بيوت شعرية شعبية جزائرية عن الأم

Riyad Barça

:: عضو مُشارك ::
إنضم
24 جانفي 2012
المشاركات
132
نقاط التفاعل
1
النقاط
7
شعر شعبي جزائري عن الأم
بـــســـم الله نــبـــــدا كــــلامي ونظم =والصلاة عــــلى الـــنـــبي طـه العدنان
محمد شفيعنا يـــــــــــــــــوم المعزم =وصــحــــــــــابو والآل رجـال ونسوان
يـــــــــــــــــا رب ياخالقي وانت تعلم =ســــهـــل لي لــــكلام وف لـي لوزان
هــــــــــــــــذي لقصيدة نظمها ع الأم =بلا كش ترضى علي يـــــــــــــا حنان
شـكـــــــــــــــــون عليها ينجم يتكلم=ولو كان يعـــــود فـــــــي الهدره فنان
ويــذا قلت عـلـيـــــــــــــك راني نتعلم=حــــــــــــاكم غير الشط في بحر الحنان
من بعد اما يـــــــــــــــاك راه العز حرم=لا قــيمة للمـــــال ولا للسلطــــــــان
حملتني تـــسعـــا وهــــــــــــي تتألم=تــــــــرجا في وينتا لـلــــنــاس انبان
وانـــايــــا محفوظ فــــــــي قصر مروم =نتغدى مـــــــــن دمها مــــــاني حيران
كي نتخبط في حــــــــشــــــــاها تتعدم=طعم الموت يــــــــــزورها فــي غير اوان
حسبت عـــــــــــــــاشورا وزادت محرم =فــــــــــــاتو تسع شهور كامل يا لحسان
يــــــــــــــــا معتاه نهار عداتو في الغم =مـــــا ضحكت حتان سلكت فـــــــي لمان
الحمد لله رب كـــــــــــــــــــي سلم=أعوذ بالله مــــــــــــــــن شر الشيطان
بسم الله نعطيك مـــــــــــــن صدري تجقم=حقك يـــــــــــــــا ولدي مقدر بالميزان
مـــــــن عند الإلـــــــــه مخدوم معقم=مــــــــــــــا خدمو لا روس ولا ماريكان
تفرح بـــــــي كــــــــــي نولي نتبسم =يـــــــا ربي تحميه مـــن شـــــر المعيان
وكبرت ووليت في أمــــــــــــــري نحكم =مـــــــــــــــا ينقصني مال لا صحة لبدان
وبــــــــــــــــدا ذاك الحب فينا يترسم=مـــــــــا يدخل بيناتنا حتى فـــتــــــــــان
ذرك مـــــــا ولات كي ظـل المرسم =عـــــــــــوض الشمس اللي تـلاحت للمسيان
شـــــاب الراس طاحت الــــــركبه والفـــم =ســـــــــــــــافر ذاك القد والـزين الفتان
عـــــــــــــادت كي ليشير ديـــما تتظلم =حست بــــــــــــالحقرا وحست بــالنسيان
يــــــــــــــاميمه نفديك بــالروح وبالدم =نخضعلك جــــــهــــــار مــن بعد الرحـمن
والله مـــــــــــــا ننساك والخالـــق يعلم =ولا نسمح فيك يــــــــــــــا مـومو لعيان
واللي لاح اميمتو راهـــــو ظـــــــــــالم =يخدم يردم مــــــــايعليش البنــــــــيــان
يـــــــــــــــا ولدي نوصيك لا كانك تفهم=عــــــــــاشر والديك بــــــــــالبر ولحسان
لا تعصي باباك وتهلا فـــــــــــــــي الأم=حافظ عنها كــــــــــي الــــوردة وسط جنان
بـــــــــــــــلا كش يغويك شيطانك تندم=تــــــــــــــا خذ فيها راي من مخزي شيطان
تدفنها حيه وهــــــــــــــــــي تتكلم=ترميها فــــــــــــــــي دار بين أربع حيطان
ثم هــــــــــــــــــذا راي مولاه يخمم=يحسب روحـــو دار حسنه في الميـــزان
واقرا للـــــرسول قـــولو يــــــــا مسلم =تــحـــت اقــــــــدام امــاتــا جنة رضـوان
واحذر مــــــــــن مسمارها راه يـــــعدم =ويخلي مــــــــــــــــــولاه ضحكه للعديان
نختم هـــــــــــــــذا القول والسامع يحكم=والفـــــاهم مـــاهــوش محـــتــــاج للبيان


 
ربي يحفظ امهاتنا و يرضاو علينا و يدخلهم الجنة انشاء الله.تحياتي ايها المحترم
 
يــــــــــــــاميمه نفديك بــالروح وبالدم =نخضعلك جــــــهــــــار مــن بعد الرحـمن
والله مـــــــــــــا ننساك والخالـــق يعلم =ولا نسمح فيك يــــــــــــــا مـومو لعيان


ياه والله شيء عظيم انك تسمع كلمة امي
والله يقدرنا باش نرجو ولو شيء قليل ملي عملوه لينا

وجزاك الله خيرا على طرحك المميز للموضوع
 
يــــــــــــــاميمه نفديك بــالروح وبالدم =نخضعلك جــــــهــــــار مــن بعد الرحـمن
والله مـــــــــــــا ننساك والخالـــق يعلم =ولا نسمح فيك يــــــــــــــا مـومو لعيان


ياه والله شيء عظيم انك تسمع كلمة امي
والله يقدرنا باش نرجو ولو شيء قليل ملي عملوه لينا

وجزاك الله خيرا على طرحك المميز للموضوع

جزاك الله ألف خير على المتابعة ومواضيعي تسعد بمرورك إليها
ربي يحفظ امهاتنا و يرضاو علينا و يدخلهم الجنة انشاء الله.تحياتي ايها المحترم

شكرا أختي المحترمة ربي مايحرمنيش منك
 
ربي يحفظ امهاتنا و يرضاو علينا و يدخلهم الجنة انشاء الله.تحياتي ايها المحترم
 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top