اختي مينات
مشكلتي شوية خاصة والحمدلله لقيت موضوع كوكب الاعتراف نشكي فيه همي
ونشوف آراء وردود الاعضاء
أنا كنت متزوجة في ايطاليا براجل اهلي مسقساوش عليه نهار جى يخطبني
هو جى عن طريق خالي اللي صار يتحكم فينا بعد وفاة بابا الله يرحمو
ضغطو عليا من كل جهة حتى قبلت بيه
في ايام الخطوبة كان عادي مبعد مورا الزواج تبدل 180 درجة للأسوء
جبت معاه طفلة (بالعملية) واجهضت وراها الحمل اكثر من 5 مرات علاش: بسبة انو منعني من اخذ حبوب منع الحمل بالرغم من ان الطبيبة أكدتلي بلي ملازمش نحمل قبل 3 سنين
البداية كانت كي منعني اني نخدم بالرغم من اني متحصلة على دبلوم يأهلني نخدم في أي مكان محترم
كان يضربني خصوصا بعدما اكتشفت خيانتو ليا مع وحدة (جزايرية تسكن هنا فالبلاد) فالتلفون وكي واجهتو منكرش والأسوء انو كان يعرفها اثناء فترة خطوبتنا
واللي زاد الأمور سوءا - والله حشمت نقولها – حب يتاجر بشرفي وكي رفضت هددني يقطعلى كوارطي ويرميني انا وبنتي فالشارع
انا الحمدلله فهداك الوقت ربي نورلي طريقي وبقيت نسايس فيه حتى رجعني للبلاد
اول ما وصلت رحت مباشرة لدارنا وحكيتلهم وش دار وقتلهم بلي طالبة الطلاق
وهنا وقفلي خويا وقالي بالحرف " ايه يا لالة احنا ما صدقنا زوجناك وتهنينا وحبينا نهنيو على رواحنا زدتي رجعتينا تحوسي تطلقي وبطفلة هادي غير انسايها"
وهزني بيا بقشي ببنتي وداني بالسيف عليا لدار سلفي خو راجلي
لثما رخست تع الصح وعاد راجلي عالطالعة والنازلة يعايرني حتى وحد النهار قالي هيا نديك تروحي تزوري يماك
خدعني بلامان داني وفالليل عيطلي قالي أي قريب توصلك ورقة طلاقك
وش نقلك في وقتها دارتلي صدمة نفسية مقدرتش نستوعب بعد كل هاد المعاناة والذل منو ومن خاوتي وعفست على قلبي ورجعتلو غير علاجال بنتي وفاللخر هو لي يرميني
راني منهارة نفسيا وكل من حولي يحملوني المسؤولية
ملقيتش الصدر الحنون اللي نبكي في حضنو
مسمعتش كلمة تطيبلي خاطري
مسمعتش وعد بأخذ حقوقي اللي ضاعت
راني نشوف في صغري قاعد يضيع وماني قادرة ندير والو
وبالرغم من كل هذا نعرف بلي " ربي كبير " وانا طامعة في رحمتو وحلمو وانتقامو من كل اللي آذوني
راني فرغتلكم قلبي نتمنى نسمع كلمة تطيب خاطري ولا رد يرجعلي أمل الحياة من جديد
