4algeriaفي شهر العسل

[harodi]

عندي مدة طويلة مندخلش للمة هادي و راني نبغاها بزاف بصح الله غالب عندي شغالات بزاف ثان
صافي راني نضرب طلة عليكم في كل صبحة و في كل عشوة بصح باش نعلق عندي بزاف ماعلقتش اليوم جيت نقلق روحي شوية ونعلق على شي مالو حواشي
قالك من مصادر موثوق منها تم التعرف على سبب العطل الي صرى فاللمة المرة الفايته كان سببها انو المدير 4algeria مع شهر الغسل يييييييييييييييييييييييييييييييييي قصدنا العسل
فقد علمنا انه في بداية الشهر الماضي شرع في مشروع جديد " تبقى السرية موجودة حول نوعية وكيفية و متى و اين ولماذا وماذا و وو وو واجبة " و هكى صرى عندنا نقص فالخبر
نستناو مراسل وش والو وي يجيبلنا الجديد

التبهديلة

لوحة الشرف الشهرية ـــــــــــــــــــــــــــــــــــــــــــ ولات لوحة الشرف الموسمية
اصحاب المعالي ـــــــــــــــــــــــــــــــــــــــــــــــــــ دايمن هوما الي يحكمو الكراسي و يزيدو حتى الاوسمة


نهدر ضرك فالمفيد منيش عارف علاه الادارة تاعنا الي هنا فاللمة ميتة ولا راقدة ولا عندها طول العام شهر العسل لوحة الشرف عندها شهرين و هي نفس اللوحة ومتبدلتش و كي تتبدل يبدلوها بلوحة الشرف تاع الشهريين الي فاتو قبل هاذ الشهرين

و خلي الانتخابات فيها كيما انتخابات الدول العربية الي يبغي يوصت يصوت على صاحبو ولا صاحبتو جامي شفت عضو قليل حدو وحد روحو مكتوب اسمو فيها

الي يغيب 3 اشهر و من بعد يحطوهلنا كاتب مميز
و لي توري دلالها عليهم و يحطوها عضوة بزاف هايلة و مميزة

و العيوب و الاخطاء كثيرة و هاذي ماراهي غير مثال بسيط

فالخير اللمة الجزائرية تمثل الحكومة الجزائرية
و بالتالي رئيسنا الموقر هو في رحلة لشهر العسل

و شكرا​

 

[The Master]

اخى العزيز انا لا اعلم سبب موضوعك لكن للكل عنده ضروف واتمنى انه يكون ردهم عليك قريبا اخى العزيز عندك الحق لازم الادارة تكون اكثر ديناميكية واكثر مرونة واكثر تفاعل مع الاعضاء ولازم حلول جديدة لتنشيط المنتدى لانى انا اعتبره المنتدى رقم واحد فى الجزائر ولازم مايكونش بالشكل هدا

 

[احمدالجزائري]

هههههههههههههه
رك فى منتدى الدامقرطية اهدر واش تحب حرودى

رنى عرف كون رك فى منتدى تانى يقطعواك لسانك

بصح معليش الحمد لله يوجد فى منتدى اللمة من يصحح اخطائنا


بارك الله فيك اخى حرودى​

 

[dahmene4algeria]

شوف أخي صح اللّمة راهي فيها شويا نقائص ولكن الظاهر راهي خير من ألف منتدى
ونحن نلاحظ أنّ مدراء المنتدى ماراهمش يدخلوا بزّاف يبدوا عندهم مشاغل لذلك خونا احمد مايقدرش يسير اللمة وحدوا...والحديث ذو شجون
خويا احمد ربيّ يكون في عونك

 

[harodi]

هههههههههههههه

رك فى منتدى الدامقرطية اهدر واش تحب حرودى​

رنى عرف كون رك فى منتدى تانى يقطعواك لسانك​

بصح معليش الحمد لله يوجد فى منتدى اللمة من يصحح اخطائنا​

بارك الله فيك اخى حرودى​

اييييييييييييييييييييييييييييييييييييييه عيش تشوف ديمو قراطية وعلاه عليك يقطعولي لساني انا من بكري في بزاف منتديات نهدر ومكاش الي وصلني وقطعلي لساني لكان صرات كنت مجيتش وهدرت على متندى الفمة

صحا ​

 

[harodi]

السلام عليكم​

باين بلي راك مشارجي و معبي فوق اللازم​

مي لازم تفرغ​

و كما هدر احمد هنــا ديمو k راcي فرغ قد ما تقدر باش ترقد متهني​

ان شاء الله تنحل بعض الاعطال في اللمة و بعدين لوحة التميز وضعها ساهل ليست عائق على المنتدى اذا كان المنتدى من كل الجوانب يعمل بشكل سليم وجيد .. في انتظار تصحيح بعض الاعطال​

سلملم​

لا مشارجي لا والو و منيش نفرغ راني نهدر فالواقع ياخي اللمة فيها بزاف عوج و حاجات مهناش ولا واش رايك و راني نشوف الاغلب قالو بلي كاين حاجات مهناش فاللمة وهذا دليل على انهم موافقين كلامي
و الاعضاء الي قالولي لوحة التحكم ميهمش امرها انا نقول يهم وبالزيادة كي تولي لوحة التحكم موسمية واش فايدة كي يحطوها فاللمة و زيد الزوار الي يجو يشوفو اللمة تلقاهم ملي يجو يطلو عليها يلقاو نفس اللوحة الشهرية الشرفية صافي يقولو منتدى الخرطي راقد كي مولاه
و مدام اللمة تمشي فالتصويت تاعها على المعالي و العلالي صافي الاعضاء الجدد يروحو يلتهو بشغالاتهم خير
و مكالاه نفسر بالديطاي ( المشكل كامل في لوحة التميز هاذي يا فاهم )


حرودي ​

 

[harodi]

مدام 4algeria مزال في الحياة ​

انا نضملك بلي اللمة مزالت على ديدنها ​

شكرا على الموضوع​

هه هه هه هه كيما الديدان الي راهم راكبينك

و فور الجريا حي و راقد علاه علينا هاذ الغبينة​

 

[The Master]

حرودى المبين انك حريص على المنتدى وانا حسيت انته كلامك يدل على حرص وليس كره عموما بارك الله فيك وان شاء الله المدير يدخل ويعدل المشاكل الى تحكى عنها

 

[avril.lavigne]

السلام عليكم اهل اللمة

 

[بلبلة الجزائر]

أنا منتدى اللمة من يوم عرفته لم أعد أدخل غيره !!

بل إني عشقته و صرّت مدمنة عليه

و نسأل الله العون لإدارتنا الكريمة دنيا و آخــــــرة

و السلام عليكم .

​

 

[harodi]

و علاه انا قتلكم اكرهو اللمة ياخي حالة الي يبغي اللمة لازمو ميغمضش عينيه على عيوبها بالعكس لازمو يوري هاذو العيوب و لا النقائص لأولي الامر باش يصلحوها
هاذا مكان ​

صافي واش رايكم في لوحة الشرف الي عندها فصل الشتاء كامل وهي باقية نفسها
و فيها غير الاعضاء ؟؟؟؟؟؟​

و شكرا​

 

[بلبلة الجزائر]

و علاه انا قتلكم اكرهو اللمة ياخي حالة الي يبغي اللمة لازمو ميغمضش عينيه على عيوبها ​

لالالا ,,, أنت لم تقل أكــــرهوا اللمة !!

إنمـــــا كان ردي أن اللمــــة حتى و أن فيها ماذكرتّ

فإعجابي بها غطى كل شئ عنها !!

فلا تفهمني خطأ مثلما أنا لم أفهمك خطأ

والسلام عليكم


​

 

[نبـ الحياة ـض]

الي يغيب 3 اشهر و من بعد يحطوهلنا كاتب مميز
و لي توري دلالها عليهم و يحطوها عضوة بزاف هايلة و مميزة ​

و العيوب و الاخطاء كثيرة و هاذي ماراهي غير مثال بسيط ​

فالخير اللمة الجزائرية تمثل الحكومة الجزائرية
و بالتالي رئيسنا الموقر هو في رحلة لشهر العسل ​

و شكرا​

يعطيك الصحة على الموضوع نظن رسالتك واضحة لكل من يقراها
وجد مفهومة لصاحب الفخامة الر ئيس فور ارجيريا و حاشيته

 

[حفيد هواري بومدين]

اهلا بيك .........hmy:​

 

[The Master]

والله مافيه حشمة بصراحة هكى تكرهوا الانسان الى خسر ماله وجهده حتى يديرلكم المنتدى هذا ومن 3 سنوات وفى الاخير يطلع هو مايصلحش ومايسواش والله عيب وانا طحتوا من عينى

 

[lana algerienne]

السلام عليكم

بما ان الموضوع بني على الديموقراطية فانا لن اتحيز لاي جهة

لكن اود القول انك ذكرت في اول موضوعك انك تغيب بفترات عن اللمة ثم تلقى نظرة خاطفة و هكذا يبقى الحال

اذا فكل له التزاماته

فالعالم الالكتروني لن يلهينا عن واقعنا

ممكن المدير مرتبط بالتزامات اهم

ارجو ان تتقبل وجهة نظري

اسفة على الازعاج​

 

[4algeria]

السلام عليكم ورحمة الله وبركاته
آخى العزيز لنكن واقعين قليلا اللمة تم ضربها أكثر من مرة عن طريق الخوادم او من مشرفين فى اللمة او من أعضاء حاربت اللمة وخاصة أصحاب 7 وجوه بالرسائل الخاصة او بالمسنجر وانتم أكيد عارفين ماحدث فى الماضي وسبب تعرقل اللمة ولا نريد النقاش فى الموضوع هذا مجددا وهدا من ناحية وعلى كل ماوجهنا من مشاكل استمرت اللمة ولن اقول انى انا من تركها تصمد وانما وبكل فخر 5000 عضو نشط من أوفياء اللمة او أكثر بالنسبة للمشاكل التقنية ألان فقط اتفقت مع مسئولى فى شبكة وافى وبوصال للعمل فى الدعم الفني لانى مع عملي الخارجي أحاول جاهدا التوفيق في صيانة الشبكة وجميع منتديات اللمة وعندما تتوقف اللمة أعطال كل اشغالى وابقي إمام الكمبيوتر لساعات حتى ترجع اللمة
من ناحية الأمور الأخرى في اللمة عندنا طاقم إداري بقيادة احمد الجزائري والمراقبين والمشرفين هما المتخصصين بلوحة الشرف وأيضا بالأوسمة فى المنتدى وكل مايتعلق بامور الاعضاء واى استفسار الموضوع هذا مفتوح مع العلم انى لست رئيس دولة ولا رئيس بلدية ولا والى ولاية ولا علاقة لى بالعمل الحكومي والقسم خصص لهؤلا لكن معليش يبقى للنقاش

 

[ZIZO/SAHARA]

حرودي خويا واش انقولك انت وقيلة مراكش عارف واش يصرى في هذا المنتدى انت قلت مرانيش انبان معهليهش ما الوموكش اهدر كيما حبيت الديمقراطية ؟؟؟؟بصح انا نعطيك اخر الاخبار تع الاخوة
-الاخ 4algerie راه كل اسبوع يبدل الكلافي
-الاخ فتحي راه القى قنبولة موقوتة غير ما خلات فينا والو
-الاخ احمد ودابلو راهم حايرين واش من الجيهة يصدو ؟؟؟؟؟
اما الاعضاء خليها على ربي راهم يحوسو غير على كاش موضوع باش يفرغو واش كاين في قلبهم واحد راه غارق في الحب ؟؟؟؟ او واحد راه يحوس على موضوع تع الحب كل واحد وين راه صاد ؟؟؟؟؟؟؟
خويا اللمة العزيزة تحتاج الى رجال واقفين ومجتهدين تع الصح .
ربي يخلينا اللمة بخير ان شاء الله ويبعد عليها العين والاعداء

 

[zagane]

salame alaycome

wache men chahre elconfiture hada ya haroudi
ehna fu ellema kol chohourna 3assale
li yestahel hadja yedduha
manache dakhline bache ettamayoze
mais bache nfud wa nestafud
wa mabrouk 3ala elmotamayizine
edumokratiya hhhhhhhhhhh

 

[harodi]

والله مافيه حشمة بصراحة هكى تكرهوا الانسان الى خسر ماله وجهده حتى يديرلكم المنتدى هذا ومن 3 سنوات وفى الاخير يطلع هو مايصلحش ومايسواش والله عيب وانا طحتوا من عينى

هه هه هه علاه الحشمة فالحق تجوز وديجا واش دخل الكره و الجرب قصدي الحب انا هنا راني نحكي على نظم وقوانين سنها صاحب الشان ومن بعد تغافل عليها و نضن 3 سنين تعب و محاين لازملو فيهم يكون واقف على الشعرة هه هه
عمبالي طحنا من وذنك
صحا خو​