الدروس الخصوصية.......... هل اصبحت موضة او الزام

[βǻŋǾừŧά ₡ǖŦё]

اهلا بجميع ناس اللمة
اليوم حبيت نطرح موضوع يشمل الذين يجتازون الشهادات
بانواعها.زعما حنا يقولو احنا لازم نديو بمعدل مليح وكلشي
وامبعد تلقى وحدا دخلت تتبعها المتوسطة ولا الثانوية كامل
انا في رايي عادت موضة وزيد تاع الbem وbacام يديرولهم
دروس الدعم فالمؤسسة صدق او لا تصدق نعطيكم مثال
يقراو معايا 05 بنات ديما مع بعضاهم (زعما برك)دخلت الاولى
تقرا دروس خصوصية النهار اللي وراح نلقاهم كامل يقراو
ايا قعدنا شويا جا المراقب للقسم قاللنا تديرو دروس الدعم ايا
سجلو كامل تسمى عادو يقراو مالاحد للخميس وزيد دروس الدعم
صباح السبت والمساء دروس خصوصية حطو في بالكم ماكانش
حتى وقت للراحة ولله هذا ماشي قرايا هذي فيها حاجة اخرى
وكي نقولوللهم علابالك واش يقولولي"احنا عندنا الbem"
واش نقولهم اخوتي احنا كامل نعقبو ماشي غير انتي تقولي انتي انتي
وانا انا
خلينا منهم دركا يقراو في 4 بلايص ولله فور بزاف يعني تقول رايحين يعودو اطباء وهما مايزيدوش على12 حبيت نعرف رايكم
:re_gards::re_gards::re_gards::re_gards:​

 

[القطة الزهرية]

سلالالالالالالام
اختي هدي ولات لامود علابالي ام يشتيو يفوخو ويزوخو هدا مكان ولا يشتيو يدورو بزاف ومايقعدوش في الدار مدامك يجيبو ب12 وبلاك كي تسقسيهم تلقايهم زيرو فيها ان واش يروحو يديرو امالا ......ربي يهديهم ويهدينا امين اجمعين

 

[adel-mz]

سلام
انا 2001 خرجت من الثانوي
كانت بالنظام القديم بصح درك كل يوم غير الجديد
جاب لي ربي ماشي الدروس الخصوصية هي تخليه يقرى ولا خاصاتو
التلميذ يخصو وسائل واحتياجات اخرى ومعروفة
كي تتوفرلو تلقاي النتيجة ،يالوكان يقرى ساعة في الاسبوع
مخصوش تكسار الراس .
التلميذ يقرا في الضيق ،ني مطعم ني ترونسبور ني والووووو
حبوه يخرج عالم هههههه
بارك الله فيك

​

 

[la_safa]

ســــــلآآآآم

والله انا نشوف فيهآ لآمود بركـ انا في حيآتي جامي درت هاذي الدروس الخصوصية
نقرى في الدار و زيد عندي الوسائل الكل متوفرة الحمد لله يعني نقدر نعاون روحي
اما لي ماعندهمش و زيد صعاب في الفهم اوكي
مي هاذي كانت بكري ذرك ولات مود بركـ

مشكوووووووورة خيتووووو ... /
​

 

[ماكانش]

يعطيك الصحة شيما على الموضوع الباهي
انا نحير ثاني
خويا لكبير ولدو يقرا الرابعة إبتدائي يديرلو فليكور ؟؟؟
كيما قلتي موضة ​

 

[إنسانة ما]

بارك الله فيك أختي شيماء
كنت نفكر نعمل موضوع على هذا الأمر لكنك سبقتيني ربي يحفظك
الأمر فعلاً مُحيِّر، الآن حتى سنة ثانية ابتدائية أولياءهم يجريو على لي كور
والله أنا درست من الإبتدائي حتى الثانوي وعمري ما درت لي كور والحمد لله جبت الباك، ربما زماننا غير هذا الزمان.
المشكل أظن في الأولياء والمعلمين، الأولياء تكاسلو على تدريس أولادهم مع أن الأغلبية الآن متعلمين عكس أولياءنا حنا، والمشكل أيضا في المعلمين والأساتذة حيث أنهم طمعوا في مال الدروس الخصوصية وشافوا أن فيه فائدة أكثر.
نحكي عن تجربة، الآن أغلب جيراني يطلبو منِّي تدريس أولادهم الدروس الخصوصية ويترجوني.
التلميذ كره من الدراسة لهاذ الأسباب
ربي يقدر الخير ويحفظك أختي

​

 

[shahrazad]

سلام عليكم
عندك الحق ختي
انا مانيش ضد الدروس الخصوصية تساعد
لكن بشرط ماشي تكون فكل المواد وبتكسال
الي عندو نقص في مادة اساسية ماشي عييب يزيد يديير لي كور
لكن الي محيرني تاع الابتدائي
وتاني الي يديرو لي كور فقاع المواد
هدا كلو من الوالديين
الوالديين لازم مايرضخوش لطلبات ابنائهم
ماكاش الي يكره ولادو لكن لازم يعلموهم التعب باش يخرجو رجال ونسا
لي كور احيانا هي دمار للتلميذ سيرتو الي يمدولهم مواضيع الامتحانات وهادي معروفة بزاف وتكون حتى بعلم الوالدين !
والله حالة التعليم مزرية في بلادنا
بزااف
صحييت
​

 

[07 _H@yThm]

مع كل اسى و اسف وحزن
اصبحت موده

 

[عامر لمداوي]

ربي ينجحهم المهم يقراو
موضوع شباب والاعضاء بردودهم كفو وفو

 

[إيمان قلب]

صح راهي ولات موضة , لخاطر بكري ماكانوش يديرو لي كور ويقراو على ضو الشمعة
والله يبارك راهم اطارات , ودوكا تلقايه كل شئ متوفرالو يزيد الدروس الخصوصية والراس فارغ
انا يبانلي يديروهم الاساتذة على جال الدراهم , والوالدين لخاطر زوخ وفوخ , والذراري " نلقاو النسبة الكبيرة للبنات يديرو لي كور " باش يهربو من الدار في حياتي مادرتش لي كور ولا حضرت دروس الدعم لظروف
واللي تقتلني وماتخليش فيا توع الابتدائي
العام اللي فات فوت خويا الخامسة سقساتني واحد الاستاذة اذا رانى نديرولو لي كور وضحكت علينا وقالتلنا باللي حاسدينو وباخلينو , قلتلها دروس السنة خامسة قادرة غير يما ولا انا نفهمهم فيه , كي خرجت الرزيلتا بنتها نجحت بالإنقاذ وهو جاب 8
يعطيك الصحة اختي على الموضوع​

 

[إنسانة ما]

صح راهي ولات موضة , لخاطر بكري ماكانوش يديرو لي كور ويقراو على ضو الشمعة
والله يبارك راهم اطارات , ودوكا تلقايه كل شئ متوفرالو يزيد الدروس الخصوصية والراس فارغ
انا يبانلي يديروهم الاساتذة على جال الدراهم , والوالدين لخاطر زوخ وفوخ , والذراري " نلقاو النسبة الكبيرة للبنات يديرو لي كور " باش يهربو من الدار في حياتي مادرتش لي كور ولا حضرت دروس الدعم لظروف
واللي تقتلني وماتخليش فيا توع الابتدائي
العام اللي فات فوت خويا الخامسة سقساتني واحد الاستاذة اذا رانى نديرولو لي كور وضحكت علينا وقالتلنا باللي حاسدينو وباخلينو , قلتلها دروس السنة خامسة قادرة غير يما ولا انا نفهمهم فيه , كي خرجت الرزيلتا بنتها نجحت بالإنقاذ وهو جاب 8
يعطيك الصحة اختي على الموضوع​

ربي يحفظك اختي إيمان على كلامك المليح
حبيت نعلق على نقطة الوالدين، بالإضافة إلى الفوخ والزوخ الوالدين الآن ماراهمش لاهيين لأولادهم، الأب مع الشغل والأم إما مع الخدمة وإلا مع مناسباتها وخرجاتها ومسلسلاتها ووو من المشاغل وأولادها آخر همها.
فتقولك خليه يروح يقرا بالصوارد ونهني روحي.
والله مانعرف وين رانا واصلين بهاذ العقلية، ربي يقدر الخير

​

 

[AHLEM1992]

بويسك كثرولهم الدروس و الاستاذ ماعادش يقدر يقري و يفهم كلشي
و هدا الجيل ما يخدمش راسو كامل
يمدولو تمرين يروح للنت يحوس عليه يلقاه محلول
بليكور و يا ربي يقراو و يجيبو دي بونوت
راني في الجامعة و كاين الي يديرو دروس خصوصية
ربي ينجحهم يقراو برك و يفرحو والديهم
​