مشكلتي هي الدراسة

[RANIA_1994]

سلام جماعة
انا بنت في عمري 16 سنة مشكلتي هي الدراسة
راني معاودة العام يعني خسرت b.e.m و هادي لي راها كاتلتني و مقطعتلي قلبي
المشكلة نحفض ونقرا غايا حفضت غايا و قريت بصح قي قعدت في القسم و عطاوني الورقة نسيت كلشي و هدا الامر ما سراليش غير خطرة قلتها لماما قاتلي اقري القران بصح و الله ما نفع معايا والو و اللي راها كاتلتني بلي صحاباتي قاع راحو للlycee و انا راني قاعدة في بلاستي ندور قولولي كيش ندير نركز في القراية و ما ندير حتى حية في راسي
و السلام تفطرو بالصحة

 

[JSK 14 CH]

مافيها والوا حنونة كامل نعاودو مافيها حتى عيب انتي كسري راسك في القراية احفظي وماديري والوا في بالك وان شاء الله تنجحي واستعيني بذكر الله والقران وان شاء الله موفقة اختي

 

[يسرى 2008]

مشكلة صعبة بزاااف اختي ربي يكون معاك وش نقلك
نحب نعرف قبل انت من الناس الي تحفظ بزاف ومهبولة بالقراية
ولا نورمال برك
ونحب نعرف وقتاه حفظتي باسكو كان راكمتيهم اكي بيانسير متقدريش
وزيد مكانش في القراية غير حفيظة والمواد تاع العلم وينهم
مش محتم تحفظي المهم تفهمي وتعبري من عندك
وانا تاني بسيييف لنحفظ
بصح نكتب في ورقة ونحفظ بيها
وزيد نبريباريها قبل وكي يكتب الدرس تحفظيه في وقتو
جاوبيني ومبعد نرد

 

[mimi17]

هادي تاع كي حاطو الورقة ونسيت كلش صرات معايا في الباك من كثرة التوتر وقلة التركيز ايه كي تحفظي حاولي انك كل درس ديروه احفظيه وكل يوم راجعيه باش ما يتراكموش وتاني قادرة تفهمي احسن من انك تحفظي وتاني اعرفي كيفاش تنظمي وقتك وتنوضي مع الصباح كونك مهنية بلي الحفاظة ما تروحش وكيما قلتي انتي ذكر الله وتلاوة القران وانشاء الله العام الجاي تنجحي علابالي صعيبة لكن ان شاء الله يكون دافع باش تقراي وتنجحي بمعدل ممتاز كان الله في عونك.

 

[@احساس طفلة@]

ركزي برك في هاد العام وانشاء الله تديه بتقدير مليح
عسى ان تكرهو شيئا وهو خير لكم
بلاك كي عاودتي هاد السنة راح تقويك أكتر في لعوام الجاية
ربي يوفقك​

 

[CHOUJOUNE]

استعيني بالله اختي و ديري لي عليك وتوكلي على ربي وتفكري ان الله يمهل ولا يهمل و كل عطلة فيها خير
متكونيش سلبية وتلومي روحك كل شيء مقدر من عند ربي
و انشاءالله العام الجاي تديه بمعدل مليح و تلحقي صحباتك

 

[عبقورة-alg]

في الاعادة افادة اختي
وكلشي يجي في وقتو حلو
هي تغيض ضربة لولة
مي نظن راكي والفتي
نهارات لولين نتاع القراية حاولي متشوفيش صحاباتك الي نجحو
تاكدي بلي هذ العام رايحة تجيك القراية ساهلة
وبدل ما تحوسي على النجاح رايحة تسعاي للتفوق
ديري ثيقة في نفسك وديما قولي روحك بهذ العبارة****** انا هذ العام انشاء الله ربي ننجح
وربي يوفقك.................سلااام
​

 

[هدى42]

ركزي مع استاذك هذا هو الحل واتكلي على القرآن

 

[nassim007]

قضية إرادة برك


ديري لقلب و كملي
​

 

[nina23]

c'est pas la fin du monde اختي المرة هاذي خابت المرة الجاية تصيب وحطي ربي في بالك انا ثاني تصرالي نحفظ وننسى بشويا بشويا راني تخرجت ونحوس على خدمة
حبيت نقلك اللي يحط حاجة في راسو يعملها حتى لوكانت مستحيلة .يعني عندك تحطي حاجة غير لقراية وان شاء الله ربي معاك اوكي.

 

[سلينا]

لازم تكون عندك الارادة

 

[أبو الوليد القصباوي]

تقوى الله اختي الكريمة هي مفتاح النجاح .. فكما تعلمين الذنوب والمعاصي سبب لنسيان العلم والحفظ وهو مذكور في كتب الله ... وما اصابكم من شيئ فبما كسبت أيديكم ويعفو عن كثير .. اجتنبي المعاصي و الكبائر والصغائر وتعلمي العقيدة الاسلامية ..