صديقتي و النصب تع الحشيش

[Bob Marley]

:confused1:سلام عليكم
رمضان شهر الرحمة و الاحسان و المغفرة
اول شيء انا شومار منخدمش مي انجيبه لي نلقه نخدمه منرجعش لورا، ومع انتهاء الصيف كنت نخدم في لبحر مع صحيبي في البحر انبيع الشواء و نكريو لي برسول

وفي رمضان حلينا نصب تع حشيش وخضر و فواكه . وكل يوم انود على 5 تع الصباح و نتوكل على ربي
ومع مرور الايام مرت علي صديقتي راتني ابيع في الكرافس و دبش معجبمش الحال دورت وجه و في الليل عيتله قريب 50مرة في البرتابل مهزتش
والبارح مرة علي هي و امه في سيارة امه وتوقف امامي وكأنه لا تعرفني و نزلت امه و شترت من عندي وهي لم تنظر معي و في الليل اتني SMS قالت فيه راهي خرجت عليك الخضر
. راني حاير وش اندير امعاه عشر تع 3 سنين تولي ارماد هل عيب الانسان يعمل مثلي هل الزوالي ميعشش مع الرغم انه تعرفني من اكون هل النصب تع الحشيش يكرهونه البنات او اذا حليت سوبرات كبير راني راجل و كي درت نصب راني كافي

و اليومSMS اتني قالت راهي عزيز و متحبش الذل
قولولي هل انا رخسته بي هدا العمل
لاحول ولاقوة الابالله
:cursing::cursing::cursing:

 

[●¦[ الــفـــارس ]¦●]

ربي يكون في عونك حبيبي

و لله غير معضلة صح

يا خويا ربي يهديها و لا يديها و يهنياه منك خلاص

هذي حشاك ما تستاهلش انسان مغوار كيفك و خدام على روحو
​

 

[كلي امال]

السلام عليكم و رحمة الله تعالى و بركاته
خويا الخدمة الحلال عمرها ما كانت ذل
الذل كي تقعد شاد حيط

 

[Bob Marley]

مانيش عضو و انت
:: عضو جديد باللمة ::

​

كلي امال
:: عضو مميز باللمة ::
شكر لولاد طلعتولي المورال

 

[Lonely Girl]

هاذا الشي عشرة تاع 3 سنين والله قراف يعني مالحق راها تعرفك بيان مدامهي تمشي معاك هاذ المدة انا من رايي نقلك خليك يابن الناس ابني سوقك و نباعد راه يبان لحلال تاع الصح
:thumbup:ربي يوفقك
​

 

[Moha le sage]

السلام عليكم

شوف خويا خادم الرجال سيدهم ..بيع البلاستيك بيع الحشيش بيع اي حاجة .. انا واحد من الناس خدمت في كلش ..في السيما في الرمل في الدالا في قراج تاع جاج .. ونورمال ..بصح عندك حاجة يسما كي عاد عندي ليسانس قدرت نلقى بلاصة بيه ..

الخدمة مش عيب ..واذا ماعجبتخاش خدمتك ..خيرها في غيرها .. نتا لي راجل .. اون ليكيد غدوة عيد ..ما تطيحش بقيمتك .. هي عزيزة ونتا ثاني عزيز واعرف قيمتك ..اذا هي ما عرفتهاش انا نقلك انفض البق عليك .. اخدم وربي يعاونك ..ودخل 5000 في النهار حلال خير ما تريح ..وكون قافز ينوب عليك ربي

رانا كامل نتمرمدو في هاذ الحياة .. والبنات كيما راك تحكي في عوض ما يكونو حنان و ينحو عليك الضر ..تلقاهم يزيدو عليك غير في المشاكل .. اذا شفت قيمتك تطيح vive سيليباتار .. انا عندي 10 سنين وحدي .. صح ديفوا نقول كون جات معايا وحدة ..بصح نولي ديما في رايي خطراش الاغلبية عقليتهم 0 ماشي كيما حنا ..غير لي توجعلك قلبك بالقصص و كل يوم حاجة جديدة ..انا نقلك اخطيك .. اذا لقيت وحدة عاقلة وتوقف معاك فبيها ونعمت صارحها و انوي لحلال وراه ربي يفرج عليك بخدمة .. بصح لازم تسعى وتحوس .. ان شاء الله بدل الولاية اذا مكاش مكتوب في ولايتك

راني نصحتك وكونك راجل ماشي مراهق يتبع في مرضات لالاه ... خطراك كون تبعها رايح تذل روحك و تلقى حياتك زيروات و تقول لاه عايش وتسماطلك الدنيا على جالها .. ماتديرش هكذاك .. ارضى بالشء لي راك فيه و حاول تسعى و ان شاء الله ربي يوفقك

خوك محمد

 

[لحظة أمل]

الخدمة عمرها ماكانت عيب ودل مادامها حلال
والواحد مايعرف منين يجيه الرزق واللي خلاتك درك
ربي يعوضك باللي خير منها وتكون عندها القناعة
وتوقف معاك وقت الصح ماشي تحشم بيك ربي معاك خويا
​

 

[NAZIHA DZ]

والله يالعشرة؟المهم نتا راك خدام ومادامو عمل حلال وتكسب رزقك بعرق جبينك ماتسال حتى على واحد وهي اذا جاهلتك ربي يسهل عليها مهيش معيشاتك خويا
لقات راجل يخدم بالحلال وراها تتقلش اووووف والله يازمان عيش تشوف
رضات صحا مرضاتش ربي يعوض
مدير والو في بالك راك في الصح وهي في ........

 

[SaMi_o7]

لا عيب ولا إشكال

العمل عبادة لكن الحب ليس عبادة

و البنت هذي لا تحبك لو كانت تحبك لأحببتك بما أنت عليه


و تقبلي رأيي الشخصي

و شكرآآ

،،,,
​

 

[Bob Marley]

شكراااا لكل الاعضاء ولي الردودكم الرائعة
والله راكم في القمة
بارك الله فكم

 

[angel_fly]

خويا الخدمة عمرها ما كانت ذل الخدمة عزة و شرف و الطفلة هادي ما تستاهلكش و انا نقدر فيك اعتمادك على نفسك و عزة نفسك و كمل اخدم اي حاجة المهم ترضي ربي و الله يرزقك ببنت الحلال اللي تقدرك ان شاء الله
ما تقلقش روحك الدنيا فانية
تقبل مروري
​

 

[Bob Marley]

خويا الخدمة عمرها ما كانت ذل الخدمة عزة و شرف و الطفلة هادي ما تستاهلكش و انا نقدر فيك اعتمادك على نفسك و عزة نفسك و كمل اخدم اي حاجة المهم ترضي ربي و الله يرزقك ببنت الحلال اللي تقدرك ان شاء الله

ما تقلقش روحك الدنيا فانية
تقبل مروري​

شكرعلى مروركي و الله راكي فور
كلمك صواب 100%

 

[ملكًة الاحسآس]

الخدمة الحلال عمرها ماكانت ولا تكون ذل ولا عيب
بالعكس ربي يعاونك خويا ،وهاذ الطفلة الي يا زعما 3 سنين وانتما مع بعض
نورمالمو توقف معاك،ماشي تحشم بيك،ربي يعوضك بالي خير عليها.
وان شاء الله ربي يفتحها في وجهك
​

 

[ملكة زماني]

هذي ماش وجه خير كي عدت تخدم على جالها وتكابر وتجري ورى الحلال ما عجبتهاش
عجبها هذاك لي يكالي الحيط ونافخ روحو وا لديه يضرفو علبه
انت راجل وهي متشتهلكش
وكمل في خدمت وربي يعطيت على قد نيتك ويكون معاك
ويطيحك في بنت الحلال
ولي اليوم ماعندوش غدوى عندو