ماذا ستطبخين اليوم سيدتي الجزء 3

[assia dz]

اليوم غدانا كانت جاجة من صنع امي اعطوني رايكم

الله يبارك باين على الوالدة طباخة ماهرة، لازم تهزي عليها الصنعة دارين وتصورينا المرة الجاية طبخة من صنع إيديك.

 

[أم دودو]

صح غداواتكم كامل
بسومة مبروك الإشراف و الله إسمك منور باللون الأحمر
هذا غداي تاع اليوم كان عبارة عن فطاير الفلفل الحار

و هذي الطاولة كاملة

​

 

[روعة2005]

اولا مبروك الاشراف بسومة تستاهلي عن جدارة حبيبتي
ام ندى غداك يشهي هذاك ما ينفع في الصيف غير المقلي
اميرة الساحل غداك يشهي مممممممم سيرتو العجيجات
دارين غداكم ممممممممم والجاجة روعة روعة تسلم ايدين الوالدة
ام دودو الفطاير تبان لذيذة مممممممممم سيرتو كي عاد بافلفل الحار
وصحه غداكم اسيا ام منصف تسنيم روز رغد وعفوفة ودهبيتو وريم و كوكو........

 

[روز]

دارين مائدة شهي ربي يخليلكم الوالدة
أم دودو راكي كل مرة تخرجينا خرجة في الماكلة وجدينا وصفاتك لرمضان^^
فوفة على سلامتك وش راكي مع الريجيم
بسومة راني حابة نسمع عيسى كي يكون يغني هههه هادوك هوما كي يخرجو الدراري الوحي يبدا ينزل عليهم ربي يحفظولك
كوثر ماهيش تبان ان شاءالله تكون بخير لي يعرفها يسقسنا عليها

 

[روعة2005]

ام دودو تعيشي معجناتك هايلة وانا نحب المعجنات حطيلنا هذو الفطاير خبز الشيبس موضوع مع الشرح تعيشي

 

[ibtesem]

امممممممممم بام دودو حبيت نعملها هدي فطائر لاني كليتها في كافتيريا تاع الجامعة هايلة
الله اسلمك فوفو حبيبتي
روز اعطيني وقت درك نسجلهولك
نرسلك
كوثر راها عندها ضياف مسكينة الله معاها

 

[نبع اليقين]

مساء الورد يابنات واش راكم توحشتكم بزاف بزاااف وشركام معا السخانة اكيد تاع الصحراء يعرفو وجمعة مباركة على الجميع
يعطيكم الصحة على الطيابت لي تطيبو فيها بكل واحدة بإسمها بصحتكم وتسلم ايديكم
مبروك عليك الاشراف يا ابتسام تستاهلي والله
مبروك على النجاح دهبيتو عقوبة للدكتورء ان شاء الله
ألف مبروك عليكوبنت الجسور على البيام عقوبة للباك ونجات اخرى ان شاء الله
ام منصف الله يشفيلك سلفتك يارب وترجع لاباس عليها وخير من قبل
ربي يكون معام او ندى على الخدمة والوحم والسخانة
وسلامي الكبير لكل البنات

احنا تغدينا كسكس بالبرزقالة ودلاع

سلام راني ساعة على ساعة نطل عليكم
سلام

 

[أم دودو]

راني فرحانة لأن الفطاير نالت إعجابكم إن شاء الله العشية نحطها في موضوع مستقل لأني مصورة كل الخطوات و الشيبس وين نديروا نصور الخطوات برك و نحطه حتى هو في موضوع وحده
وصح غداواتكم الكل مرة أخرى
​

 

[روعة2005]

بصحتكم نبوعة رغم اني مفهمتش كسكسي ب? واش

 

[نبع اليقين]

بصحتكم نبوعة رغم اني مفهمتش كسكسي ب? واش

الله يسلمك اختي فوفة واش راكي توحشت القعدة معاكم
والله مانعرف واش تسموها انتوما هيا كيما السلق غير تجي فيالصيف بنينة علكيف
راهي ندى وابتسام ورغوة يعرفوها اكيد​

 

[ام منصف]

بصحتكم نبوعة رغم اني مفهمتش كسكسي ب? واش

هذه يعرفوها غير ناس بسكرة حتى انا اول مرة داروها هنا في دار عجوزتي تفاجات بصح تعودت عليها مع اني ما نحبهاش دايما ننقص المرقة نتاعي وحدي
بصحتك نبع اليقين
البنات غداواتكم كامل يشهو بصحتكم
غدانا اليوم عيش بالرخساس
داراتو عجوزتي معروف لبنتها ربي يشفيها
​

 

[ام منصف]

حالياً الأعضاء النشيطين الذين يشاهدون هذا الموضوع : 24 (13 عضو و 11 ضيف) ‏ام منصف, ‏أم دودو, ‏أم عبدالصمد, ‏أحلام 86, ‏ام مراس, ‏ام التوام, ‏بلادي نبغيك, ‏ibtesem, ‏s_luna, ‏كوثر الوهرانية, ‏عائشة حسان, ‏عقد اللؤلؤ, ‏wassila21

راهي بانت كوثر الوهرانية نور الموضوع والمنتدى توحشناك
​

 

[روعة2005]

بصحتكم نبوعة واحنا افتقدنا تواجدك انت وعفوفتي معانا كثير
ربي يتقبل يا ام منصف المعروف وصحة غداكم

 

[tasnim55]

السلام عليكم وشراكم انشاء الله كامل بخير
الف مبروووووووووووووك بسومة الاشراف تستاهلي كل خير اختي
اسيا مشكورة على وصفة البسبومة الله يبارك عليك
دارين يعطيها الصحة ماماك باينة طباخة ولديها فن في الطبخ مشاء الله
ام ندى بصحتكم القليان منظر يشهي بصحتكم
ام دودو الله يبارك عليك فطائر جاوك تحفة وهايلين فعلا حبيبتي معجناتك رووووعة يعطيك الصحة والبيتزا ايضا رائعة بصحتكم
اميرة الساحل غداكم رائع ويشهي بصحتكم
نبع اليقين وشراكي حنونة انشاء الله راكي بخير
ام منصف معروف مقبول انشاء الله وربي يشفي سلفتك
وسلام الى فوفة كوثر لالجيرواز عفاف ايمان 27 ....الخ بدون استثناء
​

 

[nada242008]

ااامممم على هذيك الدجاجة يعطيها الصحة ماماك يا دارين
بصح هكا ضرك نحصلو فيك كل يوم لازم تصوريلنا ههههه:shay:
ام دودو فقنا بيك وباختصاصك مختصة في المعجنات كيما قالتك روز نحتاجوك في رمضان وفي الوصفات الجديدة خرجولك روعة ماشاء الله
نبع اليقين وام منصف وفوفة واسيا وتسنيم والكل صح غداكم

 

[حاملـة المسك]

ندى بصحتك الغدا ..المقلي نحبو في الغدا كتر ...الليل يشرب الماء
دارين الدجاج جا هايل تسلم يد الوالدة
أم دودو غداك هايل و خفيف في انتظار وصفة الفطاير
نبع اليقين بصحتكم البرشقالة هنا هنا وليت نعرفها
نحبها بكترة مسقية بالكسرة و نطيبها على طريقة ناس الواد
أم منصف يجعلها صدقة مقبولة ..ربي يشافي لوستك
و المرض ما هو إلا زكاة للنفس
اهلا تسنيم صح غداكم
تحايلت مع روحي باش ندير موسكوتشو بالشكولة كما ديال كوثر
مقدرتش الكوزينة تقتل بالسخانة
صـــح قهوتكم​

 

[كوثر الوهرانية]

المنتدى منور بيك يا الغالية شريفة اله يشافي سلفتك و صدقة مقبولة ان شاء اله
توحشتكم كامل يا لبنات
مرانيش ندخل بزاف راكم عافين فريدة و الضياف كل يوم
اليوم درتلهم طعام بالمرقة و الفاكهة
بسومتي الف لف مبروك الاشراف تستاهلي يا الغالية
نقولم مشاء الله عليكم طيابكم كامل ميميم خموس على بنات بلادي

 

[ibtesem]

اكيد انتوما راكم تخمو في العشاوات انا راني نخمم في الغدا
وقيلة نعمل محكوك تاع تسنيم 55
شهاتني فيه
بادن الله في الغد راح نبدا رجيم تاع روزززز راني وارك
ونتائج تاعو راها هايلة مع نوال 80 وكوثر
معالينا غير نعملوه
الله اسلمك تسنيم اختي

 

[كوثر الوهرانية]

بسومتي بصحتك المحكوك و مدابيك تعطيني الوصفة يا حبيبتي و لا رابط الوصفة تاع الاخت تسنيم

 

[ibtesem]

تسنيم الرابط تاع المحكوك تاعك او وين حطيتي الوصفة اختي