قم للمعلم وفيه تبجيلا

[السوفي]

السلام عليكم ورحمة الله وبركاته
سعدت لما خبرت ان منتدى اللمة عاد فعادت لي اقلمي ومحبرتي وانارت الافكار مخيلتي وها انا اكتب اليكم رواد منتدانا فمرحبا بكم جميعا .
منذ الصغر وانا احفظ هذا البيت الشعري
قم للمعلم وفية تبجيلا *** كاد المعلم ان يكون رسولا
اخواني هل المعلمين في هذا الوقت يستاهل ان نقف لهم تبجيلا ام ....؟
لا يعرفون الا الاضراب وتقليس ساعات العمل والعطل والتهرب من الحراسه وحتى لو تحتمت وملقاش الفلته نام وقت العمل وربي غفور رحيم
ام تمنشيرهم فانهم لا يتوقفون عن القطاع الفولاني زادهم دراهم والقطاع الفولاني عطوهم شكارت دراهم والتعليم محقور هههههههههه راهم هكذا يتحدثون صدق او لا تصدق ؟
العام وطوله وهم يشكوا خاصتهم هذه وناقتهم تلك حتى صاروا يقصدوا الاضراب من اجل الراحه فقط
والله العظيم لا يهتمون لنفسيات التلاميذ المقبلين على الباكلوريا اوشعادة التعليم الابتدائي على طول يسرحوا ويهددوا في الوزارة عام ابيض وهم لا يعرفون انه عام من اعمار ابناءنا عام من حياتهم وهم لا يدرون فقط الدراهم وقداش زادوهم
معظمهم بزناسة وصاروا حصص الدعم كل يوم تسمع سعر لها جديد وهناك من توقف عن التدريس و فتح مدرسة في بيته بلا رقيب والكل عارف فاهم صار يعمل ليل ونهار في وقت 24/24 سا ماشاء الله يقول عنه زملاءه تحرر من من
معظمهم فرود وتاجر مواشي حتى الكلاب عفاكم الله وكل شيء مباح تجده عنده دوسي في تشغيل الشباب ودوسي في الدعم البناء المرحلي ويتمنى ربي يرزقه بعمره على حساب الخدمات الاجتماعية مال دول مسيب ليش ما ننتفش منه نتفه هههههههه اصبحوا اصحاب حكم
والله راني فهمت سبب تخلفنا وجهلنا من مثل هذه العقليات

السلام عليكم
​

 

[ماكانش]

راني معاك في حاجة ومارانيش معاك في حوايج
راني معاك صح كثرو فيها بزاااااف على الزيادة وماعلاباليش واش كاين
يقلك قرينا، ماقراو ماوالو الجزاير كامل عندها ليسونس ذرك
والله استخلفت معاهم العام لي فات وقت الإضراب والله نقعد ساعات في قاعة الأساتذة كرهولي حياتي الزيادة المردودية ومانعرف واش ...
بصح حتى خدمة التلعليم خويا خدمة واعرة ومتعبة صح صح وراني جربتها
الإنسان ألي يخدم بقلبو ويحب التلاميذ كامل تفهم هذا انسان يتعب بزاف
أما الإنسان ألي يجي يقري ألي سمع سمع وألي ماسمعش الله يسهل هذا تساعدو مهنة التلعليم ...
على العموم الأستاذ طيح بقيمتو بزاف ...
والحمد لله بكري كان الأستاذ يخلعنا لأنو الناس القاريا قليل ذرك الحمد لله الجزاير كامل عندها شهادة ليسونس بل وجل الأساتذة حتى الباك ماعندهمش ...​

 

[خفيف الروح]

اكلامك فيه واعليه

يعني كاين وكاين

والتعميم ماهوش امليح

والحالة امتاع البلاد راك اتشوف
مخروضة اكل من الطب للتعليم
للصحة للحرس ربي يصلح الاحوال

مشكور خويا على الموضوع
​

 

[الورد الأحمر]

بعد ما نقول إلاّ من رحم ربي، نقولك ما بقيتش نستعرف
بالأساتذة، والحالة هذي تاع عدم الاعتراف داوها عن
جدارة واستحقاق، ربي يهديهم ويهدينا
مغسي خويا عالموضوع، تقبل مروري
___________________________

​

 

[EL General]

و الله وش نقولك مهما تقول سيبقى المعلم الأجمل في المجتمع مهما كانت صفاته و ما يحتوي
ميغسي على الموضوع
​

 

[عالي الحمدي]

بسم الله

يبقى المعلم محترما ومقدسا في ذاكرتنا وشعورنا

رغم التجار والمنفعيين اللي دخلوا

باب التربية والتعليم.

مشكور.
​

 

[ابوصفوان]

السلام عليكم
قم للمعلم وفه التبجيلا كاد المعلم ان يكون رسولا
المشكلة ليست في الاستاذ لان الاستاذ في الجزائر يمر بضروف صعبة جدا جعلت منه شخصا محطما
عندما يكون القسم مكون من 40 الى 50 تلميذ
الراتب المحصل عليه الاستاذ لايكمل نصف الشهر
والنقل غير موفر
والسكن
وفوق هذا الكثير من الاساتذة غير مرسمين
يعني هموم فوق هموم
اضافة الى ذلك يتحصل طالب جامعي على شهادة الليسانس ثم يتحول بقدرة قادر الى استاذ والمفروض ان يكون هناك تكوين في المجال قبل التعيين
كيف بشاب لم يدرس منهجية التعليم تعطه 50 تلميذ ليعلمهم
اما الجانب الاخلاقي فالوزارة تعين الاساتذة دون التحقيق والذي ليس له اخلاق يدفع رشوة حتى يرسم وذلك يصبح مدير
وحتى التلميذ لم يبقى ذلك التلميذ الذي كان في الماضي
على الصعيد الشخصي كنا نحترم الاستاذ كآبائنا لان الامر متبادل فالاستاذ كان يعرف كيف يفرض احترامه على 50 تلميذ لانه تعلم كيفية ذلك ونحن كان اهالينا يعلموننا انه اذا اشتكى منا الاستاذ منحن مخطؤون لا محالة
الآن اصبح التلميذ يعتدي على الاستاذ وكذلك اذا خرج الاستاذ الى الشارع ليطالب بحقه من الحكومة يضربه شرطي لم يكمل تعليمه الاساسي

في الجزائر الاستاذ يهان من طرف الحكومة او وزارة التربية والتعليم التي تخلت عن الرسالتين واصبح اسمها وزارة الوزير الدكتور العبقري الجهبذ قاهر الجهل بنور سيف علمه المبارك ابوبكر بن بوزيد

 

[Badech]

سلام والحمد لله

عطر زهرك اخي وطيب ريح حديقتك

كلام من ريش

و معني في صميم الجبال

بوركت و سلام
​

 

[عاشقة رجاص]

السلام عليكم

أهلا وسهلا بك أخي من جديد

لعل الحديث هنا يطول ويطول لكني سأحاول الإختصار

أخي من يقول كلاما كهذا فهو بالضرورة لايعلم حال المعلم المزرية اليوم

لأن أصعب مهنة هي مهنته

40 تلميذا على الأقل ووسائل منعدمة ومناهج مكثفة وأولياء لايعلمون شيئا عن أبنائهم حتى تصلهم نتيجة رسوبهم فيبدؤون بالتهديد والوعيد

وزير يضغط على مدراء التربية ومدراء على المفتشين ومفثشون على المعلمين

قطاع هو الأخير فعلا من حيث الخذمات و الدخل وحتى الإحترام

إذا كانت التعليم هو مصر الرزق الوحيد لهذا المعلم ومدخوله لايكفيه حتى ربع الشهر فأنى له أن يعطي ويبدع ويتقن عمله؟؟؟

وزير حطمنا كتلاميذ معنويا ومنهجيا ثم بدأ يلقي اللوم على أساتذة كل مافعلوه هو المطالبة ببعض حقوقهم المهضومة

أخي ادخل ميدان التعليم جيدا واكتشف خباياه ستوفي هذا المعلم التبجيل حقا

انظر إلى الإضرابات تجتاح البلاد أطباء وحرس بلدي وغيرهم والجميع يطالب بحقوقه

فلما التكيز على المعلم بالضبط

نعم سبب تخلف امتنا هو إهمالنا لهم وغفلتنا عنهم

دولتنا جعلت همهم الوحيد كسب تلك الخبزة من أجل أن يعيش أبناؤهم

هل تذكر العام الماضي كل ذلك التهويل الذي طال مقدار المال الذي سيقدم لهم والزيادات الممنوحة لهم

ظننا أنهم سيدخلون البلاد في فقر مدقع وفي النهاية لم ينالوا ثمن مانالهم آخرون في قطاعات أبسط من حيث الأهمية والدور دون ان تقام عليهم اية ضجة

لم تبقى وزارة تربية وتعليم

بل أصيبحت وزارة تغبية وتعتيم

والادهى من هذا ان الكثيرين ينساقون وراء ترتهات هؤلاء الوزراء الذين نصبوا أنفسهم مصلحين وماهم إلا مفسدون

شكرا أخي على الموضوع القيم جدا

بارك الله فيك​

​

 

[la_safa]

سلام خويا صحيت على الموضوع

عندك حق في كل كلمة قلتها
مي درك لاعاد استاذ يستاهل و لا والو
صدق واحد الجان يقرى معايا
مرة وقف قال للاستاذة واش راكم محوسين برك شكون لي راه يخلص كيفكم
شكون لي راه يبزنس كيفكم شكون لي راه شابع راحة كيفكم
قالها نتوما كذهوما حطب جهنم
/هادي تعتبر منو قلة ادب مي كلامو لو صحيح الاستاذة غلقت فمها وخرجت/

مرسي خويا
​

 

[السوفي]

السلام عليكم ورحمة الله وبركاته
​

راني معاك في حاجة ومارانيش معاك في حوايج
راني معاك صح كثرو فيها بزاااااف على الزيادة وماعلاباليش واش كاين
يقلك قرينا، ماقراو ماوالو الجزاير كامل عندها ليسونس ذرك
والله استخلفت معاهم العام لي فات وقت الإضراب والله نقعد ساعات في قاعة الأساتذة كرهولي حياتي الزيادة المردودية ومانعرف واش ...
بصح حتى خدمة التلعليم خويا خدمة واعرة ومتعبة صح صح وراني جربتها
الإنسان ألي يخدم بقلبو ويحب التلاميذ كامل تفهم هذا انسان يتعب بزاف
أما الإنسان ألي يجي يقري ألي سمع سمع وألي ماسمعش الله يسهل هذا تساعدو مهنة التلعليم ...
على العموم الأستاذ طيح بقيمتو بزاف ...
والحمد لله بكري كان الأستاذ يخلعنا لأنو الناس القاريا قليل ذرك الحمد لله الجزاير كامل عندها شهادة ليسونس بل وجل الأساتذة حتى الباك ماعندهمش ...​

سرني مشاركتك موضوعي هذا وصدقني انا مع الاستاذ المظلوم مع مطالبته لحقوقه انا معه في كل شيء ولكن هناك من التصرفات التي يقوم بها بعض المعلمين لا تبت الى التعليم بشيء لا من قريب ولا من بعيد امتهانهم الطاكسي المخفي صارت ملاسقة لهم دائم كما البزنسه صارت رديفتهم ثم كلامهم عن المادة في كل شيء وهم يعلمون ان عملهم حساس يمس كل بيت جزائري بل يمس مستقبل شباب فكيف يهددون بسنة بيضاء ببساطه هكذاكما قلت اخي طيحو هم بروحهم
شكرا مرة اخرى
السلام عليكم

 

[السوفي]

السلام عليكم ورحمة الله وبركاته
​

اكلامك فيه واعليه
يعني كاين وكاين
والتعميم ماهوش امليح
والحالة امتاع البلاد راك اتشوف
مخروضة اكل من الطب للتعليم
للصحة للحرس ربي يصلح الاحوال
مشكور خويا على الموضوع
​

اهلا وسهلا بك اخي الفاضل
ردك قيم وكما قلت انفا التعميم لا يصح هناك الصالح والطالح في كل ميدان وربما الصالحوان اكثر ونحن لا نعلم مما نلاقي من شرور الفاسدين
شكرا مرة اخرى
السلام عليكم

 

[السوفي]

السلام عليكم ورحمة الله وبركاته
​

بعد ما نقول إلاّ من رحم ربي، نقولك ما بقيتش نستعرف
بالأساتذة، والحالة هذي تاع عدم الاعتراف داوها عن
جدارة واستحقاق، ربي يهديهم ويهدينا
مغسي خويا عالموضوع، تقبل مروري
___________________________

​

اشكرك اختي على مشاركتك موضوعي هذا
ربي يهديهم جميعا لانهم هم من يربي وينير المستقبل للجزائريين
السلام عليكم
​

 

[NeيRسNe]

السلام عليكم اخي
مشكور على الطرح
صح وحقيقة لا يمكن تجاهلها المعلم في هاد الوقت صح نقولوا القليل او النادر يكون جدير بهذه التسمية او المهنة
بعض من يحمل اسم معلم تلقاه مايستحقش هاد الاسم
وكاين لي الله يبارك يفنيو حياتهم باش يخرجوااا شخص نافع في هاد الدنيا
ربي يهدي كل من لم يتقن عمله
شكرااا لك مرة اخرا
​

 

[أبو عاتكة]

في الماضي كان المعلم يصرف من جيبو حتى يعاون تلاميذ وكثير ما يشري الطباشير من جيبو ولوازم القسم .وكانت التربية والتعليم يمشو في خط متوازي .نتعلمو ونترباو .

والان دخلت المادة في الطريق وانشغل بها المعلم والاستاذ وجعلها من أولى الاولويات والمصيبة انها اثرت على منهج التربية للتلميذ فاصبح التدريس يفتقد للتربية وساعات العمل هي ساعات ثقيلة للمعلم ينهيها عن مضض .
هذا لا يعني انو فيه معلمين واساتذة مازالو محافضين على الحس التربوي والتعليمي .كما يوجد حماسة الشباب الجديد المتخرج حديثا لتقديم منهجه بطريقة جديدة .

ما جرى في الاعوام السابقة من كدر الحياة وضيق العيش اثر سلبا في كل النواحي واصبح هم كل جزائري هو كيف يستطيع تامين قوت عياله وسط الغلاء الفاحش والمتطلبات الكثيرة .

على العموم نتمنى منهم ان لا يربطو الجانب المادي بالجانب التربوي والضمير التعليمي ويأدون دورهم الكامل بعيد عن مطالبهم .فلا ذنب للتلميذ والطالب فيما يجري بل قد يفقده التركيز ويبعده عن الدراسة والاهتمام بها لما يرى هذا التخلخل الحاصل في القطاع التعليمي الذي ينتج تلاميذ وطلبة غير مستقرين لا من الناحية الثقافية ولا التربوية ولا السلوكية .

بارك الله فيك .

 

[السلطانة]

وعليكم السلام
المعلم تا ع هاد الزمان ماوش كيما تاع بكري
كاين يخدم على جال الدراهم ومهموش التلاميد
وكاين لي يقري عن ضمير واهتمام بالتلميد ومن قلبو صح
والتلميد تاع هاد الزمان تاني ماوش كيما تاع بكري
كاين لي يقرا وكاين لي جايبها صحانية وجه
قريني واأنا سيدك
وهادي لي تخلي المعلم يتيقير ويعواج حتى هو

كاين وكاين
ربي يهدي من خلق
شكرا على الموضوع
​

 

[BARCA232]

السلام عليكم ورحمة الله تعالى وبركاته
موضوع قيم ويستحق اول شيء الاصغاء والمتابعة وخمس نجوم
اما بعد يعني ماعندي مانزيد على كلامك الكثير
لكن مقولتك لاتنطبق على الجميع لانه الحمد لله مازال معلمين واساتذة نعم الاستاذ
أب أخ مرشد يعني كل القيم تجدها فيه
مي كاين حدث ولاحرج
وهذا شيء يخوف من القادم ربي يستر برك
شكرا لك كثير
ربي يبارك فيك
​

 

[hicham500]

لا تنسى ظروف العمل الصعبة التي يعاني منها المعلم
فاصبح يضرب به المثل في البخل
لوكانت دولتنا دولة قانون وحقوق وكل ياخذ حقه
وتوزيع عادل للثروة وفق معيار الجدارة والاستحقاق
لما اضطر المعلم او الطبيب او المهندس او المحامي ...الخ
الى اللجوء الى الاضراب او اي شيئ آخر ، انا لا اقول ان المعلم فقط المظلوم
بل هناك البعض منهم من يرى في مهنته انها تجارة وليست تعليما
ولكن الاغلبية ليست مع مثل المثال ​

 

[somi]

المقولة لا تنطبق على كل الأساتذة فهناك ممن مازال يعمل لوجه الله تعالى ومازالوا يزاولون التعليم حبا فيه مثلا لو نأخذك أنت وسط مجموعة 40 من تلاميذ المتوسط لأنوا تلاميذ الثانوي أكبر قليلا وأعقل قليلا
ونعطيك سوى عنوان الدرس والعناوين الفرعية وحلها إن إستطعت
كل العمال في كل القطاعات ينهي عمله في مقر العمل ولما يعود الى المنزل لا يشتغل إلا بالأسرة عكس الأستاذ حضر الدرس صلح لكتاب لأنه فيه أخطاء صلح الواجبات صلح الفروض صلح الإمتحانات كل هذا على حساب أسرته
مثلا أنا لما عملت كمستخلفة لمدة 5 أشهر 8 أقسام كل قسم فيه من 33 الى 38
كل شهر واجب
وفروض وإمتحانات
بدون ذكر الأعمال الإدارية التي يقوم بها كأن يكون مسؤول مادة أو مسؤول قسم وهلم جرا
تجرب كل الوسائل مع التلاميذ
الحوار الفردي مع كل شخص حتى أنوا تصبح طبيبة نفسية ولست أستاذة بمعنى كل واحد وعندوا حالته الخاصة وإذا كنت أستاذ مهتم سوف تحاول فك طلاسم كل شخصية وتعالج مشكلتها
وتجد العديد من المشاكل والله لما نعلم مشاكلهم نعذرهم
بالصح يا أخي كل هذه الطاقة لو كملت لآخر السنة كنت قد تدمرت تماما تماما لأنوا فيه تلاميذ يا لاطيف تكلم معاهم ولا دير التقرير ولا زعط ولا دير واش تحب مربيين أعلا الضرب ولا أعلا التعلال ما نعرف
بمعنى يا أخي حط نفسك مكان هذا الأستاذ وأحكم
مسألة ّأخرى الدروس الخصوصية
أنا في دراستي كلها لم أخذ ولا درس واحد
وأنا ضد هذه الأعمال
لا أقبلها
وهناك طبعا أساتذة تجار يقومون بهذه الدروس وبمبالغ كبيرة الله يهديهم
ومسألة أخرى حتى أنوا التلاميذ تعودوا على الدروس يأخذون مقالات فلسفية أو تاريخية من الدروس الخاصة ويكتبها لك مباشرة في ورقة الإجابة إن كان السؤال يدور حولها فقد غنم 18 بدون أي جهد إن كان خارج الموضوع فهو في الحضيض بمعنى تعودوا على هذه الدروس وأصبحوا مبرمجين
لا يفكرون ولا يستخدمون عقولهم
إلا الأذكياء منهم

 

[السوفي]

السلام عليكم ورحمة الله تعالى وبركاته
موضوع قيم ويستحق اول شيء الاصغاء والمتابعة وخمس نجوم
اما بعد يعني ماعندي مانزيد على كلامك الكثير
لكن مقولتك لاتنطبق على الجميع لانه الحمد لله مازال معلمين واساتذة نعم الاستاذ
أب أخ مرشد يعني كل القيم تجدها فيه
مي كاين حدث ولاحرج
وهذا شيء يخوف من القادم ربي يستر برك
شكرا لك كثير
ربي يبارك فيك
​

السلام عليكم ورحمة الله وبركاته
ما عسايا ان اقول بعد كلامك هذا جزاء الله كل خير وبارك لنا فيك
اتمنى ان تنصلح الامور وتتحسن الضروف ونعود اسياد العالم بالحق والعدل لا بالظلم والبطش
شكرا
السلام عليكم