معليش عندي الدخان هات بريكا ورواح تشعال ماكانش " فريق أولاد قسمطينة "

[Adel Adel1]

مشكل الشباب
مستر قارو
وحد النهار تقابدت و قلقان بزاف . كانت الإستراحة " تواليت " في الثانوية لي كنت نقرى فيها . نسميوها المحشايشا
كانت معقل للمزاطيل و المدخنين مرات يدخلو شراب و يسكرو الزطلة و مستر قارو لتم بلاصتو

المهم
دخلت قلقان نحوس على طفل لي تقابدت معاه ضربتني ريحة تاع زطلة ميكسي مع الدخان كفرت عليهم و شفت مع قارو في يد صاحبي
نحيتهولو و حطيتو في فمي
لتما تعرفت على مستر قارو " معريفة خير "

كانت لحضة ماننساهاش طول حياتي بداية صداقة جميلة لدرجة المودة و المحبة خرجت ووقعت على ركايبي نسعل نسعل نسعل و ليت شفتهم يضحكو ضحكت و خرجت
مرة على مرة قارو توطددت العلاقة و كثرة المحبة و تحرقت الرئة و بكات العين " من دخانة "

جماعة قولولي برك كيفاش نحبسو جربت كل طرق راني رايح نهبل مي و الله نحبو المستر قارو هادا
نفرح ندير قارو نقلق ندير قارو نتوتر و لا نخاف و لا نخمم مستر قارو معايا فالضراء و السراء نعم الصديق
جماعة لي حبسوه من قبل يجيو يقولولي كيفاش دارو
​

 

[lil-mirou]

كانت لحضة ماننساهاش طول حياتي بداية صداقة جميلة لدرجة المودة و المحبة خرجت​

تتمسخر بيا يخي؟؟
واش من محبة راهي تضر في صحتك و تتكوبالك لابيتي مش مليح خلاص قداه عندي وانا نقولك حبسو زعما تحبسو وتولي تتوحشو؟؟؟؟

ديسيدي باه تحبسو دير في بالك بللي يضرك و ماينفعك في والو غير المرض و ما إلى ذلك
​

 

[tatyana]

اولا يعطيك الصحة على هدي الجراة والشجاعة
انا عند طريقة بلاك تساعدك ولي هي
احسب قداه من قارو في النهار تتكيف وعود كل يوم نقص واحد كل يوم مثلا ادا تتكيف 10 رجعهم 9 وهكدا مع ليام حتى يولي قارو واحد برك ومن باعد خلاص
على خاطر كون تحبسو مرة وحدة متقدرش وتوليلو
ودير النية في قلبك على خاطر هدي صحتك وشوف كيفاه تشغل روحك مثلا دير الرياضة ولا اقر كتب المهم راك علبالك
وربي يساعد ان شاء الله مدام نويت الخير ليك
وادا حبستو قولييييييييييييييي باه نزغرتلك

 

[Adel Adel1]

تتمسخر بيا يخي؟؟
واش من محبة راهي تضر في صحتك و تتكوبالك لابيتي مش مليح خلاص قداه عندي وانا نقولك حبسو زعما تحبسو وتولي تتوحشو؟؟؟؟

ديسيدي باه تحبسو دير في بالك بللي يضرك و ماينفعك في والو غير المرض و ما إلى ذلك

مريم علابالك حبستو ووليتلو
ايه مودة كبيييرة
ههههههههه
​

 

[Adel Adel1]

اولا يعطيك الصحة على هدي الجراة والشجاعة
انا عند طريقة بلاك تساعدك ولي هي
احسب قداه من قارو في النهار تتكيف وعود كل يوم نقص واحد كل يوم مثلا ادا تتكيف 10 رجعهم 9 وهكدا مع ليام حتى يولي قارو واحد برك ومن باعد خلاص
على خاطر كون تحبسو مرة وحدة متقدرش وتوليلو
ودير النية في قلبك على خاطر هدي صحتك وشوف كيفاه تشغل روحك مثلا دير الرياضة ولا اقر كتب المهم راك علبالك
وربي يساعد ان شاء الله مدام نويت الخير ليك
وادا حبستو قولييييييييييييييي باه نزغرتلك

جربتها طريقة هاديك و ماكاين حتى فاااايدة

 

[karim073]

السلام عليكم ورحمة الله

و الله يا اخي و بكل صراحة صعيبة شوي باش تبطلوا

لكن القضية قضية ارادة و اكثر من الدعاء لربي العالمين

لكن نقلك حاجة مجربينها ناس ياسر

بطلوا و عود كتر من الماء سيرتو كي تدوموندي الخلايا النيكوتين انت اشرب الماء

باش تطفي الحرارة نتاعها ..... فهمت ?

و ان شاء الله ما يكون غير الخير

 

[largo19]

ربي يعافينا و يعافيك.... يا خويا ... أولا دير في بالك بلي هذا من المسكرات المحرمة ... حرمها ربي على المؤمنين ... و قارن بين محبتك لله نعالى اللي أمرك باش تجتانب كل الموبقات و الكبائر . بما فيها المسكرات و الخمور... و استعين بالله .... و شوف كاش مركز لعلاج المدمنين .. و نضن كاين واحد في مدينة البليدة .و راحو ليه جماعة نعرفهم .. قالولي جاي في منطقة طبيعية خلابة.. و و فيه مرشدين و أطباء .. و نفسانيين.. و تستمر مدة العلاج عل حسب شدة الإدمان.. حيث .. يقدمولهم علاج كيميائي مماثل لمفعول الأفيون .. ومن بعد ينقصولهم الجرعة بالشوية حتى يحبسوها.. هذا مع بعض النشاطات الرياضية و الفكرية و الإجتماعية .. لكل النزلاء.. بحيث ما تحسش روحك في فترة علاج....
و ننصحك .... أخطيك من رفقة السوء... و كيما يقول الحديث ( المرء على دين خليله. فانضر من تخالل... ) .....
و راني ملاحظ بلي عندك شجاعة و إرادة .. باش تغير نفسك ... ألور لازم تستغل هاذ الفرصة قبل ما تفوتك .... ربي يوفقك خويا....

 

[tatyana]

واش نقولك ربي معاك ولازم تحبسو عاجلا ام اجلا صحتك وحياتك في خطر كبيرررررررررررررررررر

 

[هــــيلدا]

ياخويا لعزيز الله غالب لوكان جيت نعرف واش تدير راني مابخلتش

بصح نقدر ندير حاجة وحدة تعاونك اني ندعيلك ربي يوفقك وتقدر تنحيه


ربي يحفظك خويا ونشالله تقدر تنحيه

 

[سلمى رويبة]

معندي منديرلك يا خويا غير ندعيلك ربي يوفقك باش تتخلص من هذا لعدو

 

[حورية الجزائر]

اكيد اي شيء مضر لصحتنا حراااااااااام

حاول باش تبطل وزيد ادعي ربي باه يقدرك

ربي يقدرك ان شاء الله

 

[نعم الرحمن]

السلام عليك بما أنك طرحت الموضوع فهذا يعني أنك مصمم على الاقلاع عنه
1 توكل على الله
2 كمل قلل من كمية السجائر في اليوم 3 عوضها بأكل*الفول السوداني* الكوكاو كيما يدير معظم الغاشي
3 وانت تحارب في السيجارة انتابه لوزنك على خاطر معظم لي قلعوعليها يزيد وزنهم من القلقة
4 حط روحك و كأنك صائم عن التديخين
5 بدل وضع السيجارةفي الفم اشري كوجاكا ههه باه تبدل الذوق شوية
6 اعرف بلي الخلية لي والفت بالسيجارة ماتموت إلا بعد 3 سنوات من توقيف التدخين معناها لازم تتحمل شوية و حطها في بالك برك ديما بلي راك تقاوم على جال صحتك وعلى لي يحبوك خرمن الموت البطيء
7 في بلاصة ما تشري سيجارة صدق الدراهم تاعها وادعي ربي يعاونك ان شاء الله

 

[طيب الروح]

السيجاره هي من المحرمات....
السيجاره ان لم تقدر أن تبعد عنها فأنت عبد لها لا لله
لا اجد اي نصيحة اقدمها لك احسن من هذه...
حاول أن شاء الله تكن على خير​

 

[sayco]

ربي يعاونك

 

[TamerLover]

.. الســـــلام عليـــــــــــكم ..

.. مــرحبــا خويــا العــزيز .. واش راكـ ؟ ..
.. يــا رب تكــون في تمــام الصحـة و العافيـة ..

.. شــوف شــريكي .. مــا كانش كيمــا الدخــان ..
.. سيــرتو كي يكــون مــاركة مليحــة كيمــا أفراز يا جدكـ ..
.. جبــدة وحــدة منــه تديكـ لـ هــونكونــغ ههههههههههـ ..

.. خطيكـ يــا خويــا .. أنت راكـ زعيــم مشــاء الله عليكـ ..
.. ثقــافة و كــلام زين و تربيــة الله يبــاركـ ..
.. بصراحــة و الله مــا تخــرج عليكـ تتكيــف ^^" ..
.. نقــولكـ ربي يحمي عبد مميــز كيفكـ من هذوا الحــوايج الي يضروا الصحـة ..

.. يعـطـيكـ الصحــة على مــوضـوعكـ القيــم و المفيــد ..
.. جزاكـ الله خيـرا .. و جعــله في ميزان حسنـاتكـ ..

~ .. دمت في أمان الله ..

.. أخــوكـ و صديقكـ أكــــرمـ ..
​

 

[aMiNa-K]

السلام عليكم

يا خويا ديجا كي راك حكيت برك و قلت راك حاب تبطلو.. صافي هدي وحدة عندك

الارادة وحدها ماتكفيش.. لازملك تصبر و اللي معاك يعاونوك
et bla bla bla
بزاف هدرة يقولوها للمدخن اللي حاب يبطل الدخان

و بلاما نتفلسف بزاف.. كاين شوينقوم يتباع يكرهك في النيكوتين اللي كاين في الدخان.. كي تجي تتكيف قارو تعيفو ماتقدرش تكملو .. و هكدا تبطلو ان شاء الله
​

 

[aMiNa-K]

السلام عليكم

يا خويا ديجا كي راك حكيت برك و قلت راك حاب تبطلو.. صافي هدي وحدة عندك

الارادة وحدها ماتكفيش.. لازملك تصبر و اللي معاك يعاونوك
et bla bla bla
بزاف هدرة يقولوها للمدخن اللي حاب يبطل الدخان

و بلاما نتفلسف بزاف.. كاين شوينقوم يتباع يكرهك في النيكوتين اللي كاين في الدخان.. كي تجي تتكيف قارو تعيفو ماتقدرش تكملو .. و هكدا تبطلو ان شاء الله​

 

[Adel Adel1]

بربي نشاله راني نحاول و نقصت منو بزاف

 

[شاكيرا]

كل يوم دير حبة قرنفل في فمك بشويا تحبسو

 

[Adel Adel1]

صديق الرجل عقله وعدوه جهله

ماتتكبر مايطرشقلك عضم و لا ماعلاباليش كيفاش يقولوها