كونك دئب والا اكلتك الذئاب

[bilal22]

السلام عليكم خاوتي
ليوم حبيت نخربش هكا حاجه في راسي
منعرف وين رانا رايحين بيها
كاين وحد الامثله راهي تتداول علا اللسنة خاوتنا منعرف وين رايحين بيها
وكيما يقولو كونك ذيب لا ياكلوك الذيابه
يعني علاه الطيبه درك رجعناها غباء وبلاهة
يشوفو انسان يمشي علا نيتو يقولك ابله
ويقولك لازمك تكون ذيب والا راحت عليك
رجعنا درك نشجعو في الناس علا اكتساب صفات مش مليحه
وندفعوهم بغير قصد لتغير والا راح يكونو روطار
تتخيل نتا تتعامل مع واحد تقولو نتا نيه بزاف ونتا متعيشش هكا
ولازمك تكون ذيب والا راح تطفر فيك
علاه مننصحوش الذيب حتي يعقال ويرجع نورمال
مي حنا لالا لازم نردو الاخر كي خاوتو مش مليح ولا متحلاش
الامر هادا انا ديما يحرني ومنعرف اذا انا غالط فيه ولا لا
الراي ليكم نتم
شكرا علا حسن الاصغاء والمتابعه
سلام

​

 

[ماكانش]

أهلا بيك بلال
يعطيك الصحة على موضوعك الباهي
الطيبة مليحة والنية مليحة ولكن مع ألي يستاههلها
وأغلب الناس في الوقت هذا خباثة مالازمش الواحد يطلق وذنيه معاهم

يعطيك الصحة
​

 

[أم راضية ~_]

وفي الاخير دائما
مول النية يغلب مهما كثرو الديوبة و مهما تماداو في حيلتهم و مكرهم
و ينتصر الحق والخير
خلي الديب وحدو يلقى روحو غالط وبالهدرة هاديك راهو يعترف بغلطو ويحب الناس يكونو كيما هو باش يولي يقول راهم كاااااامل هكدا رانا كاااامل كيف كيف
صحييت
والسلام وعليكم

 

[همة نحو القمة]

اهلا خيو بلال,,,موضوعك مليح,,,
لانو يحكي على ظاهرة اجتماعية,,يا لطيف,,,الملطف
والله احنا الشعب الجزائري فينا غير السلبيات ,,
لا نؤمن ابدآآ بالحاجة المليحة,,للاسف هذا بسبة البعد عن الدين,,
للاسف عاد اللي يسب الناس ويكون قوي عليهم يحسوه فحل وقافز
اما هذاك اللي يصبر على الواحد كي يسبو ولا يضرو نحسبوه نية:down:
ونحرضوه على انو يكون قاسي,الله الهادي ,,,
ان شاء الله ربي يصلحنا

موضوع يستاهل التقييم
سلامي
:regards01:
​

 

[مابقاش بزاف.Dz]

مشكور عل طرح الموضوع
و الانسان مليح يمشي بقاعدة ما تامن ما تخدع

 

[أم عبد الله]

محجوووووووووز

لي عودة للرد

 

[السلطانة]

مالا امشي بالمثل القائل : دير روحك مهبول تشبع كسور
:p

موضوع رائع وعجبني بزاف
يعطيك الصحة ابلال
تقبل مروري السريع

​

 

[محبة الهدوء]

سلام
انا نفضل يقولولي نية ومايقولوش عليا خبيثة
والطيبة مش ضعف فالشخصية
العكس الشخص الطيب اخلاقو وتربيتو ماتسمحلوش انو ينشع واحد ولا يزعفو
تلقاه يحب الناس وديما بشوش ويبادر بطلب السماح ويهتم لامور الناس حتى اكتر من اهتمامو لنفسو
على عكس الخبيث لي يسموه في بلادنا القافز تلقاه انسان مستهزء ومايقدرش مشاعر حتى اقرب الناس ليه
مشكور على الموضوع هدا
حبيت نكتبلك جرنال ههه ونعبر اكتر من هكا على خاطر الموضوع هدا صرالي مرة وحسيت روحي نوعا ما ساذجة في اعين ناس بصح منبعد اكتشفت انهم مايستاهلوش انهم يكونو في حياتي والخبث مش من طبعي
سلامو
​

 

[Houda Chaouienne DZ]

إن لم تكن ذئبا أكلتك الذئاب
.....
​

 

[07 _H@yThm]

,ومولا النية ديما يربح اااخي بلال لفرطاس ااــأأ نتا خاطي فرطاس هههههههههه
ايا تربح​

 

[الحياة كلمة]

صباح ليل ((((((((((( جيبولي ساعتي )))))))))))))

السلام عليكم
بصح بن عمي ​

كل يوم موضوع ياو خلي الدالة لخرين ههههههههههههه :p
شوف كاينة حاجا :-r
مانبقاش نشكر فالموضوع ثان ترد روحك حوحو وجماعتو
المهم الافة لي تحكي عليها الله يهديها واحسن شي ان نعمل بمقولة :
اذا احسنت لي ساحسن لك واذا اسات لي ساحسن لك
انت تمثل نفسك وانا امثل نفسي
كل واحد مسؤول على روحو
وزيد كامل راهم يتمشاو بالتنوفيق عفانا الله واياكم منه
احسن شي اننا نصلح حالنا وهاك نخليو لي قدام يتشهاو فينا باش يعاندو
ولا عفسو عليك (غاشي ماترحمش)
كاين ربي لي نتكلو علي
ولي العودة باش ناقش ​

 

[hiba14]

السلام عليكم
شوف ما نكدبوش قاع رانا دخلنا الحيلة بيناتنا و يا لوكان غي شوي حدر و في حيا تو مول النية ما هو جايح مي النية فوق الحد تولي تبهليل يا سيدي كاين وحد القش قسما بالله غي قلبك يضرك منو ياو حاجة الصح ماهي ديب و التبهليل ماشي نية
بياتنا نعرف هاد الشي مي و الله غي بهلولة

 

[فراشة المنتدى]

يعطيك الصحة

 

[مفخرة الجزائر]

ننصحو العاقل باه يولي قبيح ووما ننصحوش القباح باه يعقالو كان هكا سؤالك ياك؟
على خاطر ولاو الدياب بزاااااااااااف وطغاو على المجتمع الور لازم العاقل ما نقولوش يولي ديب مي نقولو يتاقلم مع الدياب ولكل مقام مقال

 

[مرام التيبازية]

الســــــلام عليكــــــــــم ورحمـــــــــــة الله تعــــــــــــالى وبركـــــــــــــاته....
اخــــــــــي بـــــــــــلال يقولـــــــــك المثــــــــــــل:"مــــــــــــول النيــــــــــة يربـــــــــــــح"...،،،خـــــويا الطيبــــــــة و النيـــــــة مــــــــــــلاح بـــــــــــــزاف،،،وفعــــــــلا دايمـــــــــــا ينتصـــــــــر الحــــــــــــــق والخيــــــــــــــــــــر.....
المــــــهــــــــــــــم شكــــــــــــــرا علــــــــــــى الــــــــــموضـــــــــــوع البــــــــــاهــــــــــــــــــــــي...

 

[secret de coeur]

وعليگم السلآم ورحمةة الله وبرگآته
,آآي رآگ مآگسليري فالموآضيع الله يبآرگ
مم أنــآ نــآمن بالحكمة
تآع ان لم تگن ذئبــآ أگلتگ الذئآآب
توجور .. بيسگ الدنيا راهي صعيبة
مالغري مول النية اونفان يربح مي لازم شوية الوآحد مايگونش بهلول على روحو
.. مرسيي ع الموضوع

سلــآآم
​

 

[houssem_]

عندك الحق خويا

الوقت تبدل يا حسراه
غلبت الانانية و الخيانة والغدر

ربي يبقي الستر


مشكور اخي على الموضوع

​

 

[بنت الـ25]

موضوعك مليح بلال ويعالج مشكلة خطيرة في المجتمع
تصدق
والله ليوم وانا نحكي مع صحبتي
قتلها وعلاش بطلتي الخدمة في شركة تع الدوا؟؟
قاتلي مقدرتش نعيش مع هدوك الديابا:$

نهار راحت تقدم استقالتها قالها المسؤول : احنا ما صدقنا كسبنا وحدة عاقلة ومربية كيفك
قاتلو: مقدرتش نتأقلم
قالها باش تتأقلمي لازمك تولي كيفهم
قاتلو: مالا هكداك منوليش مربية ياااو فهم رووحك
:s
واقع مر للأسف
وش رايح الدير لازمك تدز وتصحح وجهك باش تقدر تعيش فال المجتمع تعنا

سلامووو

​

 

[السوفي]

السلام عليكم ورحمة الله وبركاته

اخي صاحب الموضوع جزاك الله خيرا فموضوع يتحدث عن واقع معاش وان تظاهرنا بعدم اللامبالات به الا انه حقيقة من انكرها فقد انك شيء معاش وهذا يعد من العناد فسمح لي ان اطرح ما فهمته من كلامك باسلوب اخر لعلي استطيع ان اطرح فيه حلول لهذا المشكل
اخي ان مثل هذه الامثله سارة قانون ودستور يعيش به المواطنين فالذي يرفض الرشوة يقال له ادهن السير تسير والذي هو طيبة بطبيعته ولا يضن في الناس الا الخير يقال له كون ذيب والا اكلتك الذئاب وهكذا تفننا الناس حتى وصل بهم الشان الى التعدي على الحدودبامثله تنافي الشرع والاعراف وكل الاخلاق مثلا الحرام هو الذي لم تصله يدك سبحان الله بهذه العقلية يعيش اغلب الناس في عصرنا في كل المدن والاحياء وكل الاوطان
النتيجة مجتمع مادي لا يعترف الاخلاق ولا بالقيم والمثل والاعراف يتنصل من الدين ويتنصل من كل شيء حتى من انسانيته ليتحول المجتمع المتحضر الى تعريف بشع كثيرا ما نسمعه ولا نعير له انتباه وهو مجتمع الغاب يقال لك راك عايش في غابه وراك عايش مع ذيوبه وهلم من تسميات والحقيقة تقول ان الانسان ليس من الحيونات لانه صاحب اخلاق وقيم واعراف وعلاقات يحيا بها وهي تنظم حياته فالعجب والعجب ان نفرح حين توصف بانك ذئب وبانك شيطان وعفريت وانك قافز والحقيقة انك نزلت من مستوى البشري الى المستوى الحيواني الذي تتحكم فيه غرائزه ولا يملك دافع سواها
هذا ما يريده الغرب وما يريده كل مفسد فالانسان المريض المنحق خلقيا المجرم والمنحرف لا يحب ان يراه الناس على هذه الشخصية والا نخزى وذل لان المفاهيم في مجتمعنا انقلبت راسا على عقب فصال الذي يختلس الاموال من البنوك ووووو راجل قافز ودار صفقه حتى لو قبض عليه ورمي في الحبس فكيف نرضى بالدنئ والحقير من اجل تحقيق اهداف ما هي الا اوهام فالفتات التي تاخر زواجها يقال لها فكي تتزوجي يعني عري السواعد والراس والساقين وقتحمي عالم الاسواق واكثري من الخروج ووو في النتيجه تتزوجي نعم تتزوج ولكن من نفس طينتها رجل ما هو الا مظهر رجل لا اقل ولا اكثر والواقع شاهد
وفي خلاصة الكلام نحن من يقلب الموازين ونحن من يصور المفسد على انه مصلح ونحن من نعتقد ان الدنيا فرص والحقيقة التي نوقن بها ونعلمها ولا يستطيع احد ان ينكرها ان الدنيا متاع الغرور وويل لكل من غرته وفي نار جهنم رمته وويل له خسر الدنيا والاخرة والحمد لله المؤمن الصادق يعمل بقول الله قل لن يصيبنا الا ما كتب الله لنا عليه توكنا وصدق رسول الله فعن ابن عمر - رضي الله عنهما - قال: أخذ رسول الله -صلى الله عليه وعلى آله وسلم- بمنكبي فقال: كن في الدنيا كأنك غريب أو عابر سبيل وكان ابن عمر يقول -رضي الله عنه-: "إذا أمسيت فلا تنتظر الصباح، وإذا أصبحت فلا تنتظر المساء، وخذ من صحتك لسقمك، ومن حياتك لموتك" أخرجه البخاري.
الدنيا لا تغر الا مغرور
اسف لعلي اطلت الحديث
وشكرا مرة اخرى
السلام عليكم

 

[MĭŠš Čhŏů]

انا نتصرف بنية صافية مع العبد بلا تزوير و لا نفاق مبصح لوكان واحد يقيسني
نهار ازرق عليه
:d:d:d
​