش كاين في قلبك حقيقة والله مرات تلقى ناس قلوبها معمرة متلقة لمن تحى ولا لمن تشكى كل لي تقدر عليه هو البكاء بصح انا يظهرلي مواضيع الحب مثلا لي قلت عليها 15 سنة وتحب واحد بعمر باباها هدا نورلمون ميردوش عليها

 

[*amina*]

ربي يهديهم
نصف العتب على الوالدين نورمالمو يوعو اولادهم ويفتحو مناقشة معاهم مش يلهوهم بالدراهم ويقولو ولادي مهمش مستحقين اي حاجة والباقي على الاولاد والرفقة السيئة

 

[قساوة الماضي]

وحدة راح تسويسيدي وحدة كرهت حياتها....

​

ماتستهونش بمشاكل الناس:closedeyes::sneaky2:
ومايحس بالجمرة غير اللي كواتو
اوكي خيو
​

 

[nabil_16]

راها مخبلة...خليها حتى يفوت رمصان

 

[riadh bba]

ماتستهونش بمشاكل الناس:closedeyes::sneaky2:
ومايحس بالجمرة غير اللي كواتو
اوكي خيو
​

واش من مشاكل يا طفلة لي دارها بيديه يحلها بسنيه ولي جابوه رجليه نار ليه

 

[nassim007]

ماااعليه خووونا خليهم يفرغو وش كاين ف قلبهم

وحنا نحاولو نساعدووهم

انا وحد من ناس كي تتخلط عليا تلقاوني في فرش وش كاين ف قلبك مداير موضوع

المهم شكرااااااااااااااا​

 

[zi_crazy]

انا تبانلي لازم قبل ما نشوفوا واش راهم يديرو نروحوا للاسباب

و اللي من بينها نقص التوعية و التربية الدينية و تاني دور الاعلام ، رانا كامل نشوفوا مسلسلات غربية، يحوسوا يديرو كيما كيفهم و يقلدوهم

و تاني غياب الحوار بين الوالدين و الاولاد

الواحد في فترة المراهقة يكون في فترة حرجة و لازملو الحوار ، و في غالب الاحيان يكون تخالف في الآراء بين الوالدين و الاولاد

ملغري السبة راهي فيهم على خاطر ما كانش رقابة على واش يتفرجوا و لا واش من مواقع يتصفحوا

بكري كان الواحد في هاذي السن لاهي في قرايتو مي دروك مع العولمة تبدل كلشيء

و باش تعاود ترجع الامور كيما كانت راهو صعيب بصح ماشي مستحيل

انا تبانلي لازم واحد مين يشوف مواضيع كيما هاك يحاول يعطي رايو على خاطر اذا احنا ما حاولناش ننصحوا هاذ الناس، اكيد راح يحوسوا على حلول اخرى

مجرد رأي

و شكرا على الموضوع


سلام​

 

[رقيقة المشاعر]

ربي يهدي..