وعلاش نحقرو المسلسلات

[زئبق]

حبيت نطرح عليكم سؤال ونتمنى الاجابة منكم بلا زعاف
راكم عارفين بلي في هادي الفترة دخلو علينا مسلسلات تركية وراني معاكم بلي دارت فساد كبير ولكن المجتمع ديالنا مرقها الى وحدة ضيعة قرايتها قلت بلي المسلسلات هي السبب ولى واحدة طلقة المسلسلات ولا واحد اعشق وحدة تقول المسلسلات فسدة شبابنا ولبنات عشقو في مهند وتزيدو شوية تقولو لوكان ماشي المسلسلات التركية الشباب ميتعطاش المخدرات
دك بلاك نغدوهم على الفساد الي داروه المجتمع عاقل كيما تعنا ويحبسو التمثيل وحنا خداعين بسك خدعنا المكسكيين وبدلناهم بشوية تراك
بينتنا شوكون فور فلفساد المسلسلات التركية ولا المكسيكية ولا المجتمع اتعنا
​

 

[ماكانش]

أهلا بيك زئبق
يعطيك الصحة على موضوعك والفكرة الباهية تاعك
هوا واحد ما ينكر الضرر ألي داراتو المسلسلات في المجتمع تاعنا
يعني المسلسلات هذوك يحلو العينين على الشر والإنحلال الأخلاقي والخيانات وو
يشجعو فيهم بطرق مباشرة وغير مباشرة
وفي نفس الوقت كيما قلتي مانمسحوش كلش فيهم

يعطيك الصحة وفي إنتظار أراء الباقين​

 

[sarah staifia]

اهلا بيك اختي زئبق
كيما قالك خويا سفيان هاذو لمسلسلات عندهم دور كبير في فساد لمجتمع تاعنا اصلا اكل متشابهين و يدورو برك في نفس الموضوع الا وهو خيانة الزوج لزوجته او العكس و من هنا يبداو لبنات يفكرو و يطلعو و يهبطو
+ منلوموش لمسلسلات برك حتى مجتمعنا مهوش ناقص و جنة في طبسي
يعطيك الصحة على الموضوع لباهي

 

[sali-sali]

سلام عليكم
المسلسلات سبب من اسباب الفساد ماشي كامل المسؤولية عليهم
الاعلام بصفة عامة لعب دور كبير
وتاني غياب المسؤلية وحسن التصرف لدى الشباب
نعتابرو المسلسلات التركية سلاح دوحدين كيما يقولو
من جيهة احيانا يسلط الضوء على ظواهر موجودة في المجتمع ومن جيهة اخرى يبدي فساد كبير
شكرا على الموضوع
​

 

[إنسانة ما]

شوفي أختي المسلسلات عندها ضرر كبير أكيد ولكن حنا نورمالمو ناس واعيين ومسلمين ونعرفو نميزو بين الصح والغالط، هاذي المسلسلات لو كان ما لقاتش الأرض خصبة ما تنتشرش هكذا وما تضرش هكذا. حنا أرض خصبة والسبب هو البعد على الدين، الناس عايشة في غفلة كبيرة لهذا أثرت عليها المسلسلات.
برأيي المسلسلات ضرت الناس من جهة التبرج والسفور، البنات كامل ولو يجبو يقلدو الممثلة الفلانية ويلبسو كيما الممثلة العلانية ويديرو شعرهم كيفها ووو.
وحاجة أخرى كاين بعض البنات يعيشو هاذ المسلسلات صح حتى يظنو انها واقع ويحبو يعيشو هكاك خصوصا من ناحية الرومانسية الزائدة تع الاتراك، فالطفلة تظن انها لما تتزوج رح تعيش نفس الرومانسية ونسات أنو هذاك راهو تمثيل ومش واقع، ولما تعيش الواقع تلقاه مخالف تماما فتنصدم، وتبدا تخلق في المشاطل لروحها.
وكاين بضع الشباب ثاني يحبو لما يتزوجو يلقاو زوجاتهم في نفس جمال الممثلة الفلانية ونفس الرقة ونفس الأحاسيس ونسااااااااااو أنهم في الجزاااااااااااااااااااااائر.
فاللوم مش على المسلسلات وحدها وإنما اللوم علينا حنا لي رانا مصدقين هاذيك المسلسلات وخليناها تدخل في أدق تفاصيل حياتنا وهذا كله لأنه بعاااااااااااد على الدين.
هذا رأيي والله أعلم
بارك الله فيكِ
:re_gards:
​

 

[Jeune Sghir Mc]

انا لي نتحكم فالتلفزيون ماشي هو لي يتحكم فيا
صافي كل واحد يعرف واش يتفرج باه مايروحش معاهم
وانا عندي راس الفووت وقص



صحيتووو
​

 

[محبة الورد]

السلام عليكم اختي
اولا اان نظن ماشي واش يصرى فالمجتمع تعنا نحصلوا فالمسلسلات يعني واحد يتعاطى مخدرات يقولك المسلسلات ولا يدير كاش عفسة يحصلها فالمسلسل .انا من رايي هاذي مسالة ايمان ..اذا كان ايمانك قوي ماراحش طبق واش يديروه فالمسلسلات
وذوكا رانا كامل كبار ختي وواعيين يعني لازم نتحملوا شوية مسؤولية
وتبقى المسلسلات تؤثر بنسبة ضئيلة جدا فقط اختي
تقبلي مروري المتواضع كانت معك محبة الورد من وراء ليكرون ههه​

 

[JIJEL88]

نشكروك ختي على الموضوع تاعك
انا حسب رايي المتواضع نظن بلي المسلسلات ماراهيش تأثر بصورة كبيرة على
سلوكات الافراد ومالزمش نردو سوء السلوك والاخلاق للمسلسلات فهي مهما
كان موضوعها او الجانب الدي تتطرق اليه تبقى دوما مجرد سناريهات غير واقعية
تبقى في دهن المتابع فترة منتهية من الزمن.
كما ان تاثيرها في الغالب يكون على البنات لانهم اكثر متابعة لها
اما الذكور يا الاخت قليل وين تجد واحد يتبع مسلسل مهند وما تابع
ولهدا مالزمش يرد الواحد سبب الفشل او النقص في التربية او جانب آخر للمسلسلات
وشكرا​

 

[زئبق]

انا طرحت هاد الموضوع بسك شفة بلي نشرنا حويجنا كامل على المسلسلات و انا نتحكم في واش نشوف
ومقلناش شوفو ولا خلصو

 

[أم عبد الله]

السلام عليكم

شوفي اختي راكي اتقولي ماشي المسلسلات ولا التركية ماشي كيما المكسيكية انا نقولك كامل كيف كيف والمشكل في التركية هي اتشوفيهم يصلو ويصومو وتقولي مسلمين كيما حنا ومن بعد اتشوفي التصرفات اجنبية مئة بالمئة يعني هاذي حتى فلام مصر فان دارت الباطل
كي تشوفي فلانة في بيت فلان وهي ماشي مرتو ولا اليمات تخبي ع بنتها وهي ادير في الحرام
رانا نعلمو فيهم ثقافة اجنبية بلا مانجيبو خبر
تقبلي مروري سلام

 

[ErdoGan]

نعيب زماننا والعيب فينا وما لزماننا عيب سوانا
​

 

[أبو هريرة موسى المسيلي]

الي فسدنا مهمش لتراك ولا مكسكين ولا هنود ولا مصرين .. هذا كلهم اسباب فساد

+
من سمح لهذا الاسباب ان تشاهد اليس مجتمعنا اليس قنوات العار mbc ومشتقاتها
اليس اليتيمة واخواته الاطروحة تتمحور حول من ..!
من جعل هذا الاسباب تتغلغل في مجتمعنا
1 - نحن كمشاهد
2- قنوات العار

​

 

[Ice Queen]

المشكل ليس بالمسلسلا بل في طريقة التربية تاع الاباء لو الام والاب ربو بنتهم وولدهم بطريقة صحيحة من الصغر راح يعرفو الصح من الخطا وماراحش يتاثرو بالمسلسلات
يعني كاين ناس تتفرج على المسلسلات لكن بدون ما تتاثر.
​

 

[السلطانة]

وعليكم السلام

اختي لي يخاف على ولادو يفسدو يضغط على الزر يختفي المسلسل
يعني ماش الاولياء يطلقو لحبل مباعد تلقايها تقولك بنتي سوفجت من المسلسلات
او وين هي المراقبة تاعك ليها ياأم؟
المشكل ماش في المسلسلات المشكل في عقول ولادنا وبناتنا وأوليائهم
تقبلي مروري
​