الويفي Wi-Fi

[hadda0425]

في زوج مبنكين لول كاين حل هي كلمة السر ويهني روحو
ولاخر تاني ياكل فيها بالساهلة هههههههههه شعب استغلالي
حنا عندنا الويفي ومدارين مو دباص وريحنا رواحنا
البارح جاني ولد جاري قالي طاطا حبيت نطلب منك طلب قتلو اتفضل قالي اعطيني مودباص تاع الويفي قتلو نعطيهولك باه تعشي الباطيمة مدايرين عليها ساركل ههههه قتلو نو سي نو
ربي يهدي ما خلق وكل واحد يعول على ذراعو

​

 

[βǻŋǾừŧά ₡ǖŦё]

3iiiCh tChOùff:d
mRrC khOo
​

 

[خيرة جانت]

ولله في خلقه شؤووووووووووووووووووون
ربي يهديهم خطش اللول سراق بغى يدي حاجة مش ليه بالغصب وأنسى أن هنالك رب رقيب
والثاني قليل عقل ماقدرش يتحكم بغضبوا وأرتكب جريمة بسبب تافه
ربي يهدي ماخلق

​

 

[غادة اليم]

باين السيد ماشي نورمال و out كـــامل ماشي كي راح ليه بموس مي كي مادارش مودباس ملول !!!!!!!!
​

 

[غادة اليم]

ههههههههههه والله حاجة تشوكي عباد يتعاركوا على حوايج تافهين
ههههههههه ضحكتني وفكرتني تاني وحد لخطرة عندها شهر كي نخرج من الدار بش نروح نقرا ولا ندير حاجة خلاف نلقى شعب عظيم في لكارتي نتاعنا

واحد عندوا لاب توب وحايد بلي بورتابل وانحير وش كاين

نقول بالاك جاو عند كش جار ولا راهم صحاب تلقاو بعضاهم وقاعدين هنا المهم منتلقاش بيهم بزاف وهوما قاعدين يكوناكتيو بالويفي نتاعنا ههههههه

حنا عندنا نت وعندنا ويفي ونسينا نديرولوا مودوباص وانا راح من بالي خلاص اماجيني الجيران كامل يديروا بالويفي لحقت بيهم حتى يبلوكيو تاعهم ويخدموا بتاعنا المهم هدا كامل واحنا مناش فايقين

حتى واحد النهار نسمع في زوج يتعاركوا والناس جات تحز بيناتهم انا خرجت نسقسي وش كاين جارنا قالي يتعاركوا على جال لويفي قتلوا زيماه قالي كانوا قاعدين بحدا بعضاهم واحد نطق قال لواحد نوض منا خليني نكوناكتي راك تنقصلي فريزو تاعها وبدات لعركة تما وين فقت بلي راهي عركة على جال لويفي تاعنا هههههههه سبحان الله نجي قدام دار الناس نكوناكتي بالويفي تاعهم وزيد نريكلامي عليها

ناس منيش عارفة منين جاو ومبعد ولينا درلانها مودوباص الجيران كامل كي يلقاوني فالطريق يجيو عندي لي تسلم عليا لي يحكي معايا موالفين صح يهدروا معايا مي مش لدرجة هدي

هدا كامل على وش اعطيلنا لمودباص رانا كرهنا موالفين ديما نكوناكتيو

وكاينة جرتنا المشكل راني منهدرش خلاص معاها كانوا صراولنا ديبروبلام معاهم لقاتني وحد لخطرة فالطريق جات تسلم عليا قلت انا بالاك باغية تولي تحكي معانا

وش قالتي ولفاصوا تاع لهدرة اتاعها اسمعي انت !! درتوا لمودباص للويفي وعلاش

.... راني كنت نكوناكتي بيها انا وخويا عندنا قرايا نديروا دي بروجي اعطيني لمودباص برك

ياخي نكوناكتي فالليل برك كي نخرج مالخدمة ياخي نتوما متكوناكتيوش بيها فالليل (تقول راهي عايشة معانا)

قلتلها معنديش لكود تاعها وش قالتلي ياخي انت درتوا سيبون الشك فيرواحكم ياخي ويفي برك

ملقيتش وش نقلها شوكاتني

كيعاد تعرفي بلي ويفي برك ديروها في داركم واسكتي ياك تخلصي 4 ملاين للشهر وزيد هوما لي يحتاجوها اكتر هي تخدم واختها تقرا باراميديكال وعندها زوج خيانها فالجامعة يقراو وباباها بروف نورمالموا هوما لي نكوناكتيو من عندهم المهم انا سكت خليتها لي يحب يهدر يهدر ناس ميفهموش تهدر معاهم على حوايجك تحصل واحد لكوارت يصراو يفشلوك يشوكيو حوايج تافهين يديروهم فيلم ربي يهدينا
واسمحلي ديجا طولت عليك خويا بالاك تجيبلي جاركم لمافيا يدربني بكش سكينة تاني هههههههههههههه
​

هههههه عجبتني جارتكم هادي !! راكي حتى سكتيلها يا لحبيــبة ! p: يــووووووووووو كون جيت أنا malgré q مالفة نحمل ونجوز وماشي من طبيعتي نرد مي عباد كيما هاذو صحاح ومطلسي الوجه الله يسترنا كون راني حطيتلها سعدها في يدها اللي ماتستحيــش:very_mad: شحاااال نكره العباد اللي كيما هكذا غالطين ويزيدو مايحشموا ما ينطمو يجو يردووها عليك انت :very_mad:

 

[بنـ MaPa ـت]

هههههههههههههههههههه شغل نقرى في سيناريو تع سكاتش
والله غير عجب على جال الويفي يضرب خوه بموس
تقول ماشي مسلمين يا لطيف
كان يديرلو الكود ويريح روحو وعلاش هاد الشي كامل
وصل روحو للمحاكم ربي يهدي ماخلق

مشكور على الموضوع خيو
سلآمي
​

 

[•мϊѕŝ Šрέсǐάł•]

انا تباانلي هادا كان يسالو حساايف لقا الويفي سبة ههههه
بصح هو مداير الويفي علاه ما يديرولوش مود باص ويهني راسو ؟؟
ربي يتمم الدعوة على خييير هههههههههه اذا عاادو على جال الويفي يتضاربو بالسكاكين
ماابقاالنااش ​

 

[Moha le sage]

اهلا حسونة :-h

واشي هذا و هذا واشي .. خلينا la ville و سكنا لحواشي :d

الرد هذا برعاية جامبو بعير ..مش حتسدأ نفسك ههههه


و الله يا حسني sérieusement السرقة تاع الويفي راهي دايرة حالة هاذ الوقت

خرجو وحد les capteurs wiffi يسرقولك الكونيكسيون ويفي تاعك و يقدرو يديكريبتيو ( décryptage ) تاع ال mot de passe تاعك نورمال

المشكل اللي اكبر من هاذا ان الناس كامل ولاو يشروهم .. و اللي تهدر معاه يقلك نورمال


يعني راهم ناسيين بلي هاذي تتسمى سرقة :-o

ربي يهدينا كامل


خوك الموح :regards01:
​

 

[الورد الأحمر]

هذي جريمة مع سبق الاصرار والترصد ...
هذآك علآش مآ دآرش كود للويفي تآعو وتهنى ,,,
شكتلي يحوسلوآ عليهآ والله أعـلم ,,,
أنآ عن نفسي كي تروحلي الكونآكسيون نكونآكتي
من عند جآرتي عآدي ... مآ ضربتنيش بموس
هآذ السآعة اهئ ... سلآمي ’
​