واحد مات -ربي يرحمو - والثاني ناض يضحك عليه

[الورد الأحمر]

السلام عليكم ورحمة الله وبركاته
...
ماكان لاه المقدمات بزاف
يخي راكم ملاح وحتى أنا مليحة والحمد لله
...
مالا اليوم كي العادة راجعة لعشية للدار كنت في التخونسبوغ ركبت
في اللخر خلاص مع شلة تاع ذكورة يكونو تاع السيام باقيين يضحكو
ويتمسخرو يعني عادي خلاص ومن قبلنا بشوية كاين gـغوب تاع
نسا كبار عجايز باقيين يحكيو وجابو سيرة وحد الطفيل سكيكدي
اختفى لي جوغ لي فاتو وواحد ما علابالو وين راح حتى البارح
لقاوه في واد مطيش حكمتو رودا تاع طوموبيل لوكان كانت تروح
الجثة تاعو للبحر وعمرهم لا يلقاوها بالاك ... صغير 19 سنة برك
...
هيا وحد الطفل من الجماعة هذوك سمع لحكاية وأصلا من لي ركبت
وهو يوري في روحو ويضحك ويتمسخر على حوايج تافهين حتى
صحابو ما ضحكولوش لقيتو نطق قاللهم اوو لقاوه حرg في رودة
وبدا يضحك ويقول لصحابو سمعتو ؟ قالك حرg في رودة في واد
وينطق واحد من صحابو قالوا : انتا وين والسيد وين هذا او مات
لمرا اي تقول مات وانتا تضحك وتتمسخر على حاجة كيما هذي ؟
وقريب دُرت ليه سلمت عليه جابهالي على قد قلبي حتى انا كنت
في وسطهم حكاياتهم الكل سمعتهم وهو التافه الوحيد بينهم ...
هنا أنا حارتلي : للدرجة هذي ولاّ الموت ما يخلعناش ؟
للدرجة هذي ماكانش خشوع لحاجة كيما هذي ؟
حتى ولو كان الخشوع ماكانش ... للدرجة هذي الانسان
استغنى على الانسانية ؟ من باب الانسانية برك كان يعرف
بلي هذي عيب يضحك عليها السيد مات غارق في واد
مطيش من شحال وتعرفو اكرام الميت دفنه مي هو ما لقاوهش
بقا ايام في الواد ورحمة ربي الرودة هذيك عطلتلو الطريق
كان يروح للمصب لي يوصل للبحر طبعا ...
انا هذا الموقف بلوكالي راسي كي سمعت لحكاية غاضني
الطفل وهو ألف منها فيلم ويحرg ومعرف واش والله عيب
مات الخوف مات الخشوع ومات الموت ...
كي يذكروا الموت قدامنا نتفكروا الخاتمة والنهاية وبلي هوما
السابقون ونحن اللاحقون ونتذكروا دالتنا جاية لا محالة ...
نتفكروا ربي ونخشعوا ... ونعدلوا أمور فينا ... ونخمموا
بلي هذا مات وين درينا تغدرنا الموت في الدقيقة هذي ...
كاين آلاف الأفكار لي تجي للراس بذكر الموت ... وطبعا مش
فكرة نكتة أو فيلم أو ما علاباليش واش ...
على الأقل على الأقل
نحترموا الميت
مي ما بقاش احترام ... ربي يهدينا ويثبتنا ويحسن الخاتمة تاعنا
قولوا آميـــن

وربي يرحم الطفل هذا ويوسع عليه وباذن الله شهيد مادام مات غرقا
والله أعلم ... انا لله وانا إليه راجعون
اللهم ارحمه


- ادعيولي برك الله يحفظكم -
​

 

[homework]

طبعا اختي الأولاد يستهزون بكل شيئ حتي الموت والمسنين لأنهم مجربوش لوكان جربوا موت قريب منهم راهم يسمعوا بالموت يبكيوا
و لازم علينا نحترم الاخرين ومانيتهزوش بيهم مهم يكون الموضوع لي يحكيوا عليه ومن اداب ركوب النقل الصمت وعدم الضحك

 

[الورد الأحمر]

طبعا اختي الأولاد يستهزون بكل شيئ حتي الموت والمسنين لأنهم مجربوش لوكان جربوا موت قريب منهم راهم يسمعوا بالموت يبكيوا
و لازم علينا نحترم الاخرين ومانيتهزوش بيهم مهم يكون الموضوع لي يحكيوا عليه ومن اداب ركوب النقل الصمت وعدم الضحك

ايه مع أنهم كبار مش تاع ما يفيقوش بلي الموت ما يتهانوش بيها لكن ...
وطبعا الاحترام واجب في النقل ولا غيرو لكن هناك من لا يفهم في الآداب
فكيف له أن يميز ... شكرا اختي على الاعتماد والمرور والرد ... ســلآمي
​

 

[bilal22]

الموت هير واعض ومن لم يتعض بها فالنار تاويه
شكرا ها لحاجه وربي يرحم من مات
من المفروض لواحد يتحرك قلبو ومشاعرو في هاذي المواقف مكانش اقوي منها
ربي يهدينا برك

​

 

[السلطانة]

وعليكم السلام
اهلا بيك اختي لعزيزة نورتي الركن
موضوعك باهي يعطيك الصحة
شعبنا راح فيه التمسخير حتى رجع ضحكة
ميعرفوش وقتاه يتمسخرو تالمون حياتهم كاملة تمسخير
حتى الميت باه يترحمو عليه ويسكتو ويستعاظو جايين يحكيو عليه في وسط الناس وميتين ضحك
الله يهدي برك
والله يرحم هاد السيد لي توفى وجميع المسلمين
والله يسهلك حبيبة فيما تتمنايه
تقبلي مروري
​

 

[< مجيد >]

السلام عليكم ورحمة الله وبركاته

...
ماكان لاه المقدمات بزاف
يخي راكم ملاح وحتى أنا مليحة والحمد لله
...
مالا اليوم كي العادة راجعة لعشية للدار كنت في التخونسبوغ ركبت
في اللخر خلاص مع شلة تاع ذكورة يكونو تاع السيام باقيين يضحكو
ويتمسخرو يعني عادي خلاص ومن قبلنا بشوية كاين gـغوب تاع
نسا كبار عجايز باقيين يحكيو وجابو سيرة وحد الطفيل سكيكدي
اختفى لي جوغ لي فاتو وواحد ما علابالو وين راح حتى البارح
لقاوه في واد مطيش حكمتو رودا تاع طوموبيل لوكان كانت تروح
الجثة تاعو للبحر وعمرهم لا يلقاوها بالاك ... صغير 19 سنة برك
...
هيا وحد الطفل من الجماعة هذوك سمع لحكاية وأصلا من لي ركبت
وهو يوري في روحو ويضحك ويتمسخر على حوايج تافهين حتى
صحابو ما ضحكولوش لقيتو نطق قاللهم اوو لقاوه حرg في رودة
وبدا يضحك ويقول لصحابو سمعتو ؟ قالك حرg في رودة في واد
....................................................................
.....................
.......................
............................​

-​

بونسواغ عليكوووووووووووووو
هذ الموضوع فووووووووووووغ عجبني بزاف
ميغرسي عليك

 

[NIZAR.DZ]

سلام أختي
يعطيك الصحة
أنا أمس برك كنت مع واحد صاحبي في الفيس بووك
وقالي بلي راه عنده واحد صاحبه مات بالتريسيتي العشية أمس
وهذا اللي مات مانعرفوش وعمري ماشفتو
مي حسيت روحي شغل خويا اللي مات
ربي يرحمو مي مزالو عباد فيهم القلب
مي الاغلبية الساحقة يقولو المهم ماشي أحنا اللي متنا
تحياتي
وربي يرحمو ويرحم جميع موتى المسلمين
​

 

[الورد الأحمر]

الموت هير واعض ومن لم يتعض بها فالنار تاويه
شكرا ها لحاجه وربي يرحم من مات
من المفروض لواحد يتحرك قلبو ومشاعرو في هاذي المواقف مكانش اقوي منها
ربي يهدينا برك

​

أهلا بلال ... ايه شفت ماكانش أعظم من الموقف هذا في الخشية
مي راه يضحك ... ربي يهديه ما علابالوش واش راه يدير
وكيما قلت من المفروض يتحركو مشاعرو مي ما تحركوش للأسف
آمين ربي يهدينا كامل ... ومغسي على المرور
ســـلامي
​

وعليكم السلام
اهلا بيك اختي لعزيزة نورتي الركن
موضوعك باهي يعطيك الصحة
شعبنا راح فيه التمسخير حتى رجع ضحكة
ميعرفوش وقتاه يتمسخرو تالمون حياتهم كاملة تمسخير
حتى الميت باه يترحمو عليه ويسكتو ويستعاظو جايين يحكيو عليه في وسط الناس وميتين ضحك
الله يهدي برك
والله يرحم هاد السيد لي توفى وجميع المسلمين
والله يسهلك حبيبة فيما تتمنايه
تقبلي مروري
​

أهلا الزين
والله هذيك هي تالمو يتمسخرو بزاف رجعلهم التمسخير في كلش
ايه لا ربي يرحمو لا والو طايح يضحك طول تقول شاف سكاتش
الله يهدي عبادو ويهدينا معاهم تاني ... والله يرحمو ويوسع عليه
والله يسهلك بشبش ... مرورك على العين والراس :re_gards:
ســلآمي
​

 

[الورد الأحمر]

بونسواغ عليكوووووووووووووو
هذ الموضوع فووووووووووووغ عجبني بزاف
ميغرسي عليك

أهلا خويا بونصواغ
مليح كي عجبك ... ومغسي عالمرور
ســلآمي
​

سلام أختي
يعطيك الصحة
أنا أمس برك كنت مع واحد صاحبي في الفيس بووك
وقالي بلي راه عنده واحد صاحبه مات بالتريسيتي العشية أمس
وهذا اللي مات مانعرفوش وعمري ماشفتو
مي حسيت روحي شغل خويا اللي مات
ربي يرحمو مي مزالو عباد فيهم القلب
مي الاغلبية الساحقة يقولو المهم ماشي أحنا اللي متنا
تحياتي
وربي يرحمو ويرحم جميع موتى المسلمين
​

وعليكم السلام
الله يرحم صاحب صاحبك ويوسع عليه ...
ايه حسيت هك على خاطر فيك انسانية وقلبك فيه خشوع
مش كي هذا راسو هامل ... أكيد مازالو ناس عندهم قلب
لوكان خسفنا ربي داك العام ... الله يرحم كل موتانا
اللهم آميــن
...
شكرا لك أخي ... ســلامي
​

 

[< مجيد >]

ما عجبنش الموضوع عجبتني اللهجة الزينة

 

[الورد الأحمر]

ما عجبنش الموضوع عجبتني اللهجة الزينة

اوك مليح كي عجبتك اللهجة
ســلامي
​

 

[*ليديا*]

السلام عليكم ورحمة الله وبركاته
صح اختي عندك الحق
انا نسمع بكري يموت واحد يحزنو عليه والي ما يحزنش ما يعلقش ويضحك الناس تخشع وتخاف
درك والله شفتها بعيني في دار الميت بعد تلقايهم يضحكو ويقصرو ...
في المقبرة يروحو باه يزورو يدو الاولاد الصغار يجرو ويعفسو على القبور
والبنات الزينة والمكياج اونديري رايحة للعرس
تاع الصح الهدرة تطول في الموضوع
يعطيك الصحة ربي يخليك
​

 

[بيكهام]

سلام عليكم

واش تحبي يا غالية الله غالب ناس حاسبة روحها ماشي رايحة تموت

واحد نهار كنت نمشي جات فايتة جناازة وكان كاين براااج تاع درك الوطني كامل نحو كاسكيطا ودارو تحية

يعني قمة احترام الميت

ربي يهدينا للخير
​

 

[كمايا]

هذي حاجة والله ماتضحك

مسكينة ماماه للطفل راهي مشوكية لليوم ومامآمناش

صحابو كيف كيف شافو صاحبهم غرق قدام عينيهم

والله موقف مأساوي ويبكي

وهذا الطفل تع السيام مسكين مازال عقلو على قدو

ربي يرحم موتانا ياااارب

بارك الله فيك اختي

 

[tarek_med]

إِنَّا لِلّهِ وَإِنَّا إِلَيْهِ رَاجِعونَ

بسم الله الرحمن الرحيم​

(( يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً فَادْخُلِي فِي عِبَادِي وَادْخُلِي جَنَّتِي ))
صدق الله العظيم


ربي يرحمو ويرحم جميع موتى المسلمين
شكرا على الموضوع
​

 

[الورد الأحمر]

السلام عليكم ورحمة الله وبركاته
صح اختي عندك الحق
انا نسمع بكري يموت واحد يحزنو عليه والي ما يحزنش ما يعلقش ويضحك الناس تخشع وتخاف
درك والله شفتها بعيني في دار الميت بعد تلقايهم يضحكو ويقصرو ...
في المقبرة يروحو باه يزورو يدو الاولاد الصغار يجرو ويعفسو على القبور
والبنات الزينة والمكياج اونديري رايحة للعرس
تاع الصح الهدرة تطول في الموضوع
يعطيك الصحة ربي يخليك
​

وعليكم السلام ورحمة الله وبركاته
ايه صح درك حتى الناس لي يحضرو الجنازة تلقايهم يضحكو والميت
مازال ما تدفنش حتـى ... مات الخشوف والخلعة من الموت مش كي
زمان حتى الطفل الصغير تخلعو كلمة الموت ... ربي يهدينا وأما زيارة
المقابر راهي رجعت حدث ولا حرج ... معرف كيفاش الناس تخمم ...
فسدناااااااا ربي يهدينا ويحسن خاتمتنا ويذكرنا في الشهادة
اللهم آمين
...
مشكورة اختي على المرور الطيب ... ســلامي
​

سلام عليكم

واش تحبي يا غالية الله غالب ناس حاسبة روحها ماشي رايحة تموت

واحد نهار كنت نمشي جات فايتة جناازة وكان كاين براااج تاع درك الوطني كامل نحو كاسكيطا ودارو تحية

يعني قمة احترام الميت

ربي يهدينا للخير
​

وعليكم السلام ورحمة الله وبركاته
أهلا حسام ... مبروك الاشراف ...
ايه يحسب روحو ما يموتش هو ويضحك على الطفل
ربي يرحمو كيفاش مات وين درا ربي يكتبلو موتة كيما
موتة الطفل هذا ويضحكو عليه بعد ... ربي يهديه ...
بالاك مازال صغير ومش عارف واش دار ...
مغسي حسام عالمرور ... وربي يهدينا
ســلام
​

هذي حاجة والله ماتضحك

مسكينة ماماه للطفل راهي مشوكية لليوم ومامآمناش

صحابو كيف كيف شافو صاحبهم غرق قدام عينيهم

والله موقف مأساوي ويبكي

وهذا الطفل تع السيام مسكين مازال عقلو على قدو

ربي يرحم موتانا ياااارب

بارك الله فيك اختي

ايه هي ما تضحكش مي هو لقاها تضحك معرف كيفاش
الدرية هذي ولات ضاربة الدنيا بكودبيي ... ربي يهديهم
وربي يصبر أهلو مش ساهلة ميتة كيما هذي تاع يبقى عندهم
أمل بلي مفقود برك من بعد يجيبوهولهم جثة محللة من الماء
ليالي قضاهم فيه ... ربي يحسن الخاتمة تاعنا ويموتنا ميتة
ساهلة بين الأهل والأحبة ... وفيك بارك الرحمن ... ســلامي
​

إِنَّا لِلّهِ وَإِنَّا إِلَيْهِ رَاجِعونَ

بسم الله الرحمن الرحيم​

(( يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً فَادْخُلِي فِي عِبَادِي وَادْخُلِي جَنَّتِي ))
صدق الله العظيم


ربي يرحمو ويرحم جميع موتى المسلمين
شكرا على الموضوع
​

بسم الله الرحمن الرحيم​

(( يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً فَادْخُلِي فِي عِبَادِي وَادْخُلِي جَنَّتِي ))
صدق الله العظيم

اللهم آمين ... ربي يهدينا ويرحمنا ...
شكرا على مرورك الطيب
ســـلآمي
​

 

[iman la brune]

هذا المخلوق ربي يهديه من كثر ما ضحك مات قلبو
​