حاجة حيرتني

[رهف1]

السلام عليكم خاوتي
راهم خرجو نتائج السانكيام
مبرروووووووووووك لكل الناجحين و حظ اوفر للراسبين
هيا موضوعي اليوم على الناس اللي دات المعدل 10
انا حرتت psq قريت في النت انو طاه حسين مقدرش يدي في التعبير العلامة الكاملة
هادو كيفاه داو في التعبير تاع الفرونسي و العربية العلامة الكاملة????
ياااو حرت
انشاء الله منكونش طولت عليكم
بااي ^ _^

 

[حفيد هواري بومدين]

الله اعلم
وافقت على الموضوع

 

[أمــ وليــد الجزائرية]

ايه راكي في الجزائر و كل شيء ممكن

متتحيريش اختي كلش عادي في بلاد الي ولا فيه كلش عادي

ربي يجيب لصلاح هذا مكان و ربي يهدي ماخلق

مناش نستناو حتى حاجة من هذي لبلاد
​

 

[la_safa]

ههههـ مآ تحيريش أختي ، حتى و يقولولكـ كآين معدل 11/10
رآكي في بلد العجآئب توقعي كلشي ~

ربي يبقى الستر ..
​

 

[tistissa dj-tissou]

ايه مانعرف عليهم حبيت نقرا تعبير اللي دا 10 ونشوفوا كيفاه بعد هاد التعبير زعما
سبحان الله نورمالمون مايديوش 10 على الاقل 9.30
واش تحبي هادي البلاد
​

 

[✿أسيـل✿]

أختي راكي في بلاد العجائب والغرائــــــــب

الله يجعل الخير
​

 

[crazy of mydz]

ما تتحيريش اختي كل شيئ في بلادنا راه نورمال :d:d​

 

[لصمتي حكاية]

مام انا حرت
سورتو تاع الوضعية تاع الفرنسيه
الله اعلم

 

[soussou bel]

عادي

في الجزائر كل شيء ممكن

 

[سمسم السمسومة]

هي من حقك تتحيري و تزيدي تتحيري لوكان تكوني فالمجال...أنا نهدر على روحي فالامتحان المحروس تاع الثلاثي اللخر كي جاوني النتايج تاع المادة تاعي صدقيني تفاجأة صح على خاطر تلاميذي عندهم 3 سنين و نعرف المستوى تاعهم...تفاجأة كي لقيت 4 من التلاميذ لي بالنسبة ليا مستحيل يجيبوا علامة مليحة لقيتهم من الناس لي جابت 7 و 8....كيفاه منعرف و الحاجة لي درتها أنا باه نحي الشك من اليقين أني هذوك اللولاد لي داو العلامات لي شكيت فيها في حصة الاستدراك عاودتلهو الامتحان و النتيجة كانت مخالفة تماما للنتيجة لي كانت بين يديا......و هي نقاط لي كنت انا متوقعتها...كيفاه متحريش و متغيبلكش و تقولي كيما قالوا الاخوة لي سبقوني كل حاجة رجعت نورمال في هاذ البلاد ....هي مهيش منطقية انوا في مادة التعبير أنك تعطي العلامة كامل على خاطر راه يبقى لغة تعبيرية و اذا حبينا نزيدوا ندخل فالتفاصيل التعبير عندو قواعد لاوم تحترميها في اللغتين...طلي تشوفي المستخبي و من بعد يخرجولك العلامات 10.....​

 

[yasmine 4ever]

يا ختي كل شيئ ممكن في بلادنا
آنا تاني حيروني كيفاه هادي يمدولهم 4على4 فالوضعية الادماجية هههههه تقول عنترة بن شداد ولا فيكتور هيجو
لوكان تجيبي هادوما اللي داو عشرة سورتو فالفرونسي و تسيي تختبريهم تشوفي النتيجة الحقيقية
حتى الأساتذة ما راهومش كيتاع بكري راهوم يليكيديو برك امالا كيفاش يجي تلميذ من تلاميذهم يدي 10 حاشا اللي ما يستهلش
و الله أعلم
سلأأم​

 

[مفخرة الجزائر]

الوضعية تع الفرنسي بالاك جتهم ترتيب جمل ولا كلمات وتحطهم في فراغ
بصح الوضعية تع العربي حرت كيفاه جابو فاها العلامة الكاملة اوموا ينحو منها نص نقطة
على كل حال مشي حاجة بيزار بسكو في السنكيام10 المعدل كل عام مشي اول مرة+ 19.75 العام لي فات في البيام +18.99 في الباك هذو ثاني معدلات خيالية
ربي يجيب لي فيه الخير

 

[SETIF étudiant]

وما تتحيري ما والو العلم في الراس ماشي في المعدل ينفخو فيهم بالنقاط والراس فارغ علاه هذا اكل باش يبينو للشعب بلي ثمرة الاصلاحات راهي ناجحة وسي وزيرنا بابا أحمد راه في المستوى برك هههههههههههههه

مي حنا اومام توم نخممو و نشوفو للمستقبل اسكو الجزائر بهاذ العقلية (الكوبياج التريشري ورفع نسبة النجاح ..) رايحة تخرج عباقرة ولا لالا ... انا نgسى و ما نظنش والدليل الاف الباحثين يتخرجون سنويا ما اخترعولنا حتى حاجة ولو شكارة تاع حليب هههههههههههههههههههه

قالك كااين طبيب جزايري شهدو عليه ناس كي كان يقرا كانوا يطلعو فيه غير بالشاgور والكوبياج خرج برا لفرنسا يحوس يكمل قرايتو ايا طاح في يد دكتور حكيم فرنسي قالو سيبالابان والله يا ديبلومك تاعك هذا ما يسوى عندي حتى فرملي هههههههه و كان انا مني غير نgلبك للمدرسة تعاود تقرا كامل ومن دارو وجديد ثاني هههههههههههههه

 

[الكاتبة الصغيرة]

نععم اختي انا مين سنعت بهذا الخبر تشوكيت كيفاش معدل 10 هاذي جام صرات و مكانش قاع منها يعني ف الوضعة تاع العربية يقدر يدي نقطة كاملة بصح ف الوضعية تاع الفرنسية هادي قاع مكانش منهاا
و يبقى كل شيئ كاين في هاذي البلاد و متحصييش بالام الل داهل نابغة حنا منحرقوش رقابنا

 

[EL General]

حتى الذراري الصغار وقع فيهم التريكاج و التريشاج :d

ربي يستر برك

​

 

[SAMIRA25]

باه يديرو السعادة و يدخلو الفرحة والسرور على الشعب لي حاير
اختي رانا في بلاد كل شيء جايز
​

 

[فتاة حساسة]

اااايه يا حسرااه نهار عقب السيزيام ..انا جبت مليح نشفي علها جبت ..9.60


وحزط اسماوت فالجرنانان وانا كنت من القئمة ..كي رحت نحوس ..لقيت بالاك 10 داو 10 ...يا بنتي ماتحيريش راكي فالدزاير ونشفى عليها اللي كانت متصجرة القائمة بنت الوالي ..ايه ..عيش تشوف ...هه ..شكرا عليك ..
​

 

[كافيري]

كل شئ ممكن في بلادنا لعزيزة ختي

 

[رتيل]

hhh ; normal okhti mathirlékch c 3adi fi béladi
taba3 brk l 'essentiel ytal3ouhom
ana wahda mn ness diit 10 fl arabiya ki kont n9ra fl 5 eme fl 2008
ta3liim 3ndna tab jnanoù sah

 

[FATIMA 19]

المعلومة سمعتها من عندك
مي ندير روحي ماسمعتش بويسك مانيش حابة نكسر راسي مع هاذ العباد و المصححين
من غير سبحان الله ماعندي ما راح نقول