وين راه عطلتي

[زاد الرحيل]

السلام عليكم
أعضاء اللمة الكرام اسعد الله مسائكم و يا ربي تكون احوالكم لا باس كامل
اكيد بزاف منكم راهم في عطلة الشتاء مرتاحين من البرد و التبكار و @Soumia hadj mohammed راحت لوالديها ربي يحفظهم و كانت متشوقة لهم بزاف ،هذا بالنسبة للطلبة و المرأة الماكثة بالبيت طول العام في عطلة ،الا الصيف ممكن تبدل شوي تروح للأهل او البحر او اعراس الهم
كيفاه يشوف المجتمع لحق المرأة في العطلة انتاعها و اعلاه مينتبهش لها و يتفكر بلي تتعب و تتعصب و تقلق و تحب التغيير و الراحة ،اعلاه الانانية تطغى على الاسرة كاملة و يتخلاو على الام و كانهم يقولو لها خلقت للبيت حتى الموت ،اعلاه التخلف يمسنا في كل شيئ
اصحاب العطلة كامل مطلوبين هنا

 

[Skor m@k]

السلام عليكم
رانا هنا واسمحينا على الروطار رانا كامل في عطلة ههههههه
اواه ضرك الوقت تبدل ولات هي لي تخرج راجلها يحوس وتوريلو لبلايص لي جامي راحلهم
انا ضرك مرانيش نشوف مرأة ماكثة في البيت الا أقل قليل بزاف ههههه
فالمارشيات كامل نساء فلحوانت كامل نساء فالخدمة كامل نساء
واش وين حبيتيها تزيد تخرج خخخخخ
صح بلاك كاين بزاف نساء محرومات من الخرجة بصح حتى راجلها محروم ايضا
تلقايه على العام خدام ويتعب باش يجيب لقمت العيش وهي فالدار أيضا تعاونو وتسهر على راحتو
كي يكون الامان والاطمئنان بين الزوجين لاهلا خرجو ولا حوسو
صح لازم الواحد منذاك يخرج مرتو وولادو الى بغى لحديقة ولا كاش مركز تسلية
بصح والله صعاب الحال باش تخرجها برا تحوس وخاصة بلا سيارة صعيبة شويا
الناس ضرك ماولاتش تحشم وتلقايهم يهدرو برك ويطلقو كل حاجة من فمهم
كيفاش حبيتيه يخرج مرتو ويروح يحوس خاصة بلا سيارة
كيما يما انا ماتحبش تخرج برا غير كي تروح للطبيب تروح مع خويا ولا معيا وترجع
ولا تروح لدار ماني الله يرحمها هذا مكان وبيانسور لعراس
اما التحواس تقولك لالا راني مليحة هنا فالدار هههههه
​

 

[Salah eddin]

السلام عليكم و رحمة الله
ههه
اولا الحمد لله على العطلة ههه رانا نريحو فيها شوية بعد التعب و الميزيرية و القهر ههه " قهر ق زدتها من عندي "
ههه
اما فيما يخص كلامك يا سيدة ... ان المرأة الماكثة في البيت تحتاج عطلة تروح لأهلها

و علاه ؟ في بالك المرأة في دار زوجها راها خدامة كي شقل في ادارة و مبعد كي تدي عطلة تروج لدارها و اهلها

اصلا زوجها هو اهلها صايي ... دارها و دار زوجها هي كل شي بالنسبة ليها ...

هذا راه مش ظلم و هضم للحقوق ... و مكوث المرأة في البيت راه تكريم و تشريف ليها

امالا ... التخلف هو انكم تقولو ان مكوث المرأة في البيت تخلف

بالعكس ... شوفو الامر من جانبه المشرق

و السلام عليكم ...


​

 

[أشــواق 19]

السلام عليكم..
يا اختي المراة توجور في عطلة وتوجور شابعة تحوااس..
اوااه تبالي دكا معادش كاينة المرأة الماكثة في البيت ولا كاين الراجل الماكث في البيت ههه..
تطلعي للبيس تلقايها معمرة بنساا..تروحي حانوت تلقاي نسا..فارماسي حاكمينو نسا ولي يشرييو ثاني نسا..ولاو هما لي يسوقو :/
حقيقة نسبة النساااء لي نتصادف بيهم يوميا اكثر من نسبة الرجاال
دكا الوقت تبدل يا ختي...قلييييييل نلقاو نساء حاكمين دار ومحرومين من تحواس وخرجات...
يعطيك الصحة على الموضوع..
​

 

[rycerz]

اواه ضرك الوقت تبدل ولات هي لي تخرج راجلها يحوس وتوريلو لبلايص لي جامي راحلهم

-

قتلتنا بالضحك .. هههههههه
-
تعرف واش ؟ .. حكالي واحد صاحبي قالي مرّة خرّجت لمرا باش ندّيها للطبيب قعدو كامل النسا برّا يخزرو فيا خزرة نتاع عدوانية .. قالي ما فهمت فيها والو، ما نعرف حابين يقولولي خليها تخرج و تمشي وحدها علاش راك رابطها، ولاّ ما نعرف واش ​

 

[Skor m@k]

-

قتلتنا بالضحك .. هههههههه
-
تعرف واش ؟ .. حكالي واحد صاحبي قالي مرّة خرّجت لمرا باش ندّيها للطبيب قعدو كامل النسا برّا يخزرو فيا خزرة نتاع عدوانية .. قالي ما فهمت فيها والو، ما نعرف حابين يقولولي خليها تخرج و تمشي وحدها علاش راك رابطها، ولاّ ما نعرف واش ​

ههههههه شفت ياخويا هههههه
يعرفو بلايص حنا مارحنالهمش
بنات عمي وعماتاتي لحوانت يعرفوهم كامل بالاسموات هذاك تاع فلان وهذاك تاع فلان
منين تبدا لمدينة حتى لوين تخلاص حانوت بحانوت
وانا صاحبي يعجبا بيع فالحانوت هذاك ومانعرفش اسم مول الحانوت خخخخخخخ
ماشي هذا حزن كبير
ممبعد يقولونا ماااااااااااكثاااااااااات في البيت
ماناش نقولو كامل ماتقولوش راك تعمم ههههه​