ملف كامل عن تجهيز العروس الجزائرية مع بعض النصائح

[la rose de sable]

هيااااا ثبتولي الموضوع ،، راهو مهم للغاية ،،،
وزيد والله تعبت وانا نعمر في القوائم

 

[la rose de sable]

الملابس الداخلية

نبداو بيوم العرس ، لازم تشري دو بياس ابيض وفخم وتلبسيه من الصباح كي تعودي رايحة للكوافيرة
فيزو ابيض وشيك
قميص نوم أبيض فخم كامل ليوم العرس ( ديزابيي)
ديزابيي طويلة وفخمة ومحترمة وردي تلبسيها يوم التصديرة الصباح كي يجوك اهلك واهل العريس يسلمو عليك
البسي الفيزو ايضا الابيض
دوبياس سوتيان وسليب ، نوعي ، الالوان ، وايضا القماش
دوبياش سوتيان وشورط
شورطات عادية ، وشورطات للحيض
شوميز دو نوي قصار وطوال وبدلي الالوان ديري الساتان والقطن
ليبافان الوان ، طوال وقصار
قان gaine



​

 

[la rose de sable]

ملابس الشتاء

قنادر قطيفة تاع دار ، ماتديريش تاع الطريزة ، ديري تاع الطربوشة ، وتاع الدبوبة ، والالوان الوردي والفيولي ، بش تباني صغيرة وشيك ،كثري منهم ديري على الأقل 4

قنادر قطني ،، معبيين الحالة ،، ديري منهم بزاف ونوعي الالوان

بيجامات قطيفة

بيجامات قطن

دوخيلات قطن تحت القنادر تاع القطيف

لي جوب يتلبسو تحت القنادر

خمارات صوف

طقاشر

ريحيات

فيزوات كثري ،لانك رايحة تستعمليهم بكثرة، وديري كل الانواع وكل الالون ، والنوع المزركش كثري منو

تريكوات قطني يجو تحت الملابس ،

بيستيات كثري منهم ايضا

شورطات لايمات الدورة

قفاز ،، تستعمليه اذا كنتي دايرة الحنة

بوديات صوف ، قطن ، ربيعي وشتوي

سراول جينز

​

 

[la rose de sable]

ملابس الصيف


قنادر لاطوال خفيفة تاع دار ، اشري وخيطي ، وديري الميدي ، يتحفوا العروسة وخفاف ،، العدد على حسب قدرتك

بيجامات ،، نوعي ، ديري اللي تيركوها طويل واللي تريكوها قصير، وديري تاع البونطاكور وتاع السروال ،،،
ونوعي الالوان ديرها خااافتة بش تكوني كالفراشة

روب قطني قصار وطوال ، نوعي ، وديري اللي فيهم رسومات ، يبينوك صغيرة

بوديات ربيعية وصيفية مع تنانير قصيرة للبيت

فولارات لشغل البيت

طابليات الشغل
​

 

[la rose de sable]

الأحذية والحقائب بالتفصيل

صباط او صندال ابيض ليوم الزفاف
صبابط الوان وشيك للتصديرة ، وماديريش حوايج غاليين لانهم مجرد تنسيق مع اللبس
صابو ابيض ومريش لليلة الدخلة يكون طالو شوي
صابو وردي ليوم التصديرة
بلغة دوش بيضاء فخمة ليلية الدخلة
صابوات مريشين وملاح مع الشوميز دو نوي
بلايغ الدار

البناطف كثري ونوعي ، ديري المريش والسامبل ، الطالو وبلا طالو ، نوعي قد ماتقدري ، وديري الوان زاهية

بلايغ ولا بشامق تاع دوش ، نوعي ، وديري تاع الصبع العاليين شوي ،

بلايغ الدار تاع الصيف ، نوعي منهم ، وديري زوز تاع خرجة خفيفة



احذية الخرجة ،،
ديري 2 ولا 3 صبابط كلاسيك للخرجة وحاجة شيك نوعي الالوان ،
وديري 2 رسمي للعمل
( كي نقول تاع خرجة معناها ديمي طالو)))

للصيف
ديري بلغينات خفافي الوااان
3 صنادل تاع خرجة


الحقائب ضرك

للعرس :
حقيبة صغيرة بيضاء ،ولا فضية
حقائب ذهبية وفضية والوان للتصديرة

للخرجة:

2 حقيبة عراسي وتلمع تبان تاع عرائس للزيارات، ( ايديهم معاك للفواياج دونوص)
حقيبة شيك ومليحة للخرجات العادية والعمل (ديري 2) وحاولي تنسقي مع اللبسة ، خير ماتشري وتندمي
​

 

[la rose de sable]

الفاليزات والسلل والعلب والماليت

اشري 2 سيريات تاع فاليزات ونظميهم كالآتي
السيري فيها 4
شدي لكبار : ديري وحدة لملابس التصديرة والاخرى ملابس الشتاء
الاصغر قليلا : وحدة لملابس الصيف ووحدة لشهر العسل
الاصغر ايضا : وحدة لكادوات دار العريس ووحدة للملابس الداخلية
والصغيرااات جدا : وحدة لملابس يوم الدخلة ،، والاخرى كملي فيها كش حوايج

و2 سلل وحدة للأحذية ووحدة للكوسميتيك (( يكونوا كبار))
وكان حبيتي ديري وحدة ليوم الحنة ديري كملي فيها الشمع

والعلب اشري عدد كبير لانو رايحة تكملي الحوايج فيهم
ديري فيهم ليناب والحوايج الخفيفة

والماليت وحدة للذهب والاخرى ماعلاباليش وش يحطوا فيها
​

 

[la rose de sable]

كادوات دار العريس

هوما ثاني لازمتهم ميزانية ولازم تديرهم في بالك وماتنسيهمش

المراوات الكبار قدريهم ،،

ام الراجل ديرلها قندروة قطيفة وقندورة لاطوال وقرعة ريحة

ابوه ديريلو قرعة ريحة ومصحف

اخواتاته ، على حسب الفصل اللي تتزوجي فيه ، اذا في الشتاء ديريلهم قطع قطيفة وخمارات صوف ، واذا في الصيف ديريلهم قطع لاطوال و خمارات كتان

واذا عنده زوجات اخوة يعني سلفاتك ديريلهم كيما اخواتاته ،، او خالاته او عماته ايضا

بنات طفلاتك وسلفاتك ديرلهم صاشيات صغار فيهم مناديل صغيرة مع قالب صابون وصشة بابي مشوار ، ((( مرت خويا دارت هكا))))

هكا بش تكوني رضيتهم كامل
​

 

[la rose de sable]

كادو العريس

انا نحطلكم قائمة وانتوما خيروا :
مصحف
قرعة ريحة وساعة ( ماننصحكمش بيها لانو الريحة تفض وماتعودش ذكرى)
طقم حمام
كوستيم ليوم التصديرة يروح يفوخ بيه على صحابو
سيرفات
بيجامة ساتان
مجوعة كاملة فيها قرعة ريحة وقرعة ديودوان وجال وحوايج الحفافة

عندك تدي صباط ولا كلاكيت لانو يقولو راهي فال مش مليح
​

 

[la rose de sable]

اهمية الفحوصات الطبية وزيارة طبيبة النساء

وصلنا ضرك للنقطة الاهم
وهي لازم قبل العرس ب 3 اشهر تزوري طبيبة نسائية بش تشوفي اذا عندك كش مرض لا قدر الله ولا التهابات ، لأن البعض لازمها وقت بش تتعالج
ولازم تنظمي دورتك عندها اذا كانت مش منظمة ،، ولا تاخذي حبوب توخرها شوية بش يفوت العرس في سلام
ولازم تاخذي من عندها نصائح بخصوص العلاقة، وش لازم قبلها ووش لازم بعدها ، وهي توصفلك كل شي بالتفصيل الممل ، وتماركيلك غسول ومطهر نسائي تستعمليه بعد العلاقة ، وتوصفلك ايضا جال من اجل ترطيب المنطقة ، بش ما توجعكش العملية ،
وبطبيعة الحال تكشف عليك وتمدلك سيرتيفيكا العذرية دير ب 50 الف ، وتقولك وش هو نوع غشائك ،خبيها عندك ولا عند ماماك لانه ممكن تستحقيها في أي وقت ،


والفحوصات الطبية ماقبل الزواج ، دير فحوصات الدم وفحوصات اخرى ،

اذا عندك امراض جلدية ، مثلا الفطريات ، او الخطوط البيضاء ، او القشرة او تساقط الشعر داويها قبل عرسك

واذا عندك فقر الدم لازم تداويه وتاكلي مليح العدس والبادنجان والسمسم

واذا اسنانك لازمهم تنظيف او عندك السوس ،، لازم تعالجيهم ايضا ، لانهم يديروا ريحة كريهة تنفر الزوج منك


نتمنى اني نكون مانسيت والو
​

 

[la rose de sable]

قائمة اضافية

اكياس كبيرة حافظة للملابس ،، تستحقيهم ياااااااااسر كي تديري قش التصديرة في الخزانة بش مايتغبروش

معلاق الملابس ايضا ديري منهم ياااسر

سلة كبيرة للملابس المتسخة ،،

سلة مهملات ،،((((( حاشاكم)))


راني كش مانتفكر نجيكم
​

 

[نبض الحياة]

واااااااااااااو حبوبة
يعطيك الف صحة وعافية
ربي يجازيك ان شاء الله
والله مجهود جبار
ربي لا يحرمنا منك​

 

[la rose de sable]

واااااااااااااو حبوبة
يعطيك الف صحة وعافية
ربي يجازيك ان شاء الله
والله مجهود جبار
ربي لا يحرمنا منك​

الله يسلمك حنونة ،، مرورك اسعدنــــــــــــــــــــــــــــي جدا جدا جدا


وراني في الخدمة ، مش حابة عرايس اللمة يتعبوا كيما تعبت انا



شكرا على التقييم :up:​

 

[طيور الجنة21]

ههههههه صار لازم نوري للناس كادو العريس ،،، حنا ماعندناش هذي ،، حنا تمدوله وحدها راسها راسو ، الناس مايشوفوا والو هههههههه

يعطيك الصحة على الاضافات

وكادو ام العريس وعايلته راني درتلهم قائمة وحدهم ،،

والسبحة بش تسبح بيها ليلة الدخلة ؟؟؟؟؟؟هههههههههههههه

كل واحد وعادتوا....نهار الشورى ولا نهار العرس..الكادو مديه مديه

وبلا مزية اختي الشكر ليك

ههههه imagineتتلهاي عن عريسك بالسبحة ليلة الدخلة:up:

 

[طيور الجنة21]

شفتي كيفاه

حتى انا تعذبت في جهازي ، هذاك علاش حبيت نعاون خواتاتي بش مايتعبوش كيفي

ماشي غير من اليوم راني نشوف هذا زمان و أنت ساهرة علينا بتوجيهاتك الرائعة

تعيشي...ربي يهنيك

 

[طيور الجنة21]

كادو العريس

انا نحطلكم قائمة وانتوما خيروا :
مصحف
قرعة ريحة وساعة ( ماننصحكمش بيها لانو الريحة تفض وماتعودش ذكرى)
طقم حمام
كوستيم ليوم التصديرة يروح يفوخ بيه على صحابو
سيرفات
بيجامة ساتان
مجوعة كاملة فيها قرعة ريحة وقرعة ديودوان وجال وحوايج الحفافة

عندك تدي صباط ولا كلاكيت لانو يقولو راهي فال مش مليح
​

مجوعة كاملة فيها قرعة ريحة وقرعة ديودوان وجال وحوايج الحفافة
+
طقم حمام

هكذا تتهناي من كل مرة كي يبغى يروح للحمام .. وينهم حوايج الحمام وتبداي انت تجري...وينهي الشوميوان.والكاسة منشورة في السيلان...يا المنشفة الكبيرة نسيت غسلتها مازال ماشاحاتش...هههههههههههه

أنا شخصيا هذا هو كادو عريسي

حاجة سبيسيال ومليحة وحتى هو يكون مرتاح

 

[la rose de sable]

السلام عليكم ،،

جمعة مباركة

البنات تفكرت حوايج ،،،

الحديدة ، مع الطابلة تاعها

نظارات شمسية

مساسك القش

مساسك الخمارات

ليزيبانقل ((( نقابيات)))

بابي مشوار ((((( حطيه في فاليزة شهر العسل)))))))​

 

[la rose de sable]

مجوعة كاملة فيها قرعة ريحة وقرعة ديودوان وجال وحوايج الحفافة
+
طقم حمام

هكذا تتهناي من كل مرة كي يبغى يروح للحمام .. وينهم حوايج الحمام وتبداي انت تجري...وينهي الشوميوان.والكاسة منشورة في السيلان...يا المنشفة الكبيرة نسيت غسلتها مازال ماشاحاتش...هههههههههههه

أنا شخصيا هذا هو كادو عريسي

حاجة سبيسيال ومليحة وحتى هو يكون مرتاح

فكرة رائعة ،،

 

[la rose de sable]

ماشي غير من اليوم راني نشوف هذا زمان و أنت ساهرة علينا بتوجيهاتك الرائعة[/size]

تعيشي...ربي يهنيك

نحن في الخدمة ،، :regards01:

 

[la rose de sable]

كيما وعدتكم كل مانتفكر حاجة نجي نحطها


ساعات يد + ساعة حائط


مقص وابرات خياطة وكباب الوان ،، راهم عادو يتباعوا في علبة جميلة جدا

حقيبة صغيرة جدا في كوبونجل ومقص وحوايج الضفر ونقاط

نقاط

 

[@احساس طفلة@]

الله يبارك حبيبتي راكي شملتي كلشي و اختصرتي علينا الطريق نصايحك جات في وقتها أنا حوايج الصيف مشيت فيها شويا قنادر الدار وبيجمات النوم وغيرها انا درك باش نبدا نجهز حوايج الشتاء مزلت مدرت فيها والو راني نشوف فيها جهااااامة منيش عارفا منين نبدا باسكو اكي عارفا حوايج الشتاء تفاتيفه ياسر .....ربي يعيني
ربي يصلحلك حالك انشاء الله ويقد سعدك ( دعوة سوفية ) ويعطيك ماتتمني ليك ولينا كامل
عندي بعض التدخلات راح نقولها مبعد​

​