انتهى زواجي قبل ان اتزوج

[سمية25]

السلام عليكم ورحمة الله وبركاته

موضوعي باين من عنوانه
راني رايحة ننفصل على خطيبي نهائيا وبدون رجعة لاخطرش في وقت الصعيب ماصبتوش حدي ولا واقف معايا
صرات مشكلة صغيرة وكانت بيني وبين اخته ولكن هو تدخل ووقف مع اخته مع انني انا المظلومة انا كان قصدي الخير وكانت نيتي صافية معاها وعمري ماعاملتها بكره ولا بحقد مي كي ولات هكدا ووصلت بيها دير بيني وبين زوجي وحتى امه جات مع بنتها
والله العظيم غير ظلموني نتاع الصح واللي غاضتني زوجي مانصفنيش وطيحلي وطيح بيا قدام اللي يسوا واللي مايسواش
مي نوكل عليهم ربي هو اللي يوقف مع المظلوم وربي يمهل ولا يهمل
قررت نهائيا ننفصل عليه وراه عندي اكتر من عام مخطوبة ولكن مانفع معاه والووو
هو شخص ينصت لهدرة الناس وكيما يقولولو خواتاتو يهدر انا ماجانيش راجل لانه ماهوش نتاع مسؤولية وماهوش عارف اصلا حق الزوجة وحق الاخت مايعرفش يفرق مابين حياتو الشخصية وحياتو العائلية اي حاجة يزعف ويقولي كلشي منك انتي
انا مليت منوووو وراني مريضة درك بسبابو
نزلي الضغط لادنى درجة ومانيش قادرة نحكي ولا نبكي ولا نجاوب حتى واحد برك حبيت نقوللكم بلي انا خلاص مليت من الدنيا ومن الزواج ومن الرجال كلهم
وقررت بعد انفصالي مانفكرش فالزواج ثانية
علاااش صرالي هكدا وعلاش دارولي هكدا
مانيش عارفة
مارانيش باغية نجهل ونقول علاش يا ربي
لالا انا حقيقة قبل هذي المشكلة كنت صلي كل يوم مع كل صلاة نزيد زوج ركعات في سبيل الله وكنت ندعي ربي يجمعني بزوجي اذا كان زواجي بيه خير ليا لديني ودنيتي
ويبعدني غليه ويوريلي الصح ولو بسبب
وربي استجابلي بفترة قصيرة وبينلي بلي ماهوش ليا ومستحيل نتهنى معاه
ايا انا نقوللكم السلام عليكم
ونقول اللي ظلمني حسبي الله ونعم الوكيل
​

 

[إيمان88]

السلام عليكم حبيبتي.لا تحزني أختي الخيرة فيما إختاره الله .راكي تقولي كنتي تصلي دبر كل فرض و تدعي ربي.خلي إيمانك بربي كبييييييييييييييييييير.هو لي نورلك طريقك.لا تيأسيةأحمدي ربي بزاف تنفصلي الأن و ماشي بعد الزواج.أستودعك الله الدي لا تضيع ودائعه.
​

 

[✿أسيـل✿]

السـلام عليـكم
اختــــــي ماتزعفيش روحـك إحمدي ربي لي شفتـي هدا الشي قبل الزواج ياسيدي راكي تزوجتـي ممبعد بدات المشـــــــاكل كيفاش رح الديري؟
هو صح مش راجـل على خاطر يسمع لاهلو .. وهدا ماهوش قد المسؤوليــــة والله
حنـــونة حاولي تنســــــاي وبداي صفحـة جديدة
كون جا صح يحبك كون وقف معــــــــــــاك وماسمعش للهدرة ربي يهديـــــــــــــه

ربي يكون بالعـــــــــــــــونكـ
وربي يصبركـ ان شاء الله
ماتزعفيش روحك على جالــــــــــو
كـاين لي خير منـــــــــــــــو وربي يفرج عليــك يالعزيزة​

 

[EL General]

الله يكون في عونك آآختي
كثروآآ آآلحسآآدين في هآآد آآلزمآآن و ربي يسترنآآ

 

[ISMA.dz]

السلام عليكم اختي

ماتتقلقيش وماتعمريش قلبك


راكي تقولي انا دعيت ربي

وربي شاف فيها خير

احمدي ربي

واتكلي عليه

واللي فيها خير مرحبا بيها

وربي يصلح احوالكم

ماتزربيش روحك وماتتسرعيش فقرارك راهي مدة عام يعني مش صغيرة

+

لحظة زعاف يمكن تقلق وخرج من فمو كلام ماعجبكش

ربي يكسر قلة عسل بيناتكم

ربي معآك سلاااااام​

 

[أمازيغي]

السّلام عليكم
ربّي نشاء الله يهنّيك ويبعّد عليك كل شر، وينوّرك طريقك في الدّنيا والآخرة.
الحمد لله على كلّ حال.
مانيش في بوزيسيون باش نفتح عليك أبواب النّصح، فأناْ ضد الخطوبة طويلة الامد، ولكن حاب نقولك ربّي جعل مع العسر يسريْن، واللّي هوما في حالتك أنّو يخلف عليك ربّي خير منّو في الدّنيا أو الآخرة، أو أنّو يرجّع الحال إلى أحسن ممّا كانت عليه بيناتكم.
خلّي ثقتك في ربّي تزيد كلّ لحظة وثانية.
شكرا.

ملاحظة: حشمت كل مرة نعرضكم لعرسي
وانا مازالني ماتزوجتش
امالا ماكمش معروضين حتى نهار العرس نقوللكم
نجوتاميكم كاملين
:love01:
وحنا ثاني .
:-r

​

​

 

[fofabriyanka]

انا نقولك ربى استجاب دعوتك و الحمد لله انفصلتى عليه فى فترة خطوبة
و متفكريش فيه و وكلى ربى عليه.
و افرحى و اضحكى و انسى الماضى و الله يمهل و لا يهمل و راح يتقدملك واحد احسن منو المهم متياسيش من دنيا.

 

[حكايا الورد]

اختي مايش رايحة نواسيك لانك فعلا لست بحاجة لذلك
فقط اقول لك تذكري دائما انه كل واحد يدي مكتوبو حاجة لا نقاش فيها
وزيدي لعله خير دوك راهو هاكا من بعد الزواج كيفاش؟
ربي يعوضك

 

[{مُدَلَّلَتُهُ}]

و عليكم السلام و رحمة الله و بركاته

أختي الحمد الله الي صرا هاد الشي قبل الزواج تخيلي كن ما فقتيش حتى بعد الزواج ؟؟ ربي استجاب لدعواتك

ديري ديما في بالك ما يلحقنا غي الي كتبهولنا ربي

و ربي يعوضك بلي خير منو و يرزقك ولد الحلال الي يستاهلك و يهنيك
​

 

[سمية25]

اشكر كل من زار صفحتي وتفضل لي بنصيحة ودعم نفسي
شكرا لانني تعرفت اليكم وحقا وحقا امضيت معكم وقتا طيبا وكنت انفس عن نفسي هنا في هذا المنتدى الذي عرفني بالعديد من الاصدقاء الطيبين
شكرااااااااااا وربي يجازيكم كل الخير ان شاء الله
وحسبي الله ونعم الوكيل في اللي ظلمني وجرحني
سلاااااام

 

[roudi92]

الله يعينك وربي يكون معآآآآآك حنونة

 

[ام منصف]

سمية الحبيبة
ما تقلقي روحك ما والو صدقيني راجل بالمواصفات اللي راكي تحكي عليها ما يستاهلش كلمة راجل فيه
-مع كل احتراماتي -
والحمد لله ان ربي ما خيبكش وبينلك معدنه من البداية وقبل ما توقع الفاس في الراس
رايي تعرفيه من البداية ومازالت مصرة عليه
وقرارك هذا قرار جيد لحياتك
ممكن قاسي شوية مع الاول
بصح امبعد تلقاي روحك احسن
ربي يجيبلك قسم اخر كيما تبغيه
وربي يفرحك ويصلح امورك
استعيني بالله وعندك تفقدي الامل بربي
واكيد الصلاة الصلاة هي اللي تفرج الهموم والكرب
​

 

[مابقاش بزاف.Dz]

ما تعمريش راسك بزاف اختي و ما تتقلقيش و ما تخليش هاد المشاكل تاتر بشكل سلبي خاصة على صحتك بسبـة التخمام ووووو لانها امور بسيطة لوكان تشوفيلها بمنظور آخر
انتر حاولي ما تتسرعيش فالقرار لانو راح تندمي ممبعد من يدري شوفي معاه الحوار احسن الطرق للتفاهم بلعقل بركــــــ و ربي يكتبلك الخير

 

[sahiko hamza]

احسن والله



قالك لي فيه الخير يجيبو ربي
وانتي جاك الخير
هو قبل ما يتزوج بيك ودارلك هك
خلي يا تتزوجي ..............
تعيشي حياتك كاملة وانتي مظلومة
مالا ندعيلك ربي ينوبلك بخير منو ..
​

 

[hiba14]

شتي كيفاش المشكل وين انهم ما يفرقوش بين الاخت و الزوجة كي شغل نهار اللي يوقف مع اختو راه راجل و حق الزوجة وين راه حتى واحدة ما راهي خير من الاخرة اخت اختك و مرتك راك مسؤول عليها و المسؤولية ماشي لعب و لا ما كاش غي روح تربح و هادا من عندي الله لا تربحو يتوشي في ولية ماشي راجل اسمحيلي راني زدت فيها
ربي يجيبلك ما خير منو و دا بغيته و قاع نورمال عذمزيا خسر معاك باش تنجمي تنسايه بلخف و طيحي في سيد سيدو

 

[أم عبد الله]

السلام عليك حبيبتي حميدة

ممممممم بيناتنا علابالي بلي راكي مقهورة ومن حقك تبكي مي شوفي للقدام ربي سبحانوا كيما راكي تقولي بينوا ع حقيقتوا قبل الزواج ماشي بعدوا

ربي يجيبلك وليد الحلال الي يستاهلك ويفرحلك قلبك حبيبتي
كاين بزاف ولاد الحلال ماتبكيش ع لي مايستاهلكش علابالي ماشي بالساهل تنساي واش دارولك مي ربي يكون معاك اختي

سلامي

 

[شوشونة]

السلام عليك
معليش اختي سمية قالك كل تعطيلة فيها خيرا
ربي يصلح الاحوال ان شاء الله
فقط كوني انت بخير
​

 

[mohamed ali 1992]

السلام عليكم ورحمة الله تعالى وبركاته

أختي الكريمة,,,ماتقلقي روحك وأحمدي ربي على نعمه
و انا نتصور أنو كي كملت الحكاية بهذه الطريقة أفضل من أنك
تزوجتيه وفرحتي ومن بعد تتصدمي بواقع مريـــر ويكون راجل
في قبضة الوالدة تاعه وأخواته كلمتهم هي الي تمشي ويسمع
غير ليهمــ,,اما الأمور وضحتلك من الآن’’
ماتقوليش كرهت الزواج وكرهت الرجالة الدنيا في المليح وفيها
المتربي وفيها المش متربي وفيها وفيها,,,
أما باش تفقدي الأمر وتحصري روحك في غرفة ظلماء
وتيأسي من كل حاجة هذه غلطة درتيها وجرم في حق نفسك
الناس الكل تمر بحوايج كيما هكا وتفشل في تجارب في الحياة
أما الصبر هو كلش والعزيمة والإرادة على تخطي هذا الفشل
أنت دخلتي الإمتحان اما ماخسرتيهش بالعكس الأستاذ كان غايب ههه
وماديتيش علامة صفر أنت أكتشفتي أنو الإمتحان غالط من أولو
راح تتبدل الأيام وتجي أيام جديدة وراح نفرحوا بيك ان شاء الله
وكي اليوم تتزوجي اما الصبر مليح اختي وربي يفرج على الناس الكل
.....
التجارب في الدنيا ياسر أحنا سمعنا القصة غير من الطرف
تاعك مش من حقنا نحكموا على الطرف الأخر اما كي تحاموا
فيك الكل باين ظلموك معليش ربي يهنيكـ ويحفظك ان شاء الله
كوني قوية وشجاعة وصبورة وبإذن الله تتخطي المرحلة
وفرص الحياة عديدة وربي معاك أختي اما ماتقلقيش روحك
’’’’’
السلام عليكم



​

 

[sarah02]

ya khtii makach rajal yabghi 3la darhoum wla khawtah houma
yjou mrigline kima hakka kon saytti takssbèh w dal9ilàh w
jabdi ro7ak 3la darhoum m3a wa9te ya3raf 9imtak
chadi f rajlak saksiiini w ngoulak a roljala houma d'origine kima hak ih j'ai oubliè makalh taffsskhi al khotba assobrilah chwiya

 

[SIRMA]

اختي صبري وحمدي ربي لي عرفتيه قبل ماتتزوجوو
ربي يعيينك وتخرجي من هادي الحالة
وربي ينصرك
​