ليوم فوتنا Bac Sport

[iméne09]

مالا حرقتكم الشمس هكداك مليح تدخلو عندكم اينارجي من شمس بزاف ربي يوفقكم خو وان شاء الله تفرحنا في جوان ​

 

[Iman89]

ربي ينجحك خويا غزال
فكرتني في ايامات فوت الباك سبور كي كملنا قعت نستنى برا في بابا يجي يوصلني وكنت لابسى كاسكيتا فاتت علي عجوزة قاتلي ياولدي قداه فالساعة ههههههههههه والله شيخة
ربي يكون فالعون

 

[معاك يا الخضراء]

بالتوفييييييييييييييييييييييييييييييييييييييق
خويا هشهش
ان شالله تفرحنا بالباك
هاد التعب و الهم كل تنساه
ربي معاكم​

 

[DARINE05]

ههههههههههههههه
يقعد يوم في الذاكرة المهم اكل في الرسمي لي هو المفيد يورتو علوم ركز مليح

 

[HWK4ALGERIA]

السلام عليكم و رحمة الله تعالى و بركاته خوتي

ليوم فوتنا bac sport , ااه و الله ما كنا حاسبينو هاكا قاع !

رحنا لليسي خاطي الليسي تاعنا جاي بعيد علينا المهم ...

في الconvocation قايلين أرواحو قبل الوقت بنصف ساعة

(( ما كتبوش ساعة الدخول ))

يعني عليك و على راصك خير وقت و أرواح قبلو بنص ساعة ..

المهم ما عليناش رحنا مع السبعة و نصف أفترضنا أن وقت الدخول هو ال8

كي رحنا حسينا بروحنا طلابة دخلو تلاميذ الثانوية هاذيك و حنا خلاونا برة

مزية كانت كاينة قهوة الشومارة لمتنا حنا الذراري ,,

المهم كي لحقت الثمنية و حاجة عيطو و قالو (( أرواحو تدخلو )) غير قدمنا و ينقطنا العساس

و خرو نتوما مازال , يدخلو لبنات و مبعد ساهل //

و ريحنا برة مع الشمس تقلي و الناس كثر منها ..إلخ و من جديد تجي قهوة الشومارة تسلكنا

لحقت العشرة و نص باش دخلونا و بتشناف من لفوق

دخلنا درنا ( جلة - سرعة - قفز طويل - مداومة ) و في هاذي الأخيرة ( المداومة )

واحد صاحبي دار نص دورة و تخبى ورا شجرة خلانا حتى ولينا في الدورة لخرة و خرج يجري معانا

غير جاو يكتبونا في النقاط جبدوه و قالولو بلي رانا تحلبنالك , قلبهالهم راني مريض بالسكر ..إلخ

المهم واش نقولكم بلاد ميكي و صراو بزاف حوايج فيهم لي يخرجو من لعقل و فيهم لي يضحكو

نتمنى التوفيق لكل زملائي المقبلين على شهادة الباكالوريا

peace .

حنا هاذاك العام اللي ينقز 2.5 متر يكتبولو 4 متر عاونونا على الكيف.
بالتوفيق.
شكرا.

 

[im£ne]

سلام خويا هشام
ان شاء الله تكون فاتت مليحة !
عقبال ماتدي الباك و نفرحو بيك
تهلى !

 

[babailyes]

نحنا نهار الخميس انشاءالله ان جيبو الباك

 

[نور الصباح الجزائرية]

بالتوفيق ان شاء الله و بصحتكم التمرميد
مى هنا عندنا متهليين فيهم و مقسمين الذكور و حدهم و البنات و حدهم

 

[الزين السوفي]

ربي يوفقك إنشاء الله
حنا في 16ماي نعقبو الباك سبور
وربي يوفق الجمييييييييييييييييييييييييييييييييييع..​

 

[فؤاد الورقلي]

السلام عليكم

ههههه وين راك يا خويا
في لالجيري
وتلقيت صاحبي وانا اتي من الجامعة وحكى معايا على باك سبور
وقالي بان فلان دخل وفوت في مكان طالب اخر
وهدا الولد ما يدرس ما شي وهو جوير في احد الاندية وفوت في مكانه نورمال ههههه
لالجيري والترافيك وكل شي يصلح غير انوي هههه
ربي ينجحك هشوم الغالي جميع طلاب البكالوريا
شكرا
بارك الله فيك
السلام عليكم​

 

[menoubia]

مليح كي فوتو bac sportوعقبال ماديرو الامتحان وتجيبو نتائج ترضيكم وترضي والديكم
ويلا خفوها شويا رانا احنا دفعة الجايا العام الجاي باه نجربو هدا الباك يلي مطير عقول عباد

 

[aMiNa-K]

السلام عليكم

الله يكون في عونكم خويا غزال

انا دبرتها في العام تاع الباك .. صاحب بابا طبيب دارلي سارتفيكا و قالي اخطيك :like_1:
و كي لحق نهار يعقبو دخلت سكيمي i-o: .. قلت نقرعج كيفاه يديرو
هاداك النهار ماننساهش .. تمرغت في اللرض من الضحك :lol:
اللي مايعرفش يصوطي:laugh: .. و اللي مايعرفش وين يرمي الجلة :mellow: .. و وحدة كي لحقت دالتها في رمي الجلة من الخلعة ماقدرتش ترفدها جاتها ثقيلة بزاف :scared:
و خلي في السباق .. الطايح اكترمن النايض :lol:

بصح دبروها عطاولهم علامات ملاح :thumb_up1:

الله يكون في عونك خويا غزال .. و مابقاش قد اللي فات .. زيد اجبد و ان شاء تجيبو و تفرحنا .. و راك تسالنا كادوات

ايا .. peace love and unity
راني مانسيتهاش اليوم هيهيهييييي
​

 

[algerienne2]

المهم كملت لحكاية عل خير

 

[أفراح الجزائر]

ربي يوفقك هشام ...عقبال الباك .....تفرحنا..[/URL]
والله ماعندي خاطر ندخل ...دخلت غير على جال موضوعك​

 

[AnGeL*dZ]

بالتوفيق خويا
حنا الدكورا عندهم نهار يديروا وحدهم
ولبنات وحدهم
لبنات نهار الاحد
​

 

[maya31]

مام احنا اليوم لبنات راحو يديرو الباك سبوغتيف
عندنا لولاد يديرو وحدهم و لبنات وحدهم كيما لولاد دارو انهار لتنين و لبنات اليوم

اه شفت كيفاش و الله غير صبتني نخمم فيها العام الجاي اللهم اندير ديسبونص و نهني راسي علاخاطر علابالي رايحة نتغاشالهم تماك

​

 

[عفاف الجزائرية]

انا 12 في الشهر نفوت باك سبور
ربي يفرج
​

 

[H@teM]

ربي ينجحك اخويا هشام
​

 

[** غزال الصحراء **]

ربي ينجحك اخويا هشام
​

امين , مرسي عليك خويا حاتم ربي يحفضك //

 

[** غزال الصحراء **]

انا 12 في الشهر نفوت باك سبور
ربي يفرج
​

ربي يوفقك عفاف , نصحك ما تعبيش روحك بالجري و الهف , ألعبي بشويا

خطراش لينوت قاع تدو كيف كيف , كي اللي جا لول كي لخر .