********
في احدى نوبات جنوني الفكري جذبتني كلمة مثقف فأعجبت بها و قررت أن أكون مثقفا . فكان أول عائق أمام حلمي الجديد هو معنى الثقافة . فرحت أبحث عن معنى هذه الكلمة , و لأني لم أجد لها تعريفا بين ما علق بذهني من كم المعلومات التي كان الأساتذة و المعلمون يرغموننا على أخذها دون أن ندرك ما الفائدة منها . فشددت العزم أن أسأل أقرب الناس الي , فسألت والدي و والدتي و أقربائي أصدقائي . لكني لم أجد لديهم ما يشفي غليلي , فتذكرت أعز استاذ درسني و هو أحد الاساتذة القليلين الذين احترمهم و طالما لجأت اليه عندما تصيبي حالات الهوس الفكري. إنه أستاذي من أيام الثانوية و دونما تفكير قصدته لأسأله . فدار بيننا الحوار التالي .
- السلام عليكم , الشيخ ..... وش راك لاباس .
- أهلا يا صعلوك - دائما ينادي تلاميذه بالصعاليك - هذه غيبة وش جابك لازم كاينة مصيبة جديدة .
- والو كاينة حاجة محييرتني برك .
- واش بيك خير ان شاء الله ؟
- يا الشيخ وشنهي الثقافة .
يبتسم ابتسامته المعهودة والتي لطالما كانت ترعبنا في القسم .
- ايه يا خي صعلوك وش اداك للثقافة .
- يا الشيخ أفتني فيها لحاجة في نفسي .
- شوف ضرك نفتيك فيها بصح على أي المذاهب تحب نفتيك ؟
- ما فهمتش ؟
- ضرك تفهم يا صعلوك . الثقافة مذاهب و كل واحد و المذهب انتاعو .
مثلا على مذهب الشباب انتاع الوقت الثقافة انك تلبس هدوك السراويل الطايحين و تدير الجال و تضرب فيها كاسكيطة و نظارات رايبان و ما تنساش تسمع للغنى انتاع بيونسي و شكيرا و 50 cent *.
و الا على مذهب البنات الثقافة انك تلبس السيري وتدير ال makeup و تحفظ أكبر عدد ممكن من الكلمات الفرنسية و تستعملها بسبب و بدون سبب هذه هي الثقافة عند لبنات .
ولا تبغي نفتيلك على مذهب الشابة خليدة تومي اللي الثقافة عندها هي الشطيح و الرديح و قلة الادب و القيمة .
ولا نقولك , تبع الثقافة الكروية راهي دايرة حالة هدي الايام و راها عادت أخبار السي سعدان و أولادو أهم من أخبار الرئيس و أولاده أقصد وزراءه .
بلا ما ننساو ثقافة الادارت اللي لازمك تجيهم مكستم - لابس كوستيم - باش يحترموك ولا راهي تطفر فيك الا اذا حكيت جيبك و مديت الرشوة اللي عادو يسموها المثقفين انتاع آخر الزمان تشيبا .
و كاين مذهب - و هذو راهم ياسر- هذوك اللي تلقاهم دايما يدخلو أرواحهم في كل حاجة و يعطو رأيهم في كل موضوع باش زعمة الناس تقول عليهم فاهمين و مثقفين .
ولا ......... هنا أتدخل أنا مقاطعا .
- خلاص الشيخ راك كرهتني في الثقافة بطلت مانيش باغي نكون مثقف .....
هنا أترك أستاذي ملقيا عليه سلاما مختزلا لا يكاد يفهم و لسان حالي يقول : لعنة الله على ثقافة هذا الزمان و اشباه المثقفين , لقد كفرت بكل هذه المذاهب .
