ضرك راك معوق .....ما نقدرش نكمل معاك

[nihade.off]

السلام عليكم و رحمة الله تعالى و بركاته
-اليوم كنت نقرا في الجريدة لقيت واحد الخبر على واحد معوق و يحوس على وحدة تسترو و يسترها و تتقبلو كيما راه .....الخ المهم تفكرت واحد القصة صرات قبل عامين ..... هذو زوج مخطوبين قدر الله انو الرجل يصرالو حادث و يقطعولوا رجيله في زوج المسكين كان في همو زادت خطيبتو قاتلو نفسخو الخطبة و صح و تفرقوا ....انا الصح كي سمعت طاح مني النص و جاني في بالي بزاف افكار
هل هذي انانية مطلقة ؟ و لا خمت فيه و قالت بلي راح يقعد حياتو كامل و هوا يحس في روحو عبء عليها و تزيد حالتو النفسية ؟ و لا حست بلي مستحيل تتفاهم معاه و هوا في هذي الحالة ؟؟
حاولت نحط روحي في الموقف نتاعهم بصح ما يحس بالجمرة غير اللي كواتو ....كامل نقولو مستحيل نخليه بصح كي تلحق للصح كلش يتبدل ....
المهم المساحة مفتوحة للتعبير عن ارائكم القيمة .......................و بصحتهم اللي عندهم الثلج ...

 

[ماكانش]

أهلا بيك ختي
واحد مايقدر يلومها
واش صار عليها تتزوج بواحد بلا رجلين ؟؟؟
الله غالب تعوق طلبت فسخ الخطوبة عادي
​

 

[الظل الطويل]

كيــــما قلتي .. ما يحس بالجمرة غير لي عافسها
و الدنيـــا صعيبة نـظن بلي ردة فعل كيما هذي
نقول عليها مش غالطة اكثر
ما نقول عليها منطقية
لـأنها دارت لحساب مستقبلها و تخاف
حتى لوكان تصبر معاه توصل
وقت لي ينفذ فيه الصبر
ـالله غالب عليه و عليها و هو لـازم
يرضى بهاذ الشيء لـأنوا واقع ..
و ديجا فكرتينا في قصيدة نزار قباني :


قالت لهُ...

أتحبني وأنا ضريرة ...

وفي الدُّنيا بناتُ كثيرة ...

الحلوةُ و الجميلةُ و المثيرة ...

ما أنت إلا بمجنون ...

أو مشفقٌ على عمياء العيون ...

و مبعد كي مدلها ـاغلى
ما يملكـ سمحت فيه
مالـا ـالواحد دائما يخلي العقل
يتحكم في القلب
​

 

[مرام التيبازية]

سلام خيتو وبارك الله فيك على الموضوع..
ايه خيتو واحد ميقدر يلومها وكل واحد كيفاه يفهمها بالاك متقدرش تتزوج معاه كي تعوق تقول مانيش مريضة باه نخدموا وبالاك ..... كاين حاجات بزاف تقدر تتطرحهم على نفسها...
المهم خيتو رانا نشوف درك العجب.....
وصح الثلج طاح بصح في الجبل....

 

[الخيزران]

فيا ولا فيه
​

 

[nawal 88]

كل واحد وكيفاش يشوك لشريك حياتو
بكل صراحة زعما كون جات هي يقبل يكمل معاها مستحييييييييييل
حنا عندنا وحدة تحرقت لغدوة عرسها يعني مرتو وغدوة يديها لدارو موجدين عرسهم وكل شي بطل عليها خاطر تحرقت وماش بزاف غير شوية وماقبلهاش
ربي يستر ​

 

[المرابط بن تاشفين]

السلام عليم
صح لوكان قبلت العشرة معاه كانت يبان الخيار تعها حاجة راقية
لكن رفضها لا يلومها فيه أحد حتى لو كانت متزوجة فكيف بها وهي خطيبة
​

 

[آمِيْرَتُه]

السلام عليك
كل واحد و كيفاش يخمم انا عن نفسي منفسخش الخطوبة مهما يكون
​

 

[Ice Queen]

كل واحد والتخمام تاعو لكن هادا من المفروض انو قبل ما تخليه هي ما يكونش اناني ويخليها باش ما يغبنهاش معاه

وفي النهاية ان شاء الله ما يدوقها حتى لمومن لانها صعيبة بزاف عليها وعليه.
​

 

[محبة الورد]

اولا السلام علييكم اختي
ثانيا فيما يخص موضوعك كل واحد وتخمامو اختي
يعني كمثال فقط انت لوكان يجي واحد يخطبك ميخدمش برك ماراحش تقبلي ووالديك تاني
يعني انا لوكان جييت في بلاصتها منلومهاش بيسك هي راهي تشوف للمستقبل تحا
وحتى لوكان هو في بلاصتها زعما رايح يقبل بيها
انا من راي منلومهاش وعندها الحق ​

 

[hiba14]

السلام عليكم
شوفي اختي هي اللي بعيد على الزازا دايمن قايم و يبداو كون انا و الله ما نسمح بصح اي وحدة تحط روحها في بلاصت الشيرة هادي للحظة و الله غي واعرة رانا قاع شيرات و علابالنا شاكاين مازلنا باغيات نعيشو دايرين في بالنا هاداك الحلم تاع المصاروة يخرجني و يقلشني و هو طاوس و انا غزالو نجيبو ولد الطاوس ماشي ساهلة باش تضحي هاد التضحية و ادا ضحاة يعني راها حاجة و سايي بصح هاد لايعني كي خلاتو ماهيش ناس ملاح لا حق و الحق عمرو ما يزعف و نقلبو الاية لوكان هي باغي يساكريفي و الله غي يكدبو عليك من دقيقتها اديو يا المعوقة و نورمال و زيدي راها غي مخطوبة
بالنسبة ليا كون نكونو متزوجين و بيناتنا دراري و عشرة الشك الكبير ما نخليهش بصح مخطوبين و الله ما علابالي بالاك نكمل و بالاك نخليه الله غالب هاد قلب و مستقبل

علابالي كترت عليك الهدرة بصح بغيت تاني نحكيلك على صحبتي تاني هاك كانت مخطوبة و دار اكسيدو ن و قلعولو كرعيه هي مامبا ماراحتش تشوفو و وحد النهار كونا مجمعات في لاسيتي عيطتلها و قالتها اسامة مات هي اللي خسرتها الله يرحمو و نورمال هي صح تفكريلو نهار زين برك
صحيتي على الموضوع اللي يخوف ههههههههههههههه

 

[*ليديا*]

السلام عليكم ورحمة الله وبركاته
ما نقدروش نلوموها اختي
خاصة وانهم في فترة خطوبة
وكان جات متزوجة وطلبت الطلاق تكون غالطة
مي في هذي الحالة من حقها
يعطيك الصحة
​

 

[nihade.off]

اسمحولي و الله هادا وين جيت الردود نتاعكم كانت صريحة و خالية من التصنع الله يبارك بصح لاحظت بلي نتوما كامل خممتو في الطفلة و الراجل مشكين واش راح يصير فيه و الله شوية الصبر اللي عندو تكمل عليها هيا هيا صح صعيبة بزاف بصح هذي دنيا فيها الحلو و المر .....
معلومة + الراجل تزوج العام اللي فات ....​

 

[حوفأ]

سلام عليكم مشكور أختي على طرح هذه الموضوع ...........وقيما يقولوا ما يحس بالجمرة غير اللي كواتو

 

[Riyad Barça]

والله ماني عارف ..القلب يتقطع من هذا الحكاية ربي يسترنا ويعفو علينا ويزيدنا صحة على صحة..
واش راح نقول ربي معاه ومع كل صابر ربي..
شكرا ..

 

[MIMY22]

بالنسبة ليا ادى كان انسان صالح ويعرف ربي والله غير نيدروا في عينيا ونغلق عليه
مايهمنيش ادا طاروا رجليه ولا يديه اما بالنسبة للانسانة لي راكي تهدري عليها بلاك شافت روحها ماتقدرلوش راح تعيا معاه بك وهاد شي من حقها تفسخ الخطوبة
مشكورة اختي
​

 

[*مواطن بسيط*]

اهلا اختي
تبالي نورمال يعني تقدر تفسخ الخطوبة من حقها
حسبت للمستقبل لقات روحا مش راح يخرجها هد الطريق

 

[Eva dz]

صحا اختي راكي تفكري في الراجل مسكين و راه تزوج شتي

مي تاني حطي روحك في بلاصة الطفلة عاد صغيرة وووووو تاني عارفة موش ساهلة عليه هوا تاني و عارفاتك واش راكي تقولي

مي واحد يفكر بمنطق موش تقولي انانية و لكن هادو في فترة الخطوبة برك لربما انا و لو كنت مكانها نفسخ الخطوبة و ربما ما نفسخش القلب و واش يهوى و تاني قكري كون هيا لي تقطعو رجليها واش راح يقبل بيها ؟؟؟؟؟ ما شكيتش اختي

نزيد نقولك يا اختي هيا من حقها تفسخ مادامو خطيبها برك مي موش حق عليها لو كان زوجها تمة هادي حاجة اخرى



سلام

 

[هبة نور]

مشكورة على موووووووووضوع
صح ما يحس بالجمرة غير لكواة

 

[SETIF étudiant]

السلام عليكم وجعتيلي قلبي برك والله يكون في عون هاد السيد برك
ان دل على هذا فانما يدل على ان هاد المراة ما خيراتوش على اساس النية على اساس انو رجل ولا حول ولا قوة الا بالله ... بيها استنتجت علاش نسبة الطلاق في بلادنا كثرت لي تطلق كثر من لي تتزوج ? ماشي كان نوات تسترو خير باش يسترها ربي في الاخرة ...
ياو حنا لي معوقين... والحمد لله اعاقتو ما جاتش في راسو ولا في لسانو كان اني معاها مي في رجليه لالا ماشي هكدا ...وممكن ربي برك ابتلاه وشافو بلي هاد المراة ما تستاهلوش ورايح يعوضو بخير منها علاش لالا
ونزيدلك الانسان ما يديرش في بالو برك وما يدريش لايكملها على خير في هاد الحياة كيما هاد الرجل كان لاباس بيه بين عشية وضحاها صبح في حالة اخرى .....
والله نعرف شحال من ناس معوقين ذوو دين واخلاق خير وخير من ناس صحاح كاملين .......