«®°·.¸.•°°·.¸.•°®»[ السلام عليكم ورحمة الله وبركاته ]«®°·.¸.•°°·.¸.•°®»
وشراكم خاوتـي، ان شاء الله راكم لاباس
مبروك لجماعة الباك والسيزيام، والناس اللي طلعت العام، واللي ما نجحوش نقلهم نورمال فيها خير .. سالو مجرب خخخخخخ
قبل ساعة كنت في المستشفى في قسم الولادات، في زيارة لاختي اللي اليوم كبرت العائلة وجابت (دون) صغير - قالولي راه خارج ليا وما نعرف - ربي يكبره في العز وفي طاعة العزيز
كي كنت في قاعة الانتظار، دخل راجل يكون في الاربيعينيات من عمره، هو يمشي والسعادة تمشي من وراه تقطر .. يا جماعة يضحك من عينيه
سلم على الحاضرين واحد واحد، والابتسامة العريضة في وجهو حتى ان الضرس تاعوا يبان ماشي غير الناب ... وبعدها قعد في الكرسي على الادروات تاعي، وبدا يسقسي فيا على اي حاجة يشوفها من درجة السعادة حاب يجبد الكلام معايا
وبعدها سقسيته : طفل ؟ قالي : لا، طفلة .. وتسبم ابتسامة موالف نشوفها في الانيمي برك... وكمل كلامو، قالي : كنا نحوسوا على طفلة، واليوم - الحمد لله - تحقق الحلم تاعنا.. سكت شوي وقالي : عندي 3 اطفال كامل ذراري، عندنا 6 سنوات وحنا حابين نجيبوا طفلة.. واليوم على الـ 09 صباحا جاني احسن خبر سمعته في حياتـي كامل
بعد مدة دخل يشوف في المولودة - ربي يخليهالو - .. قعد حوالي 20 دقيقة، وبعدما خرج مشى خطوات وبعدها سجد سجدة شكر للقائل : " المال والبنون زينة الحياة الدنيا .. " سبحانه وتعالى
يا رب لا تحرمنا نعمة الابوة
وشكرا [ لكم ]
و... [ لكم ] تحياتــي
أخوكـم في الله
The DoN
«®°·.¸.•°°·.¸.•°®»[ في حفظ الرحمن ]«®°·.¸.•°°·.¸.•°®»
