هذا الكلام مش وقتو ابدا
كي بقى القليل بداك التوسويس؟
لا ما يهمش المعدل بل يهم الباك
يهم بنة النجاح و انك تكون في القائمة مع الناجحين و لو ب10.00
يهم انك تفرح والديك و تخليهم يحسو بلي وصلوك لبر الامان
يهمك انك تحقق ذاتك و تعرف بلي كي تحب تعمل حاجة تعملها
يهمك انك لما تخرج القائمة تبتسم و ما تبكيش و ما تتحسرش
يهمك انك يجوك احبابك يهنولك مش يساندوك و يصبروك
يهمك انك تربح عام من حياتك و ما تبقاش تعاود في عام كامل مع نفس الوجوه و نفس المواضيع علاش التكرار
يهمك انك تتقدم للامام
لانك اذا ما تقدمتش مستحيل تبقى في مكانك قادر تولي للوراء رد بالك
اما المعدل رانا في الجزائر
و مهما كان المعدل الاهم اختيارك
ياما ناس بمعدلات ممتازة لانهم ماعرفوش يخيرو قراو وش يحبو الناس يقولول عليهم راهم يقراو و ما نجحوش في حياتهم لا خدمة و لا هم يحزنون
كلنا هنا نقراو باش نخدمو
ماناش نقراو من اجل العلم
و الخدمة متاحة في بزاف امور مش شرط المستوى الجامعي و لا راني غالطة؟
الاختيار ثم الاختيار الصحيح و دراسة الحالة جيدا بعد التحصل على الباك ان شاء الله
شوف معدلك و التخصصات المتاحة و ظروفنا هنا في الجزاير و رغباتك ووو
لازملها تخمام جدي
و هذا كامل باش يكون لازم يكون الباك قبل
و تتخيل انت لوكان تجيب الباك بمعدل ممتاز رح تختار بسهولة؟؟؟؟؟؟؟؟؟؟؟؟؟؟؟؟؟؟؟؟؟
الباك ثم الباك
و الرضا و القناعة سر السعادة
و بعد الباك مازال الوقت باش نعرفو القرار الصحيح
تمنياتي لك بالتوفيق و السداد
و تذكر انه فرحة النجاح اهم بكثير من قيمتها المادية
منيش عارفة و لا نقدر نساعدك لانو انا مديتش الباك و هذيك الفرحة الي كانت تحكي عليها درك العضوة الي قبلي مدخلتهاش لقلب اهلي مي مستسلمتش و قدرت ننجح من غير الباك لانو رنا في الجزائر كما قالت و قدرت نفرح اهلي بطريقة اخرى و الحمد الله
انا صح في وقت الباك قريت و حاولت ندير مجهودي الخاص و كما يقولو مكتبش نكون من القائمة و معاودتوش رحت مباشرتا درت تكوين و درك حمد الله بعد 3 سنين من التكوين قعد اقل من سمانة في الدار و لقيت خدمة و حمد الله درك رني نخدم و نقدر حتى نساعد اهلي و هذا ثمرة نجاحي و حمد الله راضية بواش مدلي ربي
انا صديقاتي الي جابو الباك كاين الي سمحو في الباك ديالهم و جاو قراو كيفي درك مزالهم يقراو لاني سبقتهم :d تعرفي هذا باك الجزائر متقولي 10 ولا 15 برك ديري هدف في حياتك
ذرك متخميش في النتيجة خمي في قرايتك برك اسهري جاهدي اقراي قد ماتقدري باه غدوا متلوميش روحك لانو الي قرا مش كما الي مقراش و الباقي في يد ربي سبحانو
موفقة ان شاء الله و نتمنى ترجعيلنا في يوم من الايام و تقولي اني نجحت اما بالباك ولا بلا الباك لانو النجاح كاين في كل المجلات مش مقتصر على الباك برك
ما نيش علرفة واش نقول على خاطر انا تاني هاذا عامي الاول الي نفوت فيه اباك احساس الخوف راه منعدم عندي و هاذا الي راه مقلقني مارانيش حاسة روحي راح نفوت الباك بصح مهما كان نقولك اتوكل على ربي و حاول مهما كان و الي في المقدرة ديره و انا راني موافقة الاعضاء في كلامهم المعدل مهما كان مهم في نظرك مليح بصح حتى و لوكان جبت 10 ان شاء الله و اسمك في قائمة الناجحين في هذاك الوقت قول الحمد لله المهم تنعد من الناجحين و الي فيه الخير ربي يجيبها ليك ان شاء الله بلتوفيق ليك و ليناا يا رب
هههههههه قتلني عنوان الموضوع بالضحك، ربي يفرحك ويخلي نهاراتك كلها فرح
انا فوتت الباك مرتين وفي المرتين نجحت فيهم والله بأقل مجهود، كاين حاجة برك ديريها / ديرها في بالك، الباك ماهوش نهاية العالم، حتى اذا - لاقدر الله - ما جبتيش معدل مليح - لا قدر الله -، أبواب الخير في كل بلاصة، ماكاين علاه تعطي للباك أكثر من قيمتوا
اقراي وتوكلي على ربي وزيني نيتك، وتنجحي ان شاء الله ..
وش تقراي، مادام اكي علمية، انا نشوف في غلطة يغلطوا فيها بزاف العلميين، وهي انهم يركزوا على المواد العلمية وينساو الأدبية، نورمالموا العكس، على خاطر لو كان تقراي المواد الأدبية وتحضريها مليح، نقطتك ضامنة عالاقل تجيبي 15 في المادة اذا قريتيها مليح، والمواد العلمية على حسب السوجي والمورمال وقهوة الصباح اذا قاطعة ولا لالا :p انا شخصيا 2 بيكان فوتتهم تقني رياضي، جبتهم بالمواد الادبية برك
ربي يسهل ويوفقك ان شاء الله وتفرحينا بموضوع هنا في جويلية (واذا عرضتينا على القاطو ما نقولوش لالا )
صح راه باقي شهر حتى انا راه عندي مشكل راني كي نبغي نحفظ ما نجمش نكمل و نحس بروحي كلشي تبلع ليااا بصح المحاولة خير من تقعد تندم و تضيع الوقت في ما فهمتش ولا تقول لا واعر ياااااااااااااااااا ربي سهلها علينا قااااااااااااع ياا ربي و فتح لينا ابوابك و الله يجيب لينا الخير في هاذ الجمعة يا رب
نقلك حاجة من لواقع
شفتي لي يجيبو 10 في لباك هوما لي يديرو بيها لافير
بلا ما نطول عليك
روح(ي) دير(ي) حقوق
هي أكثر شعبة مطلوبة في الخدمة
وما تقول(ي)ـش راني سيونس ولا أدب
لازم يكون عندك بعد نظر
مثلا محامي ... حاجة تخلع وهو راهو قاري أدب وناجح لباك ب 10 وداير كابا بـ ألف فرنك
فهمت(ي)
أنا وقتي ما لقيتش شكون ينصحني مي حمد لله ضرك
علابالي لحقت روطار ليوم هو النهار اللخر تاع الباك لكن بزاف بزاف ناس حبسو القراية و ندمو و بدا لوكان قريت و لوكان درت تلعب في عقولهم ... و لازم الشخص يتأكد بلي ربي ما يكتبلوا غير اللي فيها خير يعني باك تع 10.00 قادر يسهلك حياتك و يخبيلك الخير موراه.. و في الاخير خلي ربي في قلبك لانو اللي خلق ما يضيع و الله يمهل و لا يهمل~ سلام
وعليكم السلام اختي
الحمد لله رانا خلصنا الياك وان شاء الله يتكلل هاد العام بالنجاح والفرح باذن الله للجميع
بصح اسمحيلي حنونة هادي مو حلوة بحقنا ابدا نولي كيفي كيف لي قرات ادب ولا اي شعبة اخرى اسمحيلي اختي راكي غالطة بزاااف شعبة الادب مابيها والو وياما ناس اتكبرت على الادب ومع لخر عرفت قيمتو معضم تلاميذ شعب العلوم الليي يجيبو اقل من 12 نفس اختيارات التلميذ الادبي اللي جاب معدل 10 حبيت نصصحلك نضرتك للادب برك ومشكورة وموفقة