لسلام عليكم
انا عضوة جديدة
انا اريد رايكم في ما ساكتبه
انا عمري الان 18 احببت انسانا مند4 سنوات ولا زلت احبه لليوم لكنه في كل مرة كان يخدلني ويالف اشاعات لا اساس لها من الصحة وفي نهاية المطاف خانني
وبعد ان قررت ان ابتعد عنه ولا اعطيه قيمة اصبح يلهث ورائي ويريدني ان ارجع له
وانا قلبي مجروح ومارانيش قارة علئ فراقه
اعلم انكم ستلومونني لاني مازلت احبه لكن والله انه ليس بيدي
فهادا ملخص قصتي التي دامت 4سنوات
و عليكم السلام
هذا لانك عايشة فراغ
ولي سميتيه حب هذا حب وهمي
مازلتي صغيرة هاذ كلمات الحب و الفراق ..
يا بنتي قدامك مستقبل اخدمي عليه الهاي بقرايتك هي لي تنفعك .. و متنسايش ربي ووالديك علاش تزعفيهم منك بهاذ الامور التافهة وتخيلي في يوم تتزوجي انسان خير منو و تحبيه صح .. مش تندمي على هاذ الوقت لي ضيعتيه و تندمي لانك حبيتي شخص قبل راجلك؟ و تخيلي يقولك احكيلي ماضيك و حبيتي قبلي وللا لا وش يكون ردك و رد فعلو؟ ؟؟ ..
نصيحتي ليك عزيزتي .. هاذي فرصة ذهبية باش تنحيه من بالك .. حتى و اذا مقدرتيش تنسايه بسهولة اليك الطريقة ... متزيديش تحكي عليه لا لصحاباتك و لا حتى لنفسك و كي تتفكريه اهربي من تفكيرك خمي في حاجة اخرى وللا احكمي القران و اقرايه .. اذا عندك سوفونير من عندو ارميهم و احرقيهم بلا ما تشوفيهم .. خممي في مستقبلك راح تقراي و تنجحي و تتزوجي انسان تعيشي معاه لابال في ... الخ
اتمنالك حياة سعيدة مليئة بطاعة الرحمان و رضا الوالدين و مستقبل زاهر
سلام عليكم يا اختي لالا واحد ما يلومك نورمال احكي عادي اسمعي راكي تقولي فيها نهار قيمته مش قيمني و خاني و دورك راه موراك يجري هو ما عرفش قيمتك حتى خسرك وانا ليا انسايه احسن راح تتعذبي شهر زوج و تنسي خلاص الي ما دارلك قيمة كيما كنت تقيميه مليح ملازمش تعطيله قيمة يا زينة اخطيك منه و ربي يعطيك ما احسن اقراي برك وانجحي وراح يجيك ما تتمني و ربي سبحانه ما يضيعش حتى واحد
و عسى ان تكره شىء و هو خير لكم
والله يعلم وانت لا تعلمون
عيشي المستقبل تاعك اقراي قرايتك وارسمي طريقك باه تحقي اهدافك فالحياة ليست حبا فقط
وربي يرزقك الزوج الصالح
طيشي عليك العبد هادا وادعي ربي واستغفري ونصيحة منى لكي عنما يحين وقت زواجكي اختي احذري ان تختاري زير نساء
فاكبر خطأ هو ان تربطي حياتك باهذا النوع من الرجال الله يوفقك
و عليكم السلام
اختي سامحيني هذا ليس بحب إنما فترة مراهة جازت عليك و الشيء الثاني انت مازلت في عز شبابك لا تشغلي نفسك بهذه الأمور لانها ستبعدك عن كل شيء نصيحتي لك كأخ يكبرك سنا و كيما يقولو مجرب اقراي قرايتك رد بالك رضاية الوالدين و مع الوقت دك تفهمي مليح نصيحتي و نصائح الأعضاء ربي يهنيك و يعليك و ربي يبعد عليك ولاد الحرام سلام
وعليكم السلام ورحمة الله وبركاته
أختي ’ الانسان مرات لازم يخلي قلبو بعيد ويفكر بعقلو لانو النتائج الي تفكريها بقلبك غالبة ماتكونش في مصلحتك كيما يقولك" خود الرأي الي يبكيك وماتخذش الراي الي يضحكك"
أنتي قلتي انه خانك ومن يخون مرة قادر على إعادة نفس السييناريو عليك مرتبين ثلاثة وأكثر...هو في الحقيقة يلهث ورائك ليس حبا فيك اصلا
كان مع بنت ثانية وهي بدورها خانتو ومالقاش وين يسد الفراغ الي في قلبو عرف بلي تحبيه وجا لعندك ..
أختي خلي كرامتك فوق كل شيء ومهما كانت درجة حبك لهادا الشخص ماترميش روحك وتبعي قلبك وين يديك على جال تندمي ممبعدا..
وإنتي الله يبارك مازالك صغيرة ومازلت لحياة قدامك وماديرش في بالك بلي ماتقدريش تنسايه ...هادا الشيء بيدك حاولي ماتفكريش فيه وماتخليش اي شي يذكرك بيه وتفكري واش دارلك وتفكري كيفاش خلاك وإنتي محتاجاتو...
هااذي هي اختي ماترضخيش له وعيشي حياتك وربي يرزقك بالرجل الصالح الي يحبك وتحبيه ويصونك وتصونيه باذن الله
وتقربي من ربي صلي وأكثري من الدعاء ..أملئي قلبك بحب الله..وربي يوفقك ويكون معك ان شاء الله ..
اختي لعزيزة حبيت نقولك بلي الحب قبل الزواج ماكانش منو لا زم تفهمي ان اي حاجة تكون في معصية الله جامي ويذا ربي يدومها ويكملها يجي النهار لي تزول وتولي هباءا منثورا ، اختي هاذي الاخطاء معليهش نديروها واحنا صغار منعرفوش بصح دوك راكي كبيرة وستحاسبين على الصغيرة والكبيرة ، اطوي هاذي الصفحة ومزقيها وحرقيها ، وبداي صفحة جديدة خالية من هاذو الهفوات والحب المزيف لي يحبك راهو مكتوب في جبينك ونهار يشاء الله راه يجي وحدو بلا متحوسي عليه ، انت دوك اتهلاي في قرايتك وفي صلاتك وفي علاقتك مع ربي ، وتوكلي عليه هو يجيبلك رزقك من حيث لا تحتسبين ، بدون شقاء ولا معاناة ، ثقي في الله ، واحسني الظن سيكون عند حسن ظنك به ، اختي هذا الانسان متزيديش تهدري معاه ولا مع غيرو الا اذا كانت تربطك بيه علاقة شرعية ،ولي يحبك يطلبك من باباك .
اختي اذا راكي حابة تفوزي بالرجل الصالح لازم تخافي ربي في خطوة تخطيها ومتقوليش الناس كامل يديرو هكذا ، على خاطر لوكان تبعي الناس يدوك للهلاك ، واليوم بالاك عندنا فرصة نغلطو ونصحو خطأنا ، بصح غدوا لا قدر الله يجي ملك الموت وتكون معندناش فرصة ربما حتى باش ننطقو الشهادة ، اختي والله والله والله راني نحكي في صلاحك ماشي نخوف فيك ولا نفتيلك ، راني نقولك حاجة الناس كامل تعرفها كيما انا وانت بصح نعرفو ونتعمدو ، اختي تعيشي خليك من هاذو العلاقات لي متنفعكش وتضرك ، خليك من الصحبة السيئة ، ولازم تعرفي بلي ماتدي فيالدنيا غير مكتوبك ، مرهي شطارة مرهي زين ، مكتوب ربي سبحانو برك ولازم نرضاو بيه ، ونسعاو للخير باش ربي يرضى علينا .
اولا السلام عليكم
في البداية ارجوا ان تتقبلي نقدي هذا لانه ربما يكون قاسي نوعا ما
الحب هو في الحقيقة عن شعور ينتج عن العشرة المستمر لشخص ما
و بحسب ما اراه منطقي ان الحب قبل الزواج طيش و لعبة مراهقة
فمن يريد الحلال فانه يحب بعد الزواج او قبله بقليل
و قصص حب بالسنين فانه لا يعني شيئ سوى تضييع للوقت
اذا كنت تحبيه حقا و يحبك هو كذلك
فعليه ان يتقدم اليك فاذا اطال المدة فانه لا يحبك
و من فضلك لا تلوميني لردي هذا
تقبلي مروري
18-4=14 :-o
أختي رآكي تظلمي في روحك وفي قلبك بقصص الحب هذه وإنتِ في هذا السن
مآشاء الله رآكي في عمر الزهور مآزالك جآية أيام تعيشيها،تهلآي في قرآيتك ومستقبلك أما الحب تلحقي عليه مش دُرك ..
أنتِ قلتيهآ في عنوان موضوعك:
قلبي يشتعل نارا بسبب حبي الخاطئ،قد يكون إعجاب أو تعود لكن حب لآ،
أقولهآ لكِ بإختصار الحب قبل الزواج مجرد وهم وتمضية وقتْ وظلم في حق قلوبنآ وأنفسنآ
الحب الذي لآيبني بيتا لايسمى حبا ...
إحرصي أختي على رُقي البدايات كي لآتؤلمك النهايات..
هدا لي يعمل قصص الحب مع مراهقات عمرهم 14سنة باينة مريض في عقلو او راهو حتى هو مراهق
شوفي كبري عقلك خليك من قصص مكسيكية وتركية راه من تكبري غادي تبقاي ضحكي على لي فات وعلى هادشي لي واقع ليك دابا
اويلي على علاقة اربع سنوات الناس دارت فيها الاولاد ومشاو لوليدات المدرسة كبري عقلك وديها فقرايتك راه الحب مكاينش فهاد الزمان
ما هذا لا يوجد حب بل انها اوهام
ما بالكم لوتم معنى الحب الحقيقيي ؟!!
الشباب لا يشعرون ولا يهتمون لمشاعر البنات يلعبون بها كما يلعبون البالو
ابتعدي عن هذا الطريق اختي وارتبطي بربك وادعيه ينسيك هذا الهم ويهديك لطريقه
اضافة الى انه يجب عليك الاهتمام بدراستك اكثر
