ملتقى عرائس ومخطوبات اللمة الجزائرية/خاص باستفساراتكن حول كل ماتحتاجه العروس

[رنيم الصمت]

صحيتي اختي سندريللا
عندي طلب :shay:
عرسي قريب ان شالله و حابتكم ادبرو عليا في جهازي اكتبولي واش نحتاج بالتفصيل ومذا بيا المتزوجات يفيدوني بخبرتهم
وان شالله راح تفيدوني و تفيدو البنات لي في حالتي و حاصلين كيما انا
والف شكر مسبقا:ax_flw:

 

[الاء هبة الرحمن]

مساء النور اختي انا تاني مخطوبة وراني نوجد في جهازي ..
نبداوبالفراش.....
4 مطارح .زربية تاع الارض.و الزرابة تاع المطارح على قد المطارح. 2كوات من الملاح .2كوفيرطات من الملاح.لي الدرا. لي كوفرلي.4 بساطات تاع بونج او الاواط او 2 تاع الصوف.لي نابرو.لي ريدو.و(صالون ماروكان كيما تحبي والعدد تاع الفراش انتي و مقدورك وانتي ودراهمك)
القنادر تاع الصيف من 7 الي10 كيما تحبي و2 بيجامات تاع الصيف وكلاكات و بشامق
قنادرتاع الشتاء متكثريش5 بزاف و2 بيجامات تاع الشتاء و بابوشات
لي نويزات.بينوار الصيف واخر للشتاء .تقاشر.لي با.ملابس داخلية ملونة.و ديري اخىرى للدوم
حوايج الحمام.....
صاك دو تواليت.سورتي دو بان.مناشف.مناشف صغار.بانيو.كرسي.سلة تاع القش.طاسة تاع الحمام
حوايج الكوسميتيك...
ريحة .ديودورو.شومبوان .ابري شومبوان.جال دوش.صابون.مكياج.دي ماكيون.ستيك.طقم تاع المشاطي.بروتاج.لي بوند.مراية.مساسك للشعر.كريمات للوجه و اليدين والقدمين.بوشات للمكياج.دونتي فريس.فولارات للشعر.فارني للاضافر .دوسولفون
قنادر التصديرة.....
انا درت...ال****و..قندورة بالطرز النيجيري بالفتلة المشبشبة..والتونسي ايضا بالطرز النيجيري جيب ولافاست تاعو. قندورة تاع الغداء فيو غوز.والقندورة الوهراني القبايلي المودارن..... وكل قندورة بالبوشات تاعها وصباطها او صوندالها.
حوايج الخرجة ......انتي او واش تحب تلبسي
(سجادة..سيشوار... طابليات تاع الحجر ...مصحف.. المكواة... مساسك للخيمار والنقابيات .. ..عباية ....)
نتمنى نكون قدرت نعاونك

 

[رنيم الصمت]

آلاء هبة الرحمن ... ياسلام ... انا اسمي هبة الرحمن و كي توللي عندي طفلة حابة نسميها آلاء الرحمن ههه
بارك الله فيك حنونة ربي يخليك
كاين حوايج مهمين و ناسيتهم ... صحيتي خيتي

 

[21maria]

اخواتي حابة تساعدوني واش نشري كي تجي امو نشريلها كادو لاني اول مرة نشوفها واش نشريلها بعد

 

[ISMA.dz]

اخواتي حابة تساعدوني واش نشري كي تجي امو نشريلها كادو لاني اول مرة نشوفها واش نشريلها بعد

عليكم السلام

اختي اشريلها جبة شابة وبنتوفة وشال هاذوك الشابين وهي فرات

بالتوفيق​

 

[nina bonoise]

اخواتي حابة تساعدوني واش نشري كي تجي امو نشريلها كادو لاني اول مرة نشوفها واش نشريلها بعد

اشريلها قرعة راحة و خمار و بانتوفة مالملاح
لكان تعرفي قداه تلبس


انا مرت خالي جابت ل جداتي
قرعة راحة و باكي صابون و قماش تاع قندورة
و خمار ابيض
​

 

[21maria]

merciiiiiiiiiiiiiiiiiiiii lé fiiiiiiiiiilles

 

[nina bonoise]

merciiiiiiiiiiiiiiiiiiiii lé fiiiiiiiiiilles

2r1
w ki techri golilna wech chritilha

 

[جزائرية كوول]

ايييييييييه لوكان تشوفو الدرابل اللي جابتهم مرت خويا لماما

هههههههههههه
​

 

[ISMA.dz]

ايييييييييه لوكان تشوفو الدرابل اللي جابتهم مرت خويا لماما

هههههههههههه
​

هههه

وش معناتها هاذ الكلمة :shay:

 

[جزائرية كوول]

هههههههههه معناها حويج ميسواوش ماشي ملاح كامل
طلابة تحشمي تقابليها بيهم
​

 

[ISMA.dz]

هههههههههه معناها حويج ميسواوش ماشي ملاح كامل
طلابة تحشمي تقابليها بيهم
​

مشكورة على الترجمة:re_gards::re_gards:​

 

[21maria]

انا في مارس جاييي كيفاه القندوره لي نشريهالها من عرف قطيفة ولا كيفاه عججوزتي كبيرة شوية واش رايكم خيطهالها ولا لا

 

[M!ss D!or]

حبيبتي ماريا اشريلها قماش و ه تخيطو على حسابها
و اطا حابة تخيطيها نتي لازم تعرفي واش ذوقها (الكبار عاامة يحبو الرقبة مستوورة و القندورة بالخراط ...)
سقسي سلافاتك ادا تحبي
انا مديتهالها مش مخيطة
​

 

[joumane]

انا في مارس جاييي كيفاه القندوره لي نشريهالها من عرف قطيفة ولا كيفاه عججوزتي كبيرة شوية واش رايكم خيطهالها ولا لا

انا تاخدي رايي ماتخيتلهاش تول واشريلها جلابية بيضا psq قلتي كبيرا وخيمار ابيض كيما تاع الصلات كيما يقولو مستديرد و موكاسا بيضا سكسي راجلك يمدلك la pointure
وماتكثريش بزاف باه نهار ماتروحي عروس ماتحصليش فواش هتمديلهم
وربي يهنيك حبيبتي

 

[السلطانة]

مساء الخير لبنات جبتلكم معايا هادو نتمنى يعجبوكم ​

​

:luve_2:​

وهادا لقيتو في طريقي قلت نوريهولكم
واش تعجبني تفصلية كيما هك تاع فستان عرس
​

 

[samra24]

سلام شكرا ساندي على هذه الصفحة..(^_^)....و مرحبا بيا عندكم....نحوس على model قندورة فتلة.... و لي عندها أي model تا فراش ولا أي حاجة تخص تجهيزات لعروصة ماتبخلش علينا.... Merciو ربي يهنيكم و يفرحكم انشاءالله.... douce nuit pr tt le monde......bissss

 

[السلطانة]

اهلا وسهلا بجميع العرائس من جديد
عودة موفقة بإذن الله
*****************
جبتلكم هاد لي مودال عجبوني بزاف بزاف
يصلحو تخيطي كيفهم عزيزتي لعروسة
نهار الحنة كي يدخل راجلك تقصي معاه لاطارت

​

 

[naouma]

السلام عليكم وشراكم لا باس توحشناكم
اذا ممكن تساعدوني حبيت نخدم جهاز الحمام لكن ماعرفتش كامل الدوزان الي فيه
اذا ممكن تمدوهملي اذا كان بالصور واذا ما كاش ماعليش
و شكرا مسبقا

 

[ISMA.dz]

السلام عليكم وشراكم لا باس توحشناكم
اذا ممكن تساعدوني حبيت نخدم جهاز الحمام لكن ماعرفتش كامل الدوزان الي فيه
اذا ممكن تمدوهملي اذا كان بالصور واذا ما كاش ماعليش
و شكرا مسبقا

السلام عليكم

حبيبتي

راهم يتباعو تع الحمام كامل كيف كيف علاه تشري بالحاجة

تلقايهم في المحلات المخصصة للوازم العرائس

من الكرسي للكاسة للصابونة للسلة كلشي

تان يستقاملك قل

وبالتوفيق​