ملي عرفناه ولينا نخدمو عليه !!!! إنتـ/ي تآني تخدمـ/ي عليه

[الجندية]

السلام عليكم ورحمة ربي :shiny:
السخااااااانه طروشتني مانيش طايقه نترحك

المهم ندخلو في الموضوع
يآجماعه الخير كاين وحد السيد راه مهبلني وخذني في دراهمي
وليت غير معاه نهدر غير بيه مكانش جماعه نكون فيها ومايكونش حاضر وين نروح راه معايا .. معايا قلبا وقالبا

ضرك تقولوو المهبوله نتاع فاتي واش راها تخرف :glare:
يآو ماشي العشق الممنوع هذا ...
عندي دي زيزتوار فور عل تع مهند مع ...:thumb_up2:

ماعرفتوهش ؟؟ يااااو قاع تعرفوووووووووه:crying:

هذاااااااااااااااا :

هاااااذ المـGـلوع االلي راه أشكال وأنواع في الأسواق
العآلميه .. مانبعدوش نقعدو غيـر عل أرض الوطن

الصغير والكبير المرأه والراجل .. قاع معااااااااااه_o:
الله غالب ملي عرفناه ولينا نخدمو عليه
وإنت تاني تحدم عليه ...

ماتقولوليش لا لا ... 99.99% هالكهم الفليكسي
ونزيدكم .. ماشي اللي يفليكسي غير لروحه
كاين اللي في النهار عنده من هاذا بزاااااااف

ههههههههههه راكم فهمتوني ... لا محال
:lol::lol::lol::lol::lol::lol::lol:
كاين اللي حافضينها ... البروفيتاج = 3omri Flexyli stp
يروح مسكين على نيته يفليكسيلها .. الله يحسن عونكم
ونستعرف باللي يفليكسي غير لروحه مايسال في واحد مايساله واحد :re_gards:تحيه ليهم + تصفيقه حآآآره :lolo:

جآزي دارت التاويل ... 100DA تهدر حتى تشبع
أنا كي نآكتيفي يولي قاع الشعب يحكي من عندي ههههه

الناس قاع رها جازي .. عيش la Vie
اللي ميت مسكين ماعندهش دورو .. طاح وناض وشرى

إيـــــــــــه !!!! وآش نقولو
علابالي طولت في الهدره بزاف بصح الموضوع هذا فيه هدره بزاف .. راكم تعرفو

ضروك المآيكروفون عندكم ... بصرآحه تصرف بزاف على الفليكسي ولا لا ؟ :um_sh:
علابالي الكل راهم موخذين كي حالتي:tears:
أيــآ نستنآكم ... :like_1: نقرعج شويه

هآآآآو لي عجبه السيجي يعطينا تقييم ++ صدقه عليه
والسلاااااااااااااااام عليكم ربي يقدركم على الفليكسي
أختكم المهبوووله :tongue_3:
​

 

[** غزال الصحراء **]

و عليكم السلام , السخانة طروشاتك ؟ فليكسيلها stp ..


وي الفليكسي لازمو Budget سبيــسيال , و يخلي البنادم ديراكت
Vive الميلينيوم .

 

[AHLEM1992]

انا صراحة نصرف بزاف على البورتابل و الكريدي ما نعرفش كامل كيفاش يروح
مالغري خاوتي و بابا هما هما الي يعيطولي كي نكون نقرا مي نصرف بزاااف و يروحو غير في وين راكي ، آفيشاو ولا مزال ، جا البروف ، راهم في لاغراف و هكدا يروح الكريدي
انا ضكا راني في الفاكونس عندو بزاف ما صوناش
و صحباتي كامل نلقاهم في الامسن و نديرو جمايع غراتوي بالسكايب
صحيتي على الموضوع ختي
بارك الله فيك + تقييم ههه​

 

[إيمان قلب]

مانكذب على عمري مانفليكسي mobilis والكل تعيس ست دقايق باطل وعقابها
واللي عندهم جازي نحكي معاهم من عند خويا هو اللي موخذاتو لفليكسي نهار تخصو تحسابي
خصو الدخان
يعطيك الصحة اختي على الموضوع + تستاهلي تقييم

 

[ماكانش]

يعطيك الصحة فاتي
والله انا نحير وين يروح لكريدي تاعي نفليكسي بالعشرة الاف يوم اطير ومانفهمش وين تروحلي
وينك ارواح روح جيب هذي هيا ...
ندو شهرية زايدة هههه
يعطيك الصحة على الموضوع الباهي​

 

[السلطانة]

وعليكم السلام
المخلوق هاذا مرضني
سرقوهولي في اول العام وبقيت شهورا بلابيه
وكي شريت واحد زاد طاح اون pان
وكي زدت شريت واحد هيا تبلوكاتلي
la puce
زدت شريت وحدة
.....0780
ههه هيوا

اسمحيلي حكيتلك قصة حياتي خخخخ
نجاوبك على موضوعك
انا في وقت لقراية نفليكسي صح بزاف
على خاطر نحتاجهم على جال باه نكلم لبنات
مي دركا والو
راه ديما سيليونسيو ومطيش فوق ا لطابلة
يعني منيش من الناس لي يفليكسيو بزاف
غير على الحاجة الضرورية
صحيتي على السوجي
وتفضلي التقييم
تحياتي ياعاشقة اليسا خوري
​

 

[hannsg]

ههههه انا من العنوان عرفتك تحكي على البورطابل
مي انا ماني نخدم عليه ما والو هههه
تقريب نعيط غير للدار

 

[بنـ MaPa ـت]

وعليكم لسلاام

اهلا فاتي صافا؟

انا ايدا خدمت نخدم على كرشي واللوك تاعي سي تو ههه
البورطابل خاطيني ومانسحقوش في سبيل الله فيه غير الهم وياكل دراهم البنادم خطرات بلا فايدة
وكي نحب نهدر نروح للفيكس وصآآيي

مرسي على الموضوع الجمييييل
تحيآآ’’تي
​

 

[يوسےفے]

ايه لفليكسي ....pيpلي و نpيpيلك...ما تفليكسيلي ما نفليكسيلك
حنا هنا عندنا شويا برد الحااال نفليكسيهلك هههه
المهم لا غالب وقتنا هذا يحتاج الفليكسي....لي زاfير بزاااف ههه و كيما قلتي وخدنا ف الدراااهم....كاينه ناس والله ما صايبه شا تاكل ..بصح..تصيبهم كل العام لاصق ذاك المgلوع كيما سميتيه في وذنهم تحسب..منgوش....ناس درك لاتيه غير بلفليكسي ما تخممش في حاجه أخرى
المgلوع يا الملgوع ما خليت ما بقيت........و كيما قالو لي قبلي تحا الميلينيووم​

شكراااا..على الموضوووع ...مع شويه تقييم​

تحياتي​

 

[**نجلاء**]

أنا مانخرج بزاف مانفليكسي
كي نتوحش الغاشي نفليكسي 10آلاف نكتيvي العفسة و نعيط
أما باقي اليامات والو:sad: عالعام و أنا محرقة:sadwalk:

مرسي عالموضوع اختي

 

[sahiko hamza]

Vive الميلينيوم .

والله نسيتو لفليكسي خلاص
من 2008 وانا مئة ألف كل شهر هههه
روعة الملنيوم يكذب عليكـ .
لابونيس لا أكتيفي لا 10 ب 20 لا والو
اهدر كيما تحب ومع من تحب بيان سير 07 وكمل الباقي هههه :shiny:

​

 

[تاعبة كل الناس]

سلام عليكم
ماهو مداير فيا والو انا
وعندي قرررررن ما فليكسيتيش
صاحبتي عندها 0661 نهار طول و هي تعيطلي هادا ماكان
ماهالكني فليكسي مانصرف عليه ههههه

صدقني والله ماعمبالي وش من بيس راني مركبة ضرك
وقيلة وقيلة
جيزي ههههههه
يعطيك الصحة
​

 

[chiguevara]

وعليكم السلام
ما عنديش بورطابل مهنية من الفليكسي و اللي يسحقني (يحتاجني)يلقالي عند ماما و كي نسحق)كي نحتاج) نهدر من تاع بابا هههه
​

 

[**نجلاء**]

سلام عليكم
ماهو مداير فيا والو انا
وعندي قرررررن ما فليكسيتيش
صاحبتي عندها 0661 نهار طول و هي تعيطلي هادا ماكان
ماهالكني فليكسي مانصرف عليه ههههه

صدقني والله ماعمبالي وش من بيس راني مركبة ضرك
وقيلة وقيلة
جيزي ههههههه
يعطيك الصحة
​

هههههههههههههههههههههههههههههه
وآقيلآ جآزي

عجبني الرد تاعك أختيـ...
سلآمو..
​

 

[secret de coeur]

وعليكم السلام خيتو
الفليكسي مانتفاهمش معاه
نفليكسي برك من شهر للشهر + عندي نجمة
مانهدرش بيها بزآف غالية لونيتي فيها
نpروفيتي في خاوتي كي نصحق نعيط
ايا سلاااامو
ومرسي على الموضوع +++++++
​

 

[NICHA03]

والله يا اختي طليتيلي على قلبي يااااااااو دراهمي راحواا غير فليكسي حنان نهدر من عندك حنان نبعث ميسااااااااااج حنان ..... حنان هاداك هوااا زوج دوروااااا لي عندي يخلاصواا لازم نفليكسي عالعام فالطاكسيفون مرسي على الموضوع كشما تفليكسيولي راني هنا

 

[DARINE05]

مرسي فوفو على الميضوع والله انا نفلكسي مرة في شهر يعني منحكيش بيه كي نتحتج نتصل من عند الوالد

 

[Estrella]

ههههههه
ولا ياكل معاهم ويرقد معاهم
هاد البورطابل
الحمدلله ماعندي بورطابل مانفليكسي
ماوااالو راني مريحة
صحيتي فاتي
​

 

[nina bonoise]

انا وقت لقراية نفليكسي ياسر
مي درك لا لا معنديش علاه نفليكسي
لي نسحقهم الكل نلقاهم في الفايسبوك ول السكايب

 

[الجندية]

صحيييييتو صحيتوووو صحييييتوووو
تسفيقه حآره خخخخخخخ
غير نتوما اللي تفرحو .. وما البورطابل هالكلي الجيب
نصرف مانصرف على التبييشه وماتجيش كيما هم الفليكسي
وفليكسولي ههههههههه
اللي عنده يفليكسيلي راني مشومره
​