ولد خالتي حتا حنا نتوحشوك بصح عند الخدمة لازم ... وكيفاه غدوة نزوجوك ...
لازم تظمن وتوفر شوي فرنكات ..في هاذ الوقت لازم تتهنى من حوايج بزاف باه تقدر تتنفس
باه تقدر تحس روحك عبد ...
لازم تتهنى من لارمي .. تعقبو ولا تجيب الروفورمي
راهم جايينك مصاريف كبيرة لازم تحسب منين تجيبها ذرك ولا منبعد ولازم تديرها في بالك مليح .. مشي تخمم فيها من بعد وتقول مزلت صغير ..
لازم تريقل امورك وتدير شمبرتك الخاصة ... وتخمم في حوايج اكبر
لازم تخمم في خدمة فيكسي .. تاع مستقبل ... واذا خدمت خدمات مؤقتين ... خبي صواردك
حاول تسعى و الزم لحلال ... ربي يراه يبارك في العمل الصالح والالزوجة الصالحة والبنيان ...
متخليش عوامك يروحو لعب ... ونوصيك على الصحبة ... متخالطش مجامع السوء والناس الصايعة .. تلقاه مش يخمم في المستقبل ويزيد يديك معاه في طريقو ...
اتكل على ربي ... حبة حبة نتوصل ... و كيما قتلك .. دير ربي في بالك و خمم في حياتك تاع غدوة من ذرك ...
وكاين ثاني لازم تتعرف من ذرك بمرا صالحة باش منا لوقت الزواج تكون واجد .. يعني نتا تبني في مستقبلك ومثلا هي تقرا .. ماشي حتى تكبر باه تتعرف ولا حتا يحين الوقت ..
كيما يقولو لمرا تحكم ليد يعني لازم عل الاقل عام ولا اكثر باه تعرفها ... يعني كي تبغا تتزوج لازم تكون عارفها من قبل بعامين ... ماشي تزيد تودر عوام اخرى مع واحد اخرى كي متصلحش مع لولة .. ببساطة يعني دير ليستاع لروحك وحاول توجد روحك من قبل ديما .. بصح انوى ديما لحلال .. وما تلعبش .. مترضاش لبنات الناس واش مترضاش لخاوتك ..
هاذي هيا حبيت انا نوصيك وننصحك .. لانو الدين النصيحة
قبلك انا خدمت في السيمة ..في الطوب.. في الجاج .. في الرمل .. في لبحيرة .. لمنحة تاع الخضرة .. خدمت ليكترونيك .. كنت نقرى ونبريكولي ..
بصح الحمد لله بالشهادة لي عندي لقيت خدمة ... ومزلت نسعى باه نحقق امور بزاف ..
كاينين ولايات فيهم حركة وتجارة وكاينين بلايص ميتة فيهم الحالة ... خير كي تبدل لبلاصة لعودش يسهلك ربي .. خير ما تعقب 3 سنين ولا 4 من عمرك بدون فايدة ...
والرزق راه من عند ربي .. ابذل مجهودك واتعب .. كي تكبر متندمش ..
ايا تهلا في روحك بزاف
خوك محمد
