لنعالج اقلامنا

[sam_houssem]

سلام عليكم
راكم مصحيين كامل من الحدادة للحدادة
نبدا بلي مداير قلافاطة حتى لي مازال في القماطة
المهم خلونا من التبراح
انا صح ماشي موالف ندير مواضيع هنا واغلبيتكم ماهمش شايفيني
مي مركز على ركن واحد وهو الشعر والخواطر وعلابالي هاذ الشيء ماش مليح
خاطر لازم نتنوعو بين اركان المنتدى المهم هذي قصة اخرى
الحاجة لي حاب نحكيها اليوم وجامي والا شفتها في المنتدى تاعنا
...
تقولولي وشنهي هي:؟؟؟
...
نقوللكم انا::music_whistling:
جامي والا شفت شيء واحد دار موضوع ودخل عندو واحد منا وقالو راه ينقصك الشيء الفلاني
ولا قالو اسلوبك غالط
وانا اولكم
ماعرف نحبو نجاملو
ولا كامل رانا مبدعين وفلاسفة وادباء
الحاجة لي حاب نشوفها وهي انو نكونو نديرو عملية نقد بشرط تكون بنائة
بلا سابوطاج
ماش واحد يدير موضوع والثاني يجي يعطيه بكروش ولا ضربة قاضية حاسب روحو مايكل طايسون
المهم ان شاء الله نكون نبهتكم لحاجة تخصنا في منتدانا وسلام عليكم
​

 

[هــــيلدا]

معندناش النقد البناء،
اذا مجاملكش يحرقك برد متفهم فيه والو
​

 

[DARINE05]

هيه كيما قالت طاطا اللي فوقي تقولي راهي نقصاتك حاجة ااا شومي مايخليلك ما يبقيلك يشعل فيك يجريلك في وجهك علاه نجيب تكسار الراس لروحي لي معشبنيش مانرد ما نقيمو هاذي هي انا الي يعجبني وتقريب المواضيع اللي نزورها بزاااف تاع الناس اللي يفهم يوصلك حاجتك بشوي هاذا صح كي تناقشو تجيب فايدة مي وش يجيك من واحد
تغلط تعطيه رايك ياكل ويبلعك

ومرسي على الطرح

 

[الجندية]

انا وحده من الناس مانقدرش ننتقد اللي نتعامل معاهم
خاطرش جربت بلي الناس مراهيش تفهم النقد كنقد
يقولك طيحتلي المورال راك تلعبها راكم عارفين العقليه
امالا انا نفضل ادا شفت حاجة ولا نخليها ف قلبي وخلاص
نجيب الصداع لروحي والمشاكل و عكس كل ماقلت
كاين ناس تفهم النقد وحتى تحوس عليــه وانا منهم
المهم مانطولش عليـك ربي يهدينا وخلاص
والف شكرعلى موضوعك صرآحه موضوع هايل
​

 

[إحســاس بــراءة]

اهلااااااااا وسهلااااااااا بيك خويا حسااااااام راك نورت قسم واش راك تهدر
واش راك خويا ان شاء الله لاباس
صح عندك الحق في واش قلت
نحاولو ننصحو بعضانا واذا نقد واحد شخص ينقدو نقد بناء ماشي يهدمو ويهبطلو المورال
ان شاء الله نعاونو بعضانا
يعطيك الصحةحسام
بارك الله فيك

 

[iméne09]

واش بيك حابيت ننقدو عباد باش يلصقو فينا كاين لي حابسين غير تقولهم بلي غالط رايح يشبعك هدرة ويرخسك مالا سي ميو تجاملو تiيvيتيه سي ميو ماخصناش تكسار راس معاهم مي كاين ناس تستاهل وقمة في نقاش مي عباد لا حياة لمن تنادي
يعطيك الصحة خو ​

 

[الظل الطويل]

خويا ركزت على شيء صحيح بالفعل
بصح هدا القسم وخاصة وشراك تهدر الهدف من الموضوع مشي الاسلوب على قد المضمون المهم انو توصل الفكرة ونعالجوها
اما في الاقسام الاخرى فاكيد لازمو نعالجو الاسلوب نتاعنا
خويا التفاتة مليحة
مشكور​

 

[روز]

تعيا تهدر ....؟؟؟؟
​

 

[406_nassim]

شكرا علي موضوع موضوعك ميخصو ولو

 

[بلد المليون]

عندك حق وهدي حاجة عامة بزاف سيرتوا مجاملة نتاع النساء
شكرا والله حاجة مليحة وانتقاد يكون ايجابي طبعا هو الغاية
شكرا

 

[السلطانة]

وعليكم السلام
اولا قبل معالجة الاقلام يجب معالجة الامخاخ
لازم ديتارتراج لعقلية لعرب


شكرا علىالموضوع


هدا الرد برعاية:
جميعية anti choc

 

[Moha le sage]

سلام عليكم

و عليكم السلام


راكم مصحيين كامل من الحدادة للحدادة
نبدا بلي مداير قلافاطة حتى لي مازال في القماطة


و راك صحيت يا ولد الكرطي .. ونسال على الجماعة من لدروات للاgوش ..كي لي نعرفو كي لي منعرفوش


المهم خلونا من التبراح


و الديسك جوكي ميخدمش على روحو :santa_1:

انا صح ماشي موالف ندير مواضيع هنا واغلبيتكم ماهمش شايفيني

انا شايفك :music_whistling:
مي مركز على ركن واحد وهو الشعر والخواطر وعلابالي هاذ الشيء ماش مليح
خاطر لازم نتنوعو بين اركان المنتدى المهم هذي قصة اخرى

يعطيك الصحة يا حسام ..راك زايد النص في هذاك الركن الي نحبو بزاف

كاين بزاف ناس يقلك الشعر و الخواطر ملتصقين بالحب ..يعني واحد يحب وحدة يكتبلها و يبدا يشعرلها .. بصح الشعر هو ترجمة تاع احاسيس .. و هو احساس راقي يميز اصحاب الذوق عن غيرهم .. وتعبر بقصيدة او خاطرة على همومك و حالاتك النفسية من فرح و حزن و اكتئاب و انبساط ..الخ


الحاجة لي حاب نحكيها اليوم وجامي والا شفتها في المنتدى تاعنا
...
تقولولي وشنهي هي:؟؟؟
...
نقوللكم انا::music_whistling:
جامي والا شفت شيء واحد دار موضوع ودخل عندو واحد منا وقالو راه ينقصك الشيء الفلاني
ولا قالو اسلوبك غالط
وانا اولكم
ماعرف نحبو نجاملو
ولا كامل رانا مبدعين وفلاسفة وادباء
الحاجة لي حاب نشوفها وهي انو نكونو نديرو عملية نقد بشرط تكون بنائة
بلا سابوطاج
ماش واحد يدير موضوع والثاني يجي يعطيه بكروش ولا ضربة قاضية حاسب روحو مايكل طايسون
المهم ان شاء الله نكون نبهتكم لحاجة تخصنا في منتدانا وسلام عليكم
​

نولي لقضيتك

يقلو هي تبكي بالعقر و هوما يقولولها قداه ولادك ... يعني المثل هذا فاقد الشيء لا يعطيه

كي يكون كاين نيفو ..يكون كاين نقد بناء .. وكي يكون الغاشي طالع هابط يحسب في المكونيكتيين و يصنف فيهم ..ما تستناش العسل من عند البرززو .. ( البوزنزل )

ايا و تلا في روحك حسام .. كاش نهار نعرضك على كلكوشوز :yahoo:

 

[programmeur]

أيا بسم الله اول نقد ليا

يا خويا تعرف بلي العرب يضخمو الامور
وحاجة بسيطة يعتبروها حاجة فووور
وانت راك تقوللهم أنتقدو نقد البناء
بصح عربنا مايعرفوش البناء يعرفو غيل يهدمو

امالي موضوعك مايصلحش وروح لمنتدى الشعر وأقعد تشعر على روحك ..... هدا المنتدى راه خاطيك





شفت خويا كي داير النقد تاع العرب ...... داير كيما هكدا ههههههههههههههههههههه
وماتزعفش مني لخاطرش جبتلك حالة تاع نقد تاع مواطن عربي ههههههههههههه
هدا هو القماش ........ الدي ولا خلي

 

[روز]

نولي لقضيتك

يقلو هي تبكي بالعقر و هوما يقولولها قداه ولادك ... يعني المثل هذا فاقد الشيء لا يعطيه

كي يكون كاين نيفو ..يكون كاين نقد بناء .. وكي يكون الغاشي طالع هابط يحسب في المكونيكتيين و يصنف فيهم ..ما تستناش العسل من عند البرززو .. ( البوزنزل )

ايا و تلا في روحك حسام .. كاش نهار نعرضك على كلكوشوز :yahoo:

لالا أخ موح كفاش ماكاش نيفو
كاين اقلام هنا روعة ... تقدرتقول كاين نقد هدام صح..

مي كاين ناس بزاف تكتب مليح وترد تاني مليح وشنو ديفوا يدخلو أصحاب الردود نتاع كوبي كولي يسمطو الموضوع

ومرات يدخلو ناس ضايقة روحها يبداو يخلطو المهم يزيد عدد المشاركات ولا مش عارفة قصدهم ...

ان شاء الله وحدة وحدة يولي منتدانا يفرح ...

نو

تشاؤوم


​

 

[روز]

أيا بسم الله اول نقد ليا

يا خويا تعرف بلي العرب يضخمو الامور
وحاجة بسيطة يعتبروها حاجة فووور
وانت راك تقوللهم أنتقدو نقد البناء
بصح عربنا مايعرفوش البناء يعرفو غيل يهدمو

امالي موضوعك مايصلحش وروح لمنتدى الشعر وأقعد تشعر على روحك ..... هدا المنتدى راه خاطيك





شفت خويا كي داير النقد تاع العرب ...... داير كيما هكدا ههههههههههههههههههههه
وماتزعفش مني لخاطرش جبتلك حالة تاع نقد تاع مواطن عربي ههههههههههههه
هدا هو القماش ........ الدي ولا خلي

كاين ما اكثر ....كاين لي يلحقك في وحد الأمور ...!!على كل ماعليش ربي يهدي ويصلح الأمور
​

 

[mimi.dz]

وعليـــكم السلام

المشكل أنو مكانش اللي يتقبّل هاذ النقد
نشفى مرة قريت موضوع في هاذ القسم
دخل عضو نقد الكاتبة والنقد كان في بلاصتو صراحة
مي الله غالب اعتبراتو اهانة وناضت الحرب:music_whistling:
مقعدش اللي يتقبل النقد
او بالأحرى تنقد واحد يرجعك انت الغالط :glare:
وكيما يقول خويا
ما نخالط ما نبالط ما نسمى غالط
يعطيك الصحة حسام
​

 

[sandybelle]

شوف باش تعالج قلمك ...لازمك خطوات
أولا عالج العقلية ...ثانيا عالج اللسان .... ثالثا عالج معلوماتك ... وريسكي بعمرك :music_whistling:
ولازم كي تنقد أي موضوع تكون مأسيوووري في الضمان الاجتماعي ....ماتحصيش ياخويا يعود صاحب الموضوع يخبطك بزوج كلمات يجيبك كاو .....
ايه ياخويا والله غير تخاف تنقد واحد يجيبلك خوه لكبير :music_whistling:

 

[روز]

وعليـــكم السلام

المشكل أنو مكانش اللي يتقبّل هاذ النقد
نشفى مرة قريت موضوع في هاذ القسم
دخل عضو نقد الكاتبة والنقد كان في بلاصتو صراحة
مي الله غالب اعتبراتو اهانة وناضت الحرب:music_whistling:
مقعدش اللي يتقبل النقد
او بالأحرى تنقد واحد يرجعك انت الغالط :glare:
وكيما يقول خويا
ما نخالط ما نبالط ما نسمى غالط
يعطيك الصحة حسام
​

لالا ختي كاين ناس ماتعرفش تنتقد ,,ماتعرفش تهدر... النصيحة تتقدم وحدة وحدة مش في وجهك يقلك يالي فيك وفيك..!! مش هكدا...
والافضل إذا كان في شي مربك في الموضوع رسالة خاصة وهي فرات ..مي كاين ناس ربي يهديهم يحبو يبينوا رواحهم على حساب صاحب الموضوع وعلى حساب أفكارو.. زعمة راني خير منك أنا كذا ونتا ماكش كذا ...ولا يحبوا يبينو رواحهم ملائكة وزعمة فور في العقلية...وش نقلك العقلية هادي لقيتها بزاف هنا..في اللمة
وعلى كل ان شاء الله خير
​

 

[sam_houssem]

سلام عليكم من جديد
ومرسي عليكم كامل يا لي مديتو رايكم
وراكم بينتولي وجهات نظركم وقنعتوني بكلامكم
وهذي مجاملة ليكم:music_whistling:
لالا صح
المهم كل كلامكم صواب ويمكن كان عن تجربة جربتو تنقدو وصابوطاوكم بردود تخلع
زيدان كونطر ماتيرازي
مي خاوتي لازم نتفاهمو باه نقدرو نديرو نقد
نفرضو مثال انا درت موضوع ودخل الاول وقالي مرسي على الموضوع مي راه خاصك الشيء الفلاني
انا نتخلع ونقول بلاك سابوطاني
ايا يزيد الثاني يدخل ويدير نفس الملاحظة
نقول بلاك هذا ثاني راه غار مني برك
يزيد الثالث كيفكيف نفس الملاحظة
يزيد الرابع والخامس
هنا كاين زوج حالات
يا كامل غايرين مني وحابيس يسابوطيوني وهذي ماكانش منها
الا اذا عدت جاك ويحوسو يفرقو بيني وبين روز:scared:
والثانية هي انهم كامل على صواب وانا لي غالط ولازم نصحح ونتقبل فكرة اني غالط
يعني المفيد وبالختصار لازم كامل نتعلمو ننقدو وما نخافوش
ماشي واحد ينقد والباقي يضرب السيراج
والشيتة تقولو بونيشة في وقت الثورة
المهم مرسي عليكم كامل وان شاء الله نكون بينت وجهة نظري وتفهمو وين حاب نوصل:closedeyes:​

 

[إحســاس بــراءة]

سلام عليكم من جديد

ومرسي عليكم كامل يا لي مديتو رايكم
وراكم بينتولي وجهات نظركم وقنعتوني بكلامكم
وهذي مجاملة ليكم:music_whistling:
لالا صح
المهم كل كلامكم صواب ويمكن كان عن تجربة جربتو تنقدو وصابوطاوكم بردود تخلع
زيدان كونطر ماتيرازي
مي خاوتي لازم نتفاهمو باه نقدرو نديرو نقد
نفرضو مثال انا درت موضوع ودخل الاول وقالي مرسي على الموضوع مي راه خاصك الشيء الفلاني
انا نتخلع ونقول بلاك سابوطاني
ايا يزيد الثاني يدخل ويدير نفس الملاحظة
نقول بلاك هذا ثاني راه غار مني برك
يزيد الثالث كيفكيف نفس الملاحظة
يزيد الرابع والخامس
هنا كاين زوج حالات
يا كامل غايرين مني وحابيس يسابوطيوني وهذي ماكانش منها
الا اذا عدت جاك ويحوسو يفرقو بيني وبين روز:scared:
والثانية هي انهم كامل على صواب وانا لي غالط ولازم نصحح ونتقبل فكرة اني غالط
يعني المفيد وبالختصار لازم كامل نتعلمو ننقدو وما نخافوش
ماشي واحد ينقد والباقي يضرب السيراج
والشيتة تقولو بونيشة في وقت الثورة

المهم مرسي عليكم كامل وان شاء الله نكون بينت وجهة نظري وتفهمو وين حاب نوصل:closedeyes:​

وعليكم السلام
هاذيك هي يا حسام خويا ماعندي مانزيد على واش قلت
يعطيك الصحة
ركزلي على الشيتة هاذي راهي دايرة حالة يا خويا حسام:tears::tears:
ماعليش ربي يهدي برك

هاذا الرد برعاية جمعية anti chita