يعني ناس vraiment ربي يهديهم و نطلب ربي يرجعهم للطريق

[EL General]

السلام عليكم و رحمة الله
(rodo salam)

خاوتي / خواتاتي
كيفكم ؟ إذا كانت كلمة ذكر الله في أفواهكم في كل وقت فأنتم بالتأكيد بخير

أما بعد

بعنوان : الناس ربي يهديهم

التوضيح :

عندها تقريب سمانة هكاك كي رحت نطلع في شهادة الميلاد لخويا قالي روح جيبهالي من البلدية طبعا المهم نضت على 6 تع الصباح بارسكو الغاشي ياسر ماتلقاش الدالة كي وصلت جوايه 7:30 فتحوا البلدية و دخلنا مي دوماج في النوضة هاديك تع بكري و لقيت الغاشي قدامي الله غالب المهم حطيت الكارني ستنينا شوي وصلت 08:45 تقريبا ناضو 3 دي جان يعيطو على واحد المرا كانت تخدم في القيشي تع مواليد : 1980 - 1989 بداو يعيطو عليها و يقولوها هيا برك وقتاش برك تعطونا الوراقي خلي نروحوا نروحو ... زادو شويا ناضو و بداو يعيطو عليها من جديد و على أصحاب البلدية و يطيحو في الهدرة و السبان ... على فكرة لي جان هادوما نعرفهم تع مشاكل و تع أمور ماشي مليحة الله لا يعرفني بيهم ..

يا ناس اللمة هادو ماجاوش باش يطلعوا الأوراق و لا حاجة هادو جاو على جال المشاكل و البلاد راهي معمرة بيهم الله يبارك ينوضو الصباح يروحو للبلدية و يجيو يعاركوا الناس و الغاشي شوفوا ربي سبحانو اللي محتاج الورقة تلقاه ساكت و هوما لي جايين يلعبوا في البلديات تلقاهم يعيطو ... داروها شحال من مرة ساعات يسرقوا الناس داخل البلديات داك النهار سرقوا واحد الساك تع مرا و هربوا

حبيت نقولكم هادو ماجاوش على جال حاجتهم من البلدية لكن جاو على جال العراك و المشاكل و تع شوفونا يا ناس

نقول ربي يهديهم و يوقعهم للطريق المستقيم
آمين يا رب

هدا ماكان _o:

سلام
​

 

[Estrella]

كيما قلت لبلاد راهي معمرة بهاد النوع
ربي يبعدو علينا
يحوسو غير يتبلاو فالناس زعما زعما
ربي يهديهم ويبعدهم علينا
صحيت خويا ...​

 

[kojak]

والبلدية تاعنا الله يبارك؟؟؟؟؟؟؟
كان ماطلع كواغط راسك يشيب ويطيب تقول راح يعطوك الفيزاا​

 

[olympo]

اللهــ يهدي..,
و الواحد اللي يطيحـــ الهدرة للناس ماشـــ متربيـــ ! ...,
و اما اذا راجل يطيحـــ الهدرة لمرأة خاصة فهنا غيــ يروحــ يدفنـــ روحهـــ...,
شكرا على الموضوعـــ و الله يهدي!...,

 

[Iman89]

وعليكم السلام خويا مارادونا
واش نقولك انا في رايي الظاهرة هادي تع الغاشي راهي بارتو تجي تجبد حاجة يلزملك شهر وانت طالع هابط السمانة اللي فاتت كنت عندكم بحكم الدراسة في تبسة والله 3ايام وانا طالعة هابطة على لابوست باه نجبد دراهم هكاك واللي يخدمو تقول يمدو فيها من جيوبهم وبالسيف مماهزيت مع هاداك الغاشي
انا نشوف بلي ناقصهم شوية تنظيم برك ووالغاشي مايووليش هاكا كل وتتنقص العركات...ربي يجيب الخير وشكرا على الطرح

 

[بنـ MaPa ـت]

وعليكم السلاام

انا راني نشوف لي يستهلو كل شي هادوك الخدامين تع البلدية ديفوا يتمنكرو وحد المنكر والله تقول نحطلهم المواس في رقابيهم خليهم نستعرف بيهم الله لا تربحهم....

مرسي على الموضوع
​

 

[aneshabib]

السلام عليكم كيراكم غاية يا خويا واش بغيتني نقولك مانيش عارف البروبلام من الادارة نتاعنا ولا الغاشي انا ما فهمتش فريمو كاين وحدين يبغيو المشاكل و الفوضى مي البلدية نتاعنا تاني يتمنكروا بزاف انا صراتلي شحال من خطرة شكرا على الموضوع

 

[@نور البيضية@]

الله يهدي ما خلق
وهذي الحوايج راهي تصرى بزاااف في البلايص كيما البلدية والسبيطار ايه السبيطار فيه المرضى ولعياط والمشاكل دايرة حالة
الله يهديهم انشاء الله

 

[DARINE05]

ربي يهدي الشعب في بلاد ميكيييييييييييييييييييي

 

[همس الوُرود]

نقول أنا ربي يهدي ما خلق وخلاص

 

[امير الجزائر]

البلدية تاعنا الله يبارك احنا منضما

 

[w@hiba2010]

وعليكم السلام

هادهي
مشاكل لاشان تع البلدية
زادو همهم تاني
ربي يهديهم

 

[EL General]

ههههه مايطولوش الجماعة و يحكموهم

مرسي عليكم كامل

تحية و سلام
​

 

[07 _H@yThm]

ياخو عندهم لحق وكان حرقوها ع روسهم
انا ختي باش نخرجلها 9كواغطها باش تعدي لبيام
والله غير 4 شهور وحنا نجرو
​

 

[amina_b]

وعليكم والسلام ورجمة الله وبركاته
خويا ديgو هذ الظاهرة نتاع الغاشي راي بار تو
الي ميتعبش في ليبابي هما لي عندهم المعرف
خويا الدولة بهذ النظام تشجع في العباد الي كيما هك
يعني كان جاو يخدموا خدمتهم الغاشي ميكونش ابا عباد كي هذوا
مينجموش يسرقوا ولا يديروا طوايش في وسط زوج ولا ثلاث عباد
وربي يهدينا
المهم شكرا علي الطرح
وبارك الله فيك
​

 

[EL General]

مرسي بور فو باصاج خويا هيثم مشاركتك جميلة

ايضا امينة .... شكرا لك

تحية و سلام
​

 

[hannsg]

هو يعني كي تجي تشوف التعسف الاداري و البيروقراطية ثاني يخرج العبد من عقله
مي الواحد طبعا يلزم يريكلامي على حقو و هذا شيئ من حقه ...لكن يريكلامي بأدب يعني يعمل بأصله و تربيته